Boltinn
Nú eru línurnar að skýrast í Meistaradeildinni og allt stefnir í að Rassenal detti sneyptir úr keppni. Ég spái Ajax og Valencia áfram en Rassenal hefur nú enn möguleika og meira að segja Roma gæti skriðið upp úr þessum riðli með útisigri á Rassenal. Milan og United hafa auðvitað tryggt sig áfram og Barcelona er nokkuð öruggt líka. Maður veit ekki hvort Newcastle skríður áfram aftur en það væri gaman ef Newcastle kæmist áfram en ekki Rassenalmenn.
Hér heima eru línurnar að skýrast fyrir sumarið og maður verður að fara að taka ákvörðun um hvort spilað verður undir merkjum Ástarinnar í sumar eða hvort maður rói á ný mið með FC Forseta ásamt Valsmanninum tamda. Ástin er við það að liðast í sundur og ekki víst að náist almennilegur fjöldi til að halda úti liðinu – þetta verður spennandi að sjá.

Íbúðir
Við Edda höfum skoðað íbúðir í akkorði síðustu daga og fundið nokkrar fínar og eina frábæra. Því miður fannst fleirum hún frábær og þeir áttu meiri peninga en við og því misstum við af henni. Síðan höfum við ekki fundið neitt gífurlega spennandi og því verðum við að halda áfram að leita. Kannski maður finni eitthvað í kvöld en það er ekkert víst. Við skoðuðum tvær íbúðir á sunnudaginn var og aðrar fjórar á mánudag. Síðan buðum við og biðum á þriðjudag en þegar ljóst var að einhverjir vitleysingar hefðu keypt þá íbúð 300þ. kalli yfir ásettu verði þurftum við að fara aftur af stað og skoðuðum aftur fjórar íbúðir í gær (þar af eina sem við höfðum skoðað áður). Ekkert af því var nógu spennandi til að við vildum bjóða í þær en sumar er allt í lagi að hafa í bakhöndinni. Í kvöld er síðan sett stefnan á að skoða a.m.k. 3 íbúðir og því verður maður að safna kröftum seinnipartinn.

Viðar og Þorgeir…
…eru alltaf að tala um Saddam greyið og er það ágætistilbreyting frá röflinu hans Viðars um klassíska tónlist. Nú er ég mikill áhugamaður um að hlusta á alls kyns tónlist: jass, popp, rokk, klassík og jafnvel rapp á góðum degi. Þannig gæti ég talið lengi áfram. Ég nenni hins vegar ekki að skrifa mikið um tónlist og enn síður að lesa um hana. Mér finnst í lagi að tala um hana í hófi við einhverja félaga mína en mér finnst leiðinlegt að leggja heilu partýin undir eitthvað helvítis þref um hver gerði hvað best og vangaveltur um hvort þessi var í vímu eða inni í skáp þegar hann samdi þetta og þetta tónverk. Svoleiðis er fyrir músikschizóa eins og Sjonna og Viðar.
En ef ég sný mér aftur að Íraksdeilu Bjúgunnar og Skutulsins þá verð ég að segja að yfirleitt hafa mér fundist lyktir deilna þeirra félaganna skemmtilegasti hluti þeirra – þ.e. ryskingarnar. Hlakka því mjög til endurfunda þeirra félaganna Viðars, Þorgeirs og Carlsbergs í sumar.

Landsleikurinn…
…er loksins búinn hjá Baddý en kannski verður nýr byrjaður þegar hún bloggar næst. Sjáum til.

Gunni…
…hefur tvíeflst við að flytja sig í braggahverfið enda ekki nema von þegar menn hafa jafnótrúlega lítið vit á íþróttaliðum – ég meina Valur, Juventus, Real o.s.frv. Það hlýtur að hafa verið óvart þegar hann ákvað að halda með United á sínum tíma. Kannski fór hann línuvillt og valdi næsta lið fyrir neðan Liverpool í stafrófinu. Hver veit? Annars er Thoroddsen farin að hrella erlenda ferðamenn með skoplegum uppröðunum flugvéla í lofthelgi íslenska flugstjórnarsvæðisins sem er með þeim stærstu í heimi. Skemmst er að minnast skelfingarinnar sem greip um sig meðal tindáta í fjarstýrðri 20 kg Cessna-eftirlíkingu sem hann lét steypa sér í áttina að Hallgrímskirkju í síðustu viku. Gunni er samt að standa sig eins og hetja í flugumferðarstjóranáminu og líklega verður hann sá fyrsti í mínum vinahóp sem útskrifast með gagnleg starfsréttindi. Ég meina efnafræði og sagnfræði eru nú bara hobbý og viðskiptafræði er nú eitthvað sem menn læra til að geta verið atvinnulausir. Menn á vinstri vængnum hafa nú meira að segja fengið þá hugmynd að gera það sem skilyrði fyrir atvinnuleysisbótum að vera með a.m.k. 7,25 í meðaleinkunn á B.A. prófi í viðskiptafræði. Góð hugmynd.

Fæðingarorlof…
…er merkilegt fyrirbæri. Nú mega menn varla fara inn á klámsíðu á netinu öðruvísi en einhverjar rauðsokkur heimti að þeir taki sér feðraorlof. Ótrúlegt að íslenska ríkið skuli vera að borga fólki fyrir að eignast börn þegar allir vita að það eru langir biðlistar eftir leikskólaplássum víðast hvar á höfuðborgarsvæðinu. Það ætti kannski frekar að eyða þessum peningum í að borga þeim sem hafa það verst almennileg laun í staðinn fyrir að vera að borga einhverjum millum fleiri hundruð þúsunda fyrir að vera heima með börnin sín. Mér finnst allt í lagi að borga fólki 60-70þ. kr. fyrir að vera heima með börnin fyrstu mánuðina en að borga 80% af laununum, hver sem þau eru, er náttúrlega algerlega fáránlegt.

Áhugamönnum um anatómíu...
...er bent á fjöldakrufningu í Reykjaneshöll kl. 1800 á sunnudag hvar læknanemar munu kryfja laganema. Þetta er víst kallað úrslitaleikur Háskóladeildarinnar en það er nú bara vegna þess að það er bannað að kryfja á almannafæri og því er vonast til að slík markaðssetning skili sér í auknu áhorfi.

Afmælisbörn
Nokkur eru afmælisbörnin þessa dagana en í dag er bekkjarsystir mín hún Jenna ekki deginum eldri en 25. Í gær og fyrradag urðu síðan Jón Þorkell og Ragnar sem einnig munu vera í bekknum mínum 27 ára gamlir. Til hamingju með það fólk!

Boltinn
Ég veit nú ekki hvor er að kúka meira á sig Viðar eða Ferguson. Miðað við ummæli Viðars á blogginu í dag og í ljósi úrslita gærkvöldsins í Meistaradeildinni þá held ég þó að Viðar ætti að skreppa eftir nýjum nærfötum út í Supermarkað hverfisins. Annars er það af leiknum að segja að Giggs, Veron og Keane voru guðdómlegir en að öðrum ólöstuðum held ég að Keane hafi verið maður leiksins.

DV…
…birtir í dag forsíðusmáauglýsingu um að Sjálfstæðisflokkurinn sé orðinn stærsti stjórnmálaflokkur landsins – aftur. Vei. Fólk er búið að átta sig á lævísu skattpíningartíkinni henni Skalla-Sollu. Næst er bara að sökkva henni í pólítískan hafsjó og skilja hana þar eftir. Hún ræður ekki við að ræða um efnahagsmál og því verða menn að einbeita sér að þeim. Hún hefur bara ekkert vit á þeim og er í hrópandi mótsögn við sjálfa sig í hvert skipti sem hún opnar munninn greyið.

Háskóladeildin
Læknanemar tryggðu sér auðvitað glæstan sigur í undanúrslitum Háskóladeildarinnar með auðveldum 3:2 sigri á Viðskiptafræðinni. Raunar höfðu Viðskiptafræðinemar höfðu raunar undirtökin til að byrja með og ekki skemmdi að dómari leiksins hagaði dómgæslu með vindi og dæmdi þeim liðum í hag sem léku með honum, þ.e. með Mágus í fyrri hálfleik og okkur í þeim seinni. Það var liðið svolítið á fyrri hálfleik þegar dómarinn dæmdi mjög vafasama vítaspyrnu á læknanema eftir að Snorri hafði hirt knöttinn glæsilega af sóknarmanni Mágusar. Réttlætinu var hins vegar fullnægt því á einhvern yfirnáttúrlegan hátt tókst Þóri að verja vítaspyrnuna sem var alls ekki slök - alveg út við stöng. Vítaspyrnubrennirinn varð þá svo svekktur að hann ákvað að tækla Þóri og lá hann óvígur á eftir svo læknanemar urðu að setja besta sóknarmann liðsins í markið. Skömmu eftir þetta tókst okkur að skora með hjálp þeirra Mágusarmanna þegar markvörður þeirra ákvað að gera skondið sjálfsmark eftir að Árni og Andri höfðu pressað vel. Skömmu seinna tókst Mágusum hins vegar að jafna en ekki leið á löngu áður en við vorum aftur komnir yfir með glæsilegu marki Árna Gríms eftir aukaspyrnu Örvars. Staðan var 2:1 í hálfleik en snemma í seinni hálfleik fékk lið læknanema verðskuldaða vítaspyrnu eftir að vinstri bakvörður Mágusar stöðvaði fyrirgjöf með höndunum. Jón Þorkell skoraði úr vítinu af alkunnu öryggi og það sem eftir lifði leiks lágum við frekar aftarlega á vellinum. Mágus átti nokkur sæmileg færi en ekkert kannski klárt dauðafæri og tókst ekki að skora. Þeir eru því lúserar annað árið í röð.

Boltinn
Mínir menn geta ekki rassgat þessa dagana og virðist Rassenal ætla að taka titilinn. Það er eins gott við hirðum Evrópusilfrið.

Boltinn
Liverpool vann sinn fyrsta útisigur í 18 mánuði eða svo í gær þegar þeir lögðu Auxerre í Frakklandi í UEFA-cup. Þessi bikar er eins og alþjóð veit hluti af Cocoa Puffs-þrennunni sem Liverpool vann fyrir nokkrum árum. Auðvitað var það næstbesti sóknarmaður Liverpool, Finninn fljúgandi Sami Hyypia sem tryggði sínum óverðskuldaðan sigur. Eru ekki allir sigrar Liverpool óverðskuldaðir?

Draumaíbúðin fundin...
...en seld. Djöfull getur þetta verið pirrandi. En þá er bara að leita áfram. Raunar er ein sem gæti komið til greina í Vesturbænum, raunar í sama húsi og Óttar bróðir átti heima í. Spennandi.

Hjölli...
...ber merkilega lítið hatur til RÚV í ljósi þess að ekki eru nema örfáir sentimetrar frá dýpstu hjartarótum (jafnvel þótt þú lítir á efri hluta hjartans sem rætur þess) niður í efsta hluta ristilsins. Hjölli ætti kannski að notfæra sér einfaldari anatómíufrasa næst eins og "frá hvirfli til ilja"

Afmælisbarn vestan hafs
Berkeleybjúgan hefur náð þeim ógnvænlega árangri að verða aldarfjórðungs gamall og skal honum óskað til hamingju með það. Vonandi kaupir Inga Huld eitthvað kynæsandi fyrir hann að fara í - kannski hauspoka :).

Boltinn
Mínir menn að kúka á sig í bikarnum um helgina en líklega verður slæleg frammistaða þeirra á móti góðu liði Rassenal til þess að aumingjarnir frá Highbury detta út úr Meistaradeildinni. Arsenal skeit á sig í gær og gerði aðeins jafntefli við Ajax. Þetta þýðir að Arsenal á eftir tvo útileiki á móti liðunum sem eru í baráttu við þá um efstu sætin, Ajax og Valencia; liðum sem þeim hefur mistekist að leggja að velli á heimavelli. United tók síðan Juve í ósmurt í kvöld og sigurinn auðvitað aldrei í hættu þrátt fyrir að Tórínóarnir væru meira með boltann.

Stóridómur…
…fer nú heldur geyst í málflutningi sínum um deilu augnlækna og sjónglerjafræðinga. Augljóst er að Haukur hefur ekki kynnt sér málið almennilega heldur dregur hann taum frænda síns sem er sjónglerjafræðingur góður. Eru það fullkomlega eðlileg mistök en sjaldséð hjá þeim greindarbræðrum úr Þernunesinu. Vissulega eru góðir sjónglerjafræðingar miklu meira en hæfir til að mæla sjón en rök augnlækna eru líka fremur sterk ef maður nennir að kynna sér þau. Ég held þó að á endanum verði raunin sú að sjónglerjafræðingar hafi yfirhöndina í þessu máli en það verður ekki fyrr en eftir mikil málaferli og raunar held ég að leiðin sem þeir eru að fara sé fremur klók. Það mundi kosta þá óhemju fjárhæðir að reka mál gegn ríkjandi lögum og því ákveða þeir að brjóta lögin, fá á sig kæru og síðan vonast þeir auðvitað til að málskostnaður þeirra falli á ríkið þegar fordæmisgefandi dómur fellur þeim í hag. Snillingar!

Jólin…
…eru loksins búinn hjá Ingu Huld en það ætti kannski einhver að láta Baddý vita að landsleikurinn er búinn.

Þorgeir Gandálfur Fróði Ragnarsson Önundarsonar…
…hefur hafið veffærslur. Auðvitað er bloggið hans lítið skárra en vitleysan sem kemur upp úr honum dags daglega en það getur nú stundum verið gaman að lesa veffærslur eftir rugludalla eins og dæmin sanna. Velkominn í bloggheima Þorgeir – þú verður verðlaunaður með hlekk hér til hliðar. Hefur hann fengið nafnið Skutullinn af augljósum orsökum.

Long time, no see
Mikið er ég búinn að vera duglegur að blogga ekki síðustu daga og verð ég að biðja Önund sem er greinilega aðdáandi nr. 1 afsökunar á því. Annars ætti Önundur að vita að sem læknir þá má ég vera eins og ljósastaur. Ég get lýst veginn fyrir aðra en ég þarf ekki endilega að ganga hann sjálfur. Þetta er eitthvað sem við læknar höfum einkarétt á og þið hin ættuð ekki að voga ykkur að setja út á eitthvað í fari annarra sem þið getið ekki fært rök fyrir að sé fullkomið hjá ykkur. Þannig er nú það. Annars er bloggfallið fyrst og fremst vegna mikilla anna í vinnu og skóla. Byrjaði í dag á verklegum kúrs í taugalæknisfræði sem virðist stefna í að verða mjög áhugaverður. Kennararnir eru strax farnir að setja manni fyrir erfið og krefjandi verkefni og m.a. fékk ég verkefni sem mér tókst ekki að leysa í dag og þarf því að mæta með skottið milli lappanna á morgunn.

Boltinn
Ég grét í fyrsta sinn í mörg ár á sunnudagsmorguninn en tók gleði mína á ný seinni partinn. Síðan fór ég í fótbolta og stóð mig illa.

