Óþolandi?

Ég er mjög einfaldur maður. Ég ber virðingu fyrir fólki sem notar frítímann sinn til að hjálpa þeim sem eiga í vandræðum. Að stofna Facebook-síðu sem hefur það markmið að hjálpa einhverjum að berjast gegn órétti er ekki bara tímasóun fyrir mann sjálfan heldur grípur um sig einhvers konar allsherjar múgsefjun og allir sem eyða frítímanum á Facebook (í stað þess að hjálpa einhverjum t.d.) stökkva á tækifærið til að friða samviskuna og joina grúppuna. Tálsýnin, að maður hafi tekið þátt í að stöðva barnaklám, hjálpa fótalausri stúlku í Sómalíu að kaupa nýja af Össuri eða eitthvað þaðan af undarlegra, friðþægir samviskuna í nokkrar auka Facebookklukkustundir. Ég þoli þetta ekki. Ég þoli ekki keðjubréf og þetta eru ekkert annað en einhver helvítis keðjubréf. Ég verð pirraður á þessari truflun, minni sjálfan mig á að ég hjálpa fólki með því að mæta í vinnuna og styðja nokkur handvalin góðgerðarsamtök, og geng síðan berserksgang í að hunsa allt helvítis bullið sem rignir yfir mann á Facebook. Hefur fólk ekkert skárra að gera?

Stieg Larsson

Var að ljúka við síðustu bókina í þríleiknum um Lisbeth Salander, Mikael Blomkvist, Eriku Berger og félaga. Þvílíkur spennusagnahöfundur. Frábærar bækur sem ég get mælt með. Það er samt merkilegt eftir því sem maður les lengra hvað er mikið til í því að Lisbeth og Mikael eigi fyrirmyndir sínar í Línu Langsokk og Kalla Blomkvist. Snilldarleg persónusköpun og spenna frá upphafi til enda. Góð leið til að læra nýtt tungumál. Hefur hjálpað mér mikið við að læra hversdagsnorsku.

Kreppan

Ég veit ekki með ykkur hin en ég sé inn á milli alveg ótrúlega jákvæðar fréttir af heiman sem fá litla athygli. Veitti því t.d. enginn eftirtekt að skíðasvæðin í Bláfjöllum voru skv. fréttum full næstum alla daga sem þau voru opin. Fjölskyldufólk flykktist á skíði sem aldrei fyrr. Um helgina var M12 dagur í Húsdýragarðinum og hátt í 20 þúsund manns létu sjá sig. Fjölskyldur. Gæti verið að kreppan geri það að verkum að fólk gefi sér meiri tíma til að vera með sínum nánustu og sinna börnunum sínum? Ég held að þegar öll kurl koma til grafar þá muni kreppan hafa jákvæð áhrif á samfélagsmyndina heima til langtíma litið en það verður erfitt og því miður verða margir fyrir óþægindum sem bera litla ábyrgð á því hvernig fór fyrir fjármálakerfinu. Það er þó ekki hægt að líta fram hjá því að fólk verður að bera ábyrgð á þeim áhættum sem það tók sjálft. Hjá því verður ekki komist.

Fótbolti

Djöfulsins vonbrigði var frammistaða Manchester United í úrslitum Meistaradeildarinnar. Þeir voru svo lélegir að ég var ekki hið minnsta svekktur yfir tapinu. Barcelona var eina liðið á vellinum löngum stundum svo það var erfitt annað en sætta sig við að þeir hirtu dolluna. Ég er nú svo sem gallharður Barcamaður líka en það er ekkert lið sem kemur í stað MUFC hjá mér. Það jákvæða er að Ferguson er örugglega alveg brjál og hættir ekki fyrr en hann hefur bætt fyrir þetta.

Að heiman er ánægjulegt að sjá hvað deildin fer skemmtilega af stað, spútniklið, óvænt úrslit og nýjar hetjur. Alltaf gaman að því. Vona bara að mínir menn hristi af sér slenið í 1. deildinni og fari að taka stig á reglubundinn hátt.

Vinnan

Ég finn gríðarlegan mun á vinnuálaginu eftir að ég flutti mig aftur á Ríkisspítalann en það er bara jákvætt. Maður lærir gríðarlega mikið á stuttum tíma með því að einbeita sér svona að einu undirfagi í einu. Vaktirnar eru líka mun skemmtilegri því maður hefur eitthvað að gera. Við fáum flókin tilfelli frá öllum Noregi og sem dæmi má nefna að tveir af þeim sem ég svæfði í gærkvöldi komu með löngu sjúkraflugi. Annar frá Þrándheimi og hinn alla leið norðan úr Finnmörk. Það er áhugavert að sjá hvað skurðlæknarnir eru orðnir sérhæfðir og snjallir á sínu sviði. Heima er einfaldlega ekki nógu mikið af svona flóknum tilfellum til að menn geti orðið svona klárir. Það gerir auðvitað svæfinguna miklu þægilegri líka þegar skurðlæknirinn er snjall. Aðgerðirnar verða styttri, blæðingar minni og meðferðin eftir aðgerðina mun einfaldari. Hins vegar kemur næstum á hverri einustu vakt einhver sjúklingur á gjörgæsluna með einhvern gríðarlega sjaldgæfan sjúkdóm og maður getur alveg eytt hálfri vaktinni í að lesa sig til um tilfellin og meðferð sjúkdómanna. Gríðarlega frjótt umhverfi fyrir gjörgæslunörd eins og mig.

Boltinn

Það má segja að uppskera minna liða hafi verið góð um helgina. Manchester United, Barcelona og Inter Milan tryggðu sér öll meistaratitla í gær. Ég er gríðarlega ánægður með það. Nú er bara að njóta þess að halda með báðum liðunum í úrslitum Meistaradeildarinnar og geta varla verið svekktur með niðurstöðuna. Viðurkenni þó að ég mundi helst kjósa að United tæki þetta en er alls ekki viss um að það verði auðvelt að stoppa litla kvikindið hann Messi. Hann er ekki hægt.

Eurovision

Ég var að vinna í gærkvöldi og nótt og sá því ekki keppnina nema glefsur hér og þar. Horfði svo á Alexander og Jóhönnu og stigagjöfina á netinu i morgunn. Glæsileg frammistaða hjá þeim báðum og svo var stigagjöfin auðvitað aldrei spennandi. Þvílíkt burst. Jóhanna gerði eins vel og íslenskur efnahagur þoldi og getur verið virkilega stolt af frábærri frammistöðu. Ég verð að viðurkenna að ég lét hana fara í taugarnar á mér síðustu árin og fannst hún hálfgerð prímadonna án þess að hafa unnið fyrir því. Nú hefur hún þroskast bæði andlega og ekki síst hvað varðar sönginn. Það er auðvelt að hrífast af hæglátu og lítillátu fasinu og frábærum sönghæfileikunum. Hún er langt kominn með að verða mesta díva landsins. Norðmenn voru gríðarlega hrifnir af henni og fólk hefur verið að tala um hana í vinnunni alla vikuna svo það kom mér ekki sérlega á óvart að Norðmenn gæfu okkur mörg stig. Nú eru bara nokkrar mínútur í að Alexander mæti á Gardermoen og það verður spennandi að sjá hvernig móttökurnar verða hér.

Vinnan

Nú er ég byrjaður aftur á Ríkisspítalanum hér í Osló eftir þriggja mánaða heimsókn á Radiumsjúkrahúsinu sem er sjúkrahús fyrir framsækna og flókna krabbameinsmeðferð hér í Noregi. Þar svæfði ég sjúklinga fyrir aðgerðir sem mér skilst að séu ekki framkvæmdar víða annars staðar í heiminum. Gríðarlega áhugavert en ekki beinlínis einhverjar nýjungar svæfingalega séð aðrar en ég fékk tækifæri til að bæta hæfileikana í ómstýrðum ástungum á æðum. Vann mikið með ungum þýskum sérfræðingi sem er nágranni okkar hér úti í Bærum sem er nokkuð snjall með græjurnar og hefur kennt mér heilmikið um ómtækni.

Nú er ég hins vegar kominn á hjartasvæfinguna. Var svolítið heppinn að fá inn þar strax því venjulega er þetta einn af síðustu stöðunum sem menn fara á áður en þeir klára sérnámið en síðastliðna mánuði hefur verið frekar lítil nýliðun á deildinni þannig að við nýliðarnir fáum nokkurn veginn það sem okkur langar til. Svo eru vaktirnar skemmtilegri og lærdómsríkari.

Pólítík

Ekki finnst mér rauðgræna vorið lofa góðu. Flokkarnir ná ekki samkomulagi um nokkurn hlut og bjóða okkur upp á ömurlegan málefnapakka og enn síðri aðgerðapakka. Ætlum við í Evrópusambandið eða ekki? Ætlum við fyrningarleiðina eða ekki? Á að byggja Landspítala eða ekki? Á að bjarga heimilinum eða ekki? Hvað í veröldinni vitum við um hvað stjórnin ætlar að gera? Ögmundur segist ætla að vera heilbrigðisráðherra í tólf ár. Guð hjálpi íslensku heilbrigðiskerfi ef sú hótun verður að veruleika.

Boltinn

Ég er í skýjunum eftir að mínir menn niðurlægðu Arsenal á Emirates í gærkvöldi. Það er auðvitað sárt að heyra það fyrir Arsenalmenn en reynsluleysið kostaði þá sætið í úrslitum. Mér finnst reyndar svekkjandi að sjá þennan Gibbs sem einhvern blóraböggul. Færið sem Park fékk var þröngt og Almunia átti að gera mikið betur að mínu mati. Og hvar var restin af vörninni? Bara á jogginu einhvers staðar við vítateigslínu. Aukaspyrnan var svo glæsileg en góður markvörður á að verja aukaspyrnu þar sem boltinn kemur í augsýn 25 m frá marki. Þriðja markið var auðvitað glæsileg skyndisókn sem erfitt er að verjast þegar liðið sækir stíft. Vítaspyrnudómurinn fannst mér harður en kannski ásættanlegur en linkindin við Adebayor fyrir sólatæklinguna rétt á eftir í engu samræmi við hörkuna í teignum. Að öðru leyti fannst mér dómarinn standa sig vel í þessum leik. Ég verð samt að vera sammála Roy Keane að ég sakna gömlu góðu daganna þegar leikir þessara liða buðu upp á slagsmál, rauð spjöld, dramatík, pizzukast og fleira. Those where the days!!!

Magnaður leikur

Leikur Liverpool og Arsenal á Anfield í gær er einn besti leikur sem ég hef séð í áraraðir. Stórkostleg skemmtun, sérstaklega seinni hálfleikur. Svona á að spila fótbolta. Arshavin betri en ég hafði trú að hann yrði í enska boltanum. Klárt að Arsenal verða góðir á næsta ári, haldi þeir mannskapnum sínum óbreyttum eða bæti við.

Að sjálfsögðu!

Efast einhver um þetta lengur? Nú er rétti tíminn til að kýla á þetta. Skapa störf og spara peninga á LSH á einu höggi. No brainer!!!

