Fótbolti

Mínir menn stigu feilspor á laugardag sem hefði verið dýrkeypt ef ekki hefði verið fyrir erkióvinina í Newcastle sem náðu góðu markalausu jafntefli við Chelsea í gær. Þetta er ennþá galopið. Manchester United á eftir að mæta Manchester City á City Ground og Chelsea á Stamford Bridge áður en þeir fá West Ham í heimsókn á Old Trafford í lokaumferðinni. Allt saman eru þetta gríðarlega erfiðir leikir því sá fyrsti er grannaslagur, næsti úrslitaleikur um Englandsmeistaratitilinn og líklegt er að West Ham verði að vinna síðasta leikinn ætli þeir að halda sæti sínu í deildinni. Þetta verður gríðarlega spennandi.

Viðbót:
Gleymdi reyndar að það eru fjórar umferðir eftir. Við eigum Everton á Goodison um næstu helgi. Vonandi klára þeir það.

Lítil börn

Íris og Halldór vinir okkar eignuðust stúlku þann 14. apríl og hún fékk strax nafnið Lísbet Hekla.
Kolla og Aron áttu þar á undan risastóran dreng á Föstudaginn langa sem eftir því sem ég kemst næst hefur ekki enn fengið nafn.
Til hamingju öll.

Manchester United - Sheffield United

Frábær leikur hjá mínum mönnum á sunnudaginn þegar þeir tóku Sheffield United í gegn. Mörkin voru glæsileg hjá Carrick og Rooney og undirbúningurinn hjá Ronaldo og Giggs ekki síðri. Það virðist fátt geta stöðvað þá úr þessu en martröðin yrði auðvitað að tapa öllum titlunum til Chelsea. Persónulega finnst mér þeir ekki eiga skilið að vinna meira en þennan eina titil sem þeir hafa þegar unnið. Þeir spila einstaklega leiðinlegan fótbolta núna og það virðist almennt vera þannig að þeir eru liðið sem fólk elskar að hata. Við Unitedmenn leggjum metnað okkar í að vera það lið og viljum þann titil aftur ásamt þeim þremur sem enn eru í boði í boltanum. Bikarana heim á Old Trafford.

Messidona

Rosalegt mark hjá Lionel Messi fyrir Barcelona í gærkvöldi. Það er ekki oft sem maður sér svona mörk í sterkri deildarkeppni nú til dags þar sem varnarmenn tækla yfirleitt áður en menn komast inn í teig. Messi var bara svo snöggur að enginn átti roð við honum. Það er alltaf spennandi þegar svona efnilegir knattspyrnumenn koma fram og manni hættir til að gleyma að hann er aðeins 19 ára. Áhugasamir geta farið í gegnum hlekkinn í fyrirsögninni hér að ofan til að skoða þetta glæsilega mark.

Það er bara taumlaus hamingja þessa dagana

Leikmenn og forráðamenn Manchester United keppast við þessa dagana að halda mér í því ofsakætiskasti sem ég hef verið í síðan um áramót. Það ágerðist reyndar verulega með 7-1 sigri á Roma sl. þriðjudag en náðu algeru hámarki við þær fréttir sem nálgast má í hlekknum í fyrirsögninni. Ronaldo í fimm ár í viðbót á Old Trafford getur ekki þýtt nema eitt eða réttara sagt sex - sex Englandsmeistaratitlar. Gamli spurningaliðsrefurinn Gummi Björns viðraði þá skoðun sína að hann mundi líklega óska eftir sölu ef hann væri bakvörður ensks úrvalsdeildarliðs. Maður lætur bara ekki niðurlægja sig tvisvar á ári næstu fimm árin. Enn fullkomnaðist auðvitað hamingjan í gær þegar mínir menn sigruðu Watford í undanúrslitum ensku bikarkeppninnar. Ætli United vinni ekki bara Chelsea bæði í úrslitum bikarkeppninnar og Meistaradeildarinnar auk þess sem þeir hirða deildina líka með því leggja Chelsea að velli 9. maí. Utópía!!!!

Bloggarar

Ég er mikill "surfer". Ekki svo að skilja að ég sé með bikinirönd, beri á mig barnaolíu Jónssonar og busli með skurðarbretti í brimgarðinum við Gróttu heldur ríð ég öldur alnetsins af miklum vígamóð. Ég get gleymt mér tímunum saman að elta hlekki af einni vefsíðu til annarrar en það eru reyndar ákveðnar síður sem ég heimsæki mest þegar ég geysist um veraldarvefinn. Mogginn er að sjálfsögðu opnunarsíðan á vafranum og ég renni því í gegnum mbl.is í hvert sinn sem ég opna netsíðu. Soccernet er líka mikið heimsótt, sérstaklega á leikdögum í boltanum. En það eru bloggin sem í seinni tíð drepa mestan tíma. Þannig les ég hugleiðingar Urðarkattarins daglega en þær eru yfirleitt svipaðar 8-10 daga í röð vegna bloggtregðu en síðan kemur framhjáhlaup eins og hjá öldruðum og hann skrifar hálfa tylft færslna um eitthvað stórmerkilegt. Annar spekúlant sem ég les daglega er hann Simmi úr Kastljósinu. Ég er sérstaklega glaður að lesa bloggið hans þegar Arsenal gerir í brækurnar. Áður fyrr var hinn stórkostlegi Hnakkus í uppáhaldi en hann hefur verið í löngu fríi undanfarið þó síðastliðna daga hafi verið eitthvað lífsmark með honum. Það eru fleiri sem eru skemmtilegir en þessir þrír eru þó þeir sem ég heimsæki hvað oftast.

Gleðidagur

Þvílík snilld. Við Andreas og Ögn horfðum á leikinn í kvöld yfir matnum. Það var ekki að sjá á fyrstu mínútunum að mínir menn ætluðu að standa sig í kvöld þar sem Rómverjar áttu nokkur góð skot til að byrja með en eftir að Carrick skoraði þetta glæsilega fyrsta mark varð ekki aftur snúið. Þeir völtuðu gjörsamlega yfir Roma-liðið og eftir fyrsta markið var aldrei spurning um hvort liðið mundi sigra. Mörkin voru líka hvert öðru glæsilegra en ég held að annað markið sem Smith skoraði og seinna markið hjá Carrick var náttúrlega stórglæsilegt. Glæsilegur sigur og aðeins sigur Chelsea á Spáni varpaði agnarsmáum skugga á annars frábært kvöld.

Páskamatur fenginn að láni frá nokkrum meisturum

Ég eldaði páskamat í gærkvöld fyrir Eddu, Möggu og tengdó. Var með bláberjamarinerað læri sem ég grillaði. Ætlaði að kaupa ómarinerað læri og gera einhverjar gloríur sjálfur en þegar ég fór að versla á laugardaginn voru öll ómeðhöndluð læri uppseld og ég fór því til snillinganna í Gallerý Kjöt á Grensásvegi og keypti hjá þeim bláberjamarinerað lambalæri (fékk næstsíðasta lærið og konan á eftir mér það síðasta). Það fór svo eins og það kom úr kúnni á gasgrillið. Mér finnst persónulega best að grafa grill í holu og umlykja það með gamaldags kolagrillskolum en þegar slíkt er ekki í boði er næstbest að grillla lærið í opnum álpappír og snúa því einu sinni. Ég hef grillið lokað á lágum hita og læt það malla svoleiðis ca. 30-40 mín á hvorri hlið, fyrst á þeirri kjötminni. Þannig verður lærið passlega hrátt við beinið en vel steikt að utan þannig að allir fá steikingu við sitt hæfi.
Með lærinu bar ég fram bakaða kartöflubáta a la Siggi Hall með gíslísku ívafi. Siggi vill nota stórar bökunarkartöflur en mér finnst ekkert síðra að nota bara meðalstórar íslenskar og gerði það í gær. Maður getur gert þetta á ýmsa vegu. Fyrst þegar ég gerði svona kartöflur sauð ég þær aðeins fyrst og setti þær svo stutta stund í ofn. Nú sker ég þær hráar í litla báta, skola þær og þurrka vel og brúna þær síðan í smjöri og olíu á pönnu í nokkra mínútur. Síðan raða ég þeim í ofnskúffu á bökunarpappír, krydda með salti, pipar og reyndar bara því sem mér dettur í hug. Nú setti ég aðeins timjan en mér finnst líka gott að setja steinselju eða basilikum en bara lítið. Svo fer það bara svolítið eftir smekk hvað maður hefur þær lengi inni og auðvitað eftir stærð bátanna en mér finnst gott að hafa þær stökkar og vel bakaðar og hafði þær því í u.þ.b. 60 mínútur.
Með þessu gerði ég rauðvínssósu að hætti Ragnars Freys Ingvarssonar. Þetta var frumraun mín við að gera sósu frá grunni og ég ætla að halda því áfram. Þvílíkt og annað eins lostæti er langt síðan ég hef smakkað. Tengdamamma er þekkt fyrir dálæti sitt á góðum sósum og ef þær eru sérstaklega góðar borðar hún sósu eintóma með skeið og það hefði hún gert í gær hefði hún verið heima hjá sér. Takk Ragnar fyrir sósuna sem má nálgast hér. Hún er um miðja síðuna fyrir þá sem ekki nenna að lesa alla uppskriftina þó ég mæli með því.
Auk þess bar ég fram með þessu ferskt salat sem samanstóð af klettasalati, lambasalati, tómötum, agúrku, rauðlauk og miklu af fetaosti. Ég nota kryddolíuna af fetaostinum mikið í salatið og það kemur að miklu leyti í staðinn fyrir dressingdraslið sem mér finnst oft skemma ferskt salat. Okkur finnst best að hafa salatið sem ferskast og erum hvorugt hrifin af svona edik- og dressingmenningu en ég er viss um að hægt er að venja okkur af þeim ósið ef einhver lumar á galdrauppskrift.
Með þessu var dýrindisrauðvín Montes Cabernet Sauvignon 2005 (geggjað) og í eftirrétt hafði ég ístertu sem ég keypti í búð (frekar metnaðarlítið en mér til varnar þá eru þær sjúklega góðar og ég hafði í nógu að snúast með allt hitt). Þar til næst.

Barnahrúga

Það hefur verið sannkölluð holskefla af börnum hjá bekkjarfélögum mínum úr læknadeildinni nú eftir áramótin. Berglind og Þorsteinn áttu í janúar lítinn Benedikt Árna, Magga Stína og Christian áttu síðan lítinn stráksa sem ekki hefur enn fengið nafn svo ég viti. Við Edda áttum síðan litluna okkar þann 30. mars og nú á föstudaginn langa átti Kolla lítinn risa. Þá má heldur ekki gleyma því að Ragna og Guðmundur áttu strák í nóvember (held ég), Jón Þorkell og Álfhildur áttu strák í september og Emmi og Berglind áttu litla stelpu í ágúst. Það eru svo enn fleiri sem hafa átt börn síðan við útskrifuðumst svo það hefur verið nóg að gera. Til hamingju allir.

Portsmouth 2-1 MUFC

Við feðginin horfðum á annan 2-1 leikinn í röð í sameiningu. Sú litla svaf reyndar allan tímann en ég reyndi að halda blótsyrðunum að innanverðu á meðan ég var að elda og horfa á leikinn. Mínir menn voru ótrúlega daprir, sérstaklega í fyrri hálfleik en þá komust heimamenn í 1-0 eftir hrikalega dapra markvörslu hjá Van der Saar. Seinni hálfleikur var svo hálfgerð einstefna og Portsmouth áttu bara fáeinar skyndisóknir. Í einni slíkri undir lokin fór Van der Saar í skógarferð þegar engin hætta var á ferðum og var þess vegna ekki á marklínunni þegar Ferdinand ætlaði að gefa á hann. Sjálfsmark og leikurinn búinn þó O'Shea tækist að minnka muninn í næstu sókn. Smith átti reyndar gott skot í blálokin en James varði vel. Ég er því ekkert í góðu skapi en get huggað mig við að það er Arsenalmaður að koma í mat sem ég get strítt á því að hafa tapað fyrir West Ham og reyndar Poolari líka en þeir létu Brynjar Björn skora hjá sér í dag.

Dóra Sigrún Fannarsdóttir

Lítil vinkona okkar fékk nafn í dag. Hún er dóttir Elnu sem er elsta og besta vinkona Eddu og Fannars mannsins hennar. Hún var skírð Dóra í höfuðið á langömmu sinni og Sigrún eftir móðursystur sinni. Fallegt nafn það - til hamingju.

Lúxusvandamálakosningar

Stærstu málin í komandi kosningum verða líklega umhverfismál og kannski pínulítið velferðarmál. Ég er ekki viss um að Íslendingar geri sér grein fyrir því hverslags munaður það er að svona mál séu aðalvandamálin. Atvinnumál eru náttúrlega dauður málaflokkur því allir sem vilja geta fengið vinnu ef þeir eru ekki mjög vandlátir og atvinnuleysi er skilgreint ekkert. (skv. alþjóðlegum fræðum er ákveðið atvinnuleysishlutfall talið eðlilegt þar sem fólk er t.d. á milli starfa eða fær ekki starf í stuttan tíma eftir að námi lýkur.) Fólk staldrar enda sjaldan lengi við á bótum hérlendis og mikil umsetning á lista atvinnulausra. Þegar pólítíkin og mannlífið er svo vandræðalítið kýs fólk um mál sem stendur nær hjartanu en buddunni og kýs þá gjarnan vinstri flokkana. Þegar fólk kýs í harðæri kýs það með buddunni og þá fáum við gjarnan sigur hægri flokkanna. Þetta gerist yfirleitt eftir 4 ára stjórnarsetu vinstri flokkanna hér á landi. Vitur hægri maður sagði eitt sinn að það væri mikilvægt að vinstri flokkarnir kæmust til valda á 12 ára fresti. Hann sagði að það væri gott til að koma í gegn mannabreytingum á hægri vængnum auk þess sem engum væri hollt að vera lengur en 12 ár við stjórnvölinn. Hann sagði líka að það væri vont að hafa hægri stjórn í 16 ár því þá væri stöðugleikinn orðinn svo mikill að það væri ekki víst að vinstri flokkunum tækist að klúðra honum á 4 árum og við ættum á hættu að hafa hér 8 ára vinstri stjórn. Ég óttast að það muni gerast eftir næstu kosningar og mínar verstu martraðir segja mér að Skringibjörg Sólbrún verði forsætisráðherra. Vegna draumfara minna er ég þegar farinn að undirbúa sérnám og mætti því segja að ég verði eins konar pólítískur flóttamaður enda á ég von á að allt verði hér á öðrum endanum á meðan ég er í sérnámi. Svo kem ég heim um það bil sem viðreisn hægri flokkanna hefst.