Helmingur þjóðarinnar...
...er viti sínu fjær skv. nýrri skoðanakönnun Fréttablaðsins en eftir að Sigurður Kári fíflaði Flosa Eiríksson í kastljósinu í kvöld ætti þetta nú að snúast við. Flosi fór að gráta eins og venjulega þegar hin börnin í sandkassanum vilja ekki leika eins og honum finnst best og skemmtilegast. Ég vorkenni honum svo mikið. Það er nógu slæmt að vera aumingi án þess að þurfa að heita Flosi líka.

Ísleningabók
Einhvers staðar las ég nú að maður ætti að vera skyldur öllum Íslendingum í 7. lið en skv. mínum útreikningum er ég ekki skyldur neinum af kunningjum mínum nær en í 9. lið. Til að ganga úr skugga um hvort þetta virkaði ákvað ég að fletta upp tengslum mínum við bróðir minn og hafði tölvan það nú af að finna þau tengsl. Góð bók þessi Íslendingabók.

Sný senn aftur

LOTR II - The Two Towers
Sá hana í Smárabíó í kvöld. Salur 1 var næstum tómur en myndin kom á óvart og var margfalt betri en LOTRI sem ég var ekkert sérstaklega hrifinn af. Mér fannst hún bara enn ein tæknibrelluævintýramyndin. Ekki misskilja mig samt, mér fannst myndin góð en kannski ekki ein af 20 bestu myndum sögunnar eins og flestum. The Two Towers held ég þó að gæti komist neðarlega á þann lista (topp 20) enda ótrúlegt stórvirki. Það var meira að segja smá karakter-leikur í þessu og jafnvel hægt að tilnefna menn eins og Ian McKellen og Viggo Mortensen fyrir sæmilegan leik í aukahlutverkum. En myndin fær 4g af 5 mögulegum - frádráttur fyrir skort á frammúrskarandi leikurum en söguþráðurinn og spennan draga hana upp. Mæli með henni.

Valinkunnur andans maður...
...eyðir töluverðum tíma í undirritaðan á blogginu sínu í dag. Segist nærri hafa ekið yfir mig í dag og að ég hafi ekki tekið eftir því. Fyrir slíkt biðst ég afsökunar. Ótrúlegur dónaskapur að heilsa ekki fólki sem ekur mann nær niður. Annars hef ég verið svolítið áttavilltur á netinu síðastliðnar vikur vegna stoppulla færslna hjá föstum viðkomustöðum netbrimreiðanna. Þannig hafa Viðar, Inga Huld og Sjonni verið löt, Önni frekar slappur og maður er auðvitað löngu búinn að gefa Dreifarann upp á bátinn. Bráðum missir hann linkinn sinn hér til hliðar.

HM
Ingvari er hér með óskað til hamingju með heimsmeistaratitilinn í handbolta. Auðvitað var ég löngu búinn að spá Króötum sigri enda eru þeir búnir að sigra hverja stórþjóðina á fætur annarri í þessari keppni. Strákarnir fóru síðan létt með Júggana í leiknum um 7. sætið og því er Ólympíusætið tryggt. Glæsilegur árangur hjá ekki stærri þjóð. Menn mega ekki gleyma því að allar þjóðirnar sem við töpuðum fyrir eru stórþjóðir í handboltanum og líka tvær af þeim sem við unnum. Rússland, Spánn, Þýskaland - 2., 4. og 5. sæti á mótinu. Síðan vinnum við Portúgal og Júgóslavíu. Þessir drengir eru snillingar.

Háskóladeildin
Mínir menn í læknisfræðinni tryggðu sér sæti í úrslitakeppninni með frábærum sigri á verkfræðinni þrátt fyrir að stjörnustrikerinn vantaði. Í staðinn skoruðu Árni Pneumo, Cor-Geiri og Helgi busi. snillingar. Nú er bara að safna liði og slátra þessum súkkúlaðistrákum úr HR. Þeir þekkja ekki íslenskan kulda eftir vetrarfrí í sólarbekkjum Kringluhverfisins - aumingjar.

Enski boltinn
Mínir menn eru farnir að banka á bakdyrnar hjá Arsenal en senn líður að því að leikirnir verða of stuttir fyrir Hábarðana til að sigra. Þetta var náttúrlega alveg hræðilegur varnarleikur þarna í lokin hjá Fulham. Hvernig dettur mönnum í hug að borga svona varnarmönnun fyrir að spila fótbolta? Annars virðist Liverpool vera að vakna og það er ágætt. Kannski ná þeir að tryggja sér sæti í efri hluta deildarinnar en ég held að þeirra bíði ekki merkilegri Evrópukeppni en Inter-Toto. Greyin!!

Í dag er gleði
Holræsa-Solla er hætt sem borgarstjóri og hefur nú hafist handa við að ljúga kjósendur fulla að hætti vinstri frammámanna. Kannski ætti hún að nota Ólagrís-taktíkina og þegja bara fram að kosningum. Annars er hún svo mikil tík að hún þarf ekki hjálp frá nöfnum sínum pólí-tíkinni og tak-tíkinni.

Glæsilegur...
...seinni hálfleikur hjá strákunum í gær. Ef við spilum allan leikinn í kvöld eins og hann þá rúllum við yfir Spánverjana. Dagur kom sterkur inn í gær og tek ég til baka allan þann óhróður sem ég hef borið út um hann. Hann hefur líklega verið að spara sig strákurinn. Annars er ég að vona að Gummi dragi Snorra Stein fram úr erminni fyrir leikinn í kvöld. Hann er frábær leikstjórnandi en Aron er sá eini sem hefur eitthvað getað í þeirri stöðu til þessa. Ég hef verið að velta fyrir mér þeirri ákvörðun Gumma að hafa Gunnar Berg í hópnum í stað Snorra. Hann er með 3 leikmenn sem geta spilað á miðjunni: Dag, Aron og Patta í hallæri. Hægra megin hefur hann hins vegar: Sigga Bjarna, Patta, Dag, Aron, Guðjón Val og Rúnar. Síðan bætir hann Gunnari Berg við sem aldrei hefur getað neitt. Sorglegt.

Boltinn
Aumingjunum í Arsenal tókst ekki að sigra lélegasta lið Bretlandseyja í gær vegna þess að varnartröllið Heskey skoraði með skalla. Ég veit ekki hvert er meiri snilld: að Arsenal skuli hafa tapað stigum, að það hafi verið á móti Liverpool eða að Heskey hafi skorað jöfnunarmarkið. Úrskurðar er að vænta.

Boltinn
Eiður og Jóhannes Karl voru báðir á skotskónum í kvöld. Eiður átti víst snilldarleik skv. enskum netmiðlum, skoraði m.a. með hjólhestaspyrnu. Jóhannes átti síðan nokkur góð skot að marki Middlesbrough og skoraði í sínum fyrsta leik, beint úr aukaspyrnu. Ég er verulega ánægður með hvað Leeds hefur hrunið. Maður var orðinn svolítið hræddur við þetta vaxandi stórveldi. Það er greinilegt að O'Leary og Ferdinand voru öxullinn í þessu því síðan þeir fóru hefur þetta lið hreinlega liðast í sundur.

Íbúðir
Er búinn að láta mig dreyma yfir fasteignavef Morgunblaðsins í allt kvöld. Fann nokkrar íbúðir sem koma til greina - sjáum hvernig þetta þróast.

Inga Huld og jólin
Mikið rosalega hljóta jólin að vera löng á Seltjarnarnesinu!!

Handboltinn
Djöfull voru strákarnir okkar sorry á móti Þjóðverjum. Það er alveg með ólíkindum að Þjóðverjarnir skyldu ekki valta yfir okkur. Sennilega geta þeir ekki rassgat. Óli átti lélegasta leik sinn fyrir landsliðið sem ég man eftir. Hann greip aldrei boltann í fyrstu tilraun. Þrátt fyrir þetta var hann líklega með betri mönnum liðsins. Gummi hlaðborð var sá eini sem spilaði af getu og Rúnar var nálægt henni í vörninni. En lítum á björtu hliðarnar – við erum búin með lélega leikinn og nú er bara að slátra Pólverjum og síðan Spánverjum eins og um árið í Kumamoto.

Boltinn
Maður á bara ekki orð yfir yfirburðum yfirburðaliðs United gegn West Ham í gær. Var reyndar sofandi þegar leikurinn fór fram en Giggsarinn rak kjaftæðið ofan í görnina á rækjusamlokuliðinu á Old Trafford með tveimur mörkum og frábærri frammistöðu. Rúðan vaknaði eftir mikla markaþurrð og Skerið setti eitt af gömlum vana. Litla systir fékk síðan að vera memm og setti eitt. Liverpool sannaði með enn einni stórframmistöðunni að þeir eru langbesta liðið á Bretlandseyjum þegar þeir grísuðu á jafntefli gegn heimsmeisturum Crystal Palace.

Þorrablót & Gettóið
Fjölskylda Eddu afsannaði hið fornkveðna um tengdafjölskyldur með frábæru þorrablóti á laugardagskvöldið. Ég sé mest eftir því að hafa farið þaðan til að tékka á stemmingunni í bænum því hún var lítil þrátt fyrir að við Árni og Jón Þorkell ásamt Halla reyndum að rokka þetta upp með uppistandi á Nonnabátum. Halli var með sýnikennslu í hvernig á ekki að blanda í útilegum og eyðilagði þannig fullan pela af forvondu gini (Gordon’s) og Árni lék ungling: “ég er svo fullur”. Jón hélt kennslu í hreinsun matsölustaða en hann hefur verið þekktari fyrir að hreinsa klof unglinga með rógburði um annars ágætar örverur. Síðan var tekin töfrapizza og farið heim.

Hef bætt við tveimur hlekkjum í viðbót fyrir áhugasama boltastráka

Handboltinn
Okkar menn voru frábærir á móti Portúgölum á fimmtudag þrátt fyrir ömurlega dómgæslu. Við skötuhjúin renndum á nesið til Dreifarans til að horfa á leikinn og það var rosaleg stemming. Roland gerði vel í að verja í lokin og strákarnir eiga heiður skilinn fyrir að pirra sig ekki meira á dómgæslunni. Fyrr má nú vera heimadómgæslan.

Boltinn
Maður er nú alveg að niðurlotum kominn af beinhimnubólgu eftir tíða knattspyrnuiðkun sl. vikur. Ég hef nú tvær vikur í röð tekið sunnudag, mánudag, miðvikudag og er síðan að taka sunnudag á morgunn. Held að ég sleppi framvegis mánudagsboltanum því ég verð svo slæmur í leggjunum af gólfinu sem spilað er á. Kannski maður fari bara að lyfta – sjáum til. Mínir menn eru annars að gera góða hluti. Scholes er í rosalegum ham og það er ekki oft sem maður sér Gary blitza upp kantinn eins og hann gerði á móti Blackburn – rosalegur sprettur. Það verður gaman að sjá leikinn á móti West Ham á morgunn.

Þorrablót
Var á þorrablóti Gnúpverja í gærkvöldi og það er einhver inni í hausnum á mér að minna mig á það með slaghamri. Þorramaturinn fór eitthvað skringilega í magann á mér og ég var eins og undin tuska lengi fram eftir kvöldi en hresstist á öðrum tímanum og fékk mér tvo öllara. Blótið fær 5g fyrir frábæra skemmtun og góð atriði. Sérstaklega var gert grín að félögum mínum Arnóri og Ingvari en þessir seinheppnu tvíburar lentu í því á árinu að drepa vitlausan hest af röngu kyni. Þeir áttu ekki einu sinni hestinn sem þeir drápu. Að þorrablótinu loknu fór ég ásamt Eika út á flugvöll með foreldra hans og síðan renndum við í bæinn. Ég var kominn í rúmið um sjöleytið. Góð ferð.

HM í handbolta
Ísland hefur nú leikið tvo leiki á HM og unnið báða leikina auðveldlega. Fyrst voru Ástralir teknir í gegn og ég held að þriðji flokkur Þróttar Neskaupstað í blaki hefði staðið sig betur gegn íslenska liðinu en það ástralska gerði. Síðan voru snjókarlarnir teknir létt í dag og verð ég að viðurkenna að ég varð fyrir vonbrigðum með að íslenska liðið skildi aðeins skora 30 mörk – það er næstum helmingi minna en í gær. Í kvöld verður síðan slakt lið Liverpool sent út úr deildabikarnum þegar það tapar fyrir Sheffield United á háðuglegan hátt.

Klásus
Ljós-Geislinn vill óska tveimur snillingum sérstaklega til hamingju með frábæran árangur í klásus. Fyrstan skal nefna Helga striker Jónsson úr Ástinni og liði læknanema í fótbolta. Síðan er það Haukur Heiðar Hauksson sem heldur uppteknum hætti og skilar Álftnesingum í gegnum klásus. Snillingar.

Króatinn...
...hefur verið settur í öndvegi eftir að hann hjálpaði mér að gera síðuna miklu skemmtilegri. Það eru nefnilega komnir linkar á aðrar skemmtilegri síður svo þið getið flúið auðveldlega þegar þið áttið ykkur á hvað ég er leiðinlegur. Króatía er því land vikunnar

“Og fegurðin mun ríkja ein”
Í gær fattaði ég hvað Laxness átti við í lok Heimsljóss. Hann átti auðvitað við markið sem Forlan skoraði í gær gegn Chelsea í ensku úrvalsdeildinni. Það var ein samfelld fegurð. Baráttan sem vann boltann, samvinnan hjá Keane og Veron, gullsendingin hans Veron og síðan hlaupið og afgreiðslan hjá Forlan. Er til eitthvað fegurra en MUFC-sigur…og kannski Edda? Það er náttúrlega óskiljanlegt að Veron skuli ekki vera í byrjunarliðinu í staðinn fyrir Phillippiu litlu, þó hann hafi líklega verið eini leikmaðurinn sem spilaði eins og maður í fyrri hálfleik í gær. Annars hafa þær systurnar verið góðar í vetur og líklega þarf maður að taka þær í sátt eins og maður gerði við Butt í fyrra. Snillingar allt saman.

Annars er samanburður á liðum Arsenal og United skemmtilegur:
Markvörður: Barthez er náttúrlega bara í allt öðrum og meiri gæðaflokki en Björn Búi í markinu hjá Arsenal. 1-0
Miðverðir: Líklega verður maður hér að setja Campbell og Ferdinand sem tvo bestu miðverðina í þessum liðum. 2-1
H. bakvörður: Gary hefur verið að spila betur en Lauren í vetur en líklega er Lauren þó hæfileikaríkari. 2-2
V. bakvörður: Silvestre og Cole standa nokkuð jafnfætis hér. Silvestre betri í vörn og Cole í sókn 2 ½ - 2 ½
Varnartengiliður: Keane er töluvert betri en Vieira 3 ½ - 2 ½
V. kantur: Giggs smókar Pires gjörsamlega 4 ½ - 2 ½
H. kantur: Hver er aftur á hægri kantinum hjá Arsenal. 5 ½ - 2 ½
Miðjumaður: Veron er náttúrlega miklu betri en allir miðjumenn Arsenal 6 ½ - 2 ½
Sóknartengiliður: Erfitt val á milli Scholes og Bergkamp. Held þó að Scholes sé betri en kannski er það hlutdrægt mat. Jafntefli hér af góðmennsku. 7-3
Sóknarmaður: Henry er í dag a.m.k. ívið betri en Rúðan en á síðasta tímabili var Rúðan betri. Því verður staðan 7-4.
Lið fyrir lið eða stöðu fyrir stöðu er United því miklu betri.