Kosningar 2009

Ég verð að viðurkenna að aldrei hef ég verið eins ringlaður fyrir kosningar. Hingað til hef ég aldrei verið í neinum meiriháttar vafa um hvað ég á að kjósa. Stefna Sjálfstæðisflokksins hefur yfirleitt heillað mig og gerir það raunar enn en lengi hef ég verið efins um ágæti flestra þingmanna flokksins. Nú hefur að sjálfsögðu komið í ljós að sá efi var fullkomlega réttlætanlegur. Svo virðist sem heiðarlegt fólk eigi ekki upp á pallborðið í þessum flokki. Ungliðahreyfingarnar hafa í mörg ár verið keyrðar áfram með atkvæðasmölun og ber mér fyrir augu sem ekkert annað en kosningasvindl þó sjálfsagt sé það ekki þannig í laganna skilning. Mér misbauð algjörlega fyrir tæpum 10 árum síðan og hef ekki tekið þátt í ungliðastarfi flokksins síðan, fannst ég ekkert hafa þangað að sækja. Flokkurinn hefur verið að rotna innan frá síðan seint á 10. áratugnum a.m.k. og kannski lengur. Síðan koma þessi krakkagrey inn í prófkjörin og halda áfram sama djöfulsins bullinu, atkvæðasmölun og skítkasti. Skipulagðar herferðir gegn andstæðingum sínum í stað þess að byggja upp almennilega málefnalegan grunn fyrir kosningunni. Peningana fá þeir gefins frá illa innrættum peninganna mönnum sem hafa sjálfir efnast á því að taka lán og áhættur. Mútur?! Hverjum ætli þessi vesalings grey standi með þegar kemur að því að koma böndum á skúrkana. Auðvitað er inn á milli gott fólk eða í það minnsta fólk sem maður hélt að væri heiðarlegt. Ég hélt t.d. að Geir kallinn væri heiðarlegur en nú hefur komið í ljós að FL og LÍ mútuðu honum (styrktu hann/flokkinn) með 55 milljónum og enginn veit með vissu hvaðan restin kom. Í stuttu máli þá er enginn leið fyrir mig að styðja við bakið á svona löguðu. Engin leið að kjósa flokk sem eftir svona afhjúpun hefur ekki einu sinni dug í sér til almennilegrar endurnýjunnar. Ennþá sama helvítis keypta pakkið og áður, bara búið að fara í ljós og ný jakkaföt, smá í ræktina til Ágústu eða í WC. Helvítis fokking fokk!!! Eftir situr einn maður sem ég hef álit á en því miður er það ekki nóg til að kjósa flokkinn. Sá maður heitir Birgir Ármannsson.
Hvar stendur hægrisinnaður velferðarsinni þá á Íslandi. Skoðum aðeins landslagið:

Samfylkingin
Hér höfum við flokk sem er að minnsta kosti jafnspilltur og Sjálfstæðisflokkurinn þar sem fyrrum formaður hefur viðurkennt að hafa veit háum styrkjum frá Baugi viðtöku og nú hefur komið í ljós að þingmenn flokksins voru einnig keyptir að einhverju leyti. Samansafn af Evrópusinnum, félagshyggjubruðlurum og froðusnökkum. Ég hafði ákveðið álit á Ágústi Ólafi en hann var líka sá eini og er að sjálfsögðu kominn í frí frá pólítík. Ætli við sjáum hann nokkuð aftur. Formaðurinn er svo sem ágætis kerling en algjörlega vanhæfur forystumaður og eins og sagan sýnir okkur gjörsamlega ófær um að sýna aðhald. Hættulegt ætli hún að stjórna ríkisstjórn.

Vinstri grænir a.k.a. Hinn íslenski sósíalistaflokkur/Alþýðubandalagið
Það er vel hægt að gefa marxistaflokki nýtt nafn en þegar allt kemur til alls er það að sjálfsögðu stefnan sem skilgreinir flokkinn. Þrátt fyrir að reynt hafi verið að dulbúa sósíalísku stefnuna með náttúrverndarhjali getur hver einasti maður séð að um hreina sósíalíska stefnu er að ræða. Hún er svo sem góðra gjalda verð en hvernig á maður að treysta fólki til að leysa úr vandræðum þjóðarinnar þegar það þorir ekki einu sinni að koma fyrir sjónir kjósenda eins og það er klætt. Heigulsháttur ef þið spyrjið mig. Þó mega þingmenn VG eiga það að maður hefur á tilfinningunni að um heiðarlegt fólk sé að ræða. Því miður er það bara ekki nóg þegar stefnumál flokksins eru stórhættuleg fyrir þjóð í nauðum. Égmundi ekki geta horft í augun á börnunum mínum eftir 20 ár og sagt þeim að ég hafi stutt stjórn VG og Samfylkingar sem við fáum að sjálfsögðu eftir kosningar. Sjálfseyðingarhvöt landsmanna?

Framsóknarflokkurinn
Hvað er hægt að segja um Framsókn. Spilltasti og tengdasti flokkur landsins. Samansafn af hugsjónalausum framapoturum sem velja sér Framsókn af því að það er auðveldast að komast til áhrifa þar. Gamli bændaflokkur Íslands en ég held að langflestir íslenskir bændur séu löngu hættir að kjósa þá. Flestir velja Sjálfstæðisflokk eða Samfylkingu af þeim sem ég þekki, kannski einhverjir VG. Holdgervingur afturhalds og stöðnunar í íslenskri sögu í áratugi. Nýi formaðurinn algert súkkulaði og engan veginn tilbúinn í djobbið. Aldrei í lífinu kysi ég Framsóknarflokkinn.

Frjálslyndi flokkurinn
Skelfileg saga sundurlyndis og persónuárása innanbúðar. Ógeðfelld stefna í innflytjendamálum hjá ákveðnum aðilum sem ég taldi víst að yrði dregin upp í aðdraganda kosninganna en sennilega hefur tekist að koma böndum á hana. Samansafn þingmanna sem ég ber ekki nokkuð traust til. Vonlaust að kjósa þá.

Borgarahreyfingin
Ég var mjög opinn fyrir nýju framboði fyrir þessar kosningar og hef lagt mig allan fram um að vera jákvæður gagnvart þeim. Tillögur að úrbótum eftir kosningar hafa hins vegar verið barnalegar og stefnan nánast ósýnileg. Fulltrúar hreyfingarinnar sem ég hef heyrt til í besta falli verið hlægilegir. Sorglegt að ekki fáist almennilegt fólk úr þjóðfélaginu til að leggja nýju stjórnmálaafli lið. Það að þeir fái þó þetta mikið fylgi í könnunum segir manni að það hefði verið gríðarlegur hljómgrunnur fyrir almennilegu nýju framboði. Svekkjandi að það skyldi ekki koma fram.

Lýðræðishreyfingin
Ein ástæða til að kjósa hana ekki og algerlega nægjanleg: Ástþór Magnússon. Maðurinn hlýtur að vera að grínast.

Hvað kýs ráðvilltur lítill maður þá. Ekki neitt. Ég ætla að sitja hjá í þetta skiptið. Finnst það ömurlegt en veit að mér mundi finnast ömurlegra að velja einhvern þeirra kosta sem í boði eru.

Ýmislegt

Boltinn
Mínir menn voru alveg í ruglinu hérna á þriðjudaginn og ég var ekkert rosalega kátur með Nonna bróður glottandi hérna yfir leiknum en svona er þetta. Ekkert óvinnandi vígi í Portúgal og eitt mark nægir mínum mönnum ef þeir drullast til að verjast eins og menn. Ég tók hins vegar gleði mína á ný eftir leiki miðvikudagsins þar sem Barca valtaði yfir Bayern og Chelsea lagði Liverpool. Af þessum tveimur liðum hata ég reyndar Chelsea meira en ég veit líka að ég óttast þá ekki eins og Liverpool. Helvítis poolararnir eru komnir með gamla góða takið á MUFC svo það verður fínt að losna við þá úr keppninni. Ég held reyndar að þeir geti alveg tekið Chelsea 0-3 á "Brúnni" en ekki án Gerrard eins og útlit er fyrir.

Tengdó
Fékk tengdó með flugpósti á miðvikudaginn. Tíminn er mikið fljótari að líða þegar maður er með góða heimsókn og við höfum haft það gott, borðað góðan mat og túristast svoldið. Fórum upp á Holmenkollen í gær til að sjá útsýnið og ég keyrði með þau víðar um borgina til að sýna þeim ýmislegt. Fallegt veður og útsýnið yfir Oslófjörðinn var geggjað. Stefnan tekin á Framsafnið í dag og svo kannski spóka sig aðeins á Karl Johans gate þó allt sé auðvitað lokað. Síðan er tengdamamma búin að panta verslunarferð í Sandvika Storsenter á morgun. Nóg að gera og þá líður tíminn fljótt.

Pólitík
Hrikalegt ástandið á skerinu og einhvern veginn kemur mér ekki á óvart að Guðlaugur Þór sé miðdepillinn í þessu. Ég vorkenni Bjarna greyinu því hann lendir í að troða marvaðann í saurnum úr fyrirrennurum sínum en hann hefur svo sem ekki verið manna duglegastur að gagnrýna forystuna sl. ár svo kannski á hann þetta bara skilið. Ég tel fullvíst að sigur vinstri aflanna verði gríðarstór í kosningunum í vor og það er kannski bara það sem við Íslendingar eigum skilið. Djúp lægð gerð verri af hleypidómafullum dulbúnum gamaldags kommum. Ég verð að segja eins og er að ég sakna þess ekkert að búa á skerinu ef menn eins og Steingrímur J. og Ögmundur eru þeir sem Íslendingar eiga að leiða þjóðina út úr þrengingunum. Verð bara hérna úti næstu 5-10 árin þar til Íslendingar vakna og lykta af beikoninu. Ekki það að ég skil svo sem að menn vilji ekki sjálfstæðismenn í stjórn. Þeir verða fyrst að endurvinna traustið sem þeir hafa saurgað sl. ár en valkostirnir eru nú ekki álitlegir. Sennilega væri skást ef Framsókn og Samfylking næðu saman án VG og Sjálfstæðisflokks. Þá yrði kannski einhver vottur af skynsemi í athöfnum ráðamanna. Guð hjálpi Íslandi.

MACHEDA

Ole! Ole! Ole! Ole! Nei! Það var reyndar Federico "Kiko" Macheda sem bjargaði mínum mönnum í dag. Þvílík snilld. Drengurinn gjörbreytti leik Manchester United þegar hann kom inn á og allt í einu sást til manna eins og Giggs, Tevez og Ronaldo. Svo skoraði hann þetta stórglæsilega mark. Minnti nokkuð á einn lítinn sætan Norðmann sem oftar en einu sinni dró svona lagað fram úr skálminni þegar mikið lá við. Instant hero! Snillingur.

Fréttir frá Noregi

Héðan er svo sem ekki mikið að frétta annað en ég vinn og les og sef.

Boltinn
Það er landsleikjapása í deildunum og þá er auðvitað ekkert að gera annað en að horfa á landsleikina. Er að fylgjast með Norðmönnum spila við Finna. Staðan 0-1 hér í Osló eftir fyrri hálfleik en Norðmenn voru að jafna. Íslendingar og Englendingar eru að spila líka þannig að það er nóg af leikjum að fylgjast með. Áfram Ísland!!!

Fjölskyldan
Eins og flestir vita neyddist Edda til að fara aftur heim með Hildi Vöku til að vinna aðeins því lítið var í boði hér úti fyrir ófrískan Íslending. Hún ætlar því að vera heima fram í maí og kemur aftur út til mín þá. Ég tel niður dagana þar til ég sé stelpurnar mínar aftur.

Vinnan
Ég reyni auðvitað að nota tímann á meðan ég er einn til að vinna eins mikið og ég get og síðan les ég á milli. Ég hef fengið upplýsingar um næstu rótasjón hér á sjúkrahúsinu og hún er ekki af verri endanum því ég verð á hjarta- og lungnasvæfingunni. Við erum að tala um stórar hjartaaðgerðir á fullorðnum og börnum, hjartaígræðslur og svoleiðis. Verður rosalega gaman og ég er þegar farinn að undirbúa mig með lestri. Hér úti er mikið lagt upp úr því að maður lesi í kringum vinnuna og því fær maður einn dag aðra hverja viku til lestrar. Það er auðvitað ekki alltaf sem gengur upp vegna manneklu að losa mann úr vinnu en það hefur gengið vel upp á síðkastið og þá notar maður tímann auðvitað vel. Annars hefur þetta farið vel af stað hérna úti og ég er gríðarlega sáttur með að vera loksins kominn af stað í sérnáminu mínu.

Veðrið
Eftir öll snjóþyngslin fyrstu 3 mánuðina hér er allt í einu að koma sumar. Nú er hver dagurinn á fætur öðrum sólskinsdagur með hlýju veðri en næturnar eru áfram kaldar. Íslenskt maíveður ef svo má segja og mér finnst eins og ég verði að fara að lesa undir próf. Ég held að sumarið sé á næsta leyti.