MUFC og Meistaradeildin

Við feðginin horfðum á leikinn í gærkvöld á meðan Edda lagði sig. 2-1 tap staðreynd en markið á útivelli gæti fleytt okkur áfram þegar kemur að seinni leiknum. Scholes var auðvitað eins og hálfviti og fékk tvö spjöld fyrir glórulaus brot og var raunar heppinn að vera ekki þegar fokinn út af þegar það loksins gerðist á 33. mínútu. En Ronaldo galdraði fram skyndisókn og Solskjær gaf þessa glæsilegu sendingu fyrir sem Rooney afgreiddi af sinni alkunnu snilli. Það er erfitt að trúa því að þetta séu fyrstu mörk Rooney í Meistaradeildinni frá því hann sökkti Fenerbache með þrennu í fyrsta leiknum sínum fyrir United. Það virkar svo langt síðan þó það séu ekki nema 18 mánuðir. Svona líður tíminn fljótt.

Chelseamenn gerðu í brók og náðu aðeins jafntefli á heimavelli gegn Valencia. Þar skoraði David Silva stórkostlegt mark og kom Valencia yfir en helvítis geitin hann Drogba þurfti auðvitað að jafna. Ég þoli ekki Drogba - hann er fífl. Kíkti á markverðustu atvikin úr þessum leik á youtube og miðað við það voru þetta kannski bara sanngjörn úrslit. Ayala var reyndar heppinn að fá ekki rautt fyrir að gefa Shevchenko olnbogaskot í byrjun leiks og þá hefði leikurinn sjálfsagt þróast öðruvísi. Sanngjörn úrslit held ég.

Milan náði aðeins jafntefli gegn Bayern Munchen á heimavelli og það þrátt fyrir að hafa fengið gefins vítaspyrnu eins og sést í þessu myndbandi. Kaka lenti tvisvar í leiknum í því að Lucio tæklaði af honum boltann í teignum. Í seinna skiptið náði Kaka að pota aðeins í boltann rétt áður en Lucio hreinsar boltann aftur fyrir og það hefur líklega platað dómarann og því dæmdi hann vítaspyrnu. Það var hinsvegar rangur dómur að mínu mati því Lucio tekur greinilega boltann eins og sést þegar þið skoðið myndbandið. Milan átti fullt af góðum færum en Rensing varði eins og berserkur (Þór: Hann er 22 ára, ég gáði á netinu). Það verður gaman að sjá hvað Milan gerir í Þýskalandi en með miðjumenn eins og Gattuso, Pirlo, Ambrosini og Kaka er allt hægt.

Liverpoolmenn kjöldrógu svo PSV í Hollandi á þriðjudaginn og það þarf bæði kraftaverk og stórslys með dass af heppni til að PSV klári þetta í Liverpool. Liverpool er eina liðið sem hefur tryggt sig í undanúrslit að mínu viti. Allt getur gerst í hinum einvígjunum.

Draumaúrslitaleikur yrði náttúrlega Liverpool - Manchester. Ég held að Chelsea og United mætist í undanúrslitum ef bæði lið fara áfram og Liverpool mætir þá Bayern eða Milan. Bæði þessi lið gætu slegið Poolarana út úr keppninni en eins og þeir hafa verið að spila upp á síðkastið held ég að það verði erfitt. Þetta verður allt saman forvitnilegt að sjá.

Skipt um skoðun

Fyrir nokkrum vikum býsnaðist ég yfir því að fólk skrifaði færslur á síður ómálga kornabarna í fyrstu persónu eins og barnið sjálft væri sögumaður. Nú skil ég hvers vegna foreldrar gera þetta og ét gömlu færsluna ofan í mig.

Hafnfirðingar í stuði

Naumt var það á laugardaginn. Það er varla hægt að kalla þetta niðurstöðu frekar en þegar Holræsa-Solla lét okkur kjósa um flugvöllinn. Það gæti vel verið að niðurstaðan hefði orðið á hinn veginn ef þetta hefði verið viku fyrr eða seinna, kannski degi fyrr eða seinna. En nú er niðurstaðan fengin og eins og eftir allar kosningar keppast menn við að túlka niðurstöðurnar og ráða í þetta allt saman en ólíkt því sem oft gerist þá viðurkennir Alcan að hafa tapað en þeir eru tapsárir og segjast nú vera að skoða framtíðarplönin og það hefur meira að segja verið talað um að loka bara gamla álverinu. Það væri bara pínulítið mátulegt á Hafnfirðinga ef Alcan byggði nýtt álver á Húsavík og lokaði síðan í Straumsvík.

Boltinn

Helgin var góð fyrir mína menn. Ole Gunnar hélt upp á fæðingu dóttur minnar með því að negla lokanaglann í kistuna hjá Blackburn á Old Trafford. Áður hafði Scholes sýnt gamalkunna takta og dregið liðið aftur inn í leikinn. Carrick og Park skoruðu líka í góðum 4:1 sigri. Seinna á laugardaginn voru Chelseamenn ljónheppnir að landa sigri í skemmtilegum leik við Watford. Liverpool hefndi síðan ófaranna frá því fyrr í vetur með því að valta yfir Arsenal á Anfield og galopnaði þar með baráttuna um þriðja sætið því þeir hafa 2ja stiga forskot á Arsenal sem á reyndar leik til góða. Fallbaráttan er líka orðin mjög spennandi. Það er reyndar orðið nokkuð ljóst að Watford fellur en West Ham er komið í gírinn og það gæti orðið spennandi að sjá hvort þeim tekst að bjarga sér frá falli. Ég spái því reyndar að Wigan og Sheffield United fari niður með Watford en Charlton og West Ham bjargir sér. Tevez er að vakna og verður aðalmaðurinn hjá þeim nú í restina, Boa Morte gæti líka farið að blómstra fljótlega. Ég spái því að United verði meistari, Chelsea í öðru, Liverpool í þriðja og Arsenal í fjórða.

Ekki pabbablogg

Þeir sem koma hingað til að lesa um litla sólargeislan okkar Eddu bendi ég á hlekkinn hérna til hliðar því ég ætla að reyna að halda bloggunum hennar þar. Hérna ætla ég áfram að skrifa um fótbolta, pólítík og allt annað sem mér dettur í hug að rífast yfir.

Ég er stoltur faðir

Okkur Eddu fæddist stórkostleg en agnarlítil dóttir í gærkvöldi. Hún vó aðeins 2600 g eða rúmar 10 merkur og var einungis 48 cm. Foreldrar hennar voru svo sem ekki mikið stærri við fæðingu svo það var ekki við neinum risa að búast. Alla vega kom hún í heiminn organdi og sparkandi eins og sönnum baráttujaxli sæmir og er þegar komin heim til sín þó ekki sé nema rúmur sólarhringur frá því hún fæddist. Hlekkurinn er bæði hér til hliðar og í fyrirsögninni hér að ofan.

Kosningabaráttan

Það er merkileg ákvörðun hjá Samfylkingunni í Hafnarfirði að hafa álverskosningarnar svona rétt fyrir kosningar. Það gæti haft afdrifaríkar afleiðingar fyrir flokkinn ef Hafnfirðingar sem margir hafa lífsviðurværi sitt af álverinu kjósa að leyfa stækkun á álverinu. Þetta væru þá sennilega sömu Hafnfirðingar og veittu Samfylkingunni óskorað vald í innanbæjarmálum fyrir ári síðan. Ég held nefnilega að vinstri pólítíkusar átti sig ekki á því að stór hluti þeirra Íslendinga sem áður kusu þá eigi lífsviðurværi sitt undir einhvers konar iðnaði. Það er því ekki óviðbúið að þeir missi fleiri kjósendur en þeir afla sér við þessa umhverfisverndarvakningu sína. En auðvitað er fráleitt að ætla að Samfylkingin hafi verið að reyna að heilla kjósendur með einhverju vinsældastunti. Þingmenn þeirra eru auðvitað alltaf að fylgja sannfæringu sinni - þeirri sannfæringu að stefnan eigi að ráðast af skoðanakönnunum. Það sem gleymist oft að gera ráð fyrir í svona skoðanakönnunum að það eru ekki allir búnir að kynna sér málið til hlítar, það gerist ekki fyrr en nær dregur kosningum og þá er miklu meira að marka slíkar skoðanakannanir. Þá breytir Ingibjörg Sólbrún kannski aftur um skoðun og limirnir dansa eftir höfðinu og predika einhvern annan fagurgala en í dag. Hver kýs fólk sem hefur enga eigin sannfæringu heldur fær hana að láni frá Gallup. Persónulega vil ég frekar pólítíkusa sem fylgja eigin sannfæringu en þá sem ekki geta haldið dampi. En þannig er ég bara.
Það er samt einn þingmaður á vinstri vængnum sem ég er farinn að kunna vel við og finnst gaman að lesa það sem hann skrifar á blogginu sínu. Þetta er Ágúst Ólafur Ágústsson varaformaður Samfylkingarinnar sem í skoðunum sínum og skrifum stingur töluvert í stúf við félaga sína í þingflokknum þó hann njóti augljóslega nokkurra vinsælda í röðum flokksmanna.

Spánn 1-0 Ísland

Horfði á þennan leik í fyrrakvöld. Íslendingar áttu nokkra lipra spretti í fyrri hálfleik en þegar Spánverjar vöknuðu var það bara stórleikur Árna Gauts Arasonar í íslenska markinu sem hélt okkur á floti. Ég skil ekki hvers vegna Árni hefur ekki fengið tilboð frá stærri klúbbum í gegnum tíðina. Hann er markvörður sem á að vera að spila í stærstu deildum Evrópu en ekki í norsku úrvalsdeildinni með sæmilegum klúbbi. Skrýtið hvernig sumir leikmenn eru aldrei uppgötvaðir en svo eru aðrir sem ekki eru eins hæfileikaríkir sem komast á stóra samninga. Fáránlegt.

Ógeðfelldur fréttaflutningur

Horfði á fréttirnar á RÚV í gær. Þar var frétt um niðurskurð fjár á bænum Neðsta-Hvammi í Dýrafirði. Þegar inngangur fréttarinnar stóð neðst á skjánum "Ill meðferð" og maður bjóst við að sjá bónda með haglabyssu reyna að stugga við embættismönnum. Þess í stað var auðheyrt á viðtali við yfirdýralækni að bóndinn hafði verið mjög samvinnuþýður og þegar hljóðneminn barst að honum reyndi hann ekki á nokkurn hátt að gera lítið úr aðbúnaði kindanna heldur lýsti atburðarásinni sem hafði leitt til þess að svo fór. Þannig hafði þessi viðkunnalegi maður reynt sitt besta en allt kom fyrir ekki og hann neyddist því til þess að skera niður helming þess fjár sem hann hafði á fóðrum. Persónulega finnst mér ill meðferð fela í sér ásetning en aðstæður og veðrátta geta orðið til þess að aðbúnaður sem marga vetur væri ásættanlegur virðast í þessu tilfelli hafa orðið til þess að ekki varð við þetta ráðið. Ég tek ofan fyrir þessum ágæta manni að taka þessu eins vel og hann gerði og starfa af heilindum með embættismönnum í sínu sveitarfélagi. Fréttastjóri Ríkissjónvarpsins ætti að skammast sín.

Þjóðsöngur vanhelgaður

Það hafa verið ótrúlega miklar umræður um meinta vanhelgun Spaugstofunnar á þjóðsöngnum. Stundum skil ég ekki móðursýkina í þessu þjóðfélagi. Ég er persónulega á þeirri skoðun að öll lög sem banna fólki að tjá sig um nokkurn skapaðan hlut á hvern þann hátt sem því sýnist séu mannréttindabrot. Það væri gaman að sjá þetta mál fara fyrir dómstóla. Fáránlegt mál. Það sem mér finnst hins vegar sorglegra er þegar alls kyns vitleysingar eins og ég, sem færa skoðanir sínar á veraldarvefinn, nota tækifærið til þess að hrauna yfir þjóðsönginn. Það er ógeðslegt að sparka í liggjandi mann eða söng í þessu tilfelli. Kollegi minn Hjalti Már Björnsson skrifar á Hrafnasparki um þetta mál og leggur til að "Hver á sér fegra föðurland" verði þjóðsöngur Íslands framvegis. Ég skil ekki svona vangaveltur. Maður skiptir ekki bara um þjóðsöng af því að helmingurinn af þjóðinni getur ekki sungið hann. Persónulega er ég laglaus en ég kann textann og raula með.

Kynþáttafordómar Laxness.

Ég er að lesa stórskemmtilegt greinasafn Halldórs Laxness sem ber nafnið Upphaf mannúðarstefnu. Þarna er samansafn skemmtilegra greina um hitt og þetta, mest blaðagreinar sem birtust í skandínavískum tímaritum og blöðum í upphafi sjöunda áratugarins. Það er samt sumt sem skýtur skökku við við lestur bókarinnar eins og eftirfarandi dæmi sýnir (ég vona að ég verði ekki grillaður á hannesískan hátt fyrir að stela aðeins textanum hans Halldórs).

"Sá gyðingdómur sem birtist í stjórnarfyrirkomulagi Ísraels hins nýa aðhyllist umburðarlyndi í "hugmyndafræði" og er það ekki vonum fremur í þjóðfélagi þar sem saman kemur blóminn úr evrópskri skynsemi; en rétttrúuðum sabbatsvinum, er í Ísrael haldið í skefjum, svo þeir koma sér ekki við nema í hófi, en gegna þar sama hlutverki og rétttrúaðir menn annarsstaðar, og standa fyrir utan Jerúsalem á helgum og henda grjóti í bíla sem ekki halda hvíldardaginn heilagan."

og Halldór heldur áfram:

"Ódýr neysluvara og vélakostur handa almenníngi er því miður sterkara en hugsjónir. Þannig smáfalla menn fyrir kramvöru, jafnvel þótt þeir séu múhameðstrúar. En fyrir bragðið eru arabar þeir sem eftir urðu í Landinu helga, kanski álíka margir og allir íslendingar, komnir á hærra þjóðfélagsstig af sambúð við ísraelsmenn í hálfan annan áratug en obbinn af trúbræðrum þeirra hefur náð í ríkjum sjálfra sín á þeim 1300 árum sem liðin eru síðan spámaðurinn var á dögum".

Ætli rithöfundum mundi í dag líðast að skrifa svona texta?

Það er líka margt sem er gaman að lesa í bókinni og í kaflanum um rithöfunda eru margar stórskemmtilegar setningar:

"Sumir höfundar eru svo ákafir verkmenn að þeir fá aldrei ráðrúm til að hugsa sig um."