Pæling
Ef hverju eru menn svona vissir um að Heimsljós sé eintala. Af hverju segja menn Heimsljóss í stað Heimsljósa? Viðar svaraðu þessu.

Ljóska vikunnar er...
...Sjonni fyrir að fatta ekki hálfleiðarabrandarann. Ertu ekki tölvuverkfræðingur Sjonni. M.a.s. ég heimski læknaneminn fattaði þetta. En Sjonni er nú einu sinni ljóshærður og búsettur í Ameríku þannig að maður verður að gefa honum sjens. Hann er að reyna að blendast í krávdið.

Augun mín...
...eru merkileg fyrirbæri. Því meira sem ég les um augnþurrk í augnlæknisfræðinni því þurrari verða þau. Síðan roðna þau ef ég voga mér að lesa um rautt auga. Ætti ég að þora að lesa um gláku eða illvígan háþrýsting - já ég verð... að fara að sofa.

Boltinn
Eins gott að mínir menn vinni brúarstólpana um helgina. Annars er Eiður ekki fjarri því að vera eins og brúarstólpi. Hann hefur keypt sér að éta í árans spilavítunum, greyið. Ætli 50 millurnar hafi ekki farið í hammara og franskar með cocktailsósu.

Vinstri menn eru á móti
Magnað að sjá þetta kommapakk við ráðhúsið í dag. Það hefur bara verið þannig alveg síðan við urðum sjálfstæð þjóð að helvítis friðarhreyfingarpakkið hefur verið á móti öllu því jákvæða sem hefur komið fyrir íslenskt þjóðfélag. Inngangan í NATO og Sameinuðu þjóðirnar, á móti komu Tjallans og Kanans með heri sína. Á móti símanum, útvarpinu og sjónvarpinu. Á móti ESB, EES, EFTA og öllu sem á annað borð er skammstafað. Á móti Marshall-aðstoðinni af því að peningarnir voru grænir en ekki rauðir. Á móti virkjunum og helst öllu sem skapar atvinnu. Það er alveg nóg af peningum til í landinu til að þau geti verið atvinnulausir listamenn á ölmusu frá ríkinu. Það á bara að taka peningana af fólkinu sem á þá og hefur unnið fyrir þeim hörðum höndum og heilum nema hvoru tveggja sé. Á móti opinberum heimsóknum íslenskra ráðamanna til landa þar sem glæpur hefur verið framinn og á móti því að nokkur hugsandi maður komi hingað. Meira að segja þegar kommúnistajarl kemur hérna mótmælir þetta pakk sem horfði dreymnum augum til austurs áratugum saman og laug síðan að þjóðinni ef þeir áttu því "láni" að fagna að sjá eymdina sem þar viðgekkst. Aumkunnarvert heiladautt pakk. Það má hún Skalla-Solla reyndar eiga að hún stóð ein upp vinstri manna á sínum tíma og samþykkti EES. Enda er hatur hennar á Davíð eina ástæðan fyrir því að hún er vinstra megin í pólítík. Svona greind kona getur ekki verið vinstra megin í pólítík. Reyndar hefur framferði hennar síðustu vikurnar bent eindregið til þess að hún sé vinstra megin múrsins og þori ekki að stíga yfir rústirnar af því að það er allt svo miklu betra fyrir austan.

Þeir sem glöggir eru hafa takið eftir að ég er hættur að óska Valsbragganum eyðileggingar en það helgast af einu greindarlegu ákvörðuninni sem Skalla-Solla hefur tekið sem borgarstjóri. Hún ætlar að færa Valsbatteríið lengra út í Vatnsmýrina í von um að það sökkvi.

Boltinn
Mínir menn hrista hvern sigurinn af öðrum fram úr klaufinni. Nú síðast voru leikmenn W.B.A. teknir í þann óæðri. Alltaf gaman þegar L.Orri litli tapar - hann er svo mikill lúser. Ekki þó jafnmikill og Hermann sem á heimsmetið í að falla úr úrvalsdeildinni - og aldrei með sama liðinu. Nú síðast staðfestist síðan að Eiður er ekki þar sem hann er séður því hann hefur eytt skiptimyntinni sinni í Rauðakrosskassanna. Nú er verið að tala um Simon Davies til United. Bíddu er það gimpið sem kemst varla í liðið hjá Tottenham - halló!!!

Skólinn
Nú er törn. Augu verða lærð á tveimur vikum sem líkur með prófi næstkomandi laugardag (fyrir trega þá hefur námskeiðið staðið þessa og síðustu viku). Síðan verður horgæslan heimsótt í næstu viku og hefur hafnfirskt hor orðið fyrir valinu. Loks taka síðan við geðsjúklingar og taugahrúgur fram á vor.

Spriklið
Bolti þrisvar í viku (sunnudaga, mánudaga og miðvikudaga) og kílóin renna af manni. Þyrfti eiginlega að sprikla eitthvað á föstudögum líka en það vill enginn leika þá - allir í vísindaferðum að læra eitthvað nýtt.

Pólítík
Hvernig er hægt annað en að hlæja að vinstrimönnum í Reykjavík. Þeim virðist finnast það notalegt að láta Skalla-Sollu krukka í sér með dildoinum Össuri.

Afmælisbarn hins dagsins!
Óttar bróðir varð þrítugur í fjórða skipti á þriðjudaginn og gleymdi ég að minnast á það í færslunni þá. Til hamingju með daginn gamli.

Mótsögn
Hafið þið tekið eftir liðinu sem er að leggja fyrir utan líkamsræktarstöðvarnar. Ég fer reglulega í fótbolta í Sporthúsinu í Smáranum og mér finnst alltaf jafnfyndið að það skuli spikfeitar húsmæður og grindhoraðar fyrirsætur keppast við að leggja ólöglega eins nálægt húsinu og hægt er. Halló!! Þið eruð á leiðinni í líkamsrækt - munar ykkur eitthvað um það að labba eins og 20 metrum lengra. Hafið þið ekki kannski bara svolítið gott af því, hlussurnar ykkar. Persónulega finnst mér allt í lagi að leita að stæðinu sem er næst, sérstaklega ef það er leiðinlegt veður. En að leggja ólöglega á þröngu bílaplani og teppa þannig umferð er algjörlega óþolandi. Ég skil bara ekki af hverju Linda lætur ekki draga þessar hlussur í burtu - þ.e. bílana þeirra.

Boltinn
Mínir menn virðast ekki geta spilað almennilegan fótbolta gegn aumingjunum í Blackburn. Kettlingar.

Jæja!
Þá er maður byrjaður í skólanum aftur. Nú er það augnlæknisfræðin sem heillar. Mjög skemmtilegt fag að læra en ég er ekki viss um að þetta sé eitthvað fyrir mig. Líffærafræðin og lífeðlisfræðin eru heillandi en sjúkdómarnir og læknisfræðin á bak við þá finnst mér ekki jafn heillandi. Það er því enn barnalæknisfræðin sem hefur vinninginn og veðbankar telja nær öruggt að hún verði fyrir valinu eins og staðan er í dag.

Boltinn
Fór í fótbolta í fyrsta skipti á nýju ári á sunnudaginn og er enn slappur í sköflungnum. Maður er orðinn svo gamall að maður má ekki horfa á fótbolta án þess að fá harðsperrur. Kannski maður snúi sér bara að glápi því í kvöld ætla mínir menn í MUFC að flengja litlu drengina í Blackburn. Reyndar er ég alltaf svolítið hræddur við Duff og Dunn og síðan eru auðvitað tvíburarnir í framlínunni aldir upp á OT. Þetta verður spennandi.

Viðar...
...setti í dag heimsmet í bloggun og ég gafst upp um miðja færslu. Þetta var ekkert leiðinlegt eða þannig, ég get bara ekki lesið svona mikið í einu.

Merkilegt...
...hvað maður er trúr vinum sínum. Ég er búinn að fara inn á síðuna hans Gunna í hvert einasta skipti sem ég hef farið á netið síðustu 3 mán. en hann hefur ekki glatt svo traustan og tryggan aðdáanda með svo mikið sem einni helv**** færslu. (sagt með hnugginni en jafnframt reiðri dreifararöddu). Éttu elg, auminginn þinn.

Vá!!!
Ég er búinn að vera yfirnáttúrlega latur við bloggið síðustu vikurnar. Það hefur svo sem ekki verið mikið að blogga yfir. Ef út í jólagjafirnar er farið þá fékk ég mestmegnis föt - bæði frá mömmu, Eddu og systur hennar. Frá foreldrum Eddu fékk ég KK-diskinn og neftóbak (fylgir öllum gjöfum frá þeim). Frá Gunna fékk ég nýja Sigur-Rósar-diskinn en svo skemmtilega vildi til að ég gaf honum sama disk. Frá bræðrum mínum fengum við Edda sængurföt og diskamottur (smá pressa á sambúð). Frá ömmu&afa fékk ég síðan Röddina en þar sem áttahundruð eintök eru til á heimilunum í kringum mig ákvað ég að skipta henni í Atómstöðina eftir Dóra Lax. Þar með er það upptalið. Annars finnast mér jólin orðin ferlega sorry tími orðið. Maður er eiginlega löngu kominn með leið á allri þessari vitleysu þegar þau loksins koma. Jólaskrautið búið að vera uppi í 3 mánuði og brosið svo frosið framan í kaupmönnunum að maður biður til Guðs að ættingjar þeirra drepist ekki rétt á meðan svo þeir verði sér ekki að fífli í jarðarförinni. Ég kemst nú yfirleitt ekki í jólaskap fyrr en á Þorláksmessu í fyrsta lagi og í ár var það bara um sexleytið á aðfangadag. Er ég Ebenezer Scrooge 21. aldarinnar?

Boltinn
Mínir menn að gera góða hluti núna. Beckham skorar í hverjum leik og liðið vinnur hvern leikinn á fætur öðrum. Ég held við eigum eftir að hirða bikara í vor og þá er ég ekkert að tala um eitthvað morgunkornsglingur. Poolararnir hafa nú ekki unnið leik í úrvaldsdeild síðan í byrjun nóvember - greyin!!

Vinstri menn
Merkilegt hvað margir kommar hafa plummað sig í Gettu betur miðað við hvað minni þeirra er skammvinnt. Nú segjast 39% Íslendinga ætla að kjósa lygalaupanna og aumingjana í Samfylkingunni. Þetta er nákvæmlega það sama og þegar hreinn meirihluti þjóðarinnar kaus óvinsælasta, lygnasta og spilltasta stjórnmálamann Íslandssögunnar forseta eftir að hann hafði misst málið í 9 mán. Ég skammast mín fyrir að eiga þetta fólk að löndum.

Gleðilegt ár
Hef lítið getað skrifað um jólin vegna almennrar leti og vinnu. Hef verið að vinna mikið alltaf frá 08-08 - Þorláksmessa - Annar í jólum - 29. des - Gamlársdagur+Nýársnótt. Er orðinn ruglaður í sólarhringnum eftir margar vökunætur og orðinn mjög dagsvæfinn. En ég óska ykkur öllum gleðilegs árs og þakka fyrir liðnar samverustundir sem því miður hafa líklega verið fleiri hér á þessum síðum en þær hafa verið í eigin persónu.

Boltinn
Mínir menn ekki alveg að skilja mikilvægi þess að tapa ekki leik. Töpuðu fyrir Blackburn þarna um daginn og verður að segjast að þeir áttu bara ekki meira skilið. Skítaframmistaða. Þeir hafa hins vegar tekið sig á og sigruðu bæði Sunderland og Birmingham nú um áramótin og er það gott. Arsenal virðist hins vegar komið í sama heppnisgírinn og þeir voru í í fyrra og vinna ítrekað á sjálfsmörkum hins liðsins. Aumingjar

Boltinn
Mínir menn að gera það gott í boltanum enn einu sinni. Forlan sá um Cudicini. Það eru ekki allir sem klobba þenna frábæra markvörð en ég held að Forlan verði fljótlega orðinn í miklu uppáhaldi hjá United-aðdáendum og raunar er hann í miklu uppáhaldi hjá mér eftir að hann skoraði tvö á móti Liverpool. Liverpool tryggði sig síðan fremur óverðskuldað áfram í gærkvöldi og stefna ótrauðir á Coco-Puffs-þrennuna alræmdu sem þeir unnu fyrir margt löngu.
Auk alls þessa gengur sú saga auðvitað fjöllum hærra að Eiður ísmaður sé á leiðinni til United. Vitað er að Ferguson hefur lengi verið aðdáandi Smárans og ég er nokkuð viss um að mér mundi ekkert leiðast að hafa hann í United-liðinu. Kannski maður yrði þá að kaupa sér tvær treyjur – eina með Gudjohnsen og aðra með Solskjær.

Imba lygalaupur
Ingibjörg Skalla-Sólrún Gísladóttir (örugglega rangt feðruð) hefur nú ákveðið að svíkja kjósendur sína eins og ég vissi reyndar að hún mundi gera. Hún hefur sem sé tekiðð ákvörðun um að bjóða sig gegn Davíð og Dóra í Reykjavík. Hún ætlar hins vegar ekki að taka leiðandi sæti á listanum heldur vera í fimmta sætinu eins og hún orðar það svo skemmtilega sjálf. Það þyrfti kannski einhver glöggur fréttamaður að benda henni á að hún er í áttunda sæti R-listans í Reykjavík og því skv. hennar skilningi ekki í leiðandi sæti þar. Samt er hún borgarstjóri. Staðreyndin er bara sú að þetta vinstra pakk hér í Reykjavík hefur aldrei getað tjaslað saman almennilegum lista og verður því að setja eina frambærilega einstaklinginn í svokallað “baráttusæti” til að draga alla hina aumingjana með sér inn í borgarmálin.
Menn hafa heldur ekki velt því fyrir sér að í raun hefur Ingibjörg nú gengið úr einum stjórnmálaflokk í annan. Hún hefur verið í R-listanum sem er sameiginlegt framboð allra illra afla á Íslandi en nú ætlar hún fram undir merkjum Samfylkingarinnar.. Hún hefur raunverulega verið utan hinna þriggja flokka sem mynda R-listann og er því ómögulegt fyrir hana að halda fram því hlutleysi gagnvart vinstristefnunni sem hún hefur gert sl. ár. Er hægt að vera virkur meðlimur í tveimur stjórnmálaöflum og samt vera trúverðugur? Kalt mat: NEI!!!
Síðast en ekki síst langar mig að benda vinstri mönnum á að nú geta þeir loksins látið skína í að þeir séu menn málanna en ekki menn einstaklingshyggjunnar. Staðreyndin er sú að Ingibjörg hefur gengið á bak orða sinna gagnvart kjósendum sínum og raunverulega öllum landsmönnum. Hversu fljótir ætli vinstri menn verði að gleyma því og kjósa hana. Það hefur nefnilega verið munurinn á hægrimönnum og vinstrimönnum að þeir fyrrnefndu eru heiðarlegir en hinir rosalega góðir – jafnvel þó það kosti hagræðingu á sannleikanum sbr. stöðu fjármála borgarinnar. Ingibjörg – þú er lygalaupur.