Kreppan
Það er ljóst að kreppan hefur komið við okkur eins og aðra. Maður finnur t.d. fyrir því þegar maður ætlar að flytja peningana sína að heiman hingað út. Það er ekki einfalt. Hins vegar getur maður huggað sig við það að á meðan vinstri stjórnin situr heima virðist gengi krónunnar á niðurleið og það kemur sér ágætlega þegar maður er með tekjur í erlendri mynt. Ekki minnka gjaldeyrishöftin ef marka má aðgerðir síðustu daga.

Kannabis og aftur kannabis

Djöfuls rosalegur gangur er í Fíknó. Þeir loka hverri nýsköpunarsprotaverksmiðjunni á fætur annarri þessa dagana. Það er gott að einhver er að standa sig í þessari fjandans kreppu. Lögreglumenn Íslands standa upp úr sem hetjur síðustu mánaða. Frábært starf í fíkniefnamálum og fumlaus og fagleg vinnubrögð þegar tekið var á ótýndum glæpamönnum og aumingjum sem reyndu að hleypa annars nauðsynlegum og friðsamlegum mótmælum upp í vitleysu. Ofbeldi á ekkert skylt við mótmæli. Þetta fólk á heima bak við lás og slá.

Boltinn

Mínir menn í Manchester misstu flugið um leið og mínir menn í Barcelona hrukku aftur í gang. MUFC er reyndar komið í 8 liða úrslitin í Meistaradeildinni en þeir verða að girða sig í brók í deildinni. Það liggur við að 5 titlar í vor hjálpi ekki við að græða sárin eftir 1-4 tap fyrir Liverpool í leikhúsi draumanna. Það er algerlega ófyrirgefanlegt.

Stabæk hefur byrjað deildina hérna úti með tveimur jafnteflum. Fyrst heima gegn Lilleström og svo úti á móti Brann. Þeir virka svolítið skringilega fram á við enda búnir að selja tvo bestu mennina sína, þá Veigar Pál Gunnarsson og Alanzinho. Pálmi Rafn hefur komið sterkur inn og ef hann heldur svona áfram verður hann einn af bestu mönnum deildarinnar í sumar. Næsti leikur hjá þeim er heima á móti Odd Grenland á pálmasunnudag. Árni Gautur Arason leikur fyrir Odd. Það er leikur sem Stabæk á að vinna. Kannski maður skelli sér á völlinn.

Pólítíkin heima

Ég veit ekki hvar þessi hringavitleysa ætlar að enda. Hver af öðrum slá menn sig til riddara með allskyns fábjánaskap. Frambjóðendur til formanns Sjálfstæðisflokksins koma báðir úr hópi greyjanna sem fylltu þingflokkinn eftir síðustu kosningar. Formaður Samfylkingarinnar vill helst ekki vera það en lét til leiðast af því að flokkssystkin hennar gera það sem skoðanakannanir segja þeim en fylgja ekki eigin sannfæringu (ef hún þá finnst hjá Samfylkingarfólki). Formaður VG er Georg Bjarnfreðarson... nei ég meina Skallagrímur Sigfússon. Hvernig er hægt að kjósa þennan í skásta falli sæmilega skemmtikraft? Frjálslyndir eru síðan bara frjálslyndir - samansafn af fólki sem ekki á neitt sameiginlegt nema því finnst ósanngjarnt hvernig fiskveiðiheimildum er dreift á landann. Nýju hreyfingarnar eru átakanlega máttlausar. Nýja fólkið í gömlu flokkunum er úr sömu úrsérgengnu jámannaverksmiðjunum sem hefur fært okkur hvern misheppnaðan þingmanninn á fætur öðrum sl. 20 árin. Engin endurnýjun, bara ný nöfn á sama froðusnakkinu. Verði ykkur að góðu Íslendingar að kjósa þetta yfir ykkur - aftur. Ég ætla að sniðganga kosningar á Fróni þetta árið, ég nenni ekki að ganga í gegnum allt utankjörfundarbullið í sendiráðinu hérna úti til þess eins að skila auðu.

Langt síðan síðast

Ég hef nú ekki verið sérlega duglegur hérna síðustu vikurnar en þeim mun duglegri á Facebook. Það hefur auðvitað heilmikið gerst. Fyrst kom auðvitað gámurinn og ég flutti almennilega inn í nýja heimilið okkar á Arnesenga. Það hefur gengið vel að koma okkur fyrir og við erum búinn að fara í gegnum allt dótið og taka upp úr kössum. Edda og Hildur Vaka komu 14. mars og við fórum strax í að athuga með vinnu fyrir Eddu en því miður reyndist ómögulegt að fá vinnu í svo stuttan tíma svo við ákváðum í síðustu viku að Edda færi aftur heim að vinna fram í maí og Hildur Vaka fer auðvitað með henni. Þær byrja báðar aftur á Grænuborg á mándudaginn. Ég er auðvitað ekki glaður með að missa stelpurnar mínar frá mér aftur en nú er ákveðinn tímarammi á aðskilnaðnum svo það gerir það auðveldara. Ég skutla þeim á flugvöllinn milli vakta á morgun. Frá og með föstudeginum er ég svo kominn í langt páskafrí því ég vinn ekki aftur fyrr en ég tek næturvaktina á þriðja degi páska. Nonni bróðir kemur til Noregs á Pálmasunnudag og verður í hálfan mánuð og síðan koma tengdaforeldrar mínir í heimsókn um páskana sem verður auðvitað frábært. Síðan er það bara lestur, vinna, svefn og hreyfing hjá mér í átta vikur þangað til stelpurnar mínar koma aftur með Möggu mágkonu með sér þann 23. maí.

Mínir menn

Allir sem þekkja mig vita að mínir menn hafa verið Manchester United, Barcelona og Víkingur. Nú bætist að sjálfsögðu Stabæk við en þeir eru stærsta liðið í Bærum þar sem við búum og heita raunar eftir hverfi hér í Bærum. Þeir eru ríkjandi Noregsmeistarar og nokkrir Íslendingar hafa spilað fyrir liðið. Helgi Sigurðsson, Tryggvi Guðmundsson, Pétur Marteinsson, Marel Baldvinsson, Veigar Páll Gunnarsson og nú síðast Pálmi Rafn Pálmason sem enn spilar fyrir liðið.

Ég var einmitt að horfa á norska "góðgerðarskjöldin" þar sem Stabæk mætir Vålerenga. Honum lyktaði 3-1 fyrir Stabæk. Pálmi skoraði þriðja markið með glæsilegu skoti úr teignum, tók boltann á lofti og setti hann í markhornið. Hann er búinn að eiga góðan leik. Ég er ákveðinn í að vera duglegur að draga mæðgurnar með mér á völlinn enda spila þeir á glænýjum glæsilegum leikvangi á Fornebu. Heija Stabæk!!!

The Curious Case of Benjamin Button

Horfði á þessa mynd í gær. Hún var ágæt en ég get ekki sagt að mér finnist hún eitthvað meistaraverk. Skil ekki hvernig hún fékk allar þessar Óskarstilnefningar. Ágætis afþreying í besta falli.

Kominn heim til Bærum

Þá er ég kominn heim eftir góða ferð til Stavanger. Kúrsinn var frábær og ég lærði mikið á þessum 5 dögum. Næst ætlaði ég að taka kúrs hér í Osló í lok apríl en það er ekki víst að ég fái inn á hann. Sótti svo um þann þriðja sem fer fram í Tromsø í byrjun maí. Nóg að gera.

Ég kom sem sagt heim á föstudagskvöldið eftir töluvert ferðalag. Fyrst gekk ég frá hótelinu á umferðarmiðstöðina í Stavanger. Þaðan tók ég flugrútuna til flugvallarins í Sola. Síðan var það flugið til Gardermoen og svo fluglestina í gegnum Osló til Sandvikastöðvarinnar og þaðan tók ég svo leigubíl heim því strætóinn minn sem fer á klukkutíma fresti fór 2 mínútum áður en lestin stoppaði í Sandvika og ég nennti ekki að bíða í klukkutíma. Í gær sótti ég svo bílinn hans Nonna bróður í viðgerð og fór í leiðangur að kaupa mér snjóskóflu til að moka snjónum frá nýja húsinu. Hana vígði ég svo með því að moka snjó í 2 tíma í morgunn en er samt ekki hálfnaður með það sem ég þarf að moka áður en búslóðin kemur. Held því áfram á morgun og hinn.

Hlaup

Ég er búinn að vera frekar duglegur að hlaupa hér í Stavanger og á mánudag og þriðjudag tók ég 7,6 km hring í kringum Mosvatnet en ákvað að taka mér frí í gær. Í kvöld ákvað ég að taka 15,4 km hring í kringum Stokkavatnet sem er annað vatn hérna í Stavanger. Geggjuð hlaupaleið í frábæru veðri. Nú er ég þreyttur.

Stavanger

Kúrsinn sem ég hef verið á er annar af tveimur grunnkúrsum í svæfingalæknisnáminu hér í Noregi. Námið er fremur fastmótað hér og liður í því er að maður verður að taka nokkra skyldukúrsa og nokkra valkúrsa. Þessi fjallar um endurlífgun, sérhæfða endurlífgun, sjúkraflutninga á landi og í lofti, endurlífgun barna og nýfæddra, móttöku slasaðra og alvarlega veikra og síðan er farið yfir grundvallaratriði í gjörgæslumeðferð. Hefur verið býsna góður kúrs og næstum allt hefur verið mjög lærdómsríkt. Borgin er líka mjög heillandi með líflegum miðbæ við höfnina með fallegum gamaldags krám og matsölustöðum í bland við nýtískuveitingahús sem eru innréttuð í gömlum pakkhúsum. Hér er líka fræg dómkirkja sem stendur alveg við hótelið mitt. Síðasti dagurinn er svo á morgun og ég flýg seinni partinn aftur í tóma kalda húsið í Bærum sem bráðum verðum fullt af búslóðinni okkar. Fæ hana á þriðjudaginn.

Elgir í Bærum

Fyrstu kynni mín af elgjum hér í Noregi áttu sér stað í gærkvöldi. Ég fór þá út að hlaupa og var á ferðinni í skóginum fyrir ofan nýja heimilið okkar í Bærum og allt í einu sá ég elgskýr (heita það ekki örugglega kýr?) með stálpaðan kálf. Ég hef einhvern tíma verið varaður við að þetta séu stórhættulegar skepnur en held reyndar að það hafi átt sérstaklega við um tarfana. Alla vega voru þessi tvö óttalega huglaus og fóru undan mér á hlaupum þar til annar gaur með sultuhund kom á móti þeim á stígnum. Þá sneru þau við og komu á móti mér en þorðu ekki fram hjá svo enn sneru þau við. Þá vildi svo til að kýrin tók strikið fram hjá manninum með hundinn sem hafði vikið af stígnum en kálfurinn var of hræddur við sultuhundinn sem gelti eins og brjálaður. Hann varð því viðskila við móður sína og hljóp eitthvað út í buskann af stígnum og yfir akur sem var að sjálfsögðu á kafi í snjó eins og allt annað í Bærum. Ég hljóp áfram heim og prísaði mig sælan eftir fyrstu kynni mín af þessum stórhættulegu skepnum.

Manchester United Deildarbikarmeistarar

Glæsilegur sigur hjá mínum mönnum þó þeir þyrftu framlengingu og vítaspyrnukeppni til. Ég var sérstaklega ánægður með yngri strákana. Darron Gibson var sterkur á miðjunni, Jonny Evans spilaði frábærlega í vörninni og Foster var traustur í markinu. Welbeck fékk úr litlu að moða frammi og sást varla. Ég held samt að mestu vonbrigði dagsins hafi verið ömurleg frammistaða hjá Nani. Sigurinn var sanngjarn að mínu mati en auðvitað er aldrei sanngjarnt að sigra í vítakeppni.