"Í miðri skáldsögu getur höfundurinn alt í einu byrjað ritgerð eða farið að halda ræðu um sjálfvalið efni, og aungan sakar, nema lesarinn verður þúngur yfir höfðinu, leggur frá sér bókina og fer að lúra"

"Þegar verið er að semja skáldsögu þá er holt að hafa símagjaldskrána til Falklandseya sér til leiðbeiningar. Óttinn við að þurfa að greiða undir hvert orð eftir gjaldskrá mundi forða mörgum höfundi frá málaleingíngum."

"Önnur tálsnara sem bíður leikritaskálds er sú þegar hann lætur eftir ástríðu sinni til að prédika móral yfir almenníngi í leikhúsinu."

"Vond skáld eru auðþekt á því að þau eru einlægt reiðubúin að rísa úr sæti og prédika fyrir öðrum vondum skáldum, - aðrir hlusta hvort sem er ekki á þau."

Þó ég sé ekki alltaf hrifin af skoðunum Halldórs er stórkostlegt að lesa textann sem hann skrifar. Ég fullyrði að enginn íslenskur rithöfundur, nema kannski höfundur Njálu, hefur svo stórkostlegt tangarhald á íslenskri tungu.

Ferming

Elín Helga dóttir hans Svenna mágs fermdist í dag. Frábær veisla eins og alltaf á Nesbalanum hjá Kötu og Svenna. Elín fékk margar fallegar gjafir eins og venja er þegar fólk fermist. Við Edda gáfum henni úr sem virtist falla henni vel. Hamingjuóskir og þakkir fyrir frábærar gestrisni. Veislan var líka eins konar kveðjupartý fyrir Svenna sem er á leiðinni í FBI skólann í Maryland, þann sama og Clarice Sterling hljóp í kringum í Silence of the Lambs. Hann verður í burtu fram í júní svo hann hvatti systur sína til dáða að þruma króanum í veröldina áður en hann flýgur af landi brott á föstudaginn. Við ætlum að reyna.

Tvöfalt heilbrigðiskerfi

Þetta mál er og verður mjög umdeilt og ég sé ekki að lögum um einkarekstur verði breytt eftir kosningar - til þess verða Framsókn og Sjálfstæðisflokkur að leiða áfram. Samfylking mundi að öllum líkindum klofna og Vinstri grænir afþakka eins og venjulega.
Helsta röksemd andstæðinga er sú að allir eigi að eiga völ á bestu mögulegu heilbrigðisþjónustu burtséð frá efnahag. Þessi röksemd er málinu bara algerlega óviðkomandi því einkarekstur í heilbrigðiskerfinu þýðir ekki að ríkið eigi að slá slöku við í sinni þjónustu. Það þýðir bara að efnað fólk hefur valkost. Þessu svara andstæðingar með því að ef leyfður væri einkarekstur mundu allir bestu heilbrigðisstarfsmennirnir fara í einkageirann og þar erum við einmitt komin að kjarna málsins. Læknum og hjúkrunarfólki er sem sé ekki heimilt að selja sig hæstbjóðanda heldur eru þau bundin fjötrum meðalmennskunnar á LSH.
Ég hef reyndar lúmskan grun um að raunverulega ástæðan fyrir því að ráðamenn í landinu og þá sérstaklega heilbrigðisráðherrar seinni ára vilja ekki einkarekin sjúkrahús sé sú að þeir eru hræddir um að á fáeinum árum mundi einkageirinn afhjúpa hversu lélegt og illa rekið íslenska heilbrigðiskerfið raunverulega er. Það er ekki tilviljun að stór hluti af frægustu og bestu sjúkrahúsum heims er einkarekinn.

Eiður á Old Trafford

Þetta líst mér vel á!!! Eiður hefur lengi verið á óskalista Fergusons og ég get alveg sagt ykkur það að ef af kaupunum verður þá munu bræðurnir Óli Gunnar og Eiður Smári Bergmann gera garðinn frægan í vítateigum veraldarinnar í framtíðinni. Góðar stundir.

Gettu betur!

Tvær magnaðar keppnir í Gettu betur í gær og í dag. MR-ingar tóku Verzlinga í bakaríið í gær en keppnin var reyndar frekar spennandi þangað til Verzlingarnir fóru á límingunum í lokin. Það eru auðvitað eins og alltaf erfitt að vera undir allan tímann og MR-ingar vörðu forystuna vel með því að vera rólegir og yfirvegaðir og leyfa Verzlingunum að fara snemma á bjölluna og taka sjensinn. Davíð er mikill botnlangahöfundur og því hafa mörg lið farið flatt á því að fara snemma á bjölluna. Í kvöld kepptu svo MK og MH og það var gríðarlega spennandi. MK var undir alla keppnina en náðu að jafna með því að svara þríþrautinni og eftir það var eins og MH-ingar gæfust bara upp. MK fékk 2 stig í bráðabana og komst í úrslitin en ég held að þeir eigi ekki roð í MR-ingana.
Annars finnst mér spurningarnar allt of léttar hjá Davíð en þær eru þó skemmtilega fjölbreyttar. Hann er líka skemmtilegur dómari og lifandi, kemur með skemmtilega brandara og kryddar þetta meira en margir forverar hans. Húmorinn er heldur ekki eins súr og hjá Stebba Páls sem þó er hrikalega fyndinn við réttar kringumstæður. Mér finnst Sigmar hins vegar ekki eins skemmtilegur og hann hefur áður verið. Hann er merkilega hallur undir annað liðið oft á tíðum og mér fannst hann t.d. frekar halda með MR-ingum í gær og MK-ingum í kvöld. Kannski er þetta bara einhver endaleysa í mér. Hvað sem því líður þá er Sigmar einhver alskemmtilegasti bloggari víðveraldarvefsins eins og kynnast má hér.

Slæmir hlutir, gott fólk!

Ég horfði líka á Fyrstu skrefin áðan með Eddu. Þar var viðtal við unga foreldra sem eiga litla dóttur með krabbamein. Faðirinn heitir Haukur Daníel Hrafnsson og var bekkjarfélagi minn í Álftanesskóla og samtíða í Garðaskóla. Það var forvitnilegt að sjá jafnaldra sína hafa slíkt æðruleysi á lífið sem þau sýndu í viðtalinu. Fær mann til að velta því fyrir sér hvort maður á þetta til ef svo skelfilega vildi til að maður þyrfti að ganga í gegnum veikindi með barnið sitt. Yfirvofandi foreldrahlutverk fær mann til að hugsa um svona hluti.

Dapurleg dagskrárgerð

Ég horfði á Kastljósið í kvöld. Það verður að segjast eins og er að það hlýtur bara að vera gúrkutíð þessa dagana. Þegar dregnar eru upp tvær álíka ruglaðar stelpur og látnar rífast um það hvort launamunur kynjanna sé raunverulegur. Oddný Sturludóttir, sem hingað til hefur verið mest óþolandi kvenmaður landsins á eftir Kolbrúnu Halldórsdóttir var að rífast við jafnoka sinn sem ég held að heiti Heiðrún Lind Marteinsdóttir. Sú síðarnefnda bar þess greinileg merki að hafa marinerast í Heimdalli eða einhverjum álíka leiðinlegum félagsskap um nokkurt skeið. Það eina sem Heiðrún hafði að segja var að hún teldi launamuninn stórlega ýktan. Þá færði Oddný fram þá skoðun sína að hún teldi svo ekki vera. Hvorug þeirra gat fært fram áþreifanlegar sannanir fyrir skoðun sinni heldur voru þetta einungis þeirra eigin kenningar. Ég veit ekki með ykkur hin en ég er fullfær um að skálda upp mínar eigin kenningar um svona hluti en væri alveg til í að horfa á einhverja sem í alvöru hafa rannsakað þetta. Persónulega er mér drullusama hvað Heiðrúnu Lind og Oddný Sturludóttur finnst um launamun kynjanna eða launaleynd því hvoruga mundi ég kjósa. Helgi Seljan var síðan eins og þunnur piparsveinn á milli þeirra og reyndi að komast að. Greyið. Ég held að RÚV ætti bara að selj'ann.

4x minna?

Hver fréttamaðurinn á fætur öðrum talar orðið svona. Síðastur var Gissur Sigurðsson í fréttatímanum nú í kvöld. Hann sagði að tannlæknakostnaður ríkisins væri fjórum sinnum minni en hann var fyrir einhverjum árum síðan. Ég veit ekki með ykkur en þegar ég margfalda með fjórum þá stækka tölurnar sem ég margfalda. Ég nota yfirleitt tölur sem eru minni en einn ef ég þarf að minnka eitthvað. Hvað varð um fallegu íslenskuna að tala um fjórðung, þriðjung, helming o.s.frv.
Sama má segja með ruglinginn með helmingi meira og helmingi minna.

Gagnkvæmur pirringur í heilbrigðiskerfinu

Það er gaman að vera unglæknir. Maður kynnist veröldinni á Landspítalanum sennilega betur en nokkur önnur heilbrigðisstétt því maður skiptir um lið einu sinni til tvisvar á ári en flestir hinir vinna mörg ár á sömu deild. Það versta við að vera unglæknir er það að maður er oft að láta aðgerðarleysi deildar- og/eða aðstoðarlækna annarra deilda fara í taugarnar á sér. Það sem ég meina er að maður er oft að skoða sjúklinga og finnst að hann tilheyri augljóslega einhverri annarri deild en manns eigin en deildarlæknir þeirrar deildar er ekki sammála. Síðan verður maður kannski deildarlæknir á þeirri deild seinna og áttar sig á hvílíkur bjáni maður var í fyrra skiptið. Svona er spítalalífið skrýtið. Það er hins vegar alltaf frekar skammlífur pirringurinn og sem betur fer skilja deildarlæknar hvorir aðra. Þegar allt kemur til alls eru þeir flestir aðeins sendiboðar sérfræðinganna og hafa lítil völd sjálfir. Það sem ég hins vegar á alltaf pínulítið erfitt með að sætta mig er hvað Íslendingar eru óþolinmóðir. Allt í einu ákveða þeir að verkurinn sem þeir hafa haft í bakinu/fingrinum/hendinni/fætinum í 30 ár sé bara búinn að vera of lengi og koma þá á slysadeildina seint að kvöldi. Þegar svona lagað gerist þá er biðin á slysó orðin of stutt. Það eru nefnilega margir sem halda því fram að það sé skynsamlegt að hafa bið á slysadeildum ekki minni en 2 klst fyrir minniháttar vandamál. Auðvitað þarf að sinna aðkallandi vandamálum fljótt og örugglega en kannski er bara ágætt að þeir sem geta beðið fái að bíða aðeins. Það er bara ekki í lagi að slysadeild á Háskólasjúkrahúsi, hvort sem það er á Íslandi eða úti í hinum stóra heimi verði einhvers konar bráðaheilsugæsla fyrir þá sem ekki nenna að bíða eftir tíma hjá heimilislækni. Það er nefnilega pínulítið þannig að við Íslendingar teljum okkur eiga rétt á heilsugæslu nákvæmlega hálftíma eftir að okkur dettur í hug að leita til læknis. Það er bara ekkert vit í svoleiðis heilbrigðisþjónustu að mínu mati.

"Ole Gunnar" lætur bíða eftir sér

Edda er enn hin rólegasta og lætur mig bíða óþreyjufullan eftir "ola gunnari". Kannski er það hann/hún sem lætur mig bíða en hvað um það - ég er orðinn óþolinmóður. Ég er bara til í að verða sá gamli. Ég hef haft heimasíðu í smíðum fyrir barnið en er ekki búinn að opna hana enn, það gerist þegar fæðingin er yfirstaðin. Margir lesenda Ljósgíslans fá líklega sms en hinir verða að bíða frétta og hlekks hér á síðunni til að berja myndir af erfingjanum augum. Eddu dreymdi reyndar að stúlka mundi fæðast á 85 ára afmæli ömmu Gústu sem er á morgun og við bíðum þess vegna spennt eftir því hvort sá draumur rætist. Við misstum reyndar af gullnu tækifæri fyrir 22 dögum síðan að eignast dreng þann 26. febrúar en þá varð hinn eini sanni Ole Gunnar 34 ára. Þá hefðu allar varnir sjálfsagt brostið hjá Eddu gagnvart grátbrosleika örlaganna en nú verð ég líklega að sætta mig við eitthvað hefðbundnara íslenskt nafn. Baráttan heldur samt áfram. Einu sinni United maður, alltaf United maður.

Enski bikarinn

Mínir menn mörðu Middlesbro í gær. Ronaldo kom enn einu sinni til bjargar. Hann fiskaði víti og skoraði svo úr því sjálfur. Þeir áttu reyndar skilið að vinna en leikurinn var jafn og hefði getað farið á hvorn veginn sem var. Chelsea tók svo Tottenham 2:1 á White Hart Lane sem var ekki eins svalt. Það hefði samt verið huggun harmi gegn ef þessi dauðadrukkni Tottenhammaður hefði hitt Lampard á trýnið en ekki slegið svona skelfilegt vindhögg. Það er dapurt að fá lífstíðarbann á völlinn fyrir vindhögg. Mér finnst að úr því hann fær bann þá eigi að hleypa honum í 10 mínútur í hringinn með Lampard og sjá hvort hann getur ekki skilað einu eða tveimur á skoltinn á honum. Það er nú bara sanngjarnt.

Sáttmáli Framtíðarlandsins

Var að lesa sáttmála Framtíðarlandsins á netinu. Tiltölulega pólítískt orðaður sáttmáli sem ég held að flestir geti skrifað undir hvort sem þeir eru með eða á móti þeim virkjanaframkvæmdum sem í gangi eru nú. Það eru samt alls konar kverólantar sem þurfa að eyðileggja svona fallega hugmynd með skítkasti og leiðindum. Þarna á ég við vitleysinga úr báðum fylkingum. Í fljótu bragði fann ég engan sem var nógu vitlaus til að skrifa mótmæli á heimasíðu Framtíðarlandsins en fólk sem er fylgjandi skrifar alls kyns meiningar þarna. Nokkrar eru skynsamlegar og margar bara mjög góðar og málefnalegar, hvort sem maður er sammála þeim eða ekki. En svo eru aðrir sem skrifa bara tóma steypu.

Ég þoli t.d. ekki eftirtaldar klisjur sem fólk fátækt af rökum notar:
1) Ég styð þetta af því að ég er ábyrgur foreldri
Eru þá allir sem vilja virkja óábyrgir foreldrar? Er þá ekki fínt að grisja bara óhæfa foreldra út úr í næstu kosningum og gelda þá við útganginn sem ekki kjósa græn framboð. Það mundi eflaust spara heilmikið í félagslegum útgjöldum vegna barnaverndarmála í framtíðinni.
2) Ég styð þetta sem hugsandi manneskja
Ég er viss um að flestir sem styðja þessa framkvæmd gera það að yfirlögðu ráði. A.m.k. hef ég ekki hitt neinn sem er fylgjandi virkjunum af því bara. Hins vegar eru margir sem eru á móti af því bara. Þannig er það nú bara.
3) Við erum með landið að láni frá börnunum okkar (ÆLA)
Þvílík endaleysa. Við eigum landið núna og eigum að ráðstafa því eins og skynsamlegast er akkúrat núna. Þannig er líklegast að við verðum börnunum okkar að gagni. Ef við hugsuðum alltaf þannig að allar ákvarðanir sem við tökum séu fyrir fósturstjúphálfsystkin barnabarna barnabarnabarnanna okkar þá yrði okkur aldrei neitt úr verki.