Auk þess legg ég til að Valsbragginn verði lagður í eyði. Áfram KR!!!

Barnadeildin og boltinn
Tók smá forskot á sæluna og vann fyrstu vaktina mína á barnadeildinni í nótt. Mætti reyndar ekki fyrr en kl. 16 því ég var í 25 ára afmælinu hans Adda ískáps í gær. Hann bauð okkur í sumarbústað í Miðhúsaskógi og grillaði jarmflykkisuppfót sem bragðaðist snilldarlega. Vissi ég vel að Arnar er snillingur við grillið en hann toppaði sjálfan sig algerlega í gærkvöldi. Síðan var auðvitað tekið á í drykkjunni og Ingi Örn frændi okkar fór hamförum á gítarnum. Síðan var skriðið í kojuna um kl. 2 fremur af illri nauðsyn en einlægum vilja. Því var ég ekki sá allra hressasti í dag en lét mig þó hafa það að vakna fyrir allar aldir (kl. 1330) og keyra í bæinn. Síðan var farið svo til beinustu leið í vinnuna en mér tókst þó að sturta mig og sjá Arsenal skíta í brækurnar gegn Totturunum. Mikið er gaman að vera United maður í dag.
Annars voru mínir menn heppnir því líklega var fullkomlega löglegt mark hirt af Vesturskinkumönnum í fyrri hálfleik. En þeir sem muna lengra en nef þeirra nær muna líka að Skinkubræður stálu 2 stigum af United í nóvember með ólöglegu marki í lok leiks. Réttlætinu var því fullnægt að hluta.

Addi ískápur...
...er afmælisbarn dagsins og verður heiðraður með sviðsljósi Ljós-Gíslans. Til hamingju með daginn gamli.

Auk þess legg ég til að Valsbragginn verði lagður í eyði. Áfram KR!!!

Jæja
Þá eru prófin búin og bara tveir kjaftakúrsar eftir. Í dag er einhver öldrunardagur í átjánda skipti í náminu og á eftir verður okkur boðið í kokdilli - um leið og við erum búin í vísindaferð. Ætli maður verði svolítið rakur? Síðan hefst alvaran við messu heilags Þorláks en þá hef ég störf á barnaspítala Hringsins nánar tiltekið Bráðamóttöku barna en þar mun ég starfa yfir jól og áramót og vonandi eitthvað áfram.

Prófin...
...voru þau sanngjörnustu sem ég hef tekið lengi. Engin kúkaspurning heldur bara aðalatriði, m.a.s. krossaspurningarnar voru 99% sanngjarnar og það er erfitt. Annars var ég illa undirbúinn undir þetta próf vegna leti og lélegs innblásturs og undirstrikar það fáránleika þess að prófa úr verklegum kúrsus næstum 9 vikum eftir að honum lýkur. Erfitt hefur reynst að fá þann ágæta mann Ásgeir Haraldsson til að breyta þessu og er það líklega eini löstur þessa annars frábæra prófessors. Kvensjúkdómarnir voru líka sanngjarnir eins og áður sagði en það var meira um smámunasemi í þeim enda um munnlegt próf að ræða og því fleiri tækifæri fyrir hártoganir. Annars er lokaniðurstaða: skemmtilegir kúrsar og sanngjörn próf eru frábær blanda.

Boltinn...
...er stórkostlegur þessa dagana og er ég verulega sáttur við liðið mitt. Það eru ekki mörg lið sem Davíð Bekkskinka kemst ekki í en Skerið er bara búinn að vera stórkostlegur á kantinum. Hann lagði upp annað markið á miðvikudaginn og bjó til pláss fyrir sendinguna frá Scholes í því fyrra. Ole hefur alltaf verið í uppáhaldi og ef einhver er að leita að fullkominni jólagjöf fyrir mig þá er það United-búningur með hans nafni. Ekki má heldur gleyma Ruud sem er búinn að vera hreint út sagt stórkostlegur síðustu vikurnar eða allt frá því hann skeit í brækurnar á móti City. Síðan er Phil að blómstra á miðjunni og O'Shea getur bara verið hvar sem er og spilar samt vel. Hver er þessi maður eiginlega? Síðan er auðvitað sérlega gaman að sjá að Leeds er að skíta á sig. Merkilegt að halda því fram að Ferdinand hafi bara verið varaseifa þar eins og Ridsdale hefur reynt. Snillingur en hann kemst varla í liðið úr þessu.

Að lokum...
...langar mig að dissa hina háæruverðugu og ömurlega sorglegu Svanborgu Sigmarsdóttir. Það að hún skuli skrifa á síðu sem kennd er við miðpunkt einhvers misheppnaðasta gæluverkefnis ömurlegra framapotara sem um getur, segir allt um skrif hennar sem segja þarf. Ég skil ekkert í vinstri mönnum. Það eru allir heilbrigðir menn búnir að sjá að Sovétríkin og raunar öll kommúnistaríki heimsins voru og eru andfélagslegustu fyrirbæri sögunnar og samt keppist þetta lið við að kenna sig við einhver kennileiti liðins tíma. Múrinn, Kreml o.s.frv. heita vefsíður þessara viðrina sem enn hafa ekki áttað sig á öllum þeim hörmungum sem af kommúnismanum hlutust. Þeir segja alltaf að þetta hafi bara misheppnast og þetta virki annars staðar t.d. á Kúbu og í Kína og jafnvel N-Kóreu. Svo er þetta sama lið mætt í fullum herklæðum á öll torg landsins að mótmæla ef kínverskur embættismaður vogar sér hingað til lands.
Kúba hefur löngum verið helsta röksemdafærsla vinstrimanna fyrir virkni kommúnismans. En ég hef aðeins eina spurningu fyrir þetta fólk. Hvernig útskýrir þú það að tugir þúsunda Kúbverja reyna að flýja yfir til USA á ári hverju. Hvernig útskýrir þú það að það vill helst enginn búa á Kúbu? Hvort ætli það sé vegna viðskiptabanns USA eða vegna þess að þar er einræði? Efég væri stoltur af landinu mínu þá mundi ég standa með því í gegnum þykkt og þunnt og ekki láta eittert ofurbákn í vestri segja mér og mínum löndum hvað við megum og megum ekki. Og ef ég mundi að lokum hrökklast burt af litlu eyjunni sem ég kalla heimili mitt þá mundi ég síst af öllu vilja búa í landinu sem hefur valdið öllum þessum hörmungum heima fyrir. Q.e.d.

Auk þess legg ég til að Valsbragginn verði lagður í eyði. Áfram KR!!!

Boltinn
Haha, frábær dagur. Það er ekki oft sem tvö mestu grísaralið allra tíma tapa á einum og sama deginum en það gerðist í dag og græt ég það eigi. Mínir menn tóku Arsenal á tauginni og það var sérstaklega gaman að sjá hvað Ljungberg og Vieira voru slappir. Litla systur var með Patta greyið í vasanum allan tímann og átti frábæran leik inni á miðjunni auk þess sem Veron og Scholes voru góðir. Skerið virðist líka ætla að blómstra í þessari kantstöðu og ég er ekki frá því að hann sé að ná Beckham-færni í fyrirgjöfum, enda er maðurinn snillingur. Síðan áttu fjórmenningarnir í vörninni, þeir Gary, Wes, Mikael og John alveg frábæran leik og má segja að eina feilsporið hafi komið frá Gary sem spilaði Henry dauðafrían í fyrri hálfleik en sem betur fór tókst Henry greyinu ekki að klára dauðafærin sín frekar en vanalega. Þetta er alveg ótrúlegur leikmaður. Engum dylst ótrúlegir hæfileikar, hraði, frábær skot og snilldarlegar sendingar svo ekki sé nú minnst á einleiksrispurnar sem hann tekur stundum. Það er hins vegar eitt sem hann er lélegur í og það er að klára dauðafærin. Þess vegna segi ég alltaf að Henry sé betri leikmaður en Ruud en Ruud er hins vegar miklu betri framherji. Það voru fáir í þessu Arsenalliði sem gátu nokkurn skapaðan hlut í dag. Það var ekki að sjá að þetta lið hefði skorað í 55 leikjum í röð eða að þeir séu nýbúnir að spila heilt ár í úrvalsdeildinni án þess að tapa. Þeir eru enda búnir að tapa 4 af síðustu 8 leikjum sínum í deildinn en það er næstum eins gott og Liverpool sem hefur náð 1 stigi úr síðustu 4 leikjum í úrvalsdeildinni ensku. Mín spá fyrir vorið er að MUFC verði efstir, næstir komi Arsenal og síðan Chelsea, Merseyside-liðin koma síðan þar á eftir og líklega verða Pollarnir fyrir ofan. Síðan koma norðurliðin Middlesbrough og Newcastle. West Ham, Bolton og Leeds falla.

Kvensjúkdómalæknisfræði…
…er langt og leiðinlegt orð en kúrsinn kom mér hins vegar á óvart. Ég bjóst nú ekki við miklu af honum og þótti þetta alveg sérstaklega óspennandi fag. Það kom hins vegar á daginn að fagið er spennandi á margan hátt en þó ekki svo spennandi að ég hafi hug á að leggja það fyrir mig. Það neikvæða við þetta fag er hin augljósa klofástæða, þ.e. að vera með þetta fyrir augunum allan daginn. Jákvæða hliðin er hins vegar hvað þetta er ótrúlega phýsíólógískt og rökrétt fag. Stjórnin og síbreytileikinn er alveg sérstaklega spennandi, allir þessir hormónar og áhrif þeirra á líf og limi kvenna.

Barnalæknisfræði…
…er næst á dagskránni. Prófið er á fimmtudagsmorgunn og maður verður að halda vel á spöðunum ætli maður að standa sig í þessu. Ég ætla nú að reyna að standa mig í þessu þar sem ég er að vinna hjá þeim um jólin. Ég er reyndar mun hrifnari af því að láta verkin tala en prófin. Hins vegar gæti það verið mjög neikvætt ef mér gengi mjög illa á þessu prófi.

Pólítík…
…er merkileg. Eins og margt efnisfólk er vinstrisinnað virðist enginn vilja ganga fram fyrir skjöldu og láta á sér bera í þingflokkum þeirra. Ég held það sé bara enginn spennandi kandídat undir fertugu í þessum flokkum. Björgvin sá er skipar sæti á lista Samfylkingarinnar í Suðurkjördæmi er alger froðusnakkur og hefur margoft elt á sjálfum sér rófuna með algeru kjaftæði í Silfri Egils. Síðan er það Dagur greyið sem getur ekki ákveðið sig hvernig vinstri maður hann vill verða og hefur því ákveðið að vera svona þverpólítískur eins og Ingibjörg í von um það að vinstimenn sameinist um síðir á landsvísu. Hversu aumkunnarverðir geta menn verið – taktu afstöðu maður – það er ekki nóg að vera bara sætur. Síðan er það Lúlli greyið – mikið hefði nú verið gaman ef hann hefði losað okkur við vælið í henni Margréti sem marggrét á þinginu sl. vetur og mun eflaust marggráta í framtíðinni. Um Lúlla er svo sem fátt að segja, hann segir það allt sjálfur auminginn sá arna. Ásgeir Ágústsson eða hvað hann nú heitir sonur hans Ágústs flokkaflakkara Einarssonar er líklega sá sæmilegasti af öllu þessu liði en hann er nú samt óttalegur volari líka. Hann er svona mini-me af pabba sínum – eldklár strákur sem ætti kannski heldur að vera í stefnumótun flokksins en í eldlínunni.

Auk þess legg ég til að Valsbragginn verði lagður í eyði. Áfram KR!!!

Forlan snillingur
Ég gleymdi auðvitað að minnast á þátt Diego Forlan í leiknum um helgina. Ég veit ekki hvort var sætara, það að vinna eða það að Forlan skyldi skora tvö mörk hjá liðinu hvers aðdáendur hafa dissað hann hvað mest. Þarna svaraði hann sko rækilega fyrir sig. Síðan braut hann ísinn í gærkvöldi gegn frábærum markverði Burnley. Annars voru United menn bara heppnir í þessum leik því Burnley hefði alveg eins getað unnið þetta. Það var aðeins stórleikur Carroll í markinu sem kom í veg fyrir að þeir skoruðu og svo kláruðu auðvitað snillingarnir Forlan og Solskjær færin sín snilldarlega. Nú hlýtur Forlan að vera búinn að fá nóg af peningum í markabónusa til að splæsa á sig klippingu. :)

Skólinn
Próf í kvensjúkdómalæknisfræði á föstudag og ég lítið búinn að lesa. Maður verður að taka sig á. Það versta er að maður er bundinn hér í skólanum alla daga og ekkert verður upplestrarfríið. Maður verður bara að taka þetta á skriðþunganum. Er á síðustu nemavaktinni minni hér í kvöld og síðan fer maður heim að lesa. Það verður bara hálfpottur af kaffi og kóki til að halda sér vakandi.

Auk þess legg ég til að Anfield verði lagður í eyði!!! Áfram United.

Snillingur dagsins...
...er tvímælalaust Helgi Hrafn Bergmann. Hann er sonur Nonna bróður og fæddist í Noregi um hádegið. Hann var 52 cm og tæpar 16 merkur sem gera 3950 gr. Hann er búinn að láta bíða eftir sér eins og systkin hans gerðu en hann átti að fæðast fyrir 15 dögum skv. plani. 2. desember er náttúrlega úrvalsafmælisdagur - 02.12.02-XXX0. Nú á ég tvö lítil frændsystkini sem ég hef aldrei séð og maður verður að bæta úr því eins fljótt og maður hefur efni á.

Boltinn
Ég veit ekki hvort ég á að hlæja eða gráta yfir þessum leik áðan. Dudek er alger snillingur. Enn sannast kenning mín um eyðileggingu Liverpool á markvörðum. Þetta var eins og að horfa á 6 ára gamalt barn grípa boltann. Hann hlýtur bara að hafa verið að reyna þetta kallinn. Annars fannst mér þetta sanngjörn úrslit. Leikurinn var jafn og jafntefli hefði verið sanngjarnt ef Dudek hefði ekki gert þessi mistök. Það var munurinn á liðunum í dag. Dudek gerði mistök, ekki Barthez. Djöfull verður gaman að mæta í boltann í kvöld með öllum Poolurunum. Þór, Eiki, Arnar, Gummarnir tveir og Ingvar hinn er allir miklir Liverpoolmenn - kannski er bara rétt að leyfa þeim að vera saman í liði grátandi.

