Æfing nr. 2
Ég held að það væri hægt að stilla upp nokkuð sterku liði hjá Dufþaki. Það er töluvert af góðum leikmönnum þarna og svo nokkrir liðtækir í viðbót. Það verður erfitt fyrir mig að komast í liðið því það virðist vera töluvert af góðum sóknarmönnum þarna. Það er að sjálfsögðu bara meira gaman þannig, gerir mann ákveðnari í að standa sig ef tækifæri gefst. Það er stefnt að æfingaleik á laugardaginn og þátttaka mín veltur á dugnaði við lestur þangað til og því hvort þjálfarinn kærir sig um krafta mína, sem eru eins og allir vita umtalsverðir. Hvað knattspyrnuhæfileikana varðar ætla ég ekki að tjá mig. Ætti kannski að benda honum á að ég skoraði einu sinni tvö mörk gegn Dufþaki í bikarleik - þegar hann var að dekka mig. Reyndar ætti ég kannski ekkert að vera að rifja það upp því Ástin tapaði þeim leik 4-2 og hefur eftir því sem ég kemst næst aldrei unnið Dufþak.

Lestur...
...hefur gengið ágætlega síðustu daga en margir hafa krafist nærveru minnar og því hefur stundum gengið illa að einbeita sér. Mikið af afmælum og svoleiðis en það er svo sem ágætt að standa upp frá lestri í 2-3 tíma af og til. Frá og með mánaðarmótum verður allt svoleiðis látið lönd og leið og setið við lestur mestan hluta sólarhringsins. Maður nær nú reyndar sjaldan nema 6-8 góðum lestrartímum á dag en lesformið er óðum að batna og ég sat t.d. vel við í dag. Nú er bara að drulla sér í háttinn, taka daginn snemma og láta augu standa fram úr tóftum við lestur á morgun.


Afmælisbarn dagsins...
...er hún mamma gamla. Það var reyndar í gær því nú er kominn 30. mars en hún verður að sætta sig við seinagang Geislans.
Höddi og Guðrún klippikona fá líka afmæliskveðju en þau urðu 26 og 25 ára í gær (fyrradag - 28. mars).

Spakmæli dagsins

Vincent Vega: Want some bacon?
Jules Winnfield: No man, I don't eat pork.
VV: Are you jewish?
JW: No I ain't jewish, I just don't dig on swine, that's all.
VV: Why not?
JW: Pigs are filthy animals. I don't eat filthy animals.
VV: Yeah but bacon tastes good, pork chops taste good.
JW: Hey, sour rat meat might taste like pumpkin-pie, but I'd never know 'cause I'd never eat the filthy mothafucka'. Pigs eat and root in shit. Thats a filthy animal. I ain't eating nothing thats got no sense of disregard for its own feces.
VV: How 'bout a dog? Dog eats its own feces.
JW: I don't eat dog either.
VV: Yeah but do you consider a dog to be a filthy animal?
JW: I wouldn't go so far as to call a dog filthy, but they're definately dirty. But dogs got personality, personality goes a long way.
VV: So by that rational, if a pig had a better personality, she'd cease to be a filthy animal. Is that true?
JW: Well we'd have to be talkin' 'bout one charming motherfuckin' pig. I mean he had to be ten times more charming than that Arnold on Green Acres, you know what I'm sayin'?

Sennilega er þetta besta samtal í kvikmynd fyrr og síðar. Eða að minnsta kosti fyrr, veit ekki með síðar.

Boltinn
Mínir menn stóðu sig með prýði í dag og náðu jöfnu í Háboru þeirra Rassenalmanna eftir að hafa lent stórglæsilegu marki undir. Ég er reyndar nokkuð viss um að Howard hefði haft'ann en Carroll á nú alveg skilið lof fyrir prýðilega markvörslu undanfarið þannig að ég ætla ekkert að púa á hann í dag. Það er hins vegar ekki mörgum liðum sem tekst að sækja stig í Háboruna og það hefur aðeins stórliðunum Portsmouth og Fulham tekist á leiktíðinni. Saha er að koma rosalega sterkur inn í þetta United-lið og ég held að m.a.s. Magnús Gísli sé farinn að halda upp á hann.
En þrátt fyrir ágæta ferð í Háboruna þá stendur eftir sá blákaldi veruleiki að við erum að tapa Chelsea alltof langt frá okkur í baráttunni um 2. sætið í deildinni og því blasir við mínum mönnum umspil um sæti í Meistaradeildinni næsta vetur. Það er ekki gott.