En af hverju notar fólk svona endaleysu þegar það er svo auðvelt að færa sannfærandi rök fyrir því að maður vilji ekki virkja? Við eyðum svo miklum tíma í að sannfæra alla aðra um að við höfum rétt fyrir okkur að við missum sjónar á raunverulegum tilgangi umræðunnar. Við verðum að ganga úr skugga um að við og allir aðrir sem taka afstöðu í þessum málum geri það á grundvelli þekkingar á málinu. Ætli mótmælendum sé til dæmis ljóst að stærsti hluti lónanna í virkjunum í neðri Þjórsá eru í farvegi sem þegar er til staðar? Ætli fylgjendum virkjunnarinnar sé ljóst að af framkvæmdunum hlýst gífurlegt rask á búsældarlegum býlum í Gnúpverjahreppi og örugglega austanmegin árinnar líka? Ætli mótmælendum sé ljóst að með rangfærslum í málflutningi sínum hafa þeir flæmt fleiri frá málstaðnum en unnist hafa? Þegar allt kemur til alls held ég að við verðum að taka afstöðu út frá okkar eigin sannfæringu en ekki láta hræða okkur með einhverjum bölsýnisspám fylkinganna tveggja. Ísland mun ekki sökkva í sjó þó við virkjum aðeins og iðnaður á Íslandi mun ekki leggjast af þó við virkjum ekki. Hættum þessu bulli og ræðum málin af einhverri skynsemi.

Árninn og Hallinn þrítugir

Þessir tveir heiðursmenn fylltu þriðja tuginn um helgina. Halli í gær og Árni í dag. Til hamingju með það drengir.

Elna og Fannar eignast dóttur

Elna og Fannar vinir okkar Eddu eignuðust dóttur í morgunn. Til hamingju með það kæru vinir.

MUFC

Góð helgi í boltanum. Mínir menn unnu, en það gerðu Chelseamenn líka. Arsenal tapaði og Liverpool gerði markalaust jafntefli. Það er uppskrift að góðri helgi í boltanum. Það vantaði bara að Chelsea tapaði svo hún væri fullkomin.

Góð helgi

Við Edda vorum fyrir austan um helgina. Fórum á föstudag ásamt mömmu og Andreasi. Fyrir voru pabbi og Stúdent. Við fórum öll í tvöfalt fertugsafmæli á laugardaginn hjá Lilju og Guðna á Brúnum. Það var rosalegt hádegisverðarhlaðborð með öllu tilheyrandi. Í gærkvöldi voru svo Eiki og Guðný í mat hjá okkur. Sváfum út í morgunn og komum heim undir kvöld. Frábær helgi.

Uppskrift að Bolognese a la Gilli fyrir áhugasama

Kannski ég taki einn Ragnar á þetta og skelli inn einni uppskrift hérna og athugi viðbrögðin.

Efni
500 g Nautahakk (helst ungnautahakk)
2 meðalstórir laukar
6 meðalstórar gulrætur
1/4 rauð paprika
4-5 rif hvítlaukur
2 msk rjómaostur (má líka vera rjómi)
1 dós niðursoðnir tómatar (hvort sem er hakkaðir eða heilir)
1-2 litlar dósir tómatþykkni (purre)
2 nautakraftsteningar eða nautasoð
Bragðbætt með basilikum og svörtum pipar
Jafnað með hveiti ef þarf og gott að bragðbæta með rauðvínsdreitli

Aðferð
Nautahakkið er brúnað í matarolíu í potti eða á pönnu í nokkrar mínútur. Síðan er lauknum, paprikunni og gulrótunum blandað saman við. Mér finnst best að hafa það gróft saxað því bitarnir rýrna alltaf við suðuna. Látið malla í smástund en síðan bæti ég niðursoðnum tómötum og u.þ.b. hálfri dós af vatni út í. Svo súputeningar og loks tómatþykkni. Bragðbætt með hvítlauk, svörtum pipar og basilikum. Mér finnst gott að krydda mikið en það er auðvitað smekksatriði. Lokahnykkurinn er síðan tvær matskeiðar af rjómaosti og kannski smá rauðvín ef það er spari. Ég setti lengi vel matreiðslurjóma en einhvern tíma átti ég ekki rjóma og setti þá rjómaost sem ég átti og mér finnst það gefa betri fyllingu. Síðan sýð ég þetta niður í 40-60 mínútur, því lengur því betra en ef maður er í tímaþröng þá er hægt að jafna með smávegis af hveiti. Síðan ber ég þetta fram með soðnu spaghetti. Auðvitað er best að búa til sitt eigið pasta en ég er ekki enn orðinn svo mikill atvinnumaður. Kannski maður læri það í fæðingarorlofinu á næsta ári. Það er líka mikilvægt að hafa nýbakað brauð og parmesanost, helst ferskan en þegar maður er með lítið heimili er hann fljótur að skemmast svo ég er yfirleitt með hann þurrkaðan nema þegar mikið liggur við. Svo er auðvitað best að hafa eitthvað gott rauðvín. Casillero del Diablo er í miklu uppáhaldi hjá mér en þetta er auðvitað smekksatriði.
Verði ykkur að góðu!

Matarboð

Ég fór beint úr vinnunni að sækja Andreas bróðurson minn og við fórum á rúntinn. Hann er með æfingaleyfi og ég er að reyna að kenna honum að keyra. Hann er úrvalsnemandi en kennarinn er nú sennilega síðri, skítsmeykur og taugaveiklaður. Hann er orðinn ansi sleipur ökumaður og á eftir að rúlla upp þessu bílprófi þegar þar að kemur. Eftir bíltúrinn komum við hérna heim og ég matreiddi Bolognese a la Gilli. Uppskriftin er reyndar upphaflega frá mömmu en ég hef breytt og lagfært að mínu skapi þannig að varla er hægt að tala um sama réttinn lengur. Mamma og pabbi komu síðan í mat og við feðgarnir sátum lengi fram eftir að ræða hesta- og Hamarsheiðarmál á meðan Edda skrapp í bíó með Möggu systur sinni eftir að hafa skutlað mömmu og Andreasi heim. Frábært kvöld.

Hörkuleikir í bikarnum

Manchester og Middlesborough spiluðu fínan leik í gær. Mínir menn áttu fyrri hálfleikinn en misstu einbeitinguna í lok fyrri hálfleiks og létu Boro jafna. Síðan mættu þeir sofandi í seinni hálfleik og það var ekki liðin mínúta af seinni hálfleik þegar Boateng kom Boro yfir. Það var hrikalega dapurt. En mínir menn voru í stuði og náðu að jafna eftir að víti var dæmt á Boateng. Það var fínt að jafna en það hefði verið betra að vinna þetta í gær í staðinn fyrir að þurfa annan leik. En þrennudraumurinn lifir enn svo maður getur ekki verið annað en kátur. Áfram Manchester United.

Viðburðaríkur dagur

Þegar ég vaknaði í gær var það við hringingu frá pabba. Það voru óskemmtilegar fréttir. Afi hafði verið fluttur mjög veikur upp á sjúkrahús og hann vildi láta mig vita. Einhvern veginn var ég ekki viðbúinn því að hann yrði veikur því hann er alltaf svo hraustur. En hann er í góðum höndum og ég verð að takast á við það erfiða hlutverk að vera aðstandandi og sætta mig við þá vel þekktu staðreynd að aðstandendur hafa yfirleitt ekki dómgreind til að stýra meðferð ættingja sinna. Ég reyni að vera bara túlkur fyrir áhyggjufulla fjölskylduna. Þetta er erfitt en silfurrefurinn er svo hraustur fyrir að ég er sæmilega bjartsýnn á framhaldið, nú er bara að bíða þolinmóður og láta tímann græða sárin.

Eftir að ég hafði kíkt á afa og fylgst með uppvinnslunni fór ég aðeins til tengdapabba og hjálpaði honum að hreinsa til í gamla herberginu hennar Eddu, bera rúm niður í kjallara o.fl.

Í gærkvöldi fór ég síðan í tvær veislur. Fyrst fór ég til Gissurar sem var að halda upp á sveinsprófið í rafeindavirkjun og babuð okkur til veislu heima hjá sér. Frábærar veitingar og skemmtilegt fólk. Eftir að hafa staldrað þar við rúma tvo tíma fórum við til Ingólfs og Áslaugar sem voru með Big Lebowski partý í tilefni af þrítugsafmæli Ingólfs, innflutningi í nýja íbúð og Íslandsmeistaratitil Ingólfs um síðustu helgi. Þar var líka mjög gaman. Eftir það skutluðum við Ingvari niður í bæ en á leiðinni heim lentum við í rassíu lögreglunnar við Perluna. Edda var látin blása og að sjálfsögðu var hún ekki búin að drekka neitt. Mér finnst þetta frábært framtak hjá löggunni og vildi að þeir gerðu þetta oftar.

Lítill Bergmann fæddur í Ameríku

Við fengum þær gleðifregnir frá Ameríku áðan að fæddur væri heilbrigður og kátur drengur. Hann fékk nafnið Þorri Heiðar Bergmann. Fyrir þá sem ekki vita eru foreldrarnir Óttar bróðir og Björk konan hans. Til hamingju Ameríkanar.

GLORY GLORY MAN UNITED!!!!

Mínir menn hafa tryggt sig áfram í meistaradeildinni eftir frábært mark frá Henrik Larsson. Ágætis kveðjugjöf frá honum á Old Trafford. Það var samt leiðinlegt að sjá Arsenal detta út. Mér finnst alltaf gaman þegar mörg ensk lið fara áfram þó mér sé meinilla við Arsenal og Chelsea. Ég hefði reyndar frekar viljað losna við Chelsea. Þoli ekki Mourinho.

Poolarar áfram en Barca heim!

Fylgdist með þessum leikjum á netinu í gær. Ég er hundfúll yfir því að Barca komst ekki áfram en úr því að þeir þurftu að detta út var ágætt enskt lið skildi skella þeim. Ég var líka svekktur að Chelsea skyldi koma til baka á móti Porto. Þegar ég kíkti fyrst var staðan 0-1 fyrir Porto og ég hélt að þeir mundu taka þetta. Svo sló Valencia Inter út á mörkum skoruðum á útivelli. Sá leikur endaði með slagsmálum og einhver eftirmál hljóta að verða af þeim hasar. Roma kom svo á óvart og sigraði Lyon örugglega í Frakklandi. Þannig eru tvö ensk lið, eitt spænskt og eitt ítalskt komin áfram. Ég á von á því Arsenal, United, AC Milan og Bayern fari áfram í kvöld. Þá verða það 4 ensk lið í átta liða úrslitum, tvö ítölsk, eitt spænskt og eitt þýskt. Það sem gæti kannski helst breyst í þessu er að Arsenal fái á sig mark á móti PSV og verði í vandræðum með að skora 3 mörk en sennilega klára þeir það.

Pólítíkin

Er ég einn um það eða eru stjórnmálin hérna orðin hundleiðinleg. Ég verð reyndar að viðurkenna að það hefur lifnað aðeins yfir þessu eftir að Siv kom með hótanir í garð Sjálfstæðisflokksins og Sigurður Kári kvaðst vilja sjá hana segja af sér vegna ummælanna.
Sorglegasta útspilið hlýtur þó að vera yfirlýsing stjórnarandstöðuflokkanna í dag að þeir muni styðja þessa tillögu Framsóknarmanna komi hún til atkvæða á Alþingi. Þetta er náttúrlega alveg ótrúlegt lýðskrum því það er nokkuð augljóst að það verður gríðarlega erfitt að mynda stjórn eftir kosningar án þátttöku sjálfstæðismanna og því nokkuð klárt að ekkert stjórnarsamstarf mun standast að þessi stjórnarskrárbreyting verði samþykkt á tveimur þingum eins og mig minnir að sé nauðsynlegt. Það er því algjörlega án nokkurrar skuldbindingar sem þessir menn lofa þessu. Eftir kosningar geta þeir bara kennt Sjálfstæðismönnum um að vilja þetta ekki.
Auk þess hafa svo lögfróðir menn siðustu daga keppst við að benda á það að þjóð geti ekki átt neitt. Nú ætla ég svo sem ekki að fella dóm um það hvort þeir hafi rétt fyrir sér en mér finnst þessi hugmynd svolítið barnaleg.
Mér finnst hins vegar fullkomlega eðlilegt að einkaaðilar eigi ekki eignaraðild að kvótanum heldur sé hann á formi leigu eða hreinlega boðinn út. Ég meina er ekki eðlilegt að svona lagað sé boðið út.

Skrýtið!

Mér finnst skrýtið þegar fólk leggur ómálga kornabörnum sínum orð í munn á heimasíðu barnsins. Væri ekki miklu eðlilegra að skrifa bara undir eigin nafni þar til barnið er farið að hafa vit á því hvað það vill segja umheiminum. Kannski breytist viðhorfið eitthvað þegar Strækerinn mætir, hver veit?
Aðeins betur að meðgöngunni. Það gengur allt ljómandi vel. Edda er að velta fyrir sér að þrauka þessa viku í vinnu og hætta svo eftir föstudaginn. Ég held að það væri mjög skynsamlegt því hún er orðinn ansi þreytt og lúin eftir vinnudaginn þó hann sé aðeins fjórar klukkustundir. Hún er hins vegar svo mikil keppnismanneskja að hún getur ekki almennilega sætt sig við að hætta snemma.
Það er margir búnir að panta fæðinguna á afmælisdaginn sinn því það eru gríðarlega margir sem eiga afmæli í fjögurra vikna glugganum kringum ásettan dag. Þar eru t.d. Vala Jóns, Helga Steinþórs og Júlía Rósa, Ingibjörg föðursystir mín, Lilja Lofts, amma Gústa, Mamma, Halldór Benjamín, Andreas yngri og Gissur. Þannig er alveg óhemjumikið af hrútum í kringum okkur.

Guðmundur tapaði!!