Ferðamál
Vestmannaeyingar eru þvíumlíkir snillingar. Þótt helsta ferðamannaaflinu sé skúbbað frá eyjunum til Noregs þá deyja þeir ekki ráðalausir. Keikó er farinn og þeir verða að gera eitthvað. Eitthvað stórt. Eitthvað öðruvísi. Eitthvað krassandi. Fáum Olgu Færseth, feitasta stjörnuframherja í heimi, til Vestmannaeyja.

Þreyttur
Er nú búinn að sofa 1 klst síðan kl. 16 í gær og stefni ekki á að skríða í koju fyrr en í kvöld eftir boltann. Fyrst verður snætt svín, síðan hlegið að svínum i boltanum. Æ greyin - Liverpool hefur bara ekki getað rassgat í mörg ár.

Auk þess legg ég til að Anfield verði lagður í eyði!!! Áfram United.

Jæja!
Það er langt síðan ég hef verið jafnlatur að blogga og síðustu dag. Það helgast af tvennu: leti og vinnu. Er núna að vinna á slysadeildinni og það er frekar lítið að gera - helst að löggan sé að koma með byttur í prufur. Seinna í nótt fara líkamsárásirnar að hellast inn með saumaskapinn og síðan fara bytturnar aftur að sýna sig undir morgunn. Það er ekki alltaf tekið út með sældinni að græða peninga. Ég missti t.d. af langþráðu ginkvöldi 5. árs læknanema (karlkyns þ.e.a.s.) sem var í gærkvöldi og var víst vel heppnað. Það var soldið að gera í fyrrinótt en þó ekkert hektískt, bara fínt rennsli.

Jólin
Verð að vinna á barnadeild Hringsins um jól og áramót. Er þó ekki klár á hvernig verður um mestu helgidagana. Þetta kom út úr ráðningafundi okkar læknanema sem haldinn var sl. miðvikudagskvöld. Mér til mikillar undrunar var ekki búið að taka þessa stöðu þegar kom að mér að velja og því ákvað ég að drífa mig enda mjög spenntur fyrir barnalækningum eins og allir vita. Maður verður því ekki alveg skítblankur í vor og gæti jafnvel lagt fyrir í íbúð - jibbí.

Boltinn
Arsenal virðist vera komið á beinu brautina aftur og það er vont. Thierry er heitur og gæti bara gert harða atlögu að heiðrinum "næstbesti sóknarmaður heims". Annars er mjög erfitt að bera Ruud og Henry saman því þeir eru svo ólíkir. Ruud er meiri potari og miklu betri í að klára. Hins vegar er Henry maður sem getur unnið leiki ítrekað með einstaklingsframtaki. Auk þess eru sendingarnar hans oft snilldarlegar. Þeir væru snilldarlegt framherjapar. Síðan er það leikurinn á morgunn. Það verður spennandi að sjá hvort MUFC tekst að kveða niður Pool-grýluna og vinna Bítlabörnin. Ég held persónulega að leikurinn fari 4:3 MUFC í vil og Ruud setji 2, Skerið 1 og Carragher 1. Fyrir Poolarana skorar Baros 2 og Owen litli 1. Ég verð nú líklega sofandi eftir vakt en maður reynir kannski að taka leikinn upp.

Almenn þekking
Umtalið síðustu daga hefur á endanum sannfært mig um að fólk er fífl og þá er ég þar meðtalinn. Það virðist sem grunur minn frá því á miðvikudag sé á rökum reystur því allir sem ég hef talað við byggja skoðun sína á því hvað sé almennur fróðleikur, algerlega á eigin vitneskju. Það þýðir t.d. að ef stelpa semdi spurningar fyrir próf í almennri þekkingu yrðu allar spurningarnar um sjónvarpsþætti t.d. Dawson's Creek, Friends, Sex&TheCity, Nágranna, Ally McBeal o.s.frv. Ekki yrði spurt neitt úr sögu, íþróttum, stjórnmálum eða neinu slíku nema ef ske kynni að fengin yrðu einhver stórskrýtin stelpa í þetta. (Smá karlremba sakar engan:))

Auk þess legg ég til að Anfield verði lagður í eyði!!! Áfram United.

Boltinn
Ruud var snilldarlegur í leiknum í gær eins og reyndar allt United-liðið. Samleikurinn var frábær, baráttan einstök og mörkin glæsileg. Bestu mennirnir voru að mínu mati Ruud, Solskjær, Fortune (sem var frábær á miðjunni), Brown og Barthez. Mark nr. 2 var náttúrlega eitthvað sem maður á seint eftir að gleyma – ekki nóg með að Ruud fíflaði varnarmenn Basel heldur var þessi afgreiðsla með ólíkindum. Það hefði verið erfitt að klára úr þessu færi ef enginn hefði staðið í markinu en honum tókst að klára þetta þrátt fyrir að Zubi stæði á línunni. Ótrúlegur leikmaður.
Síðan gerðu Juventus og Deportivo jafntefli á Spáni 2:2 og því er United eitt á toppi riðilsins. Birindelli skoraði fyrra mark gömlu frúarinnar með glæsilegu skoti af 30m færi upp í markvinkilinn fjær. Eitt glæsilegasta mark Meistaradeildarinnar í ár.
Schevchenko gekk síðan frá Real á meðan Dortmund kláraði Lokomotiv í Moskvu í hinum riðlinum. Í kvöld verða síðan kettlingarnir úr Lundúnum í sjónvarpinu.

Fréttablaðið
Bendi á nokkuð góða grein eftir Hálfdan Pétursson í fréttablaðinu í gær. Þar skammast hann út í samnemendur sína í samkeppnisprófum læknisfræði fyrir veimiltítugang eins og hann kýs að kalla það. Drengurinn er skemmtilegur eins og hann á ætt til en hann er sonur Péturs Stera Péturssonar sem er heilsugæslulæknir á Akureyri og því bróðursonur Palla á Höllustöðum.

Almenn þekking…
…er svolítið vítt hugtak og greinir menn oft á um hver hún sé. Yfirleitt finnst fólki nú samt að það sem það veit ekki geti alls ekki tilheyrt almennri þekkingu og því búast auðvitað allir við að fá tíu í prófi úr almennri þekkingu. Ég held því að réttast væri að endurnefna þann hluta prófs í læknisfræði og ætti hann fremur að heita “gagnslaus þekking” eða “vitavonlaustþúvitirðafábjáninnðinn”. Þá væru menn miklu frekar upp með sér yfir því að geta yfirhöfuð nokkurn skapaðan hlut á prófinu í stað þess að allir hlaupi upp til handa og fóta við að kæra þær örfáu spurningar sem þeir gátu ekki.

Auk þess legg ég til að Valsbragginn verði lagður í eyði. Áfram KR!!!

Gleymdi
Stólpaparið Gunni og Baddý er farið að blogga - án þess að láta mig vita. Skammist þið ykkar ekki? Raunar virðist Gunni greyið hafa örmagnast við að búa til síðuna enda ekki við almennilegu bloggi að búast frá einhverjum h******* Valsmanni. Baddý er hins vegar dugleg og er m.a.s. búin að hlekkja á mig (ef rætt er um Gunna ætti að sleppa á og yrði þá setningin: ...hlekkja (á) Gunna). Að launum fyrir meðaltalsdugnaðinn (deila hjón ekki öllu?) fá þau bæði hlekki við nöfnin sín hér en varanlegu hlekkirnir verða að bíða þar til ég er búinn að læra á tölvur.

Stebbi Páls...
...er alveg miður sín yfir úrslitum prófkjörsins á laugardaginn en hann hafði auðvitað vonað að Sjálfstæðismenn kysu yfir sig gamla pakkið eins og vinstri menn gera yfirleitt (a.m.k. þeir örfáu sem trúa á lýðræði). Reyndar er forystan auðvitað sú sama en baklandið er orðið allt annað og greinilegt að Sjálfstæðismenn í Reykjavík vilja fjölbreytta frambjóðendur á þing sbr. það að Pétur Blöndal, sem hefur ekki alltaf verið sammála meirihlutanum í flokknum, hlýtur glæsilega kosningu í fjórða sætið. Ég hlakka til að sjá fyrsta blogg Stefáns eftir kosningarnar í vor. Mig grunar að það verði ekki á annan í kosningum. Þess verður langt að bíða.

Súru brandararnir...
...eru alveg hættir að flæða og verða menn að fyrirgefa þurrkana. Það rignir um síður - sannið til.

Auk þess legg ég til að Valsbraggin verði lagður í eyði. Áfram KR!!!

Prófkjörið
Hrikalega ánægður með prófkjörið, nema kannski hvað Solla Bolla var ofarlega. Ekki kom á óvart að Davíð, Geir og Björn héldu sínu. Pétur kemur mjög sterkur inn í fjórða og Sólveig hefur líklega tapað ráðherrastólnum eftir útreiðina en mín vegna hefði hún alveg mátt vera neðar. Guðlaug setti ég nú ekki á listann minn en get þó verið sáttur við útkomuna hans - hann er búinn að vera duglegur í borginni og verður það vonandi líka á þingi. Síðan er Sigurður Kári minn maður í sjöunda með glæsilega kosningu. Guðmund og Ástu setti ég hvorugt á lista og hefði verið nokkuð sama þó þau hefðu dottið út. Birgi hefði ég viljað hafa ofar en hann er líklega öruggur á þing og því lítið hægt að segja við því. Katrínu vil ég helst ekki hafa á listanum enda fer hún í taugarnar á mér en Láru Margréti hefði ég viljað hafa ofar en vona þó að hún komist á þing. Síðan eru auðvitað Ingvi Hrafn og ungu konurnar sem maður hefði nú kannksi viljað sjá ofar en það geta víst ekki allir unnið. Í heildina held ég að þessi listi sé mjög frambærilegur og raunar sigurstranglegur en ég held að heillavænlegra hefði verið að deila honum niður með hinni gamalkunnu kosningaaðferð 1-2-2-2-2-1 eins og maður gerir í boltanum til að jafnara sé í liðum. Þetta mundi þýða að Geir og Björn yrðu saman í kjördæmi sem mótvægi við Davíð í hinu. Þá hefðu listarnir verið:
Davíð - Pétur - Sólveig - Guðmundur - Ásta annars vegar og hins vegar Geir - Björn - Guðlaugur - Sigurður Kári - Birgir.
En eins og áður sagði þá er ég nokkuð sáttur.

Barbapabbi
Ég hef nokkrar áhyggjur af því að nú sé að koma fram heil kynslóð lækna sem ekki veit hvernig Barbapabbi er á litinn. Þetta er auðvitað hræðilegt mál og verður að koma í veg fyrir. Þess vegna er ég mjög fylgjandi því að þessi spurning fái að lifa í úrtökuprófi læknadeildar. Ég skil samt ekki kvartanirnar. Prófið er úr almennri þekkingu og maður mundi nú halda að þetta falli undir almenna þekkingu. Sama má segja um spurninguna um Fox Mulder. Aftur á móti held ég að þessar dylgjur um að í prófinu hafi reynst leynt greindarpróf séu mun alvarlegri og þurfi að kanna. Það er auðvitað ekki sjálfgefið að mikil greind skapi góðan lækni. Persónuleikapróf væri mun heillavænlegra og er raunar notað sums staðar erlendis. Það þyrfti þó auðvitað að gera fyrir opnum tjöldum.

Boltinn
Ruud er kominn í gang og því loksins eitthvað farið að gerast hjá mínum mönnum. Á laugardaginn hafði Ferguson loksins kjark til að nota guttana og auðvitað blómstraði liðið. Menn benda á þrjú mörk fengin á sig en ég segi bara, frekar að spila skemmtilegan bolta og fá á sig nokkur mörk en að spila leiðinlegan leik og halda hreinu. United hefur alltaf verið f.o.f. sóknarlið en ekki varnarlið. Svona er þetta bara. Arsenalleikinn sá ég með öðru og fannst brottreksturinn og vítið harður en réttur dómur. Þetta var brot og þar sem það átti sér stað inni í teig og Sol var aftastur átti dómarinn enga aðra kosti í stöðunni - víti + rautt. Hann virtist fyrst bara fara í öxlina en í endursýningunni sást að hann hittir ekki öxlina á sóknarmanninum heldur bakið - ergo - þetta var bakhrinding og þar með rán á dauðafæri. Það er engin spurning í mínum huga að þetta var réttur dómur. Hins vegar sýndist mér boltinn fara í höndina á Delgado í síðasta marki Southampton og það á auðvitað ekki að gerast. Annars var þetta skemmtilegur leikur sem mér fannst þrátt fyrir allt að S'ton ætti skilið að vinna. Liverpool tapaði líka svo mínir menn eru komnir í baráttuna að nýju. Gaman að sjá Everton og Chelsea þarna uppi líka því mér hefur alltaf þótt þetta skemmtileg lið. Það er svolítið patríotískt stolt hjá manni að horfa á Chelsea með víkinginn innanborðs. Everton er líka skemmtilegt sóknarlið með hinn frábæra Wayne Rooney innanborðs sem er auðvitað annað hvort snillingur eða þrítugur loddari eins og hann lítur út fyrir að vera. Þetta stefnir allt í hörkutímabil.

Auk þess legg ég til að Valsbraggin verði lagður í eyði. Áfram KR!!!

Merkilegt
Umræðan um breytingar á raunvísindadeildum finnst mér aldeilis skemmtileg og þá sérstaklega ósættið sem skapast hefur milli félagsvísindamanna og raunvísindamanna. Það er auðvitað gott að standa utan við þetta í grein sem byggir að stórum hluta á raunvísindum með félagsvísindalegu ívafi en snýst um félagsvísindi með raunvísindalegu ívafi í daglegu amstri. Ég skil bara ekki þetta viðhorf að kynjahlutföll þurfi endilega að vera jöfn í öllum greinum og raunar hef ég ekki séð neinn berjast hatrammlega fyrir breytingum á greinum þar sem konur eru í meirihluta til þess að auka hlut karla í stéttinni. Raunar hafa nokkrir strákar úr hjúkrunarstétt vakið athygli á greininni upp á sitt einsdæmi en það voru engir jafnréttisfulltrúar með í því svo ég viti. Gæti það kannski verið að Y-litningurinn veiti okkur körlunum ákveðna hæfileika á ákveðnum sviðum og hitt X-ið gefi konum eitthvað forskot á öðrum. Ég held það. Auk þess held ég að smávægilegar breytingar á námsskrá muni ekki hafa áhrif á þessi mál heldur miklu frekar áróður og vitundarvakning í mennta- og barnaskólum.

Stefán Pálsson
Er skemmtilegur maður og kjaftfor. Skoðanir hans eru oft framúrskarandi undarlegar og oft hrjóta af vörum hans þvílík snilldarinnar spakmæli að annað eins heyrist varla nokkurs staðar í heiminum. Hins vegar held ég að við Stefán höfum aldrei verið og munum aldrei verða sammála um nokkurn skapaðan hlut. Það er eins og áður hefur komið fram alveg sérlegt áhugamál mitt að tala við svoleiðis fólk. Stefán hefur því verið valinn snillingur dagsins. Mæli með bloggsíðunni hans sem er hlekkjuð við nafn hans hér að ofan. Til hamingju með það Stefán.