Nýjir hlekkir
Datt inn á skemmtilegt blogg í dag og hef ákveðið að bæta því á uppáhaldslistann. Það er svona 1. deild bloggara en með sama áframhaldi mun Hjalti Snær verðskulda hlekk hér til hliðar, þ.e. komast í úrvalsdeild bloggara.

Prófbókin!
Geislinn hefur lengi haldið þann sið að trappa sig niður úr stressi próflestur með því að lesa góða bók í bælinu fyrir svefninn á meðan á lestrartörnum stendur. Í ár varð fyrir valinu bókin House of God eftir Samuel Shem sem var svona hálfgerð cultbók fyrir lækna og læknanema á sínum tíma. Bókin fjallar á afkáralegan en jafnframt eilítið raunsannan hátt um fyrsta árið eftir útskrift í lífi bandarísks læknis á einu virtasta sjúkrahúsi USA (sem heitir The House of God í bókinni). Þarna er sagt frá vinnugeðveikinni, líflegu kynlífi aðalpersónanna og mörgu skemmtilegu. Bókin er alveg hrikalega skemmtileg og mjög erfitt að sannfæra sjálfan sig um að leggja hana frá sér og fara að sofa. Með sama áframhaldi klára ég hana fyrir næstu helgi og þarf þá að finna mér nýja bók. Ætli ég reyni ekki einhverja Laxnessbók eða ævisögu Hitlers sem ég festi nýverið kaup á. Hver veit?

Boltinn
Er duglegur í boltanum þessa daganna, mánudagar, miðvikudagar og laugardagar eru boltadagar. Boltadagar eru góðir dagar.

Lífsýni í Álverinu í Straumsvík
Ég skil ekki fjaðrafokið út af þessu máli. Það ætti að vera hagsmunamál starfsmanna álversins að fyrirtækið sjái til þess að menn séu edrú í vinnunni. Þarna er verið að vinna á stórum vinnuvélum með stórhættuleg efni og því mikilvægt að menn séu alsgáðir. Ég get hins vegar verið sammála því að ákvæðið í ráðningasamningnum er illa orðað og þarf frekari útskýringar við. Þarna er fyrirtækið raunverulega að áskilja sér þann rétt að krefjast þess að menn séu alsgáðir í vinnunni og bjóða mönnum því upp á blóðsýni á vegum fyrirtækisins. Annar kostur væri sá að koma aftan að mönnum sem taldir eru undir áhrifum vímuefna með því að boða lögreglu á staðinn til að heimta blóðsýni því ég geri ráð fyrir að lög um ölvun við akstur gildi jafnt innan sem utan álversins. Álverið er því raunverulega að bjóða mönnum leið til að missa aðeins vinnuna en ekki bílprófið sitt líka ef upp kæmist að þeir væru undir áhrifum.
Einhvern veginn held ég að fyrir stjórnendum fyrirtækisins vaki ekki að rannsaka lífsýnin frekar nema ef til kemur ósk starfsmannsins. Slík lífsýnataka er alvanaleg í stórfyrirtækjum erlendis og þjónar þá yfirleitt hagsmunum bæði einstaklingsins og fyrirtækisins. Fyrirtækið útilokar að einstaklingurinn sé undir áhrifum ólöglegra efna og í staðinn fær starfsmaðurinn ókeypis læknisskoðun með reglulegu eftirliti. Slíkt hefur sennilega margoft bjargað mannslífum, þegar sjúkdómar uppgötvast snemma, áður en þeir verða ólæknandi.
Ég tel einnig að, alveg eins og ekki má skerða rétt einstaklinga til sjálfsákvörðunarréttar um eigin heilsu og meðferð eigin lífsýna, þá megi heldur ekki skerða rétt fyrirtækja til að gera ákveðnar kröfur um líkamlegt og andlegt atgervi starfsmanna sinna með þeim sjálfsagða fyrirvara að þær séu rökstuddar haldbærum rökum.