Stavanger

Þá er maður kominn til Stavanger. Ákvað að drepa aðeins tímann á meðan ég bíð eftir mæðgunum, búslóðinni og bílnum og fara á fyrsta kúrsinn í svæfinganáminu. Hann er sumsé í Stavanger eða Stafangri eins og Íslendingar kjósa að kalla borgina. Það kom mér gríðarlega á óvart að koma úr öllum snjónum í Osló og í hálfgert vor hérna. Sex gráðu hiti og ekki eitt einasta snjókorn. Strákurinn í móttökunni sagði mér að hér snjóaði mjög sjaldan og snjórinn stoppaði yfirleitt stutt. Ég er strax orðinn mjög hrifinn af þessari borg. Snyrtileg og falleg, byggð meðfram ströndinni og á mörgum eyjum. Hér er líka mikið af vötnum og tjörnum og mikið hægt að stunda útivist inni í borginni. Skrifa meira þegar ég hef skoðað meira en fótboltapöbbana og Subway.

Íbúðin seld

Þetta eru nú svo rosalegar stórfréttir að þær fá alveg sérstaka færslu. Við seldum íbúðina í gær. Þurftum auðvitað að slá verulega af ásettu verði en við erum sátt við niðurstöðuna. Við vorum svo sem ekki tilneydd að selja en það er ágætt að þurfa ekki að hafa áhyggjur af einhverri íbúð heima á Íslandi. Nýi eigandinn er heppinn því okkur hefur liðið alveg gríðarlega vel í Hólmgarðinum og hefði íbúðin ekki verið svona lítil hefðum við vel getað hugsað okkur að búa áfram í þessu einstaka húsi. Við eigum eftir að sakna okkar frábæru nágranna úr Hólmgarðinum.

Fréttir

Nú hef ég ekki verið sérlega duglegur að blogga en ætla að bæta úr því núna

Íslandsferð
Eins og þið vitið flest var ég heima á Íslandi frá 13.-22. febrúar. Við Edda notuðum tímann vel til að pakka búslóðinni í gám, hitta fjölskyldu og vini og sýna áhugasömum íbúðina okkar. Þetta var mikið púsluspil og stress en gekk á endanum.

Flutningar
Eftir mikið drama fór gámurinn í skipið í gær og er á leiðinni til okkar. Við uppgötvuðum okkur til mikillar skelfingar að gámurinn stóð enn við Hólmgarð á miðvikudagskvöld en skv. heimasíðu Samskipa þarf hann að vera kominn kl. 17 á miðvikudegi niður á höfn til að ná skipinu sem leggur úr höfn á Íslandi á fimmtudögum. Við fengum að sjálfsögðu sjokk því ég það var umtalað við Samskip að gámurinn yrði sóttur á mánudeginum enda ekki huggulegt að hafa hann fyrir utan fjölbýlishús lengur en nauðsyn krefur. Þetta var þá allt partur af planinu hjá Samskip. Nota bílastæði úti í bæ til að geyma gáminn. Aðalatriðið er þó að gámurinn fór í skipið og kemur til Noregs í lok næstu viku. Stefnum á að afferma þriðjudaginn 11. mars.

Veikindi
Eftir allt stressið heima hlaut eitthvað að láta undan. Ég var hundslappur við komuna hérna út en dreif mig í vinnuna á mánudag. Veiktist svo á mánudagskvöld og lá þriðjudag og miðvikudag heima. Er að skríða saman en ekki orðinn alveg góður.

Húsið
Ég fékk húsið afhent á miðvikudag, fjórum dögum á undan áætlun. Það passaði eigendum betur því þau eru að flytja til Spánar og ég er auðvitað feginn líka. Ég flutti af Stensberggötu í gærkvöldi og svaf fyrstu nóttina á Arnesenga sl. nótt. Það var kalt og einmanalegt að sofa í galtómu húsinu einn en ég finn á mér að okkur á eftir að líða vel þarna og það verður gaman að fá gesti í gestaherbergið. Ég prufukeyrði húsið svolítið í gærkvöldi, þvoði þvott, kveikti upp í arninum og fór í sturtu. Allt virkaði fínt.

Hjólreiðar
Nú lengist aldeilis leiðin í vinnuna. Það verða tæpir 14 km hvora leið út apríl en eftir það verða það 18 km hvora leið. Ég fór þetta í fyrsta skipti í dag og var rétt rúmar 50 mínútur á leiðinni. Sé fyrir mér að vera 40 mínútur þegar færðin og formið skána og þá 50 mínútur á Ríkisspítalann.

Meistaradeildin
Ég er ánægður með frammistöðu minna manna á San Siro á þriðjudag. Þeir voru óheppnir að vinna ekki leikinn. Ég skil hins vegar ekki hvernig svona dapurt lið eins og Liverpool getur staðið sig svona vel í Meistaradeildinni á móti sterkustu liðum heims. Síðan geta þeir ekki neitt í úrvalsdeildinni. Ótrúlega undarlegt lið með ótrúlega undarlegan þjálfara.

Stavanger
Ég fer á fyrsta kúrsinn í svæfinganáminu í næstu viku. Hann er í Stavanger en mér skilst að það sé Houston þeirra Norðmanna þ.e. olíuborg. Hún var menningarborg Evrópu í fyrra og þar er víst margt flott að skoða. Ég er í það minnsta búinn að kynna mér hlaupaleiðir þar en ég hef ekki farið út að hlaupa síðan 31. janúar. Nú ætla ég að bæta úr því. Verð í Stavanger frá sunnudegi til föstudags. Tek svo vakt á sunnudegi og mánudegi og fæ vonandi gáminn á þriðjudegi.

Noregur trekkir
Tvær bekkjarsystur mínar úr læknadeildinni hafa ákveðið að reyna fyrir sér í Noregi. Friðný hefur störf á barnadeild Ullevålsjúkrahússins á mánudaginn en Sunna (Bella) kemur með haustinu og ætlar að reyna fyrir sér í háls-, nef- og eyrnalækningum, sennilega í Drammen. Alltaf gaman að fá fleiri Íslendinga, sérstaklega þegar það eru svona vönduð eintök.

Íbúð

Þá er hægt að segja frá því hér að við höfum tryggt okkur glæsilegt endaraðhús í Bærum að leigu til tveggja ára. Það er staðsett í Skui, rétt utan við Íslendinganýlenduna í Vøyenenga. Set inn myndir hér fyrir áhugasama.

Eurovision

Ég verð að segja að það kom mér verulega á óvart að sjá Jóhönnu Guðrúnu í Eurovision-forkeppninni í kvöld. Allt í einu getur bara litla óþolandi barnastjarnan sungið eins og engill þetta frábæra lag. Við Edda sátum bæði hérna heima í stofu og misstum andlitið. Það verður ekki amalegt að senda eina ljóshærða og huggulega í Eurovision. Það verður kannski smásjokk fyrir Evrópubúa að bomban geti sungið líka en það hlýtur að venjast. Mér fannst líka flott lögin hjá Ingó og Edgari Smára en restin var frekar slöpp að mínu mati.

Vondur dagur

Átti einn versta d sem ég man eftir í gær. Þannig er að ég ætlaði að fá lánaðan bílinn hjá Nonna bróður og hugðist sækja hann fyrir vinnu í gærmorgunn. Þegar ég ætlaði að starta bílnum var hann rafmagnslaus og ég hef líklega gleymt að slökkva ljós í honum tveimur dögum áður. Við því var lítið að gera því ég átti að mæta í vinnuna eftir 25 mínútur í 5 km fjarlægð. Komst á réttum tíma í vinnuna en þetta var fyrsti dagurinn í vinnunni sem ekki var skemmtilegur af ýmsum orsökum. Ég fór svo strax eftir vinnu með Geir að reyna að starta bílnum með köplum en geymirinn var svo dauður að hann fékk ekki nógan straum úr Geir. Ég fékk því far með honum út til Bærum til að sækja nokkra pakka á pósthúsið. Var síðan boðinn í mat hjá þeim hjónum en Inga hafði gert frábæran pastarétt úr Silfurskeiðinni. Þetta var það eina sem var gott við gærdaginn, þ.e. að njóta matarins með góðum vinum. Hvað um það. Geir skutlaði mér síðan á lestarstöðina í Sandvika og ég tók lestina niður til Osló og ætlaði síðan að taka neðanjarðarlestina upp á Ríkisspítala þar sem ég hafði mælt mér mót við Håkon vin hans Jóns Braga til að gera aðra tilraun með kapla. Það gekk ekki heldur. Ég hafði hins vegar að ráði JB gengið í NAF (FÍB þeirra Norðmanna) í gærkvöldi og í morgunn þegar ég vaknaði mælti ég mér mót við bílakall frá þeim til að athuga með bílinn og draga hann á verkstæði ef við fengjum hann ekki í gang. Sá fyrsti kom kl. 11:30 en startbatteríið hans var ekki nógu hlaðið svo það dugði aðeins til að bíllinn startaði aðeins en fór ekki í gang. Ég þurfti því að bíða í aðra 2 tíma eftir einhverjum vanari gaur sem kom svo kl. tvö og reddaði málunum á 5 mínútum. Ég keyrði síðan bílinn í hálfan annan klukkutíma til að hlaða geyminn og vona að það hafi verið nóg til að bíllinn fari í gang í fyrramálið.

Heimferð
Ég fer síðan beint af vaktinni í fyrramálið að láta athuga með geyminn fyrir gamla og svo er það bara að sækja farangurinn og brenna á flugvöllinn. Verð með íslenska símann minn heima ef einhver þarf að ná í mig.

Menn sem hata konur

Ég skrifaði fyrir nokkru að ég væri að lesa bók með þessu nafni eftir Stieg nokkurn Larsson sem var sænskur blaðamaður sem skrifaði að mestu fyrir skúffuna. Hann lést langt um aldur fram áður en bækur hans voru gefnar út en hafði lokið þremur í flokki sem stóð til að innihéldi tíu bækur um blaðamanninn Mikael Blomkvist og félaga hans. Ég lauk við fyrstu bókina fyrir rúmri viku og hún er ein besta sakamálasaga sem ég hef lesið lengi. Nú hef ég lokið við þriðjung af bók númer tvö og hún er ennþá betri. Mæli með þessum bókum fyrir þá sem vilja góðan krimma á náttborðið.

Scolari og Adams reknir

Það kom mér nú ekki sérlega á óvart að þessir tveir fengu að fjúka eftir helgina. Abramovich er nú ekki beinlínis þolinmóðasti liðseigandi í Evrópu og Portsmouth gat ekki neitt undir stjórn Tonys gamla. Ég á eftir að sakna Scolaris úr enska boltanum. Með honum hverfur ein mannlegasta hlið enska knattspyrnunnar - nefnilega knúsið.