Auk þess legg ég til að Valsbragginn verði lagður í eyði. Áfram KR!!!

Caruso restaurant
Við fórum nokkrir félagar að borða á téðum veitingastað í gærkvöldi. Maturinn var mjög góður og m.a. kjammsaði einn okkar á því sem hann sagði vera ljúffengan skötusel. Ég sá strax eftir því að hafa ekki farið að fordæmi hans og pantað mér slíka máltíð enda er skötuselur eitthvert mesta lostæti sem um getur. Það fyndnasta við kvöldið var þegar nokkrir úr hópnum ákváðu að fá sér eftirrétt. Fyrir valinu varð fljótandi súkkulaði eða Súkkulaðiterta með ís eins og stóð á matseðlinum. Þetta kostaði litlar 1150 kr og bjuggust menn því við vel útilátnum dessert. Þegar eftirrétturinn ætlaði allt um koll að keyra af hlátri meðal þeirra sem ekki höfðu pantað dessert en hinir urðu fremur hnýpnir. Dessertinn samanstóð nefnilega af einum litlum eggjabikar af súkkulaðiköku og einni lítilli ískúlu ásamt berjum og einhverju skrauti. Kílóverð á súkkulaðiköku er orðið hærra en á gulli.

Ótrúlegt bull
Rakst á ónefnda bloggsíðu í dag. Hef aldrei á ævinni lesið jafnmikla endemis vitleysu. Hér er ég sem sé að ræða um síðu manns sem hefur átt í hálfgerðri bloggdeilu við Kisu um erfðafjárskatta. Þarna er hægt að lesa allskyns þvælu um allt milli himins og jarðar og flest af því er svo rosalega litað af því að grey barnið hafi verið heilaþvegið af miskunnarlausum foreldrum sínum alla sína æsku. Það kæmi mér ekki á óvart að þau væru annað hvort eldrauðir grunnskólakennarar eða krullhærðir sagnfræðingar. Hann kemur síðan algerlega upp um endalausa fávisku sína með því að úthúða neðanjarðarlestarkerfi Lundúna og segir meðal annars að kerfi Moskvuborgar sé betra. Eflaust er kerfi Moskvu gömlu ágætt og tek ég umræddan Kristbjörn trúanlegan fyrir því uns ég hef sannreynt það sjálfur. Neðanjarðarlestarkerfi Lundúna þekki ég hins vegar af eigin raun en þangað kom ég fyrir fjöldamörgum árum þegar ég var 18 ára. Það tók okkur félagana ca. 20 mín. að læra á þetta mjög svo einfalda kerfi og gekk það snurðulaust fyrir sig allan þann tíma sem við vorum í London. (fjöldamargir dagar, næstum því vika). Vel getur verið að því hafi hrakað síðan en ég hef nú grun um að vandamálið liggi fremur hjá Kristbirni sjálfum en í kerfi Lundúnaborgar.

Erfðafjárskatturinn
Skattakerfi Íslendinga er mjög skrýtið og flókið og í því er ég enginn sérfræðingur. Eftirfarandi gæti borið keim af því. Ég held að óvíða í heiminum sé meira um tvísköttun á borgarana og hefur það gert það að verkum að fátækt hefur aukist hér á landi. Hugsum okkur til dæmis einstæða móður sem hefur 100.000 kr í laun á mánuði. Hún tekur heim líklega eitthvað í kringum 85.000 kr á mánuði. Síðan fer hún út í búð að versla og þar sem hún hefur verið heilaþvegin að hætti Önundar þá er hún sérlega dugleg að gefa börnunum sínum mjólkurvörur. Ekki nóg með að hún þurfi að borga vask af þessum mjólkurvörum heldur hefur talsverður hluti af sköttum hennar síðustu árin farið í að niðurgreiða þessar sömu mjólkurvörur. Sjáiði hvað þetta er öfugsnúið allt saman?

Súr brandari dagsins
Held að ég geti ekki toppað kímni Önundar og ætla því ekki að reyna heldur mæla með hans.

Auk þess legg ég til að Valsbragginn verði lagður í eyði. Áfram KR!!!

Nafnlaus ábending
Fékk í dag ábendingu um rangfeðrun á aumingja vikunnar sem valinn var í gærkvöld. Þessi ábending var undirrituð Kef.drengurinn og áleit ég því að um Keflavíkurdrenginn Gunnar Thoroddsen væri að ræða. Hann hefur hins vegar neitað sakargiftum og því er ég engu nær um sendandann. Þakka þó ábendinguna og hef þegar breytt nafninu.

Skólinn
Var rétt í þessu að leggja lokahönd á verkefni sem ég á að flytja á kvennakúrsinum á morgunn. Viðfangsefnið er afar geðslegt - Herpes Genitalis eða kynfæraáblástur. Namminamminamm!! Annars líkar mér bara vel á kúrsinum og virðast sögur af illkvittnum ljósmæðrum vera stórlega ýktar. Eru þessar konur alveg framúrskarandi indælar upp til hópa þó auðvitað sé eins og annars staðar misjafn sauður í mörgu fé. Eða eins og Megas mundi segja það: "Diffrent rolla í bunch af money" Ég fékk viðurnefnið Bricanyl-maðurinn vegna einstakra hæfileika við að koma í veg fyrir fæðingar. Bricanyl er sem sé lyf sem er notað til að fresta fæðingu ef ástæða þykir til en ég þótti sérlega lítið fiskinn á fæðingar og þá sérstaklega eðlilegar fæðingar. Ég komst í slatta af keisaraskurðum, klukkufæðingum og slíkt en aðeins örfáar venjulegar fæðingar. Þetta hefur samt verið mjög gaman og ekki laust við að upplifunin við að sjá öll þessi kríli koma í heiminn framkalli hringl í eistunum á manni. Læt það nú samt sem vind um eyru þjóta uns ég hef fjárfest í góðu þaki með íbúð undir.

Vinna
Það verður massadagskrá næstu vikurnar því ég hef tekið að mér að vinna þrjár vaktir á Slysó næstu 2 vikurnar auk þess sem styttist í prófin sem verða 6. des og 12. des. Fyrst verða kvensjúkdómarnir brotnir til mergjar og síðan verður barnalæknisfræðinni hesthúsað áður en við tekur einhver kjaftakúrs fram að jólum. Annars er ég nú svo undarlega af guði gerður að ég hlakka ekki til jólanna fyrr en ég er búinn í prófum. Veit nú ekki hvort það er greindarlegt að vinna svona rétt fyrir próf en maður verður að vinna ef kaupa á íbúð. Vonum bara að ungviðið taki því rólega svona seint í nóvembermánuði þegar líða tekur að jólum. Þá getur verið að maður geti eitthvað kíkt í bók á vaktinni.

Hannyrðir
Hitti ungan mann í dag sem ég saumaði á Slysó í sumar. Gaman að sjá afrakstur hannyrðanna en drengur þessi hafði fengið allljótan skurð á hægri augabrún. Virtist hafa tekist vel til, alla vega var drengurinn ánægður.

Aumingjar vikunnar
Eru tveir, Hjálmar Árnason og Össur Skarphéðinsson sem héldu því fram á Alþingi að fjöldatakmarkanir í heilbrigðisgreinum í Háskólanum væru til komnar vegna þess að heilbrigðisstarfsfólk vilji halda spítulunum undirmönnuðum. Læknar vilja sem sagt vera fáir. vinna minnst eina vakt í viku á skítalaunum og helst ekki hafa neina aðstoðar- eða deildarlækna til að aðstoða sig vegna þess að það er miklu meira gaman að standa upp fyrir haus í vinnu allar vaktir. Reyndar hefur forseti læknadeildar svarað þeim með háði og spotti í Morgunblaðinu í dag. Málið er það að það er hvorki til húsnæði, fjármagn né mannskapur til að kenna fleiri læknanemum á ári en raun ber vitni - og raunar er kraftaverk að stjórn læknadeildar skuli geta fjölgað læknanemum í 48 á ári frá og með áramótum. Í hjúkrun hefur nú verið vandamál að tilskyldur fjöldi hefur ekki náð clausus-prófunum og sama hefur oft verið upp á teningnum í tannlæknisfræði og sjúkraþjálfun. Össur gerði því enn einu sinni í buxurnar sínar og hefur nú ráðið bróður sinn barinn og atvinnulausan til að hreinsa fyrir sig buxurnar en fyrir hreinsunina greiðir hann eflaust úr sjóðum Samfylkingarinnar ef ég þekki kauða rétt. Svo heldur hann örugglega með Val eða Fram.

Súr brandari dagsins
Af hverju étur Össur ekki reyktan lax? Össur veit það sem augljóst er að laxinn er nýbúinn að fá'ða!!!

Auk þess legg ég til að Valsbragginn verði lagður í eyði. Áfram KR!!!

Boltinn
Snökt. Mínir menn eru algerlega heillum horfnir. Dómararnir hafa nú séð aumur á grófasta liði heims og eru farnir að reka leikmenn í hinu liðinu út af. Þetta gera þeir til að koma í veg fyrir að Arsenal nái enn einu metinu í úrvalsdeildinni þ.e. flestir tapleikir í röð. Ruud er þó alla vega kominn í gang og er nú búinn að skora í tveimur leikjum í röð. Nú hlýtur Ferguson líka að fara að taka hintinu frá guðunum um að öll þessi meiðsli þýði það að Jesú bróður besta þykir tími til kominn að gefa smellunum frí og táningunum sjens á að spreyta sig. Ég skil ekki hversu ragur hann er - ég meina það eru gríslingar í öllum þessum liðum sem við erum að mæta, síðast í dag voru það Cole, Carrick og Defoe. Það hefði verið heillavænlegast að hann hætti síðasta sumar og hleypti Eriksson í stólinn. Síðan eru komnar upp hugmyndir um að Mark gamli Hughes taki við liðinu að Ferguson gegnum og lýst mér bara þrusuvel á það.

Viðar...
...hefur horfið til fyrri venja og skrifar nú aftur skemmtilegt blogg. Óska ég spúsuföður hans til lukku með öldina hálfu og vona að sú næsta verði verði jafngæfurík.

Kobbi...
...er farinn að áreita mig á öllum tímum sólarhringsins síðustu vikur. Sendir mér sms og fleira með allskyns tvíræðum skilaboðum. Finnst mér þetta alveg sérlega skemmtilegt og hvet Jakob til að halda þessari aðdáunarverðu iðju áfram. Jakob er nefnilega snillingur sem hefur aðeins tvo galla. Hann heldur með Liverpool og talar ekki íslensku en afburðaslök íslenskukunnátta virðist oft fara saman við það að halda með Liverpool (að undanskildum bræðrum mínum og Golla en allir hafa þeir verið heilaþvegnir af slökum íslenskumönnum sem halda með Bítladrengjunum. SMS-in hans Kobba gleðja litla sálartetrið mitt og vildi ég að ég gæti glatt Kobba til baka. Súru brandararnir mínir hafa stundum fallið í kramið hjá Klofberti og mun ég því reyna að halda þessum lið gangandi fyrir aðdáendur hans (Kobba og Viðar).

Súr brandari dagsins
Hver er munurinn á nöfnunum Sturla Þórðarsyni og Sturla Böðvarssyni? Sturla Þ. skrifaði bækur en Sturla B. atkvæðaseðla. Raunar held ég að Sturla núlifandi hafi ekki staðið fyrir þessu svindli. Ef svo væri, væri það í fyrsta sinn sem eitthvað plan gengur upp hjá Sturla greyinu.

Auk þess legg ég til að Anfield verði lagður í eyði. Áfram MUFC!!!

Gleði
Hef haft spurnir af því að snillingurinn Haukur Heiðar yngri ætlar að verða læknir eins og pabbi hans. Pabbi hans lokaði einu sinni hausnum á mér þegar heilinn gerði tilraun til að sleppa. Kann ég honum hinar bestu þakkir fyrir það enda hefur sýnt sig að ég þarf á öllu mínu brain-power að halda. Haukur spilaði stundum með mér körfubolta í gamla daga. Bíð hann velkominn í geðveikina og sendi honum baráttukveðjur í komandi prófum. Mæli líka með blogginu hans.

Önundur...
...segir innlegginn virka. Mér fannst mín líka virka fyrst. Það sem angraði mig hins vegar var það að þegar ég fór að spyrjast fyrir komst ég að því að allir sem fara í göngugreiningu fá innlegg. Þegar ég segi allir á ég ekki við flestir heldur allir. Ef þú getur fundið fyrir mig mann sem fór í göngugreiningu og fékk ekki innlegg þá færðu eitt hrós frá mér og örugglega Fálkaorðuna frá Óla grís. Það sem þú fannst var nokkuð sem kallast placebo. Ef maður trúir á að eitthvað verki þá virkar það á sálina þannig að þú hættir að taka eftir einkennum. Síðan þegar frá líður og þú hættir að dást að frábæru innleggjunum ferð þú að finna verkinn aftur og þá versnar hann jafnvel. Svona virka margar af hinum svokölluðu óhefðbundnu lækningum (sumar virka þó tvímælalaust í alvöru eins og sýnt hefur verið í rannsóknum t.d. nálastungur í réttum höndum o.fl.). Ef ég las bæklunarlæknisfræðina mína rétt í sumar er mun líklegra að annar fóturinn styttri valdi þér verkjum í baki eða mjöðmum. Mjög ólíklegt að slíkt hafi áhrif á hnén. Ég þori að veðja mikilvægum líkamspörtum þínum upp á að þú ert með einhverja liðþófalöskun, líklega í liðþófanum framanverðum og gæti þá verið að þú finndir svolítið til við að labba upp í móti eða upp stiga. Nætursársaukann skil ég ekki alveg en þyngdaraflið getur gert undarlega hluti, kannski sest liðþófinn eitthvað asnalega til þegar þú liggur á bakinu, hvað veit ég.

Innlegg
Þessi innleggjamenning er orðin svolítið skondin. Nú er það svo að það má ekki muna 1mm (í mjög svo ónákvæmum mælitækjum) til að fólk fái innlegg vegna styttri fótar. Ef það eru hins vegar jafnlangir fæturnir er týnt til eitthvað sem heitir plattfótur, skakkt niðurstig eða hvað það nú heitir, og menn látnir fá innlegg með púðum hér og þar upp í ilina og undir jarkann og ég veit ekki hvað og hvað. Staðreyndin er hins vegar sú að við erum ekki samhverf um miðlínu. Svipað dæmi væri að ég gerðist lýtalæknir og nýtti mér það þegar fólk kemur á stofu til mín að enginn hefur samhverft andlit. Ég mundi mæla nákvæmlega áferð andlitsins og sýna fólki fram á að það sé ósamhverft - og því alveg hrikalega ljótt. Síðan mundi ég láta það velja fegurri helming andlitsins og móta hinn helminginn sem nákvæma spegilmynd þess fegurri. Út mundi koma fallegur og samhverfur féflettur maður (eða kona). Gallinn er hins vegar sá að ósamhverfan er það sem gerir okkur falleg eða ljót. Menn gleyma því stundum að annar fóturinn getur verið styttri af þeirri einföldu ástæðu að mjaðmargrindin er pínu skökk og líkaminn aðlagar sig með því að hafa annan fótinn styttri. Það er ekki svo að skilja að innlegg geti ekki hjálpað fólki, ég er bara að segja að þeir sem selja þau eru búnir að skemma fyrir sér trúverðugleikann með því að setja innlegg í alla skó sem voga sér inn fyrir þröskuldinn hjá þeim.