Eftir stendur þó bjánalegt orðalag sem mætti breyta.

Þorgeir...
...greyið! Hann er eins og Arsenalmaður þegar hann er að tapa. Lætur öllum illum látum, lendir í slagsmálum, fær rautt og allir gera grín að honum. Þorgeir er svo óður í bræði sinni að hann skilur ekki einfalt hugtak eins og alæta á tónlist. Alæta er sá sem getur étið hvað sem er en það þýðir ekki endilega að hann éti hvern sem er. Hann velur úr það besta, creme de la creme, og geymir draslið þar til hann á ekkert betra. Eins er með alætur á tónlist. Þeir hlusta ekki endilega á allt heldur fíla það besta sem hver tónlistarstefna hefur upp á að bjóða. Reyndar fíla ég ekki hipphopp og tölvutónlist frekar en alætur fíla skítinn úr sjálfum sér.
Þorgeir sem á að baki nám í líffræði við kommúnuna við Norræna húsið ætti nú að skilja svo einfalt hugtak sem alæta er en eins og öðrum vinstrisinnuðum sagnfræðingum (því þeir eru allir laumukommar sem sést best á ritgerðum þeirra og bókum) hefur honum tekist að rækta með sér þann ósið að ljúga, pretta, beygja, breyta og þvæla hugtökunum þannig að þau henti hans málstað.
Þorgeir er vinsamlegast beðinn að lesa orðabókina og eitt stykki líffræðibók áður en hann svo mikið sem skoðar bloggsíðuna sína aftur. Vertu svo til friðs Þorgeir.
Já og svo ég minnist á Júróvisjónlagið fyrir Tyson litla. Mér fannst lagið bara þrælfínt, Jónsi syngur það vel eins og ég hafði áður sagt og sá því enga ástæðu til að minnast á það aftur í fyrra svari mínu til þín Tyson litli. Ég hafði hins vegar gleymt að taka til greina að gullfiskaminni Þorgeirs nær ekki 2 daga aftur í tímann svo ég minnist á það aftur fyrir hann. Þið hin leiðið það bara hjá ykkur.

Gvöð menn almáttegur!!!
Morgunblaðið er sífellt að gera betur í gúrkufréttum. Allir kannast við forsíðufréttir Morgunblaðsins af pósthússstjóraskiptum í Viðey eða vitavarðaskiptum í Kolbeinsey en nú gerðu þeir enn betur.

Sagan af kofanum
Morgunblaðið birti í gær frétt um kofabruna á Álfanesi. Maður hefði nú haldið að þetta hefði verið eitthvað merkilegur kofi í eigu fóstursonar fyrrverandi tengdadóttur móðurömmusystur nýskipaðs pósthússstjóra í Viðey en neinei. Þetta var bara kofi einhvers staðar á víðavangi sem enginn hafði komið í síðan ég flutti af Nesinu. Eru ritstjórarnir á Mogganum dauðir eða? Góð saga!!!!

Meistaradeildin
Chel$kymönnum tókst ekki að knýja fram sigur gegn Arsenalmönnum sem virðast ekki geta tapað þessa dagana þrátt fyrir ömurlega leiki. Sá reyndar ekki nema korter af þessum en Arsenal komst varla í sókn í upphaf seinni hálfleiks. Ég held að markið hjá Pires hafi komið í fyrsta skipti sem þeim tókst að komast nálægt Chel$kymarkinu í seinni hálfleik. Þá stóð ég upp og fór að klára skattframtalið mitt. Skilaði því áðan, duglegur!!! Real klikkaði heldur ekki í sínum leik og kláraði Mónakó 4-2. Þetta seinna mark Mónakó sem Morientes skoraði held ég að gæti orðið Madrídingum dýrt í Frakklandi en við vonum að sjálfsögðu að þeir klári þetta. Draumaúrslitaleikurinn yrði AC Milan og Real Madrid sem ég held að séu bestu liðin í keppninni. Arsenal er síðan í þriðja, ekki langt undan og væri allt í lagi þó þeir skiptu við annað liðið. Annars verður maður bara að vona að Milan taki þetta því þeir eru mitt lið (ásamt Inter reyndar - gat aldrei valið á milli þannig að ég held með báðum).