Ótrúlegir fábjánar

Það er ótrúlegt að lesa skrif bankamanna um þessar mundir. Hver af öðrum skrifa þeir greinar í blöðin til höfuðs Seðlabankanum og bankastjórunum þar. Nú í dag má lesa grein eftir Sigurð Einarsson fyrrum stjórnarformann Kaupþings sem verður að teljast einn af aðalskúrkunum í aðdraganda efnahagshrunsins á Íslandi. Sigurður tekur fram mörg afglöp sem hann telur gagnrýniverð í starfi Davíðs sem formanns bankastjórnar Seðlabankans.
Gagnrýnin á að miklu leyti rétt á sér en Sigurður gleymir bara einum stórum punkti. Hann hefði átt að byrja á að gera lista um sjálfan sig áður en hann hófst handa við að kasta grjóti úr glerhúsinu sínu. Að skýla sér á bak við það að hrun eins aðalsamkeppnisbankans á Íslandi hafi orsakað hrun Kaupþings ber auðvitað vitni um hversslags svínarí átti sér stað í þessum ógeðfelldu fyrirtækjum áður en hrunið átti sér stað. Maður hefði haldið að hrun eins aðalsamkeppnisaðilans hefði jákvæð áhrif á rekstur fyrirtækisins en sökum þess hversu mikið bankarnir höfðu fjárfest í hvors annars spilaborgum hrundu auðvitað allar spilaborgirnar eins og Domino-kapphlaupið sem ég gaf Helga Hrafni bróðursyni mínum í afmælisgjöf um daginn.
Sigurður skrifar síðan undir að hann sé með meistaragráðu í hagfræði og hafi starfað í bönkum í Evrópu um tveggja áratuga skeið. Mér er spurn: Við hvaða háskóla tókst þessum vanvita að næla sér í meistaragráðu og hversu vitlaus getur maður verið sem vinnur í banka í 20 ár og lærir næstum ekkert sem að gagni kemur þegar harðnar á dalnum. Stundum er bara betra að þegja og láta fólk halda að maður sé vitlaus en að opna munninn (eða í þessu tilfelli skrifa grein) og sannfæra alla um hversu mikill brain-donor maður er.
Það eina sem ég er sammála Sigurði um er að auðvitað væri réttast hjá Dabba kóng að víkja - ef ekki vegna afglapa í starfi þá vegna þess að almenningur í landinu hefur ekki lengur trú á stjórn Seðlabankans. Það sama á hins vegar við um alla sem sátu í stjórnum gömlu bankanna og meginþorra þingmanna og ráðherra. Þegar allt þetta gerspillta og húðlata pakk hefur axlað ábyrgð sína get ég kannski hugsað mér að flytja heim til Íslands.

Áhugasamir geta lesið grein Sigurðar hér.

Kuldi og snjór

Þetta er búin að vera fín helgi. Hún byrjaði eiginlega á fimmtudaginn með árlegri kampavínsgleði á Ríkisspítalanum. Ég átti vaktina nóttina áður en það var mín fyrsta vakt hér í Noregi. Svolítið að gera en ekkert í líkingu hvernig það var stundum á Landspítalanum. Það er víst meira svoleiðis þegar ég kem inn á Ríkisspítala. Það var þrusustuð og mikið kampavín í boði. Eftir veisluna var stefnan sett á bar sem heitir Lorry sem er einskonar vinnubar svæfingardeildarinnar hér. Þar var drukkið aðeins meira en ég dreif mig heim um tíuleytið vegna þreytu eftir vaktina.

Svaf síðan vel um nóttina og mætti til vinnu á föstudagsmorgunn. Þá bauðst mér að taka vaktina aðfaranótt laugardagsins sem ég og þáði. Ég vann þannig frá hálfátta á föstudagsmorgunn (vaknaði kl. 6) til kl. 10 á laugardagsmorgunn en það var rólegt og ég gat sofið heilmikið um nóttina.

Á laugardaginn var ég svo boðinn í mat til vinar hans Nonna bróður. Ég lenti í rosalegum vandræðum á leiðinni því lestinni minni seinkaði um klukkutíma vegna snjóa og ég var því næstum 45 mínútum of seinn í boðið. Á boðstólnum var þýskur matur með snaffs og bjór og þar var setið við drykkju til að verða 3 um nóttina. Ég var reyndar ekki mjög liðtækur í drykkjunni en sat með fólkinu fram á nótt. Ég fékk síðan að gista hjá þeim og tók lestina heim á sunnudagsmorgunn. Þá var loksins hætt að snjóa eftir næstum tveggja sólarhringa snjókomu. Um nóttina hafði fallið næstum 30 cm jafnfallinn snjór. Ótrúlegt að upplifa svona snjókomu í logni því heima er alltaf kolvitlaust veður þegar snjóar svona mikið.

Í gær tók ég það svo rólega. Horfði á leikinn og las svolítið og fór svo snemma í háttinn til að verða upplagður í dag. Nú eru bara 4 daga þar til ég kem heim og ég get varla beðið. Edda er byrjuð að setja ofan í kassa og við ætlum að nota þessa viku sem ég er heima til að klára það og setja í gáminn. Það verður stuð. Svo er það bara Heija Norge!

Mr. Manchester United

Það hafa margir góðir knattspyrnumenn gert tilkall til þessa titils en það er líklega enginn betur að honum kominn en Ryan Giggs. Að hugsa sér að það eru næstum 18 ár síðan hann lék sinn fyrsta leik fyrir Rauðu djöflana og hann hefur verið fastamaður í byrjunarliðinu í sautján ár. Hann sýndi það enn og aftur í leiknum í gær hvað hann er frábær leikmaður. Liðið þarfnaðist töfra til að vinna frábært lið West Ham og Giggs hristi fram úr skálminni enn eitt snilldarmarkið - og það var með hægri. Sá einhvers staðar að hann hefur ekki skorað með hægri fyrir United í 12 ár. Metin halda áfram að falla varðandi mörkin sem þeir fá á sig. Nú held ég að Van der Saar sé búinn að bæta öll möguleg met í ensku deildarkeppninni og mörg af metum Bretlandseyja. En það má ekki gleyma því að það eru fleiri sem gera það að verkum að mínir menn fá ekki á sig mörk. Vörnin er ótrúleg og í gær áttu Carrick og Scholes ekki síður heiðurinn að enn einni stórframmistöðu varnarinnar. Ótrúlegt að sjá Giggs og Scholes hokna af reynslu og virðingu hlaupa eins og fábjána á eftir hverri einustu blöðru sem kemur nálægt þeim. Liðið í ár er frábært og það sem er ennþá ánægjulegra við þessa glæsilegu frammistöðu að það eru í kringum 18 leikmenn sem hafa skilað henni. Meiðsli hafa þjakað liðið í allan vetur og samt eru þeir að spila eins og meistarar. Enda eru þeir langbestir.

Það var ánægjulegt að sjá dapra frammistöðu hinna toppliðanna. Chelsea og Arsenal náðu bara jafntefli gegn mun lakari liðum og liverpoolmenn voru ljónheppnir að fá öll stigin á móti Portsmouth. Ég held að ekkert þessara liða eigi möguleika að hirða titilinn af mínum mönnum eins og staðan er í dag.

Vaktin
Vakt númer tvö sl. nótt. Það var dálítið að gera fram eftir kvöldi en svo róaðist það og ég náði að sofa svolítið í nótt. Nú þarf ég að hjóla heim í gríðarmiklum snjó því nú hefur snjóað næstum sleitulaust í sólarhring hér. Gröfukarlarnir hérna eru reyndar mun duglegri að moka en heima svo göturnar eru auðar mestan partinn af deginum en það verður gaman að sjá hversu oft ég dett á leiðinni heim.

Tölvan
Ég endaði með því að gefast upp fyrir Trójuvírusnum sem hefur heltekið tölvuna mína. Náði að bjarga því út úr tölvunni sem er ekki auðvelt að bæta og setja það á harða diskinn og ætla svo að fá vana menn í að strauja tölvuna þegar ég kem heim í næstu viku. Nú eru bara sex dagar þar til ég kem heim og fæ að sjá stelpurnar mínar aftur. Svo er bara að setja í gáminn og flytja út. Ekki eftir neinu að bíða held ég enda ætlar Edda að reyna að vinna eitthvað með vorinu. Planið er að hún komi til Noregs í byrjun mars en við fáum húsið afhent um mánaðarmótin febrúar/mars. Þá flyt ég sennilega út eftir með það litla sem ég á hér og reyni að fá lánaða dýnu hjá bóngóðum nágrönnum.

Boltinn
Mikilvæg þessi helgi í boltanum. Liverpool og Chelsea spila í dag og svo United og Arsenal á morgun. Mínir menn hafa oft lent í vandræðum með West Ham en oftast hefur það sloppið fyrir horn. Vonum að það verði svoleiðis á morgun. Ég held að bæði Liverpool og Chelsea tapi stigum í dag en það er kannski mest óskhyggja.

Pólítík, húsaveiðar, boltinn o.fl.

Húsaveiðar
Við fengum húsið sem við vorum svo hrifin af. Það er 133 fm raðhús í Bærum með bílskúr og æðislegum sólríkum garði. Við erum þvílíkt ánægð með þetta allt saman. Það besta er að aukaherbergið er mjög stórt þannig að fólk þarf ekki að vera hrætt við að koma í heimsókn. Setjum inn myndir á síðuna hennar Hildar Vöku þegar við erum flutt inn.

Pólítík
Ný ríkisstjórn tekur aldeilis til hendinni. Búið að reka mann og annan strax í fyrstu vikunni og seðlabankastjórnin á leiðinni út. Ég get ekki sagt að ég sé beinlínis hissa eða ósáttur við ráðstöfunina en það verður forvitnilegt að sjá hvaða áhrif það hefur út í þjóðfélagið. Fyrstu skoðanakannanir sýna að þjóðin er ekki viss um nýju stjórnina - Sjálfstæðisflokkurinn er aftur orðinn stærstur og ef mér skjátlast ekki mun hann bara auka fylgi sitt á komandi mánuðum. Ekki sé ég fyrir mér að auðvelt verði að kjósa nokkurn af gömlu flokkunum nema með mikilli endurnýjun í mannskap.

Boltinn
Úrslitin um helgina voru mér að skapi. Ég hef meiri áhyggjur af Chelsea í vor en Liverpool og því er ég sáttur við sigur drengjanna frá Merseyside. Það er fínt að toppliðin tapi stigum á móti hvoru öðru. Best hefði auðvitað verið jafntefli en það var skárra að poolararnir sigruðu því þeir hafa sögu um að springa á limminu en Chelsea er yfirleitt sterkt seinni part tímabils.

Helgarpælingar

Ég skrifaði svo mikið á fimmtudaginn að ég ætla að hafa þetta stutt í dag.

Húsaveiðar
Ég fór og kíkti á húsið sem ég sagði frá á fimmtudaginn í gærkvöldi. Þar býr Norðmaður sem er giftur kínverskri konu í nýuppgerðu endaraðhúsi. Ég varð strax stórhrifinn og við ætlum að gera tilboð á mánudagsmorgunn. Læt ykkur vita hvernig það gengur.

Pólítík
Það er grátbroslegt að fylgjast með ástandinu heima. Norðmenn hafa heilmikla samúð með okkur en það endist nú ekki lengi með þessu áframhaldi.

Hreyfing
Tók rúma 12 km á Bygdö í dag. Svolítið dapurleg frammistaða en tímarnir eru samt að skána og astminn og hnén eru að stríða mér. Líður samt vel á eftir og ætla að þrífa aðeins í dag og þvo þvotta. Svo er stefnan sett á að taka annað hvort stóran hjólahring eða 15-18 km hlaup á morgun. Sjáum í hvernig stuði ég er.

Langt síðan síðast

Það er heldur betur búið að gerast ýmislegt síðan ég settist síðast niður til að blogga.

Húsnæðisleit
Ég er búinn að vera á fullu að skoða hús. Skoðaði tvö á fimmtudaginn fyrir viku eins og ég hef áður sagt frá og skoðaði síðan eitt mjög stórt og flott raðhús á mánudag og síðan þrjár íbúðir í gær. Við vorum eiginlega búin að ákveða að bjóða í raðhúsið sem mér fannst svo fínt fyrir helgi en í morgunn áður en ég sendi tilboðið ákvað ég að kíkja einu sinni enn á finn.no og athuga hvort eitthvað hefði bæst við og þá var húsið sem við erum búin að vera að leita að komið á netið. Við erum þvílíkt spennt og ég er að fara að skoða á morgun. Ef allt gengur upp þá ætti þetta að vera klappað og klárt um leið og ég fæ kennitöluna sem ég vona að verði á morgun eða strax eftir helgi. Skrifa örugglega um helgina hvernig þetta fer á morgun.