Boltinn
Mikið rosalega var ég dissaður núna maður. Bæði Ipswich og Blackburn duttu út úr UEFA-bikarnum í kvöld. Kannski er Liverpool með skítsæmilegt lið eftir allt saman. Kalt mat: Nei.

Auk þess legg ég til að Valsbragginn verði lagður í eyði. Áfram KR!!!

Baggalútur...
...er oft á tíðum snilldarsíða. Ingvar aumingjabloggari heimsótti mig stuttlega í gær og benti mér á að þar má oft finna úrvalskveðskap og við nánari skoðun var tvennt sem sló í gegn hjá mér. Annars vegar var það bréf Matthíasar Jochumsonar til fóstru sinnar sem forvitnir geta lesið hér. Hins vegar var það svokallað Íslandsmeddley en þar mæli ég fyrst og fremst með erindunum um Bríetarkvinnurnar og Vatnsmýrarmóra sem bæði eru fremur seint í ljóðabálkinum. Einnig eru þrífarar vikunnar oft á tíðum snilld og eru þrífarar þessarar viku engin undantekning.

Boltinn
Það stefnir allt í að Liverpool verði eina enska liðið sem ekki tekst að tryggja sig áfram í Evrópukeppninni. Þeim tókst hins vegar að tryggja sig aftur á bak inn í Evrópukeppni félagsliða. Þeir geta nú aftur stefnt á þrennuna eftirsóttu sem Poolarar héldu ekki vatni yfir fyrir 2 árum síðan en eins og allir vita var aðeins ein merkileg dolla í þessu bikarasafni sem þeir unnu og það var FA-bikarinn (mjólkurbikarinn svokallaði). Leeds var að enda við að skjóta 4x í höfuðið á Alan Smith og í netið og Ipswich og Blackburn munu líklega líka fara áfram. Langar bara að benda Liverpool aðdáendum að lélegt 1. deildar lið á Englandi getur komist jafnlangt og Liverpool í Evrópukeppni félagsliða, hvað sem síðar verður.

Súr brandari dagsins
Liverpool-vörnin var eins og svissneskur ostur á móti Basel!

Snillingur dagsins...
...er Sverrir fyrir að kalla mig öfgahægrimann. Maðurinn hefur séð að sér eftir kjarngóða máltíð a la Gilli og breytt þessu. Ég hef alltaf sagt að menn eigi að taka mikilvægar ákvarðanir eftir kjarngóðar máltíðir.

Eru allir orðnir aumingjabloggarar?
Hjölli og Haukur Þór eru algerlega dauðir. Inga Huld hefur dalað mikið. Viðar er orðinn latur. Sjonni er farinn til Bagdad. Sverrir er að undirbúa stjörnuskoðun. Ingvar og Þór - hverjir eru það? Þetta eru allt tómir kettlingar. Eini maðurinn sem stendur undir nafni er Önundur tréfótur úr Hnoðraholti. Önni er daglegur áfangastaður á netinu eins og Selfoss er áfangastaður á leiðinni upp í Grafarvog.

Auk þess legg ég til að Valsbragginn verði lagður í eyði. Áfram KR!!!

Boltinn
Liverpool er snilldarlegt lið. Þeir eru með besta markvörð í heimi en þegar hann gerir fágæt mistök tapar Liverpool. Þetta hefur orðið til þess að ég hef dregið þá ályktun að gengi Liverpool hefur í gegnum tíðina alltaf verið háð spilamennsku markvarðanna og því álagi hafa margir úrvalsmarkverðir kikknað undan, t.d. David James, Brad Friedel, Sander Westerveld og nú loks Dudek. Liverpool hefur einstakt lag á að eyðileggja markverði. Síðan selja þeir þessa markverði á hálfvirði og þeir eru reistir við af alvöru knattspyrnustjórum. Sjáið bara hvernig James og Friedel eru að spila síðustu misserin. Friedel var einn allra besti markvörðurinn á HM í sumar og hefur spilað frábærlega fyrir Blackburn í vetur. James er búinn að vera mjög góður hjá West Ham og síst hægt að kenna honum um slakt gengi þeirra síðustu vikur. Westerveld var einn besti leikmaður Liverpool í a.m.k. eitt tímabil. Síðan átti hann nokkra afleita leiki og eftir það voru keyptir tveir nýjir til að eyðileggja, Sander saltaður í nokkra mánuði og síðan seldur sem niðurbrotinn maður á hálfvirði. Nú er Dudek að brotna undan álaginu og þá er bara eftir að brjóta niður Kirkland. Liverpool er stærsti framleiðandi niðursoðinna markvarða í heiminum.

Heigðu mitt hjarta við Undað hné
Önundur er að drepast í hnénu.
Í fyrsta lagi: hentu innleggjunum, ef ekki munar meira en 1cm (sumir segja 1,5cm) hafa innlegg ekkert að segja. Með öðrum orðum, þú varst féflettur. Velkominn í klúbbinn.
Í öðru lagi nokkrar spurningar: Er vont að labba upp eða niður stiga? Er vont að beygja um hnéliðinn með snúið um ökklann? Finnst þér verkurinn utan á eða innan í hnénu? Er hnéð bólgið (miðað við hitt)? Hvað varstu að gera þegar þú fannst fyrst fyrir þessu?
Í þriðja lagi: það er erfitt að greina meiðsl á hné í gegnum internetið – maður vill skoða og meiða sjúklingana. Líklegast er þó að þú sért með laskaðan liðþófa eða eitthvað slíkt. Einnig gæti verið um að ræða svokallaða liðmús.
Í fjórða lagi: Bestu bæklunarlæknarnir eru á læknastöðinni í Álftamýri. Man ekki hverjir eru bestir í hnjánum en þeir eru nokkrir. Líklega skiptir það ekki öllu því hver sem er getur greint þetta. Mestu skiptir hver gerir aðgerð ef með þarf. En hafðu engar áhyggjur af prófunum. Þú ert heppinn ef þú færð tíma hjá þeim fyrir próf/jól/áramót.

Prófkjör NV
Eru menn að grínast með þennan farsa á Akranesinu? Það er ekki nema ein lausn á vandanum. Nýtt prófkjör. Menn segja að þá geti menn sem voru ofarlega á listanum dottið niður og það komi ekki bara niður á svindlurunum. Hafa sömu menn ekki velt því fyrir sér að þessir sömu menn gætu hafa grætt á því að svindlað var í prófkjörinu. Í öðru lagi eiga náttúrlega ekkert að vera utankjörfundaratkvæði í prófkjörum. Frekar á að láta kosningarnar standa í 2-3 daga svo sem flestir komist. Ef þú kemst ekki á kjörstað verður bara að hafa það. Í þriðja lagi á bara að láta flokksbundna menn kjósa í slíkum prófkjörum. Ef fólk hefur ekki áhuga á að vera í flokknum á það ekki að fá að hafa eitthvað að segja um uppstillingu listans – ég meina fær sjálfstæðisflokkurinn samtals 6000 atkvæði í NV-kjördæminu í kosningum?

Boltinn frh.
Mínir menn að klára með glans. Newcastle gerði hið ómögulega og komst áfram þrátt fyrir að tapa fyrstu 3 leikjunum. Kalt mat: Newcastle er með betra lið en Liverpool.

Auk þess legg ég til að Valsbragginn verði lagður í eyði. Áfram KR!!!

Boltinn
Það verður gaman að fylgjast með boltanum í kvöld og sjá Basel sparka Liverpool út úr Meistaradeild Evrópu. Það er ekki oft sem maður losnar við Tvö leiðinlegustu þýsku liðin út úr keppninni í fyrstu umferð en nú er Bayern dottið út og Liverpool við það að hrynja líka. Þið veltið kannski fyrir ykkur hvort þið hafið lært landafræðina ykkar vitlaust – hvort Liverpool sé raunverulega í Þýskalandi en ekki úthverfi Manchesterborgar eins og þið hélduð alltaf. Ástæðan fyrir því að ég kalla Liverpool þýskt lið er sú að þeir hafa um langt skeið spilað afspyrnuleiðinlegan varnarsinnaðan kick&run stíl að hætti Þjóðverja. Skipulagið virðist höfuðatriðið og það að halda boltanum, helst inni á eigin vallarhelm-ingi. Þennan leiðinlega leikstíl hef ég alltaf sett í samband við þýska knattspyrnu og lái mér hver sem vill. Liverpoll spilar með Heskey fremstan í sjö manna vörn. Síðan spila oft Murphy og Smicer þar fyrir framan og síðan Owen litli aleinn frammi. Síðan hefur hann greyið verið skammaður fyrir markaþurrð (sem hefur batnað að undanförnu eingöngu vegna þess að hann er frábær framherji en ekki fyrir tilstilli liðsins). Það líða heilu og hálfu leikirnir þannig að Liverpool er með boltann en samt er hann einn á vallarhelmingi andstæðinganna – hvað er það?!! Eina ástæðan fyrir því að Liverpool trónir á toppi úr-valsdeildarinnar er frábær markvörður, góður miðvörður og heimsklassa framherji. Auk þess hafa þeir átt fremur rólega dagskrá, þ.e. slakari lið deildarinnar. Í desember mæta þeir bæði Arsenal og MUFC og sést þá vonandi úr hverju þetta skítalið er gert – nær eingöngu tómum aumingjum.

Skúrkur dagsins
Sverrir Guðmundsson er skúrkur dagsins og raunar síðastliðinna vikna fyrir að láta orðið sjálfstæðismaður birtast þegar rennt er yfir linkinn á Ljós-Gíslann á bloggsíðu hans. Þrátt fyrir fögur fyrirheit og afsökunarbeiðni, hefur Sverrir á mjög svo undirförulan og svik-samlegan hátt komið þeim skilaboðum áleiðis til lesenda sinna að ég sé eldheitur stuttbuxnadrengur. Ef ég kynni á tölvur yrði þessa illvirkis hefnt grimmilega en í staðinn hefur Sverrir verið útnefndur skúrkur ársins 2002 þrátt fyrir að árinu sé ekki lokið. Til hamingju Sverrir! Í verðlaun er ljúffeng máltíð fyrir tvö á veitingahúsinu “a la Gilli”. Í forrétt er hlandmarineraður ræpuvellingur, í aðalrétt útfrosinn flamberaður saur og í eftir-rétt bragðþefur með gíslísku yfirbragði. Verði þér að góðu.

Klassíska hornið toppað
Við lestur bloggsins hjá Viðari í dag sofnaði ég þrisvar. Samt var ég nývaknaður þegar ég byrjaði. Má ég biðja um klassíska hornið aftur.

Fæðingarvakt
Sá 5 fæðingar síðastliðna nótt á vaktinni. Þar af voru 3 keisaraskurðir. Snilld. Ekkert fallegra en að sjá nýtt líf hefjast. Mæli með því.

Auk þess legg ég til að Valsbragginn verði lagður í eyði. Áfram KR!!!

Sturla
Sturla Böðvarsson vann ótrúlegan svindlsigur í prófkjöri Sjálfstæðismanna í NV-kjördæmi. Sigurinn innbyrti Sturla með því að safna atkvæðum á geðdeild sjúkrahúsanna á Akranesi, Sauðárkróki og Blönduósi auk þess sem hann kom við í Stykkishólmi og á Ísafirði og Patreksfirði. Þetta segi ég vegna þess að það mundi ekki nokkur heilvita maður kjósa þetta fífl yfir sig. Það er nokkuð ljóst að Sjálfstæðisflokkurinn mun ekki ríða feitum hesti frá kosningum í þessu kjördæmi í vor. Það versta við þetta prófkjör er það að eini almennilegi frambjóðandi Sjálfstæðismanna í þessu kjördæmi, Vilhjálmur Egilsson, beið algjört afhroð og endaði í 5. sæti listans og hefur hann þegar látið hafa eftir sér að hann muni ekki taka þetta sæti.

Súr brandari dagsins
Þegar úrslit prófkjörsins lágu fyrir í NV-kjördæminu hringdi Sturla í Vilhjálm Egilsson og sagði sigri hrósandi sinni barnslegu röddu: Þú hefur verið Sturlaður!!!!:)

Boltinn
Jónatan Grænkar fyrrum United kappi hefur verið valinn í enska landsliðshópinn. Þess verður sennilega ekki langt að bíða að Eriksson sér ljósið og velur bara núverandi og fyrrverandi leikmenn besta liðs heims í landsliðið hjá sér. Palli tomma og Andrés Kol gætu því hlotið náð fyrir augum þjálfarans ásamt nokkrum fleirum. Hlakka til þess dags.

Kvennakúrsinn
Er að verða hinn skemmtilegasti fyrir utan þá staðreynd að konur virðast fá mikla slökun í legið þegar ég kem nálægt fæðingarganginum og því hefur mér aðeins tekist að vera viðstaddur eina fæðingu á kúrsinum til þessa. Þetta ætti þó að lagast á næstu dögum því ég er fluttur inn á kvennadeildina og verð hér á sólarhringsvakt 3 af næstu 7 dögum, þ.e. í kvöld, fimmtudag og síðan á sunnudaginn. Maður mætir á slíkar vaktir kl. 800 að morgni og fer heim kl. 800 morguninn eftir. Maður hefur aðstöðu til að leggja sig og aðgang að tölvu þannig að þetta er ágætt. Skrifa sjálfsagt eitthvað skemmtilegt ef lítið verður að gera í nótt.

Auk þess legg ég til að Valsbragginn verði lagður í eyði. Áfram KR!!!

Garðabæjargrúppan…
…kom saman í gær heima hjá Heiðari og Fríðu. Þar var almennur aumingjagangur viðhafður og aðeins við Heiðar fengum okkur mjöð sem rann ljúflega niður eins og fyrri daginn. Var þar mikið spjallað um pólítík, bíómyndir (LOTR) og fleira. Menn voru ekki á eitt sáttir um málefnin frekar en fyrri daginn en þó munurinn á skoðunum ekki eðlismunur heldur mun fremur áherslumunur. Burt séð frá því þá hafði Heiðar víst sett fullmikið af bjór í kverkarnar á sér því hann fékk þá arfaslöku hugmynd að fara á Thorvaldsen-bar. Það eina jákvæða við þá heimsókn var að sjá hversu lítill Eyþór Arnalds er. Reyndar hefur læðst að mér sá grunur í dag að um mini-me Eyþórs hafi verið að ræða. Þar sem ég var inni en Edda aftast í langri röð var tekin sú frábæra ákvörðun að yfirgefa staðinn og reyna fyrir sér annars staðar. Kom í ljós að enginn vildi fá okkur og virtust myndast langar raðir hvert sem við fórum. Við Edda gengum því að Hlemmi, fengum okkur Devitos-flatböku sem er sú besta sem ég hef smakkað og síðan var húkkaður leigubíll.