Ingólfur S. Ingólfsson, oftar kallaður Golli eða Ozon, varð Íslandsmeistari í tvíliðaleik ásamt Kjartani Briem í gær. Það væri svo sem ekki í frásögur færandi nema fyrir það að þeir lögðu Guðmund og Matthías Stephensen. Golli er Hannesarmaður, læknir og góður vinur. Þessi sigur er merkilegur fyrir margt, ekki síst það að Ingólfur er nýorðinn löggilt gamalmenni því hann varð þrítugur 1. mars sl. Fyrirsögn færslunnar fylgir svolítil nostalgía því þegar við Golli vorum í menntó þá vildi svo til að hann sigraði eitthvað mót hérna heima sem var bara ekki í boði þá því Guðmundur Stephensen vann hverja einustu dollu sem var í boði. Það fór þó svo að lokum að Ingólfi tókst að leggja hann í einum úrslitaleiknum en fyrirsögnin í Íþróttablaði Morgunblaðsins daginn eftir var einmitt svona yfir hálfa opnuna. Það var sem sagt ekki frétt að Ingólfur væri Íslandsmeistari heldur var auðvitað stórfréttin að Guðmundur skildi tapa leik. Við stríddum Ingólfi mikið á því að fréttamaðurinn léti þetta hljóma eins og Guðmundur hefði tapað fyrir blindum og útlimalausum flóðheststarfi en ekki frambærilegum pingpongleikmanni. Honum var ekki skemmt.

Takmarkalaus fegurð

Allir sem hafa gaman að því sem er fallegt og gott ættu að skoða hlekkinn í fyrirsögninni.

Nokkuð mögnuð aðsókn

Setti nýja teljarann upp fyrir viku og það hafa komu nákvæmlega 200 manns fyrstu vikuna. Ekki slæmt það. Sum ykkar hafa auðvitað komið oftar en einu sinni. Takk fyrir komuna, velkomin aftur.

Virkjanamál

Þið sem hafið lesið færslurnar mínar upp á síðkastið eruð kannski svolítið ringluð og óviss hvort ég er með eða á móti. Það er vegna þess að ég er bara ekki búinn að mynda mér almennilega skoðun. Hálft í hvoru er ég fylgjandi því að menn skoði virkjanamál af yfirvegun og ef Núpsvirkjun er raunverulega besti kosturinn held ég að uppistöðulón i mynni Þjórsárdals þurfi ekki að vera svo hrikalegt. Á hinn bóginn finnst mér að það hljóti að verða sjónarsviptir af fallegum fossum eins og Búða og Urriðafossi. Það verður hins vegar að segjast að þessir fossar hafa ekki beinlínis verið aðgengilegir fyrir almenning, Urriðafoss er kannski skárri en það er töluvert ferðalag að komast að Búða, a.m.k. að vestanverðu. Ég þekki reyndar ekki hvernig það er að austanverðu. Ég get bara ekki ákveðið mig, stundum er ég á móti og stundum með. Oftast þegar ég er með er ég nýbúinn að hlusta á þá sem eru á móti og öfugt. Mér er sagt að ég sé svolítið svona ósammála týpa.

Uppistöðulón

Það er margt skrýtið sem náttúruverndarsinnar taka sér fyrir hendur en mér finnst merkilegast þegar menn fara að tala um uppistöðulón. Er ég eini maðurinn sem finnst vötn falleg? Ég er miklu meira á móti stíflumannvirkjum, ljótum stöðvarhúsum og rafmagnslínum. Ætli 101 náttúruverndarsinnarnir fari ekki í göngutúr um helgar í kringum virkjunarlónið Elliðaárvatn? Og þó. Þeir halda kannski að það hafi alltaf verið þar. Kannski halda þeir líka að Úlfljótsvatn hafi alltaf verið þarna austur í Grímsnesi af því það var þar þegar skátamótið var 1991. Staðreyndin er nefnilega sú að virkjanaframkvæmdir geta verið stórkostlegar fyrir náttúruunnendur því fjöldamörg tækifæri skapast fyrir þá að njóta náttúrunnar á nýjan hátt með uppistöðulónum. Það er líka staðreynd að virkjanaframkvæmdir og vegagerð samhliða þeim hafa opnað okkur staði á landinu sem seint hefðu verið á forgangslista Vegagerðarinnar annars. Stundum held ég nefnilega að þeir sem hæst gjamma séu ekki endilega þeir sömu og ferðast um landið heldur þeir sem skoða náttúruperlur á ljósmynd eftir Ragnar Axelsson, lesa um hálendið og nýtingu þess í bók eftir Andra Snæ og skoða jöklana á myndbandi eftir Ómar Ragnarsson. Það er svo sem góðra gjalda vert en megum við hin sem nennum í alvöru að standa upp úr sófanum og upplifa náttúruna þá ekki bara hafa Landsvirkjunarvegina fyrir okkur til að skoða landið?

Gott svar

Ég var glaður að sjá gott svar vina minna í Steinsholti við ógeðfelldri persónulegri árás á bróður þeirra í Fréttablaðinu fyrir skemmstu. Svarið birtist á föstudaginn í Fréttablaðinu og var mjög málefnalegt og án heiftar. Manni finnst alltaf óþægilegt þegar vinir manns verða fyrir barðinu á ósanngjarnri gagnrýni sem gælir við grófa persónulega árás.
Þegar maður vafrar um vefinn sér maður ýmislegt skrifað um þennan blessaða Árnesfund og eftir því sem maður les fleira er ljóst að það er enga ályktun hægt að draga af honum.
Í fyrsta lagi var stór hluti fundarmanna eftir því sem ég kemst næst ekki úr Skeiða- og Gnúpverjahreppi. Þannig er ekki hægt að draga ályktun um vilja íbúa sveitarinnar.
Í öðru lagi var þeim sem eru fylgjandi virkjunum ekki leyft að tjá sig á fundinum
Í þriðja lagi var ekki kosið um ályktun fundarins eins og ýjað hefur verið að heldur virðist fundarstjórinn hafa samþykkt hana með því að biðja fundarmenn að klappa fyrir henni. Auðvitað hefði enginn klappað ef fundarmenn hefðu almennt verið ósáttir við hana en það er samt ljóst að það þarf ekki nema hluti að klappa til að yfirgnæfa þögn hinna sem ósammála eru og þegja.
Allt þetta kemur fram í svari þeirra systkina í Steinsholti sem þau skrifa bróður sínum til varnar.

Duffi sigraði í kvöld

Dufþakur tók leik við Vængi Júpíters sem er eitt af sterkari liðum utandeildarinnar í kvöld. Í stuttu máli tókum við þá í bakaríið. Sigruðum 5-2, Steini með tvö og Stebbi, Þengill og Maggi Ella með sitt markið hver. Góður leikur.

Glæsilegur sigur minna manna - eða þannig!

United tók Reading í kvöld og tryggði sig áfram í bikarnum. Mér skilst að þeir hafi verið góðir fyrstu 6 mínúturnar en eftir það voru Readingmenn betri. Mörkin voru fín þarna í byrjun en ég held reyndar að Ole Gunnar hafi verið suddalega rangstæður í þriðja markinu. Enn okkur Unitedmönnum er alveg sama um það. Sigur er sigur og við mætum Middlesborough í næstu umferð. Það er fínt og verður þetta örugglega hörkuleikur.

Nýjir bloggarar hlekkjaðir

Datt niður á tvö Duffablogg í dag og bætti þeim í hlekkjalistann. Þetta er bloggið hjá Jóni Helga sem er yngri systirinn í systrunum í Duffa. Hann er alltaf meiddur og þess vegna bloggar hann svona mikið. Hinn er Magnús Elíasson, sjaldan kallaður annað en Mæjan. Hann er greinilega nýbyrjaður að blogga aftur og er nokkuð duglegur sýnist mér. Athugið það.

Chels$ky deildarbikarmeistarar

Chelseamenn lyftu deildarbikarnum í gær við lítinn fögnuð tengdafjölskyldunnar. Svenni mágur, Magga og Elín Helga horfðu víst saman og voru ekki kát. Ég sá ekki mikið af þessum leik en ég er búinn að sjá mörkin, slagsmálin og þegar Terry sleikti ilina á Diaby. Mér fannst nú sumir Chelseamennirnir sleppa ansi ódýrt eftir slagsmálin í lokin en allir sem fengu rautt áttu það nú skilið. Spurning hvort Lampard hefði ekki mátt fá reisupassann líka en það er erfitt fyrir dómarann að sjá svona lagað. Chelsea tóku sem sagt fyrsta stóra titilinn þetta árið og ég vona að það verði jafnframt sá síðasti sem þeir taka í ár.

Þvílík endaleysa

Rakst þessa fádæma endaleysu eftir Sverri Jakobsson á netinu áðan. Stundum verður manni bara illt að lesa vitleysuna sem kemur frá þeim vinstri grænu. Þið megið ekki skilja mig sem svo að ég sé ósammála Sverri að töluvert skorti á að jafnrétti gæti hér í launamálum en það eru tillögurnar sem fara fyrir brjóstið á mér. Hann vill sem sé aflétta launaleynd og taka upp kynjakvóta. Það er kannski bara rétt að ganga alla leið og setja innistæður bankabóka á netið líka svo hægt sé að draga úr launum þeirra sem eru duglegir að spara. Ég meina það eru takmörk fyrir því hvað fólk þarf að eiga inni á bankabókinni sinni er það ekki?
Hann talar einnig um að Vinstri grænir og Framsóknarmenn séu þeir einu sem tryggi konum örugg sæti á framboðslistum. Það er kannski rétt að benda Sverri á það að í síðustu Borgarstjórnarkosningum voru 3 konur í efstu 7 sætum á lista sjálfstæðisflokksins ef ég man rétt og 5 í efstu 10 sætunum. Þetta gerðu þær án þeirra hækju að eiga sætin vís. Þannig er hægt að færa rök fyrir því að sjálfstæðismenn séu þeir einu sem tryggja framgang kvenna í pólítík án þess að gefa þeim einhverja forgjöf - það þarf nefnilega ekki þegar menn eru raunverulegir jafnréttissinnar. Kannski eru bara frambærilegri konur á hægri vængnum.

Húrra fyrir Guðmundi Steingrímssyni

Mikið rosalega var ég ánægður með að lesa bakþanka Guðmundar á Fréttablaðinu í gær. Hann er sem sé eini stjórnmálamaðurinn sem hefur hugrekki til að standa vörð um mannréttindin. Það verður oft raunin með fólk sem þykist berjast fyrir mannréttindum af vinstri vængnum að það eru bara ákveðin mannréttindi fyrir ákveðna einstaklinga sem það berst fyrir. Þótt okkur líki það illa þá eiga klámmyndastjörnur líka rétt á að njóta mannréttinda.

Heppnir

Mínir menn voru heppnir í gær. Ronaldo bjargaði okkur með frábæru marki rétt fyrir lok leiksins. Strax eftir markið áttu Fulhammenn slatta af færum og kröfðust þess að fá vítaspyrnu rétt fyrir leikslok þegar Heiðar Helguson og Edwin van der Sar lentu saman. Mér fannst það nú alger steypa. Heiðar og van der Sar voru báðir að eltast við boltann og Heiðar hleypur á markmanninn á blindu hliðinni. Ef eitthvað var hindrar hann markmanninn í að ná til boltans en dómarinn gerði vel í að láta leikinn bara flæða áfram. Það er samt merkilegt hvað það eru margir andUnitedmenn að lýsa á Sýn. Þetta var nú reyndar sérlega slæmt þegar boltinn var á RÚV því þá voru allir íþróttafréttamenn meira eða minna aðdáendur svörnustu andstæðinga MUFC. Þetta hefur skánað en var einstaklega slæmt í gær.
Því er þó ekki að neita að mínir menn voru heppnir að fara með sigur af hólmi í gær og mega þakka van der Sar það því hann varði oft á tíðum stórkostlega í seinni hálfleik. Nú er bara að vona að Chelsea fari að misstíga sig svo þetta klárist fyrir páska.

Siðgæðispostular við Hagatorg og Femínistar

Ég er enn í áfalli yfir því að við Íslendingar skulum láta múgæsingu framkalla mannréttindabrot árið 2007. Mér finnst merkilegast af öllu að Femínistafélag Íslands eða hvað sem þessi svokölluðu kvenréttindasamtök kalla sig skuli hvetja til slíkra mannréttindabrota. Er sem sagt ekki sama hvaða starfsvettvang konur velja sér? Eiga bara þær sem vinna í tískubúðum, verkfræðingar og lögfræðingar skilið að njóta almennra mannréttinda? Ég skoðaði nú heimasíðu þessarar samkundu og þó ég sé nú ekki sannfærður um að allar þessar stúlkur séu siðgæðisséníar þá fæ ég ekki séð að íslenskum stallsystrum þeirra hafi tekist að sýna fram á einhverja glæpi sem kalla á að þessum stúlkum og drengjum sé útskúfað héðan. Hvað varð um regluna að fólk njóti sakleysis uns sekt sé sönnuð?
Getum við þá í framtíðinni átt von á því að vera útskúfað af Radisson SAS hótelum af því að Íslendingar veiða hvali? Þó að við stöndum kannski ekki beinlínis sjálf við skutulinn þá erum við nú einu sinni Íslendingar og ríkisstjórn okkar veiðir hvali. Víðast hvar erlendis er glæpur að veiða hvali alveg eins og það er glæpur hér að framleiða klám.
Ég er samt á því að það sé réttur hvers fyrirtækis að velja sér viðskiptavini og neita fólki um þjónustu alveg eins og það er réttur einstaklingsins að sækjast eftir þjónustunni. Ég fæ ekki séð að réttur einstaklingsins sé meiri en fyrirtækisins. Það breytir því þó ekki að þegar samningar hafa verið undirritaðir þá ber að standa við þá hvort sem manni líkar betur eða verr, ellegar greiða viðeigandi bætur fyrir samningsbrot.
Fyrir mitt leyti skammast ég mín fyrir að búa í landi þar sem yfirvöld leika sér á þeirri fínu línu að álykta um hverjir séu velkomnir hér og hverjir ekki. Persónulega held ég að þetta Femínistafélag geri meiri skaða en gagn í jafnréttismálum hérlendis en það er bara mín skoðun og mér dettur ekki í hug að biðja yfirvöld að álykta um það hvort Femínistafélagið eigi rétt á því að básúna sínar skoðanir og siðapredikanir yfir okkur syndarana. Þeim er fullkomlega frjálst að hafa sínar skoðanir þó mér finnist þær alger tímaskekkja í nútímaþjóðfélagi.