Stjórnmálin
Ég held ég láti vera að tjá mig um þessa fábjána sem við í sameiningu kusum öll yfir okkur í síðustu kosningum. Ég held ég láti duga að segja að ég er sannfærður um að við séum að fara úr öskunni í eldinn. Það eina jákvæða við þetta er kannski það að við fáum almennilega endurnýjun í flokkana í vor en ekki bara í Sjálfstæðisflokk og Samfylkingu. Ég spái því að tíminn fram að kosningum verði litaður sömu stjórnarkreppu og Reykvíkingar þurftu að þola í kringum þarsíðustu áramót. Það verður athyglisvert að sjá hvernig Jóhanna klárar sig forsætisráðherrastólnum en hún hefur verið góður félagsmálaráðherra og líklega eini ráðherrann sem hefur gert eitthvað af viti síðan í október. Eins vil ég segja að mér finnst synd að Ágúst Ólafur skuli hverfa af þingi en mér hefur fundist gaman að fylgjast með honum og ég er viss um að ef hann nær frama í pólítík eftir endurkomuna þá mun ég hugleiða að kjósa hann. Ég lái honum þó ekki að vilja ekki taka þátt í þessum vinstri græna skrípaleik.

Fótboltinn
Mínir menn eru á rosalegri siglingu á meðan hin liðin keppast við að gera gloríur. Chelsea virðist reyndar vera að ná upp ágætis formi en ég held það sé of seint. Van der Saar og strákarnir í vörninni hafa verið frábærir upp á síðkastið og verðskulda metið sem þeir settu í fyrradag. Nefnilega að halda hreinu ellefta leikinn í röð og bæta þannig met Chelsea en auk þess hefur enginn markmaður í sögu ensku úrvalsdeildarinnar haldið hreinu marki jafn lengi. Mér finnst samt frammistaða Michaels Carrick í síðustu leikjum standa upp úr. Frábærar sendingar hans hafa skapað ótal færi og nokkur mörk auk þess sem vinnusemin og dugnaðurinn á miðjunni skilar sér í betri varnarleik fyrir aftan hann. Scholes og Giggs hafa einnig verið magnaðir þrátt fyrir að vera komnir fast að áttræðu auk þess sem Tevez og Berbatov hafa verið baneitraðir saman frammi. Ronaldo er líka að koma til eftir að hafa farið rólega af stað í haust og hann var mjög ógnandi á móti WBA á þriðjudag. Ég held að það verði í það minnsta tveir titlar í vor með þessu áframhaldi en þeir gætu orðið fjórir.

Trójuhestur/-vírus
Ég fékk einhvern helvítis Trójuvírus í tölvuna í gær og var í allt gærkvöld að reyna að vinna bug á honum. Hann er enn að stríða mér en ég er búinn að keyra SpyBot, WindowsDefender og McAfee vírusvörnina trekk í trekk og losna alltaf við meira og meira. Held að hann hafi ekki náð að senda út tölvupósta en þið varið ykkur ef þið fáið póst frá gislibe@internet.is því það netfang nota ég sjaldan þó ég hafi það uppsett í Outlook.

Megrun
Ég er nú ekki í aktífri megrun hérna úti en hef reynt að halda áfram með heilsuátakið. Ég hef ekki getað farið eins mikið út að hlaupa og ég hefði viljað vegna eymsla í hnénu og erfiðra veðurskilyrða. Auk þess hef ég verið tvo daga í vikunni fram eftir kvöldi að skoða íbúðir. Reyni þess í stað að hjóla aðeins aukalega en ætla að reyna að hlaupa um helgina bæði laugardag og sunnudag ef ég verð í lagi í hnénu. Ég er nú samt búinn að léttast um hálft þriðja kíló síðan um áramót.

Nýr vinnustaður
Byrjaði á Radiumhospitalet á mánudaginn og líkar vel. Þarna eru framkvæmdar flestar meiriháttar krabbameinsaðgerðir í Noregi þó heilmikið sé líka gert á stóru landshlutasjúkrahúsunum. Þarna er verið að gera aðgerðir af stærðargráðu sem ég hef ekki vanist heima þar sem verið er að skera í mörg líffæri í sömu aðgerð í þeim tilgangi að lækna fólk af krabbameini eða í það minnsta halda þeim að mestu í skefjum. Aðgerðirnar eru oft langar og erfiðar og algengt er að þær standi í þrjár til átta klukkustundir og stundum lengur. Ég er búinn að svæfa fyrir tvær svona risaaðgerðir alveg upp á eigin spýtur en sérfræðingur hefur verið á bak við mig ef eitthvað kemur upp á. Hér er gert ráð fyrir að maður hafi töluvert mikla reynslu og maður hefur heilmikið frjálsræði í ákvarðanatöku. Það er gert ráð fyrir að maður sé lesinn í fræðunum en síðan er manni leiðbeint ef eitthvað er ekki í samræmi við það sem viðurkennt er. Ég hef greinilega fengið góða kennslu heima á Íslandi því enn sem komið er hafa þeir verið mjög jákvæðir í minn garð sem hafa haft með mig að gera. Ég held að það verði mjög gaman að vinna þarna fyrstu mánuðina og rólega tempóið gerir það að verkum að ég get einbeitt mér að því að lesa og læra norskuna. Gat til dæmis lesið mikið í dag á milli aðgerða. Hér er líka gert ráð fyrir að þriðja til fjórða hvern föstudag eigi maður klíníklausan dag, þ.e. maður hefur engum svæfingaskyldum að gegna heldur á maður að lesa fræðin. Það er samt gert ráð fyrir að maður mæti á morgunfund en eftir hann er maður sendur á skrifstofuna að lesa. Það er auðvitað gríðarlega mikilvægt en heima þurfti maður yfirleitt að gera þetta í sínum eigin frítíma eða á vöktunum vegna þess hve mikið var að gera.

Heimsókn
Ég er búinn að fjárfesta í miða heim til Íslands föstudaginn þrettánda febrúar og verð heima í rúma viku. Á stefnuskránni verður að njóta tímans með stelpunum mínum og svo klára ég ferðina með brúðkaupi Vidda bjú og Jónínu. Ég er gríðarlega ánægður að geta verið með þeim þennan dag en lengi vel leit út fyrir að ég kæmist ekki. Það er aldrei að vita nema við kýlum á að pakka niður dótinu okkar þessa viku þannig að kannski verður nóg hjá mér að gera. Ef við fáum þetta raðhús sem ég er að fara að kíkja á á morgun þá er leigan á því frá 1. mars svo það verður ekki seinna vænna að drífa pökkunina af.

Verðlag
Munduð þið borga 1360 kr fyrir venjulega Big Mac máltíð eða 350 kr fyrir hálfan lítra af Pepsi Max í plasti. Ef maður umreiknar norska verðlagið yfir í íslenskar krónur er þetta verðið. Ég keypti mér t.d. pylsu, pepsi max og daim í gær fyrir 1408 kr íslenskar. Bilun. Hins vegar má hugsa það þannig að ég minnka vinnuna við mig um næstum 40% við að koma hérna út en hækka umtalsvert í launum. Auk þess fæ ég frí úr vinnunni á launum með dagpeninga til að fara á námskeið sem eru skylda í sérnáminu og fæ frí níundu hverja viku vegna áunnins frítökuréttar.

Björgvin hættir

Það var kominn tími á að einhver ráðherra axlaði ábyrgð. Því miður held ég að þetta sé ekki gert á réttum forsendum heldur til að auka möguleika hans á að ná aftur kjöri á þing í vor. En niðurstaðan er sú sama. Ráðherra sem hefur ekki staðið sig hverfur úr embætti og gefur öðrum tækifæri með hreinan skjöld. Mér finnst reyndar góður leikur hjá honum að losa sig við stjórn Fjármálaeftirlitsins í leiðinni. Það verður kannski til þess að fólkið í landinu fær smá tiltrú á stjórn fjármálalífsins í landinu.

Útihlaup

Dreif mig loksins út að hlaupa en ég hef ekki farið í níu daga vegna annríkis og veðráttu. Það var fínt. Fór 15,8 km á mjög rólegu tempó og kíkti aðeins á leiðina í vinnuna á nýja staðnum. Sýnist að ég verði að fara einhverjar krókaleiðir og legg snemma af stað í fyrramálið til öryggis. Þetta eru rúmir 6 km svo það er eins gott.

Eagle Eye

Það endaði með því að ég horfði á aðra mynd í gærkvöldi áður en ég fór að sofa. Það var Eagle Eye sem ég hafði aldrei heyrt um en sá ágæta dóma um hana á netinu og ákvað að kíkja á hana. Ég vissi ekki við hverju ég átti að búast og myndin kom mér skemmtilega á óvart. Hún er reyndar svolítið langsótt pæling en hasarmyndir eru það nú oft. Spennan er fín allan tímann en plottið svolítið augljóst. Það hefur samt lítil áhrif á spennuna og myndin er bara ágætis afþreying. Ekki skemma þrusu bílaeltingaleikir.

Brúðguminn og Stieg Larsson

Var að sjá þessa mynd í fyrsta skipti. Kom mér skemmtilega á óvart. Edda sá hana með mömmu sinni og systur svo ég fékk aldrei almennilega tækifæri til að sjá hana í bíó. Svo bauðst Fidel sem er íslenskur bæklunarlæknir sem býr hér úti til að lána mér hana og ég horfði á hana í kvöld. Ég verð nú að segja að hún kom mér skemmtilega á óvart. Langt síðan að ég hef séð svo góða íslenska mynd en Baltasar Kormákur klikkar nú eiginlega aldrei. Hilmir er auðvitað frábær leikari og síðan eru þarna aðrir stórkostlegir með: Margét, Jóhann, Ólafía Hrönn, Þröstur Leó, Ólafur Egill og Ólafur Darri öll frábær í sínum hlutverkum. Ég hef aldrei séð þessa Laufeyju Elíasdóttur áður enda ekki mikið í leikhúsum heima en hún er líka góð í sínu hlutverki. Í stuttu máli ein albesta íslenska myndin sem ég hef séð.

Annað sem ég hef gert til að stytta mér stundir hér úti og til að læra norsku er að lesa Menn som hater kvinner eftir sænska höfundinn Stieg Larsson. Hún hefur verið "þýdd" yfir á norsku og Hildur Tómasdóttir svæfingalæknir og fyrrverandi vinnufélagi minn á Svæfingunni við Hringbraut hefur margoft mælt með þessum höfundi (sem og fleiri sem hafa lært í Svíþjóð). Sá hana í hillunni á bókabúð sem ég fór inn í fyrstu vikuna mína hér og ákvað að splæsa henni á mig og hef hlakkað til að opna hana á hverju kvöldi. Ég hef reyndar ekki haft mikið þrek að lesa en hún er mjög skemmtileg og spennandi og spennan er svo stígandi að maður getur varla lagt hana frá sér. Ég er til dæmis búinn að lesa þar til ég sofna síðustu tvö kvöld og stefni á að gera það líka í kvöld. Skrifa kannski meira þegar ég er búinn með hana en get alla vega mælt með því að fólk lesi fyrstu 200 síðurnar eða svo.

Carrick jarðaði gamla félaga

Horfði á leikinn í gegnum nýju fínu nettenginguna mína. Skemmtilegur leikur með nóg af færum. Carrick átti tvær unaðslegar sendingar sem skópu mörkin. Fabio er greinilega enginn eftirbátur tvíburabróður síns Raphael og stóð sig vel vinstra megin í vörninni. Danny Welbeck var líka hættulegur úti á kantinum og það er greinilegt að Ferguson er að fá heilmikið af góðum leikmönnum úr unglingaliðinu sem standa sig þegar aðalliðið meiðist. Það er auðvitað gríðarlega þýðingarmikið fyrir framtíðina. Gott mál að vera kominn áfram í bikarnum.

Skegg

Ég ákvað að setja tvær myndir af mér hérna inn svona til að leyfa ykkur heima á Íslandi að sjá hvernig ég leit út áður en ég rakaði mig í morgunn. Var orðinn leiður á þessu enda ekki hægt að tala um að skeggrótin sé þétt hjá manni. En þetta var skemmtileg tilraun.