Afmælisbarn dagsins…
…er fallegasta kona heims – hún Edda mín. Hún varð 24 ára í dag og náði mér því eftir að ég hafði haft forystu um 6,5 mánaða skeið. Takið ykkur frí frá önnum dagsins og syngið fyrir hana. Í tilefni dagsins hef ég ákveðið að sleppa lokaorðum bloggsins í dag en það verður á sínum stað á morgunn.

Aumingi dagsins
Að sjálfsögðu er Jakob Frímann Magnússon sá eini sem kemur til greina.

Súr brandari dagsins
Spurði félaga minn hvernig stemmingin hefði verið á prófkjörsvöku Jakobs Frímanns í gærkvöldi. Hann svaraði að bragði: “Það var stuð, maður!”.

Boltinn
Ég er alveg að gefast upp á Alex Ferguson. Í stað þess að nota eitthvað af þessum snillingum í varaliðinu t.d. Richardson, Djordjic, Stewart eða Fletcher ákveður hann að spila með Neville-systurnar inni á. Ég skil ekki af hverju hann spilaði ekki með Stewart í stað Philipíu aftarlega á miðjunni. Síðan er Forlan búinn að vera brilliant í síðustu leikjum en samt fer hann á bekkinn um leið og Nistelrooy er hættur að væla. Hann var lélegasti leikmaðurinn á vellinum í dag og það var af nógu að taka. Barthez gerði nákvæmlega það sem hann mátti ekki gera í fyrsta markinu. Ef hann hefði látið boltann fara hefði hann líklega farið út af eða Ferdinand hefði hreinsað. Í stað þess blakar hann boltanum beint á Anelka. Síðan er stóra systir að kerlingast í öðru markinu. Spáiði í að fá að vera fyrirliði af því allir vorkenna þér og síðan kúkar hann algerlega í stígvélin sín. Hálfviti!!!! Síðan klikkaði hann eiginlega líka í þriðja markinu því hann fylgir manninum ekki í hlaupið. Barthez átti svo sem ekki neinn stórleik – varði ágætlega inni á milli en seinni mörkin voru bæði frekar slök og kannski átti hann að verja þetta greyið. Sem betur fer vann Liverpool ekki en Arsenal stakk United af líka. Persónulega finnst mér að Ferguson eigi að taka meðvitaða ákvörðun um að einbeita sér að Evrópukeppninni, leyfa ungu mönnunum að spila svolítið mikið heima fyrir og koma síðan með nýtt gullaldarlið á næsta tímabili. Þá verður Blanc ekki lengur að þvælast fyrir O’Shea (Blanc var reyndar ágætur í dag). Það verður fínt að fá Brown í bakvörðinn, Silvestre hinum megin og síðan Rio og O’Shea í miðvarðarstöðurnar. Ætli árans aumingjarnir á Highbury taki þetta ekki aftur eða þá Liverpool-skepnurnar. Það mundi auðviðað þýða að sá hluti þjóðarinnar sem dregur niður greindarmeðaltalið hérlendis yrði óþolandi næstu misserin en sem læknanemi (og á stundum starfandi læknir) hefur maður lært að umgangast leiðinlega sjúklinga með virðingu og án fyrirlitningar. Maður getur nú líklega gert það við Liverpool-greyin líka.

Miðaldra kona!!!!
Á föstudagsmorgunn gekk ég í svefnrofunum áleiðis í skólann. Leiðin lá niður Eskihlíðina í átt að kvennadeild Landspítalans. Það var kalt í veðri og ég því venju fremur pirraður enda afskaplega erfitt að dotta á ganginum í svona kulda. Sem ég nálgast gatnamót Snorrabrautar/Bústaðavegar og Miklubrautar/Hringbrautar þá sé ég að bíll nokkur hefur ragast við að skella sér yfir þegar rauða ljósið kom og teppir því leið mína. Þar sem þráðurinn er stuttur hjá mér verð ég svolítið pirraðri en áður og kíki inn í bílinn. Sýndist mér sitja þar nokkuð myndarleg miðaldra kona, hálfsofandi eins og ég. Hún var í forláta loðpels en á fremur ljótum bíl – líklega Diahatsu. Linkaðist pirringurinn nokkuð við þetta enda er ég þekktur fyrir að vera blíður við konur. Þegar ég svo nálgast bílinn snýr konan sér að mér og viti menn. Þetta var ekki kona heldur Daníel Ágúst Haraldsson fyrrverandi söngvari Nýrra Danskra. Mikið rosalega er maðurinn kvenlegur. Frábær söngvari samt. Mér finnast Ný Dönsk vera frekar slöpp án hans þrátt fyrir að Björn Jörundur sé ágætis söngvari. Annars er ég mikill aðdáandi þessarar frábæru hljómsveitar.
Ef menn eru að velta fyrir sér hversvegna ég segi “Nýrra Danskra” hér að ofan þá er það vegna þess að einhvers staðar heyrði ég að nafnið væri komið úr auglýsingu þar sem auglýst voru Ný Dönsk blöð og því ætti eignarfallið að verða Nýrra Danskra og maður ætti að segja “Ný Dönsk eru…” í stað “Ný Dönsk er…”.


Besti dissarinn
Viðar veitir mér ofannefnda nafnbót á bloggi sínu í gær. Þakka hana og samþykki stoltur. Engan vil ég þó dissa í fýlu og vona að fólk taki skrifum mínum hér frekar sem persónulegum skoðunum en sem einhverjum alheilögum sannleik. Eins er fólki alveg frjálst að dissa mig til baka en ég endurtek orð sem ég lét falla einhvern tíma þegar einhver reyndi að stríða mér. “Ég hef verið lítill alla ævi og er því orðinn vanur dissi. Ég er ÓDISSANLEGUR.”

Auk þess legg ég til að Valsbragginn verði lagður í eyði. Áfram KR!!!

Lærdómur
Er búinn að lesa um kvensjúkdóma í allt kvöld. Vissuð þið að það er hægt að útskýra allt sem konur væla um vegna áhrifa hormóna. Ég veit ekki hvað þær eru að væla. Við erum líka með hormóna. Við erum dæmdir til að vakna með standpínu alla daga þangað til Viagrað hættir að virka og þær kvarta undan smá blóðsutli einu sinni í mánuði. Ég verð nú að viðurkenna að ég hef aldrei gert mér almennilega grein fyrir hvað þetta er mikið magn á mánuði. Skv. klobbabókinni minni eru þetta að meðaltali 30 ml. Það er 1/10 af stórri kók í gleri. Svo væla þær í heila viku yfir því að þær séu á blæðingum. Konur eru skrýtnar. Ég skil þær ekki. Annars er þetta fremur skemmtilegt fag. Mikil lífeðlisfræði sem mér finnst skemmtileg. Ég held ég leggi þetta nú samt ekki fyrir mig. Fæ mér frekar vinnu í fiski. :)

Boltinn
Rosalegur leikur í Manchester á laugardaginn. Vona að mínir menn taki þetta í nösina og hefni fyrir síðasta ósigur sem var 1989 (1-5). Annars er gaman að segja frá því að leikmenn Sunderland, sem voru fyrir gærkvöldið búnir að skora samtals 6 mörk á tímabilinu, skoruðu 3 mörk á Highbury og unnu 2:3 eftir að hafa lent 2:0 undir. Arsenal er greinilega algerlega hrunið og eini leikurinn sem þeir hafa unnið í næstum mánuð vannst á sjálfsmarki. Það segir meira um þetta lið en margt annað. Aumingjar.

Félag eldri borgara í San Francisco
Viðar lýsir nákvæmlega einhverri tombólu sem félag eldri borgara í SanFran hélt í vikunni. Þar spilaði amma formannsins á píanó og gjaldkeri félagsins stjórnaði sagarkvartetti eldri borgara. Þess má geta að Félag eldri borgara SanFran er eina félag eldri borgara í heiminum þar sem meirihluti félaga er samkynhneigður. Á efnisskránni voru verk eftir Hay Den sem því miður gat ekki verið viðstaddur vegna alvarlegs hjartaáfalls sem hann fékk á lokaæfingunni. Einnig voru verk eftir Beat Oven sem er bandarískur ofnaframleiðandi og French Lift sem er níræður lyftusmiður frá Ungverjalandi en báðir semja þeir tónverk á Yamaha rafmagnsorgel. Að öllu gríni slepptu held ég að einhver verði að setja sokk í útblásturinn frá Viðari svo þessi ósköp rati ekki á prent. Það væri hægt að herma það upp á hann í ellinni og það er alltaf ljótt að hrekkja gamalt fólk.

Talandi um gamalt fólk
Hafið þið tekið eftir því hvað sjónvarpsmenn eru illir. Alltaf þegar einhver verður 100 ára þá láta þeir grey fólkið alltaf syngja einhverjar barnagælur fyrir landsmenn. Svo gerir þetta fólk sig að algerum fíflum fyrir framan 200.000 manns. Af hverju er ekki fólk látið segja frá einhverju skemmtilegu, eins og t.d. hvernig á að flytja fréttir. Mér finnst áberandi hvað fréttamennska er léleg. Helmingurinn af þessu liði er hvorki talandi né skrifandi á almennilega íslensku. Hinn helmingurinn er svo undirgefinn að hann þorir ekki að bjóða viðmælendum sínum byrginn. Það þýðir að annað hvort verða viðtöl við ráðamenn rassbónun af hæstu gráðu eða þá að pólítíkusarnir rúlla yfir liðið með orðum eins og gjörla og árla og þetta útreykta pakk sem er að taka viðtalið er bara alveg út á þekju því þeir voru þunnir þegar þessi orð voru kennd í íslensku 101 í framhaldsskólanum á Útkjálka. Hálfvitar!!!

Virðing
Önni segist bera virðingu fyrir mér. Mín skilaboð til þín Önni: Sonur, ég er stoltur af þér!!! Annars er bloggið hans Önna orðið uppáhaldsbloggið mitt fyrir utan mitt eigið. Mér finnst bloggið mitt vera langskemmtilegast. Strax á hæla mínu kemur síðan Önni. Kannski er ég svona skrýtinn en mér finnst yfirleitt hundleiðinlegt að lesa spurningaliðsmannablogg. Þeir eru svo ógeðslega sögulega þenkjandi. Þeir eru líka eiginlega allir forsögulegir. Þetta eru líka mikið til íslensku- og/eða sagnfræðingar. Þeir eru svo gamalþenkjandi að meira að segja hugsanir þeirra eru rykfallnar, svo ég tali nú ekki um bloggin þeirra. Mér finnst samt gaman að kynnast hvernig gamalt fólk hugsar eins og fyrra blogg benti á. Því lít ég stundum á þessi blogg þeirra. Taka skal fram að fyrir mér er aldur hugarástand en ekki árafjöldi.

Súr brandari dagsins
Ef Golli tæki sig til og semdi lag fyrir Eurovision, mundi það þá heita Ozonlagið? (Þessi var svolítið local)

Auk þess legg ég til að Valsbragginn verði lagður í eyði. Áfram KR!!!

Ósáttur
Ég er verulega ósáttur við ákvörðun Önna um að breyta linknum mínum á síðunni sinni úr "afgamall læknanemi" í Gísli Bergmann. Hitt er miklu frumlegra. Hvort munduð þið frekar klikka á linkinn "afgamall læknanemi" eða eitthvað venjulegt nafn sem segir ykkur ekki neitt. Hver er þessi Gísli Bergmann og afhverju ætti ég að lesa bloggið hans. Það hlýtur að vera jafnleiðinlegt og nafnið. Það er oft gaman að lesa það sem gamlir, svo ég tali nú ekki um afgamlir, skrifa. Það er oft svo þröngsýnt og skemmtilegt. Einn ónefndur læknir á efri árum sagði t.d. einu sinni á morgunfundi að hann saknaði þess tíma þegar hann gat bara ákveðið fyrir sjúklingana hvað þeir ættu að gera. Sorglegt. Grunnhugmynd læknisfræði í dag gengur út á að uppfræða sjúklinga svo þeir geti tekið sjálfstæðar ákvarðanir. Það var hlegið að honum greyinu. Ef Önni þráast við að breyta þessu aftur fer ég fram á að ég fái að njóta fulls nafns á blogginu. Ég heiti nefnilega Gísli Björn Bergmann.

"Íþróttir"
Keila er bjánalegt tómstundagaman sem sumir vilja kalla íþrótt. Ef litið er á pöpulinn sem stundar þetta reglulega væri maður hins vegar fljótur að sjá að þarna er lítið um íþróttamenn heldur eru þetta yfirleitt stórir, feitir, illa lyktandi og skítugir karlar um fimmtugt sem verða að stunda þessa aumu tómstundaiðju vegna þess að þeir eru lélegir í öðrum íþróttum og Viagra virkar ekki á þá. Ef menn vilja kalla þetta íþrótt er lágmark að þeir hlaupi með kúluna á enda brautarinnar áður en þeir þeyta henni í kúlurnar eða þá að þeir sæktu kúlurnar sjálfir og stilltu upp keilunum ef svo ólíklega vildi til að þeir mundu hitta eitthvað af þeim. Ástæða þess að ég fæ allt í einu útrás fyrir keiluhatur mitt er sú að félagar mínir taka stundum upp á því að bjóða mér með í keilu. Þeir gera þau mistök yfirleitt ekki oft hver en hafa gert að gamni sínu að siga óreyndum greyjum á mig þegar kemur að boðun. Best væri samt að innlima keiluhöllina í Öskjuhlíð í íþróttafélagið Val. Það mundi fullkomna ömurleika Vals og þess að spila keilu.

Boltinn
Mínir menn klikkuðu ekki í gærkvöldi fremur en fyrri daginn og ég held að þessi Richardson-fýr eigi eftir að gera góða hluti. Skallinn var víst frekar magnaður hjá honum í gær miðað við lýsingarnar á netinu. Síðan er undrabarnið Nardiello að fá fína dóma fyrir leikinn þrátt fyrir að ná ekki að skora. Kannski er bara að koma ný bylgja af snillingum úr unglingastarfinu á Old Trafford. Það væri þá svona svipað eins og síðast þegar Giggs kom fyrstur og síðan kom halarófan á eftir Beckham, Scholes, Butt, Neville-systurnar og Brown. Þá væri þetta náttúrlega búið spil á Englandi næstu árin. Engir titlar fyrir Arsenal og Liverpool sem hvorugt er með jafnsterkt unglingastarf og United (þrátt fyrir að það sé ágætt hjá Liverpool).

Súr brandari dagsins
Ef Valur mundi stofna keiludeild væri það eina góða við hana að hægt væri að kalla hana Veilu!!!!! :) hahahaha

Auk þess legg ég til að Valsbragginn og keiluhöllin verði sameinuð og síðan lögð í eyði. Áfram KR!!! (helvítis KR-ingarnar eiga keilulið - þessu þarf að breyta)