Heimsókn

Við Edda kíktum á Þórhildi Örnu Kristjánsdóttur á efri hæðinni í dag. Hún er dóttir þeirra Brynju Jónsdóttur og Kristjáns Derekssonar sem bæði voru tveimur árum á eftir mér í læknadeildinni og búa hér á efri hæðinni. Þórhildur er fædd á síðastliðinn jóladag og var pínulítið að flýta sér í heiminn því hún átti ekki að fæðast fyrr en í byrjun janúar. Hún er mjög gestrisin og var alveg til í að leyfa okkur að æfa okkur. Þær stöllurnar Edda og Brynja eru farnar að plana göngutúra og fleira í sumar og ég held að það verði voðalega notalegt hjá þeim að vera svona nálægt hvorri annarri. Ætli ég segi ekki bara takk fyrir okkur.

Vinnan

Þá er ég búinn að vera hér í rúmar þrjár vikur á háls-, nef- og eyrnadeildinni (HNE) og líkar bara nokkuð vel. Það er auðvitað alltaf þannig þegar maður byrjar á nýjum stað að maður er algjör bjáni og þarf aðstoð og kennslu við minnstu viðvik en svo kemur þetta hægt og bítandi. Annars hefur verið svo mikið að gera hjá mér að ég hef því miður haft lítinn tíma til að lesa fagið. Það stendur til bóta. Maður reynir að glugga í þetta á vöktunum en oft er svo mikið að gera að það er lítið hægt að lesa.

Poolararnir koma á óvart

Liverpool tókst það sem enginn, nema hörðustu poolarar, hafði trú á. Þeir unnu Barcelona á Nou Camp. Ég sá reyndar ekki leikinn en maður verður eiginlega bara að óska liverpoolaðdáendum til hamingju með árangurinn. Það er ágætt að þeir standa sig einhvers staðar því ekki eru þeir að gera það gott í deildinni.

Svekktur, varla!

Ég get ekki sagt að ég sé mjög svekktur yfir þessu, þó mér finnist þetta jaðra við mannréttindabrot. Ég veit ekki til þess að tekist hafi að sanna á neinn ráðstefnugesta að hann hafi gerst brotlegur við lög þannig að ég skil ekki alveg hvernig Bændasamtökin ætla að verja sig ef til málsóknar kemur. Að því sögðu er ég nú bara sáttur við að þetta fólk sé ekki á leið hingað þó mér finnist sá tilgangur ekki hafa helgað meðalið sem var notað.

Færslu breytt

Hef gert breytingar á færslu minni um náttúruverndarsinna eftir að hafa lesið hana aftur. Hún var kannski skrifuð í fullmikilli heift og að áeggjan annarra endurskoðaði ég það sem ég skrifaði. Þetta er ástæðan fyrir því að ég yrði aldrei góður stjórnmálamaður, heiftin nær stundum tökum á mér og þá gleymi ég að vera kurteis.

United, United!

Mínir menn að standa sig þó svo virðist sem markið verði umdeilt um einhverja hríð. Við höfum svo sem fengið okkar skerf af svona mörkum á okkur og ég hef alltaf verið gríðarlega ósáttur við að þetta sé hægt en það var kominn tími til að við fengjum svona mark sjálfir. Annars skilst mér að þetta hafi verið hundleiðinlegur leikur en sá seinni ætti að vera skemmtilegri úr því Lille verður að skora. Ég vona bara að mínum mönnum takist að skora fljótlega svo þeir slökkvi vonir Frakkanna. Svo er bara að vona að PSV og Barcelona standi sig.

Kímniskortur

Einn af mínum uppáhalds bloggurum er Sigmar Guðmundsson fréttamaður. Hann er einstaklega fyndinn og hittir oft naglann á höfuðið. Það sem er þó grátlegt við að lesa síðuna hans er það að margir sem þar skilja eftir álit sitt eru greinilega algerlega sneiddir íslenskum húmor. Þarna er einn ofurbloggari og feministi sem ég man ekki hvað kallar sig en hún er með fjólurautt hár eða eitthvað. Hún náði bara ekki kaldhæðninni í færslu Sigmars um klámstefnuna hér. Í dag voru svo nokkrir sem ekki náðu djóknum um fréttaskúbbið og mýsnar í Bónus. Eins og augljóst er hverjum sem skoðar myndbandið almennilega er útilokað að um mýs sé að ræða. Ég meina hafið þið einhvern tíma séð mýs leiðast yfir gang. Þær hljóta þá líka að vera vel aldar úr því að þær eru kúlulaga og rúlla yfir gólfið í rólegheitum í stað þess að skjótast eins og kollegar þeirra. Þetta er enn eitt dæmið um það að hér er ekkert í fréttum.

Ógeðfelldir "náttúruverndarsinnar"

Öllu má nú nafn gefa. Sl. föstudag skrifuðu nokkrir Gnúpverjar opið bréf til Gunnars Arnar Marteinssonar oddvita í Skeiða- og Gnúpverjahreppi í Fréttablaðið vegna fyrirhugaðrar Núpsvirkjunnar. Ég verð að segja eins og er að ómálefnalegri áróður hef ég sjaldan séð. Sjálfur hef ég ekki myndað mér skoðun á þessu máli enn sem komið er en þegar ég sé hvernig málflutningur andstæðinganna hefur farið af stað er næstum útilokað fyrir mig að styðja við bakið á samtökum gegn virkjuninni.
Í þessu bréfi er ráðist persónulega á sómadrenginn Gunnar sem þó hefur reynt að koma fram í þessu máli af einhverri skynsemi og reynt að sjá fleiri en einn flöt á málinu. Þetta náttúruverndarhalelújafólk sem hefur hæst þarna fyrir austan hefur margsinnis sannað að það telur það ekki eftir sér að hagræða sannleikanum fyrir fáfróðum höfuðborgarbúum til að fá þá á sitt band eins og ég komst að þegar ég fór að ræða við nokkrar samverkakonur mínar á svæfingunni í Fossvogi þegar umræðurnar um Norðlingaölduveitu fóru sem hæst. Þær höfðu farið í fylgd ónefnds Nátturuverndar-Gnúpverja inn á afrétt og mun hann hafa sýnt þeim náttúruperlur sem átti að færa í kaf en raunar voru þær víðs fjarri hinu áætlaða lóni. Náttúrverndarsinnum hættir nefnilega til að eyðileggja auðverjanlegan málstað með gífuryrðum og vanhugsuðum blekkingum og það er ástæða þess að margir eru orðnir þreyttir á þessum áróðri. Ég held að sumum væri nú nær að taka til hendinni á eigin landi áður en þeir fara að predika yfir öðrum um náttúrvernd.

Grey kallinn

Ég skil ekki af hverju menn hafa ekki velt sér meira upp úr fréttinni af því að einhver fréttamaður skuli hafa samið heilu tilvitnanirnar og jafnvel viðtöl við þáverandi forsætisráðherra, Steingrím Hermannsson, án þess að hann gerði athugasemdir við það. Steingrímur greyið man ekki neitt fremur en fyrri daginn en í dag kann það þó að vera eðlilegur hluti öldrunarferlis hjá karlgreyinu. Hann var nú svo sem alltaf hálfgert meinleysisgrey þó hann klúðraði hér öllu í efnahagsmálum þjóðarinnar. Merkilegt hvað metnaður hefur lítið með efnivið að gera. Sjáið bara hana Holræsa-Sollu. Hún er í dag álíka efnileg og Glanni glæpur. Sorglegt útbrunnið kerlingarpólitíkurkeis. Má ég þá frekar biðja um Össur og Steingrím. Þeir gætu þá alla vega klúðrað hér öllu góðærinu með einhverjum stæl. Skringibjörg hefur álíka mikinn sjarma og ófullnægður og sköllóttur fangavörður. Og þó. Maður á ekki að tala illa um fangaverði. Indælasta fólk.

Lifrarlaugardrengir golfa

Mér skilst að sómadrengurinn og mannvitsbrekkan Craig Bellamy hafi þjónustað frænda vorn Jón Árna Risa með golfkylfufótanuddi um helgina og það fyrir að neita að syngja í karókí. Þar fór alveg töffarayfirbragðið af grey stráknum. Ég sé fyrir mér einmana yfirþyngdardrottningarnar sem fitjuðu upp á nefið þegar ég nauðgaði You never walk alone í steggjaveislunni minni á sviðinu í Ölver. Þeim fannst ekki mikið til frammistöðu minnar koma. Craig var að hætti félagsins sektaður um andvirði golfkylfunnar sem hann keypti úr dánarbúi Önnu Nicole sl. fimmtudag. Ég meina hvað er málið með þetta pakk. Það er stórmerkilegt hvað lífið í Liverpool þarf oft að snúast um eitthvað annað en fótbolta. Það er eins og það safnist þangað hver sorasauðurinn á eftir öðrum. Það er náttúrlega ótrúleg skammsýni að festa kaup á Bellamy og Pennant, verandi með kóknösina Robbie Fowler á hliðarlínunni. Poolarar eru og verða hálfvitar.

Hitt og þetta

Helgi á Hamarsheiði
Fín helgi á Hamarsheiði um helgina. Ég kom heilmiklu í verk innanhúss og slappaði líka af á milli. Íris og Halldór komu ásamt Naomí og við skemmtum okkur vel saman.

Klámhistería
Ég veit ekki hvað er að verða um þetta land. Það er allt vitlaust út af því það ætla að koma hér eitthvað klámpakk að halda ráðstefnu. Ég meina af hverju má þetta lið ekki spjalla svolítið saman hérna. Það er ekki eins og það sé verið að skipuleggja fjöldasamfarir á Austurvelli eða járnbrautarlest í Kringlunni. Ég veit ekki hvers vegna þetta femínistafélag þarf alltaf að vera að rífa sig. Það er ekki eins og þetta fólk sé hér tilneytt.

Þreytt grammófónplata
Skringibjörg Sólbrún er byrjuð á sínu skrykkjótta kosningabarátturausi. Það verður gaman að sjá hvort henni tekst í þetta skiptið að koma í alvöru einhverja stefnuskrá eða hvort hún gerir bara eins og venjulega að fara eftir skoðanakönnunum. Algjörlega hugsjónalaus stjórnmálamaður sem hefur enga tilfinningu fyrir vilja kjósenda lengur. Hundleiðinleg væluskjóða.

Fokking Brynjar Björn

Uppfærsla
Sæl öllsömul. Ég er enn að uppfæra síðuna og var nú að setja inn hlekki á nokkur börn í viðbót. Hjá sumum þarf lykilorð en ekki hjá öðrum. Þið finnið út úr því. Annars vil ég endilega að þið sendið mér línu með kommenti ef ykkur finnst barnið ykkar vanta þarna.

Uppáhaldsbloggarinn þessa dagana
Ég er orðinn háður því að lesa nýju matardagbókina hans Ragnars Freys. Ragnar var með mér í læknadeildinni og er mjög ástríðufullur maður. Ein af sterkustu ástríðum hans er matargerð og hann hefur nú ákveðið að deila með okkur hinum snilli sinni í eldhúsinu með því að blogga á hverjum degi hvað hann og konan elda. Ég mæli með því að þið kíkið á þessa síðu ef þið hafið minnsta áhuga á matargerð. Brjálæðislega girnileg síða.

Tvær aðrar heimasíður í smíðum
Annars vegar er það heimasíða fyrir Hamarsheiði sem er reyndar fyrst og fremst fyrir okkur sem eigum pleisið en áhugasamir geta fylgst með því hvað fer fram á heiðinni.
Hin síðan er síðan fyrir "Ole Gunnar Bergmann" en hún verður ekki opnuð strax. Slóðin verður þó þessi þegar þar að kemur og ég geri ráð fyrir að ég opni hana um miðjan mars.

Breytt útlit

Ég var orðinn þreyttur á útlitinu og ákvað að breyta til. Uppfærði líka hlekkjalistann svo ef einhver vill láta hlekkja sig þá er bara að setja álit og ég skelli þér inn ef mér líst vel á. Er annars að vinna í tveimur öðrum síðum líka. Það er síða fyrir Hamarsheiði og fyrir Ola Gunnar. Gengur ágætlega. Meira seinna - er að fara á vaktina.

Meðgangan
Þá er farið að styttast allsvakalega í þetta. 34 vikur á þriðjudaginn og það er kominn í mann heilmikill fiðringur. Edda er orðin myndarleg þó bumban sé nett eins og foreldrarnir. Ekki kannski við því að búast að komi einhver risi út úr svona dvergaræktun. Eitt er samt víst að barnið verður liðtækt í boltanum því hann skallar og sparkar í innanverða bumbuna af miklum móð og er einstaklega laginn við að hitta í lófann á pabba sínum.

Frábær afrek
Það er frábær siður hjá Rauða krossinum að veita viðurkenninguna skyndihjálparmaður ársins. Síðustu árin hafa mörg börn og unglingar fengið viðurkenninguna og fyrir árið í fyrra hlaut átta ára gamall drengur hana. Hann bjargaði lífi móður sinnar þegar hann brást hárrétt við ofnæmislosti hennar.

Pabbinn
Við fórum skötuhjúin ásamt Helgu og Sverri, Áslaugu og Ingólfi og Elnu og Fannari að sjá þetta verk í gær. Það er svo magnað með leikhús að það er alltaf gaman að fara en maður fer samt svo ótrúlega sjaldan. Það er ekki einu sinni vegna þess að ég hafi ekki haft tækifærin heldur valdi ég bara að fara ekki. Mamma og pabbi hafa verið frekar dugleg að fara og buðu mér oft að koma með þegar ég bjó hjá þeim en ég afþakkaði alltaf. Þetta varð til þess að þegar ég fór með tengdó á Með fullri reisn fyrir nokkrum árum þá hafði ég ekki farið í leikhús síðan Hilmir Snær og Valgerður Guðna slógu í gegn í The Rocky Horror Picture Show í Loftkastalanum um árið.
En hvað um það - við sáum þetta verk í gær. Bjarni Haukur var auðvitað frábær í Hellisbúanum um árið svo maður bjóst við frábærri skemmtun og það var nákvæmlega það sem maður fékk. Ég veltist um af hlátri hvað eftir annað og á milli komu mikilvæg skilaboð til verðandi og nýbakaðra foreldra. Ég mæli eindregið með þessu fyrir alla sem hafa gaman að því að hlæja.

Boltinn
Áfram MUFC. Góður sigur á Charlton í gær þrátt fyrir að Ronaldo og Carrick væru hvíldir. Það virðist allt ætla að ganga upp hjá mínum mönnum þetta árið. Það er gott og kominn tími til. Það er líka frekar jákvætt að hvíla tvo af bestu leikmönnum liðsins og mennirnir sem koma inn í liðið sjá um að klára leikinn. Það kallar maður að koma inn í liðið með stíl. Ég er farinn að hafa góða tilfinningu fyrir vorinu. Ég er viss um að Óli Gunnar er ánægður með þetta.