Erfið vika

Þó það sé rosalega gaman í vinnunni er erfitt að einbeita sér að norskunni allan daginn. Ég brenndi mig á því fyrstu tvær vikurnar að sofa ekki nóg svo ég tók þessa vikuna með trompi og passaði mig að sofa aldrei minna en 6 tíma og helst ekki minna en 8. Það þýðir að ég er kominn í bólið um tíu því ég fer á fætur kl. 5:45. Ég var samt alveg að drepast úr þreytu í gærkvöldi og sofnaði yfir bókinni sem hefur heltekið mig síðan ég kom hérna út. Vaknaði svo um miðnættið og fór úr fötunum og undir sæng. Svaf síðan eins og ungabarn til kl. 10 í morgunn. Ætlaði svo að fara út að hlaupa í morgunn en það hefur snjóað svo mikið hér í nótt að það er erfitt. Stefni því á að hlaupa á morgun.

Ég fékk svo loksins netið í dag. Þeir komu með módem hérna heim á fimmtudagskvöldið en það var bilað og ég þurfti því að fara í búðina í dag til að fá nýtt. Það gekk eftir og netið virkar vel. Er að fara að horfa á Manchester United-Tottenham í bikarnum og éta piparsveinalasagna. Ætla mér að njóta kvöldsins í rólegheitum, lesa og horfa á bíómyndir.

Kosningar?

Sá á netinu að það á að boða til kosninga í vor. Afskaplega leiðinlegar fréttir að Geir skuli vera veikur en það virðist eitthvað vera að ganga að oddvitar stjórnmálaflokka á Íslandi veikist alvarlega. Fyrst Davíð, svo Ingibjörg og núna Geir. Þrátt fyrir að ég sé ekki hrifinn af stjórnarháttum Ingibjargar og Geirs get ég ekki sagt að maður óski þeim ills. Ég læt helvítis aumingjana sem eyðileggja stemmingu mótmælanna um það. Ótrúlegt að það skuli ekki vera hægt að taka þessa fábjána úr umferð en hins vegar mjög jákvætt að friðsamir mótmælendur séu farnir að standa vörð um lögregluna og ráðamenn þegar upp úr síður. Það er greinilegt að meirihluti mótmælenda er heiðvirt fólk og forheimski minnihlutinn gerir sitt allra besta til að kasta rýrð á þau stórkostlegu mannréttindi að hægt sé að mótmæla í friðsemd. Senda þessa krakkabjálfa í sveit eða á sjóinn til að þeir læri að vinna eins og menn.

Húsaveiðar

Ég fór í gær og kíkti á tvö hús sem eru til leigu og leist mjög vel á annað. Það er reyndar ekki nema rúmir 100 fermetrar en mjög vel skipulagt á tveimur hæðum. Kannski prófum við að bjóða í það eftir helgi. Hitt var ekki eins spennandi og það leit út fyrir á netinu, klósettin ógeðsleg og þannig. Reyni örugglega að kíkja á nokkur fleiri eftir helgi en við erum svo sem ekkert að flýta okkur með þetta því það er óljóst hvenær mæðgurnar koma út. Læt vita hvernig gengur.

Á toppnum

Það hlaut að koma að því að stresskjúklingarnir frá bítlaborginni létu undan álaginu enda geta þeir ekki neitt nema í bikarkeppnum. Mínir menn komnir á toppinn þar sem þeir eiga heima og með leik til góða. Nú er bara að halda áfram þessari glæsilegu frammistöðu. Það er reyndar helmingurinn af liðinu meiddur en strákarnir sem hafa verið að spila síðustu leiki hafa staðið sig vel svo ég kvíði engu. Svo tökum við bara Tottenham í bikarnum um helgina og höldum voninni um að gera hið ómögulega lifandi - þ.e. að vinna fjóra titla í vor.

"Mótmæli"

Nú er mér nóg boðið. Þeir kveiktu í Oslóartrénu helvítis aumingjarnir.

Bergmann jr

Það reynist erfitt fyrir Norðmennina að takast á við að það séu tveir Bergmenn í vinnu hérna. Þeir hafa þó leyst það með því að titla mig alltaf Bergmann jr á vinnuplani dagsins. Fyrir ykkur sem eruð vel að ykkur í titlum (sem ég var ekki) þá vitið þið að junior á (í það minnsta í Noregi) við samnefndan son. Það eru því þónokkrir sem hafa spurt mig hvort ég sé í alvöru sonur Jóns Braga og ég svara því að sjálfsögðu alltaf játandi enda er hann miklu eldri en ég.

Löng helgi

Eins og þið hafið vonandi áttað ykkur á er ég ekki með veraldarvefinn heima í herbergi og verð því að notast við netið í vinnunni. Það stendur reyndar til bóta. En ég átti annars góða helgi. Var í fríi á föstudag og slakaði vel á. Tók reyndar 12,1 km hlaup út á Bygdö seinni partinn en slakaði annars á og las svolítið.

Síðan tók ég laugardaginn á langan spássirúnt um miðbæ Oslóar að leita mér að hlutum sem mig vantar í "búið". Var reyndar líka að reyna að átta mig í miðborginni og læra aðeins á hvernig almenningssamgöngur liggja hér. Annars hefur Nonni bróðir verið ótrúlega þolinmóður að kenna mér á allt hérna úti og það er algjörlega ómetanlegt enda kann ég honum óendanlegar þakkir fyrir það. Eftir spássitúrinn las ég aðeins og æfði mig á gítarinn en svo sótti Bergmann eldri mig og við fórum í matarboð til vinafólks hans. Fékk dýrindiskalkún og skemmtilegan félagsskap. Matarboðið varð hálfendasleppt því gamli þurfti að fara aðeins upp á spítala enda var hann á vaktinni. Ég fór heim og horfði á bíómyndir í tölvunni og át snakk.

Á sunnudaginn svaf ég út og vaknaði ekki fyrr en undir hádegi. Það er í fyrsta sinn síðan ég kom út sem ég vakna ekki kl. 5:42 stundvíslega. Þess má geta að ég stilli klukkuna ýmist kl. 5:45 eða 6:00 svo ekki er því um að kenna. Ég var boðinn í eftirmiðdagsbrunch hjá Viðari og Hildi úti í Bærum og fékk þá grillu í höfuðið að hjóla út eftir en það munu vera u.þ.b. 18,5 km. Ég hjólaði 22,1 km því einhverjir fullir unglingar höfðu tekið upp á því að snúa nokkrum skiltum á hjólaleiðinni þannig að ég fór oft einhverja vitleysu. En ég komst á endanum á leiðarenda en þá var farið að kyngja niður snjó. Stefnan var sett á að hjóla til baka en það snjóaði samfellt þar til ég dreif mig heim og þá var komið 20-30 cm lag af nýföllnum snjó á alla hjólastíga og traktorarnir höfðu ekki við að moka. Það var því ófært að hjóla nema niður í Sandvika þaðan sem ég tók lestina með hjólið niður í bæ. Fínn dagur en ég svaf eins og engill í nótt eftir erfiðið. Gekk síðan í vinnuna í morgunn vegna snjóþyngsla enda hélt áfram að snjóa í alla nótt.

Boltinn

Bara svona fyrir þá sem elska fótbolta þá er ég gríðarlega sáttur við að mínir menn skuli hafa lagt Wigan að velli í vikunni. Gríðarlega mikilvægt skref í átt að Liverpool á toppnum og nú er ekki langt að bíða þar til við stingum þessa aumingja af í titilbaráttunni. Það eru svona tiltölulega auðveldir leikir framundan í deild og bikar - Bolton í deildinni á laugardaginn, svo Derby í deildarbikarnum, þá Tottenham í bikarnum, síðan heimsækjum við West Brom í deildinni og fáum svo Everton í heimsókn í deildinni. Eftir þessa leiki held ég að United verði komið á toppinn því Liverpool á þrjá Everton, Wigan og Chelsea í næstu þremur leikjum í deild, og reyndar Everton í bikarnum líka inn á milli. Þetta verður létt það sem eftir er tímabils og ég held að við tökum þrjár dollur í ár.

Vakt og vinna

Ég tók svona fylgdarvakt á miðvikudag og var í húsinu til miðnættis. Þegar ég ætlaði síðan að hjóla heim var orðið afturdekkið loftlaust. Einhverra hluta vegna hafði mér dottið í hug um morguninn að það gæti verið gott að hafa tösku með viðhaldsgræjum fyrir hjólið í bakpokanum og hún kom sér því vel strax fyrsta daginn sem ég bar hana með mér í vinnuna. Gat pumpað í dekkið og komið svo við á einni bensínstöð á leiðinni til að pumpa aftur og komst þannig heim. Ég var því ekki kominn heim í rúm fyrr en kl. 1 og þurfti síðan að vakna kl. 5:45 til að ganga í vinnuna. Ég hefði svo sem getað tekið lestina en ákvað að ég hefði gott af því að vakna aðeins eftir lítinn nætursvefn og það virkaði. Var lítið sem ekkert þreyttur í vinnunni í gær þrátt fyrir að ég vekti bara yfir einni aðgerð sem tók allan daginn.

Vaktin var annars skemmtileg og vaktavinnan snýst greinilega að mestu um það sama og heima nema það er annar reyndari deildarlæknir sem sinnir gjörgæslunni að mestu. Hér skiptist hún í nokkra hluta þ.e. intensiv avdeling og post operativ enhet. Hvort tveggja er sambærilegt við gjörgæsluna heima. IA tekur veika medicinska sjúklinga og fleira á meðan p.o. tekur þá sem koma úr aðgerðum með barkarennu (í öndunarvél) en gert er ráð fyrir að geti komist á deild daginn eftir. Almennt stoppa sjúklingarnir skemur hér á gjörgæslunni því flestar deildir eru með sína eigin hágæslu en þar fylgja svæfingalæknarnir þeim eftir með innlitum og aðstoða við hluti sem okkur eru tamir.

Vaktin sem ég geng til að byrja með er sem sagt mest skurðstofuvinna og hjálp með vandamál úti á deildum s.s. fæðingardeyfingar o.fl. En ég byrja svo sem ekki á þeim vöktum fyrr en í maí því í febrúar, mars og apríl verð ég á Radiumhospitalet sem er sérstakur hluti spítalans þar sem flestar krabbameinsaðgerðir eru gerðar og krabbameinslyfjadeildin er þar líka. Það er víst mjög gott að byrja þar því tempóið er aðeins hægara og vaktirnar rólegri þannig að maður getur lært norsku í rólegheitum og er ekki algerlega á haus á vöktunum eins og virðist vera hér á Rikshospitalet.

Eftir vinnu fórum við Nonni bróðir og fengum okkur að borða og nokkra bjóra og fórum svo til Håkons vinar hans Jóns Braga og fengum okkur nokkra bjóra með honum og Kristinu konu hans. Svo gisti ég þar því það hefði tekið óratíma að komast heim í gærkvöldi og ég var gjörsamlega aðframkominn af þreytu. Svaf eins og ungabarn í gestaherbergi hjá þeim og vaknaði svo kl. hálfníu og fékk far með Kristinu í vinnuna (hún er líka læknir á Rikshospitalet). Ákvað svo að setjast aðeins við tölvuna og vinna og blogga áður en ég fer heim að gera við hjólið.

Lítill frændi

Ég varð föðurbróðir í sjöunda skipti í á þriðjudaginn þegar Óttar bróðir eignaðist sitt fjórða barn og þriðja drenginn. Glæsilegur piltur eins og allir aðrir í minni fjölskyldu ;)

Nýtt heimilisfang og sími

Set nýjan síma og heimilisfang hér til hliðar. Síminn er svona frelsissími þannig að ég svara örugglega ekki mikið af sms-um nema ég sé við tölvu. Hins vegar getið þið prófað að hringja á skrifstofuna mína milli kl. 1530 og 1800 á norskum tíma (14:30 og 17:00 á Íslandi núna en 13:30 og 16:00 þegar sumartíminn kemur) því þá er planið að vera að lesa. Svo er læst á Facebook á sjúkrahúsinu þannig að ég læt ekki sjá mig þar fyrr en eftir hálfan mánuð til þrjár vikur nema ég komist einhvers staðar á netið annars staðar en í vinnunni.