Boltinn
Mínir menn að standa sig í boltanum. 0-4 á útivelli á móti Tottenham og þeir sáu aldrei til sólar í leiknum. Ronaldo er náttúrlega ótrúlegur leikmaður og þó vítið hafi verið fremur ódýrt þá verður að segjast að dómarinn sleppti augljósum vítaspyrnudómi stuttu áður þegar Larsson var teikaður í teignum. Vidic er svo auðvitað baneitraður þarna í hornunum en ég hafði nú samt svolitla samúð með Robinson greyinu að fá á sig mark eftir nokkrar stórkostlegar markvörslur í aðdraganda marksins. Scholes setti svo eitt sem Ronaldo gaf honum eiginlega og Giggs kláraði leikinn endanlega þegar hann sett'ann undir lokin. Ég var að vonast eftir marki frá Larsson en hann gerði svo sem flest annað en að skora í leiknum. Ótrúlega seigur leikmaður. Arsenal og Liverpool halda áfram að skíta í buxurnar en ég er ekki nógu ánægður með hvað Chelsea tekst alltaf að bjarga sér fyrir horn. Það er reyndar ánægjulegt að sjá hvað þeir skora lítið en það gæti skilað sér í óþarfa jafnteflum á móti liðum sem tekst að skora á móti þeim.

Umhverfisverndarendaleysan
Það hlýtur að vera erfitt að hafa ekkert áhugamál í pólitík annað en umhverfismál. Það er nefnilega þannig að umhverfisvernd er áhugamál fólks úr öllum flokkum og hefur ekkert með aðrar pólitískar hugsjónir fólks að gera. Ég held að þeir einstaklingar sem fengjust til að bjóða sig fram í nafni umhverfisverndarhugsjóna yrðu ekki frambærilegir þingmenn því mér virðist sem ötulustu talsmenn umhverfismála séu algerlega stefnulausir í öðrum mikilvægari málum. Umhverfismál ættu að vera sameiginlegt áhugamál fólks úr mismunandi flokkum og rétti vettvangurinn fyrir slíka baráttu eru fjölmiðlar og baráttuhópar en ekki stjórnmálaflokkar sem hafa engan áhuga á öðrum stefnumálum og fá einhverja leigða kosningasérfræðinga til að setja saman eitthvað stefnumálamombodjombo sem þeir nenna síðan ekki einu sinni að kynna sér. Ég mundi persónulega ekki kjósa Ómar eða Andra Snæ. Ég mundi einfaldlega ekki treysta þeim fyrir heilbrigðis-, efnahags- og velferðarmálunum því menn sem láta ástríðu fremur en skynsemi ráða ferð enda yfirleitt í ógöngum.

Nýja vinnan
Mér líst mjög vel á mig á nýja staðnum. Maður er reyndar frekar ryðgaður í skurðlæknisfræðinni sem við er að eiga á vöktunum en dagvinnan er frábær og ég finn strax að það mun nýtast mér vel svæfingunum. Ég er líka að byrja fyrir alvöru að vinna í rannsókninni minni sem snýst um starfsemi nýrnanna í gjörgæslusjúklingum. Það ætti að taka mig 4-6 mánuði að fá einhverjar niðurstöður úr því ef ég held vel á spöðunum.

Ótrúlegt svekkelsi
Þeir stóðu sig ótrúlega vel í gær strákarnir okkar í handboltanum. Það er glæsilegur árangur hjá pínulítilli þjóð eins og okkur að komast í 8 liða úrslit á heimsmeistaramóti. Stórsigur á Frökkum, sætur sigur á Slóvenum og frábær barátta á móti Dönum standa upp úr að mínu mati. Það er samt margt sem var jákvætt í þessari keppni. Markvarslan hefur t.d. sjaldan verið betri og ég held að það sé fyrst og fremst vegna þess að Sverrir, Vignir og Alexander hafa komið gríðarlega sterkir inn í vörnina en áður var Fúsi algjör yfirburðamaður. Annað sem er jákvætt er að ógnin sem hefur vantað vinstra megin á vellinum er komin með þeim Loga og Markúsi Mána og þó Arnór Atlason hafa ekki náð sér á strik á þessu móti þá má ekki gleyma því að hann var frábær á síðasta stórmóti og ég er viss um að hann kemur aftur sterkur inn næst. Að lokum er það svo snillingurinn Snorri Steinn Guðjónsson. Þarna er að mínu mati kominn framtíðarfyrirliði íslenska landsliðsins. Svo má auðvitað ekki gleyma því að við eigum tvo frábæra hægri bakverði framtíðarinnar í Einari Hólmgeirs og Ásgeiri Erni. Þannig erum við komnir með frábæra leikmenn í hverja einustu stöðu á vellinum.
Guðjón Valur er náttúrlega einn magnaðasti vinstri hornamaður heims.
Logi og Markús Máni eiga eftir að vaxa enn meira í vinstri bakvarðarstöðunni.
Snorri Steinn er frábær á miðjunni en því miður vantar annan góðan leikstjórnanda.
Óli á sennilega ekki mörg ár eftir, ekki af því að hann getur það ekki heldur af því að hann vill það ekki. Ég hef það að minnsta kosti á tilfinningunni. Þar er framtíðin hins vegar björt með Ásgeir og reyndar sérstaklega Einar Hólmgeirsson sem því miður gat ekki verið með núna.
Svo eigum við auðvitað hinn stórkostlega tengdason Alexander Petterson í hægra horninu. Ef það er til útlendingur sem er stoltari og ákafari að spila fyrir fósturþjóð sína þá megið þið vinsamlega benda mér á hann.

Medicin
Þá er lokið veru minni á lyflækningasviði. Eins og ég held að ég hafi skrifað um hér áður þá ákvað ég að stytta starfstímann minn þar úr einu ári í sex mánuði þar sem ég taldi mig ekki vera að fá það út úr starfinu sem ég lagði upp með í upphafi. Eins voru aðstæður á sviðinu ekki hagstæðar á þessum sex mánuðum, sérstaklega vegna manneklu. Það er ekki þar með sagt að mér hafi ekki líkað samstarfsfólkið sem slíkt. Það fer ekki alltaf saman góður vinnuandi og gott umhverfi til að bæta sig sem læknir. Ég hef einhvern veginn á tilfinningunni að ég hafi litlu bætt við það sem ég kunni þegar en kannski gerir maður sér ekki grein fyrir svoleiðis löguðu fyrr en frá líður. Einhverra hluta vegna gekk mér að minnsta kosti ekki vel að stunda lestur fræðanna á meðan ég starfaði þarna, hverju sem það er um að kenna. Ég hef störf á Háls-, nef- og eyrnadeildinni í fyrramálið. Það verður vonandi lærdómsríkt.

Handboltinn
Strákarnir hafa verið að standa sig svona upp og ofan. Tap fyrir Pólverjum og Þjóðverjum en sigur á Slóvenum og Túnisbúum. Ég held að ef við höldum okkur frá verjunum þá munum við hirða þessa helvítis dollu. Það er því ljóst að við getum tekið Rússa, Dani, Frakka og Króata en það gæti orðið erfitt að vinna Spánverja, Pólverja og Þjóðverja. Kannski spilast þetta heppilega fyrir okkur í hinum leikjunum en á morgun hef ég trú á því að við tökum Dani.
Ég er gríðarlega ánægður með hvernig breiddin í hópnum hefur aukist. Þannig hafa Logi og Markús Máni staðið sig með prýði og Róbert hefur létt töluvert álagið sem var alltaf á Fúsa. Eins hefur innkoma varnarjaxlanna Sverris og Vignis auðveldað varnarleikinn fyrir Fúsa eins og reyndar Alexander hefur gert líka. Með þessum bætta varnarleik hefur markvarslan batnað til muna og í fyrsta skipti síðan ég fór að fylgjast með hafa markverðirnir verið með bestu mönnum liðsins. Þeir hafa allir átt góða spretti en Birkir hefur þó verið jafnbestur og alveg hreint stórkostlegur á köflum á móti t.d. Frökkum og Slóvenum.

Fótboltinn
Mínir menn í MUFC hafa verið allt of rólegir á leikmannamarkaðnum í janúar að mínu mati því ég var að vonast eftir alla vega einum varnarmanni og einum miðjumanni. Einn miðjumaður hefði meira að segja glatt mig gríðarlega. Ferguson veit hins vegar hvað hann syngur og ég er löngu hættur að efast um ákvarðanir hans í leikmannamálum. Maðurinn er lifandi goðsögn. Nú er bara að baka Reading í bikarnum og halda áfram á sömu braut í deildinni.

Frjálslyndir
Ótrúlegt hvað er hægt að mynda mikinn storm í svona litlu vatnsglasi. Margrét lætur eins og einhver drottning og vælir yfir öllu sem menn segja og gera. Sú hefur verið rúmlega handfylli á gelgjunni en það var svo sem ekki ómerkari nagli en Sverrir Hermanns sem tókst á við það þannig að sennilega hefur það verið í lagi. Það er nú engin lognmolla í honum blessuðum. Ég held reyndar að Frjálslyndir forystumenn muni líta á þessa kosningu sem stuðningsyfirlýsingu við þjóðernisstefnu flokksins og þeir gætu sópað til sín fylgi út á það í vor. Ég er ekki að verja stefnuna en það er augljóst að margir eru orðnir þreyttir á aðstreymi erlends vinnuafls hingað, hvernig sem unnt verður að hefta það. Það er hins vegar sjálfsögð umræða að spá í hvort ekki ætti að halda íslenskunni meira að útlendingum eða a.m.k. ensku. Það er sífellt vaxandi vandamál að á bráðamóttökur LSH leitar fólk sem hvorki talar ensku né íslensku og sumir tala ekkert nema framandi móðurmálið. Slíku fólki er erfitt að hjálpa en sem betur fer er túlkaþjónustan hér framúrskarandi. Það verður í það minnsta spaugilegt að fylgjast með þessari umræðu í aðdraganda kosninganna.

RÚV
Þvílík og önnur eins endaleysa sem þetta RÚV-mál er allt orðið. Ég er nú enn þeirrar skoðunnar að almannavarnanautaskíturinn sé tómur fyrirsláttur í einhverju nostalgíuliði sem vil troða upp á sauðsvartan almúgan einhverjum leiðindagaurum sem fjalla um orð sem enginn notar lengur eða spila tónlist sem einhverjir dauðir menn sömdu á falskt píanó fyrir 1700 árum. Hvað hefur þessi Mozart karakter fram yfir Diktu og Jeff Who?? Nákvæmlega ekki neitt nema hann djammaði aðeins meira og var vel plöggaður. Helvítis ræfill. Ég er svo sem ekki að setja út á músíkina hans sem slíka en það er bara svo margt sem flestum núlifandi finnst skemmtilegra. Tengdamamma heldur t.d. mikla meira upp á Bjögga gamla en hinn útdauða Wolfgang, tengdapabbi hlustar á Spaðana og Queen og pabbi gamli er meira svona djassgeggjari þó hann fíli nú alveg W.A.M.

Hamarsheiði og Helgi Hrafn
Við vorum á Hamarsheiði um helgina fjölskyldan. Jón Bragi og Sigrún voru á landinu og krakkarnir líka svo það var þrumustuð. Helgi Hrafn var alveg steinhissa á þeirri fáránlegu staðreynd að Edda væri með barn í maganum og skildi ekkert í því hvernig ætti að ná því út. Hann hélt fyrst að það kæmi bara út um munninn en þegar pabbi hans reyndi að útskýra þetta fannst honum það ekki trúlegt. Hann velti þessu fyrir sér dágóða stund og sagði svo spekingslegur: "Vi har en plan!! Ég tala bara við doktorkallinn og hann nær því út". Við bræðurnir vorum auðvitað gjörsamlega gagnslausir og það var því ákveðið að Helgi mundi hafa samband við doktorkallinn strax daginn eftir. Ég náði þessu sem betur fer öllu á myndband og þetta verður geymt til þess dags að drengurinn gengur í það heilaga. Þá verður sko hlegið í salnum.

In memoriam
Samband skötuhjúanna virðist brostið og báðir hafa þeir hafið stefnumótun af krafti. Ekki hefur sést til Safapressunnar sl. 10 daga vegna gríðarlegra stefnumótunaranna. Blessuð sé minning sambands þeirra sem var stutt en þó fallegt og ástríðufullt.

Strákarnir okkar brillera!!!
Frábærasti leikur íslenska landsliðsins í langan tíma. Mér finnst menn reyndar gleyma níu marka sigrunum á Júgóslövum og Spánverjum hérna um árið en það að valta svona yfir Evrópumeistarana er sannarlega rosalegt. Við keyrðum yfir þá í fyrri hálfleik og bökkuðum svo yfir þá í þeim seinni. Birkir Ívar var náttúrlega maður leiksins og maður sér hvers hann er megnugur þegar vörnin verður svona góð. Það voru markvörslur í heimsklassa þarna inni á milli, sérstaklega þegar hann tók þessar neglur frá Fernandez niðri í hornunum. Ótrúlegar markvörslur. Liðið var reyndar allt alveg frábært, Óli, Guðjón, Snorri Steinn og Logi í sókninni. Fúsi, Vignir, Alex og Sverrir í vörninni. Talandi um Alex. Það er magnað að sjá mann spila af svona miklu stolti, innlifun og baráttu fyrir land sem hann er ekki einu sinni fæddur í og hafði reyndar ekki búið í fyrr en um tvítugt. Hann er sannarlega draumatengdasonur íslensku þjóðarinnar. Nú er bara að redda sjónvarpinu á Hamarsheiðina svo við getum fylgst með þessu um helgina.

MUFC
Helvítis svekkelsi í gær að tapa svona fyrir Arsenal. Ég held að það sé eitthvað bogið við það að ég horfi á þessa leiki heima hjá Svenna mág og co. svo ég ætla að hætta því. Horfi á næsta leik einhvers staðar annars staðar. En púlararnir stóðu sig á laugardaginn svo munurinn er ennþá 6 stig og ég hef reyndar minnstar áhyggjur af Chelsea, því þar virðast öll eyðslusemin vera að koma í bakið á þeim. Mourinho sýnir þessa daganna að þegar illa gengur er það öllum öðrum að kenna en honum sjálfum og er greinilega búinn að gleyma því hvernig á að gera mikið úr litlu eins og hann gerði hjá Porto.

Aumingi
Ljós-Gíslinn er búinn að vera sannkallaður aumingi síðustu daga. Ég var á vaktatörn í síðustu viku og þegar ég kom heim á sunnudagsmorgunn fann ég að ég var að fá hálsbólgu. Ég lagðist því til svefns eftir að hafa tekið sýklalyf og ætlaði að reyna að hrista þetta af mér fyrir vaktina um kvöldið. Þegar ég vaknaði seinni partinn var ég helmingi verri og kominn með hita í þokkabót. Ég þurfti því að slaufa vaktinni. Til að bæta gráu ofan á svart hafði ég tekið að mér fundarstjórn á Læknadögum á mánudagseftirmiðdeginum og slíkt er erfitt að afboða með svo stuttum fyrirvara. Ég klæddi mig því upp, skellti í mig tveimur parkódín og einni íbúfen og rétt hafði það af þennan einn og hálfa tíma, kom heim og svaf. Nóttin á eftir var hræðileg. Ég svaf næstum ekkert fyrir svitahófum og kuldahrollsköstum á víxl og það endaði með því að ég færði mig fram í stofu um kl. 4:30 til að halda ekki vöku fyrir Eddu. Nú er kominn fimmtudagur og ég er enn með hitavellu og að drepast í hálsinum en þetta er samt allt að koma. Vonast til að komast í vinnuna á morgun.

Boltinn
Spennandi bolti um helgina. Fyrst Liverpool-Chelsea á laugardaginn og svo Arsenal-Man.Utd. á sunnudag. Draumur í dós ef Liverpool tæki Chelsea og United tæki Arsenal. Þá væri tímabilið næstum búið held ég. Ronaldo setur 2 og Scholes 1 í 2:3 sigri minna manna. Magga og Maggi verða á vellinum svo ég vona að það verði skorað mikið.

Brúðkaup
Gleymdi auðvitað að blogga um brúðkaupin sem við fórum í um og eftir áramótin. Fyrst voru það Heiðar og Fríða 30. desember og svo Árni Grímur og Steinunn þann 6. janúar. Bæði brúðkaupin ógleymanleg, frábær matur, skemmtilegar ræður, skemmtilegt fólk og almenn gleði. Takk fyrir mig fólk.

Boltinn
Þeir gefa ekkert eftir United menn og nú síðast tóku þeir Aston Villa í kennslustund á Old Trafford á laugardaginn. Þrjú mörk í fyrri hálfleik, þar af eitt frá hinum sjóðheita Cristiano Ronaldo og annað frá hinum gagnrýnda Michael Carrick. Ég er mjög hrifinn af þeim félögum og mér finnst gagnrýnin sem Carrick hefur orðið fyrir svolítið fáránleg. Miðjan hefur verið vandamál hjá okkur lengi eða alveg frá því Keane fór að dala og svo kemur þessi strákur, liðið fer að spila vel og hann fær ekkert hrós. Ég held að ein af stóru þáttunum í því hvað Ronaldo, Scholes og Giggs hafi spilað vel á þessu tímabili sé einmitt óeigingjarnt starf Carricks aftarlega á miðjunni og stundum reyndar O'Shea og Fletcher. Ég er í það minnsta einn Unitedmaður sem er hrifinn af framlagi stráksins og vona að hann fái að spila mikið og lengi hjá MUFC.
Ég fór aðeins að skoða heimasíðu Actim og þar sér maður að Ronaldo er #2 yfir bestu leikmenn deildarinnar, rétt á eftir Drogba. Þar getur maður borið þá saman og sér þá eftirfarandi.

Tölfræði Ronaldo Drogba
Leikir 21 23
Leiknar mín 1866 2040
Mörk/skot á mark 13/60 14/29
Mörk að meðaltali 0,62 0,61
Stoðsendingar 6 3
Fyrirgjafir 59 14
Gul spjöld 0 6
Actim stig 394 403

Miðað við þessar tölur skil ég ekki af hverju Drogba toppar listann. Ronaldo er bara miklu betri. Aðrir United menn á þessum lista eru:
Rooney 7. sæti
Rio 12. sæti
Van der Sar 13. sæti
Saha 17. sæti
Giggs 23. sæti
Neville 25. sæti
Evra 33. sæti
Scholes 35. sæti
Vidic 43. sæti
Carrick 69. sæti

Svo þið sjáið að allt byrjunarliðið er á topp 100 listanum

Van der Sar
Neville Rio Vidic Evra
Carrick
Ronaldo Scholes Giggs
Rooney Saha

Ekki slæmt enda hefur liðið staðið sig frábærlega á tímabilinu og ég held að þeir hirði helvítis dolluna í vor.

Pólítíkin
Ingibjörg Sólrún virðist alveg búin að missa það. Eftir að hún tók sér frí og fór að læra meira hefur færst yfir hana þessi menntasnobbsyfirlætisangan sem svo gjarnan einkennir hámenntaða vinstrimenn. Hámenntaðir vinstri menn finnst mér alltaf svolítið spaugilegir því mér finnst þeir alltaf svo ótrúverðugir. Ég mundi miklu frekar kjósa verkalýðsforingjann sem hefur unnið 400 daga á ári og á sautján börn með æskuástinni sinni heldur en einhvern uppskafinn vinstrisinnaðan háskólamann. Þeir eru bara miklu trúverðugri. Kannski er ég gamaldags og vil að veröldin sé bara sama gamla ríku hægri, fátæku vinstri ímyndin. Þetta er orðið svo flókið núna eftir að allir flokkarnir færðu sig inn á miðjuna, Sjálfstæðisflokkur frá hægri og vinstri flokkarnir frá vinstri. Um leið hefur gamli miðjuflokkurinn Framsókn einhvern veginn sokkið í niðurfallið og er nú í endalausum lífsbáráttuspíral í hringiðu niðurfallsins. Til allrar hamingju fyrir þá var Alfreð Þorsteinsson búinn að rústa holræsakerfinu og yfirtaka Orkuveituna þannig að öll niðurföll borgarinnar eru hálfstífluð og taka illa við svona hroða. Við þurfum að fá okkur svona tætara eins og eru á öllum góðum heimilum í henni Amríku.

Vaktin
Ég er á næturvöktum um helgina ásamt Ingólfi Ozon. Vona að það verði rólegt svo maður geti lagt sig og gert eitthvað úr deginum en það er svo sem ekki algengt. Kannski maður nái í það minnsta að sjá leikinn á morgunn.

Eru allir hættir að lesa?
Það hafa ekki komið nein komment á síðustu tvær færslur og Ljós-Gíslinn er farinn að hallast að því að allir séu búnir að gefast upp á honum. Slíkt er ekki óhugsandi enda hefur oft liðið langt á milli færsla. Sjáum hvort við fáum ekki einhvern til að rífa sig yfir þessum skrifum.

Buffið gengið út
Já, hvort sem þið trúið því eða ekki þá er buffið gengið út. Hann hefur sést með ónefndri dömu (ath! ekki Safapressunni) í öllum helstu kvikmyndahúsum borgarinnar upp á síðkastið. Ólyginn sagði að hann hefði m.a.s. farið í áttunda skipti á The Departed án þess að segja stúlkunni frá fyrri kynnum sínum af myndinni. Áform Buffsins og Safapressunar um sambúð eru í uppnámi að sögn vina Safapressunnar og hann lifir nú milli vonar og ótta að fregnir af tilvonandi brullupi Buffsins seint í næstu viku séu úr lausi lofti gripnar. Undirbúningur ku þó vera svo langt á veg kominn að tilvonandi brúður hafi sést nær daglega ásamt þreknum einkaþjálfara í Laugum upp á síðkastið. Sögusagnir segja að um bróður Buffsins sé að ræða en líklegt verður að teljast að Buffið sjálft sé þar á ferðinni enda þeir bræður sláandi líkir. Meira um þetta mál síðar.

Ljót orð
Það er ákveðið orð sem hefur riðið húsum Ljós-Gíslans upp á síðkastið sem hann hefur sérstaka andstyggð á, en það er nafnorðið elska. Takið eftir að ég er hvorki að tala um sögnina að elska né nafnorðið elska í merkingunni ástin mín eða krúsíbolluknúsudúllan mín. Orðið sem ég á við er elska í merkingunni ást eða umhyggja. Mér finnst það alveg skelfilegt orð einfaldlega vegna þess hvað það verður ljótt þegar það er notað í þessari merkingu. Vinsamlega notið þetta orð ekki í nærveru minni, það gæti orðið banamein ykkar.

Boltinn
Ég elska að hata önnur fótboltalið en þau sem ég sjálfur held með. Þannig hata ég t.d. Val, Fram og Fylki (hef aldrei náð upp KR-hatrinu í mér). Þannig hata ég líka Chelsea, Arsenal, Juventus, Real Madrid og Bayern Munchen. Ég elska jafnframt Víking, Manchester United, Barcelona og Milanoliðin Inter og AC. Af þessari ástæðu finnst mér ekki gaman þegar Arsenal vinnur tvo góða sigra í röð á útivelli þó það sé gegn Liverpool. Sem betur fer var þetta allt saman í bikarnum og bæði lið halda áfram að skíta í bleyjurnar sínar í deildinni. Mínir menn hafa hins vegar staðið sig frábærlega í deildinni til þessa og maður vonar bara að Ferguson sé enn seinni helmings maður eins og hann hefur alltaf verið, þ.e. að United spili seinni hluta tímabils betur en þann fyrri. Þá verður titillinn okkar.

Vinnan
Ég er að verða búinn með mína sex mánuði á lyflækningadeildunum og hlakka til að skipta um vettvang og flytja mig yfir á háls-, nef- og eyrnadeildina um mánaðarmótin. Það verður svolítið öðruvísi að fást við skurðlæknisfræði næsta hálfa árið en þegar því er lokið verður lífið bara ein svæfing ef öll plön ganga eftir. Í sumar stefni ég að því að fara að athuga fyrir alvöru með sérnám og ég ætla mér að komast út ekki mikið seinna en haustið 2008 eða í síðasta lagi um jólin sama ár. Það er ekki eftir neinu að bíða svo sem en það er ágætt að njóta lífsins aðeins áður en næsti áfangi á námsferlinum hefst.

Lífið
Nú er maður farinn að átta sig betur og betur á því hvað bíður manns eftir rúma 3 mánuði þegar "Óli Gunnar" kemur í heiminn. Við skötuhjúin eigum eins og flestir lesendur vita líklega von á barni í lok mars og ég hef mér og fleirum til gamans uppnefnd bumbubúann Óla Gunnar, Eddu og tengdafólki mínu öllu til mikillar "gleði". Þau eru flest Arsenalmenn en einstaka Poolarar og reyndar einn Villamaður. (Ath!! ekki Villimaður). Svo er það vinnan sem ég nefndi að ofan auk þess sem ég er að reyna að drulla mér af stað með rannsóknarverkefni en ég finn mér aldrei tíma í allri letinni til að koma því af stað. Svo er ég að reyna að koma mér í form því ég ætla að taka eitt alvöru tímabil í boltanum áður en ég flyt út en það gengur erfiðlega, fyrst og fremst vegna áðurnefndrar leti og þrjósku við að taka upp hollara mataræði. Í morgunn hófst enn eitt átakið. Sjáum hvernig gengur.

Ný börn
Ég hef náttúrlega gleymt að blogga um öll nýju börnin í kringum okkur.

Fyrst verður að sjálfsögðu að nefna KR-inginn og fegurðardrottninguna Helgu Kristínu Eiríksdóttur (Eika og Guðnýjar) sem kom í heiminn þann 27. nóvember. Við erum búin að heimsækja hana og hún tók vel á móti okkur. Fjallmyndarleg eins og foreldrarnir.

Næst voru síðan Kristján og Brynja sem búa hér í húsinu og vinna bæði með mér á LSH. Þau áttu litla skvísu á jóladag ef ég man rétt og heilsast öllum vel þar líka. Hún kom aðeins og kíkti á okkur ásamt foreldrunum á gamlárskvöld eða reyndar nýársnótt. Efnileg stúlka þar á ferð.

Síðan var botninn sleginn í árið þegar húnninn þeirra Björns og Ernu leit dagsins ljós á Eðalfundsdaginn 29. desember sl. Hann hlýtur að sjálfsögðu að fá nafnið Hannes úr því hann fæddist á þessum degi og hafði eðalfundinn af pabba sínum en við sjáum til hvernig það fer allt saman.

Í svipinn man ég ekki eftir fleiri nýjum börnum en minnið mig endilega á ef ég gleymi einhverju.

Gleðilegt ár og takk fyrir gamla!
Já, nú er komið enn eitt nýárið. Janúar er skemmtilegur mánuður. Hann ber með sér marga skemmtilega atburði. Í ár er sá fyrsti brúðkaup þeirra Árna Gríms og Steinunnar á laugardaginn en á sunnudaginn eigum við Edda svo eins árs brúðkaupsafmæli. Tíminn er fljótur að líða. Þá verður Óttar bróðir líka 37. Janúar er líka mánuðurinn sem ég er mikið í símanum að tala við apótek. Þannig er nefnilega mál með vexti að lyfseðlar duga bara í 1 ár frá útgáfudegi og ég er mjög lengi að átta mig á áraskiptum og skrifa því lengi fram eftir mánuðnum gamla árið með dagsetningunni. Þannig eru seðlarnir í raun útrunnir um leið og ég skrifa þá. Súrt að vera svona utan við sig stundum.


Vellyktandi
Við Edda höfum þann sið að kaupa dýrasta skoruþerrinn í búðinni yfir hátíðirnar. Um þessi jól reyndist hann vellyktandi og jólasteikin hefur því ferðast um blómlega haga á leið sinni til fiskanna. Alltaf gott að hafa botninn vellyktandi.

Áramótapartý
Við skötuhjúin héldum heljarinnar teiti hér á gamlárskvöld og nýársnótt. Við byrjuðum á að bjóða tengdó og Möggu í mat auk þess sem Viðar kom þar sem hann var ekki boðinn til tilvonandi tengdaforeldra sinna á Álftanesinu og foreldrar hans voru í sveitasælunni. Við höfðum Nautalund Wellington sem var frumraun og þótt innpökkunum heppnaðist ekki alveg var maturinn ljúffengur á bragðið þó ég segi sjálfur frá. Edda gerði svo stórkostlega súkkulaðiköku í eftirrétt. Síðan var horft á skaupið sem var svo sem allt í lagi, svolítið steikt en ekki nógu að mínu mati. Stundum er betra að fara bara með steikina alla leið. Svo skutum við upp flugeldum í kapp við nágrannana og svo var tekið á Konna og ölinu fram eftir nóttu. Það var fámennt en góðmennt. Gott partý.

Hörmuleg hestaslys
Það hafa verið skelfileg hestaslys á þessu ári. Fjöldi mænuskaða og a.m.k. tvö dauðsföll, það síðasta var nú rétt fyrir áramótin þegar Jóhanna Björnsdóttir blóðmeinafræðingur og kollegi minn fannst látin eftir útreiðartúr. Ég vann nú ekki mikið með henni Jóhönnu en talaði töluvert oft við hana í síma og hún var mjög viðkunnaleg kona. Blessuð sé minning hennar.

Gleðileg jól!
Sælt veri fólkið. Langaði bara að óska lesendum Geislans gleðilegra jóla.