MBK
GBB

Gaman í vinnunni en erfitt á kvöldin

Ég nýt mín sífellt meira í vinnunni. Norskan kemur mjög fljótt og faglega er ég að sjá nýja hluti á hverjum degi. Líffæraflutningar 2-3 á dag síðustu dagana. Sjúkdómar sem ég hef annað hvort bara lesið um í bókum eða aldrei heyrt um. Ótrúlega spennandi tilfelli og maður endurnýjar áhugann alveg upp á nýtt sem þó var ekki lítill fyrir. Ég reyni að hafa nóg fyrir stafni á daginn og fram undir kvöldmat með því að lesa og undirbúa mig fyrir aðgerðir morgundagsins. Planið þar til mæðgurnar koma út er að lesa fram undir kvöldmat, hjóla þá heim og slaka á eftir kvöldmat, fara kannski út að hlaupa 3-4 x í viku og fara svo snemma í háttinn. Kvöldin eru erfið en það hjálpar að ég hef verið eitthvað að gera flest kvöld. Nú ætla ég að einbeita mér að því að hrekkja nágranna mína með því að æfa mig á gítarinn á kvöldin. Á morgun tek ég svokallaða "følgevakt" sem þýðir að ég ætla að elta forvaktina og sjá hvernig vaktavinnan gengur fyrir sig. Fyrir það fæ ég síðan frí á föstudaginn, þ.e. ég verð á launum á vaktinni sem er ekki eitthvað sem ég vandist á svona vöktum á Íslandi. Ég á því langa helgi um helgina.

Íbúðin

Ég svaf fyrstu nóttina í herberginu síðastliðna nótt. Fínt herbergi sem er rúmgott og ekki svo kuldalegt þegar maður er búinn að koma sér fyrir. Set myndir sem ég tók á símann minn hér fyrir neðan. Ég hjólaði líka í vinnuna í fyrsta skipti í morgunn. Það tók u.þ.b. 25 mínútur en ég hafði ekki farið þetta fyrr og fór því rólega og reyndar aðeins vitlaust líka. Þetta er líka allt upp í móti þannig að ég verð örugglega miklu fljótari heim á eftir. Svo er bara að fara út í búð að versla í matinn svo maður geti byrjað að smyrja sér nesti eins og Norðmenn virðast flestir gera. Þeir fara kannski í matsalinn einu sinni í viku í mesta lagi enda er það mjög dýrt.

Burst

Ég sá mína menn taka Chel$ky í bakaríið í gær. Giggs var góður á miðjunni en ég var sérstaklega hrifinn af Jonny Evans í miðri vörninni með Vidic. Það er greinilegt að framtíðin er björt þarna í vörninni því Vidic er enn tiltölulega ungur og Ferdinand líka og svo er þessi gutti bara nýorðinn 21 árs. En þetta var alla vega mjög notalegt að horfa á og ekki skemmdi fyrir frábær matur hjá Bigga, Ásu og þríburunum spræku. Tók lestina í fyrsta (og annað) skipti frá miðbænum í Osló þar sem ég bý og út í Sandvika-stöðina í Bærum. Mjög þægilegt.

Nýtt símanúmer

Ég er kominn með norskt símanúmer og legg því hið íslenska á hilluna í bili. Nýja númerið er 0047-9426-8750 og er svona frelsiskort á norska vísu. Geri síðan ráð fyrir að fá nýtt númer um leið og ég hef fengið norska kennitölu. Er reyndar kominn með norska lækningaleyfið - fékk fréttir af því í dag að það er á leiðinni í póstinum heim. Það breytir svo sem ekki miklu í bili en gerir það að verkum að ég er löglegur í vinnunni.

Megrun

Ég er svo sem ekki í neinni megrun en ég er aðeins að reyna að breyta um lífsstíl og borða hollari mat. Það hjálpar hvað ég fæ góðan og hollan mat hjá Hildi og Viðari en eins og ég hef sagt verð ég ekki nema eitt kvöld í viðbót hér og svo ætla ég að flytja niður í bæ á sunnudag. Þá á ég auðvitað eftir að hjóla meira svo hreyfingin kemur en það hefur hjálpað þessa vikuna að frá bílastæðunum geng ég upp þrjár hæðir þar til ég er kominn út og svo geng ég 500 m að álmunni þar sem skrifstofan mín er og svo upp 4 hæðir til viðbótar þannig að ég er að labba amk 1 km bara til og frá bílastæðinu. Svo er heilmikið labb að ganga um þennan stóra spítala. Ég finn það á fötunum að ég er að grennast töluvert og það er bara fínt. Stefnan var sett niður fyrir 70 kg og nú er bara að standa sig í hjólreiðum og hlaupum og þá kemur það fljótt.

Það var svolítið mikið að gera í vinnunni í dag og ég er auðvitað svolítið lengur að öllu vegna þess að ég er ekki alveg farinn að rata um spítalann og svo tefja tungumálaörðugleikar aðeins fyrir mér. Var aftur á kvennadeildinni í dag og það er fínt því ég er vanur því að heiman. Þetta eru hins vegar oft flóknari svæfingar því oft eru sjúklingarnir hér með alls kyns undirliggjandi vandamál sem maður er ekki vanur að heiman og því þarf alls kyns meðferðir til að takast á við það. Mjög skemmtilegt og lærdómsríkt.

Bið að heilsa öllum heima og það væri gaman ef fleiri létu heyra í sér í commentakerfinu. Það hjálpar með einmanaleikann sem sækir að manni án fjölskyldunnar á nýjum stað.

Brúðkaups- og bróðurafmæli

Við Edda eigum leðurbrúðkaup (3 ár) í dag 7. janúar og Óttar bróðir er 39 ára í dag. Hamingjuóskir til allra.

Ferð í IKEA og fleira

Góður dagur í vinnunni í dag. Aftur á kvennadeild. Vorum reyndar fjórir (Sérfræðingur, sérfræðinemi sem kom í heimsókn frá öðru sjúkrahúsi þar sem ekki er kvennadeild, læknanemi og ég) um eina stofu því það var lítið prógram. Ég er strax farinn að taka stórstígum framförum í norskunni (að eigin mati) og Norðmennirnir virðast oftast skilja það sem ég segi. Hér er mikil hefð fyrir erlendum svæfingalæknum og mér reiknast til að næstum þriðjungur sérfræðinemanna sé útlendingar og töluvert af sérfræðingunum. Var til dæmis bæði í gær og í dag með þýska sérfræðinga á bakvið mig.
Eftir vinnu fór ég aftur að kíkja á herbergið til að athuga hvað ég þyrfti að útvega mér áður en ég flyt inn og fór síðan í IKEA og keypti það sem upp á vantaði. IKEA verslunin hérna úti í Bærum er mjög stór og flott og verðið töluvert betra en heima. Ég keypti til að mynda næstum fullan bláan IKEA-poka af alls kyns dóti og borgaði eitthvað um 500 norskar fyrir. Mjög gott mál. Fór síðan í bílskúrinn til Geirs til að koma hjólinu í stand fyrir hjólreiðarnar næstu vikurnar.

Vinnan

Var á skurðstofunni og kom nálægt sjúklingum í dag. Var á kvennaklíníkinni og það gekk vel. Strax búinn að sjá tvær aðferðir sem ég hef ekki séð heima þannig að þetta lofar góðu. Eftir vinnu fór ég og reddaði mér norsku símanúmeri en það er ekki komið í gagnið. Set það inn þegar síminn er farinn að virka. Fékk svo frábæra grænmetissúpu hjá Hildi í kvöldmat og fór svo út að hlaupa og tók 13,4 km hring um Bærum. Þreyttur núna og ætla að fara að sofa.

Fyrsti dagurinn

Þá er fyrsti vinnudagurinn að baki. Ég svaf eins og engill í nótt en það er í fyrsta skipti sem ég geri það nóttina áður en ég byrja í nýrri vinnu. Var síðan mættur snemma eða upp úr sjö. Fékk lánaðan bílinn hans Nonna bróður en hann hefur ekki selst síðan þau fóru heim. Það léttir mér óneitanlega lífið fyrstu vikuna enda heilmikill þeytingur á manni. En ég sumsé mætti og allt gekk vel. Mesti parturinn af morgninum fór í skoðunarferð um spítalann og á meðan á henni stóð var komið við til að fá föt, auðkenniskort og fleira slíkt. Ég er meira að segja kominn með skrifstofu sem ég deili með einum öðrum sem er náttúrlega snilld. Ég hef mína eigin tölvu og mikið hillupláss og mér sýnist því að Norðmenn ætlist til að maður vinni í vinnunni en slappi af heima. Ég ætla að taka hintinu. Ég fékk síðan að fara um hádegið til að redda ýmislegu hjá skattinum hér úti en ég þurfti bæði að tilkynna flutning og sækja um norska kennitölu. Það kom upp úr dúrnum að gamla kennitalan mín síðan 1998 er enn á skrá hér en dottin úr gildi þannig að ég þarf nýja. Það tók rúman klukkutíma að komast að á skattstofunni en þegar það loksins gekk var afgreiðsludaman hin almennilegasta og sérlega hjálpsöm - það er eitthvað að ganga þessa dagana. Í það minnsta er þetta frágengið en afgreiðslan tekur u.þ.b. 3 vikur. Fór svo að athuga með leikskólamálin fyrir Hildi Vöku hér á bæjarskrifstofunum í Bærum og spurðist fyrir um atvinnu fyrir Eddu líka. Síðan kíkti ég í Sandvika Storsenter en var tæpur á tíma og gat ekki verslað neitt af því sem mig vantaði. Geri það á morgun eða hinn. En alla vega þá var fyrsti dagurinn bara mjög lofandi og ég hlakka til að mæta aftur á morgun.

Ferðasaga

Við komuna í Leifsstöð leið mér eins og hálfvita með hjól í heimatilbúnum kassa og tvo bakpoka – hvernig dettur einhverjum að ferðast einn með tvo bakpoka. Röðin var stutt en samt nógu löng til að nokkrir veltu fyrir sér hver furðufuglinn með kassann væri. Svo kom að mér og ég rétti miðann. Það næsta sem ég heyrði var: “Þú áttir flug í gær”. Ég hafði á einhvern undarlegan hátt náð að breyta dagsetningunni á bókuninni án þess að taka eftir því og pantaði óvart 2. janúar í stað 3. Ég fékk nett panic-kast en Ingi og konan náðu að róa mig og koma mér í söluskrifstofu Icelandair og þar var einstaklega vingjarnleg og elskuleg kona sem bjargaði mér fyrir horn og gat breytt miðanum gegn mjög skaplegu gjaldi. Eftir þessa reynslu mun þurfa mikið til að ég segi styggðaryrði um Icelandair. Hjálpsemin og hugulsemin einstök. Allur farangurinn komst svo á leiðarenda og ég komst í flugvélina án þess að drepast úr hjartaáfalli og er kominn til Viðars og Hildar og allra hinna hér í Íslendinganýlendunni á Borkenholmsveien í Bærum. Ég geri ráð fyrir að vera hér eitthvað fram í vikuna og færa mig svo þegar ég veit hvernig aðstaðan er og hef gert ráðstafanir varðandi nauðsynjavörur. Svo er það bara djúpa laugin á mánudag sem er einhvers konar kynnisdagur og seinni partinn þá verð ég líklega að drífa mig í alls kyns útréttingar – flytja lögheimilið, fá kennitölu o.s.frv. Læt vita af mér fljótlega aftur.

Kveðjustund

Við hjónin héldum gott kveðjupartý á föstudaginn. Það var opið hús og margir létu sjá sig til að kveðja Dvergmennið. Það var mjög gaman að sjá svo marga og ég er þakklátur fyrir allar góðu kveðjurnar. Ég gat síðan lítið sofið um nóttina og það endaði með því að við hjónakornin sofnuðum ekki fyrr en á milli tvö og þrjú um nóttina en síðan þurfti ég að vakna rétt fyrir fimm til að drífa mig út á flugvöll. Ingólfur skutlaði mér og það var kannski eins gott því hann fór hamförum í að redda mér þegar á reyndi í Leifsstöð.