Æfing!
Mætti á mína fyrstu æfingu hjá Dufþaki í gær. Stóð mig held ég ágætlega, lagði upp nokkur mörk og skoraði eitt sjálfur. Sjáum til hvort mér verður boðið að sækja aðra æfingu. Mér leist annars ágætlega á hópinn. Svolítið af gömlum jöxlum í bland við unga og spræka (misspræka þó). Stefnt að æfingaleik þann 4. apríl þannig að þá sér maður hvernig liðið virkar. Kannski maður fái að hlýja bekknum.

Þorgeir...
...er með einhvern kjaft og þykist hafa "vit" á tónlist. Ekki man ég til þess að Þorgeir hafi neinn sérstakan smekk í tónlist. Einu skiptin sem ég hef heyrt hann tala um tónlist er þegar hann fjargviðrast út í lélega tónlist á "fóninum". Ekki það að ég hafi sérstakt "vit" á tónlist eins og margir þykjast hafa. Hlusta bara á það sem mér finnst skemmtilegt og er yfirleitt ekki að láta það trufla mig þó öðrum finnist það halló. Hlustaði t.a.m. á Bob Marley þegar allir félagar mínir nema Gunni og Haffi hlustuðu á Death og Rapp. Þeir félagarnir hlustuðu á Queen. Síðan þegar ég var kominn í menntó var ég nú aðeins farinn að fíla U2 og REM sem voru vinsælir þá en hlustaði jafnhliða á Bogomil Font og Gling Gló með Björk. Tónlistarsmekkur er nefnilega nákvæmlega það, smekkur, og enginn getur því sagt að eitthvað sé lélegra en annað. Margir hafa sagt að sú tónlist sem er á boðstólnum í dag sé miklu óvandaðri en það sem áður var en menn verða að átta sig á að fæstir snillingar í tónlist fortíðarinnar hafa vera metnir að verðleikum af fjöldanum á sínum tíma. Yfirleitt voru það aðeins örfáir sem áttuðu sig á snilli manna á meðan þeir lifðu. Mín kenning er því sú að góð tónlist sé afstætt hugtak. Hver verður að ákveða fyrir sig hvað honum finnst skemmtilegt og fyllandi að hlusta á.
Ég er þeirrar blessunar aðnjótandi að vera það sem kallað er alæta. Ég get setið við lestur í einn dag, byrjað með Azhkenazy að spila Rachmaninov, skipti síðan yfir í O með Damien Rice en þegar hann hefur gengið sinn gang set ég Gling Gló með Björk á fóninn. Þegar fer að líða að kvöldi set ég kannski Dave Brubeck á og slæ síðan botninn i daginn með svolitlu af John Williams, besta klassíska gítarleika sögunnar, að mínu mati.
Staðhæfingu Þorgeirs um að Eurovisionlagið sé lélegt vísa ég því beint til föðurhúsanna. Föðurlegar staðhæfingar um að maður hafi rangt fyrir sér varðandi tónlist er eins og að reyna að kenna samkynhneigðu fólki að elska einhvern af hinu kyninu. Ekki aðeins bjánalegt heldur ber það vott um virðingarleysi gagnvart skoðunum og tilfinningum annarra. Vendu þig af þeim ósið Þorgeir.

Á fóninum
Þetta er hugtak sem ég held að eigi eftir að haldast í íslensku þrátt fyrir að grammófónar heyri brátt sögunni til. Það þýðir að við sem nú erum í barneign eigum eftir að þurfa að útskýra fyrir börnunum okkar hvað í fjandanum það þýðir að vera á fóninum. Skemmtilegt hvernig sagan gerir hugtök úrelt séu þau tekin bókstaflega en við mennirnir lærum að nota þau í öðrum tilgangi og höldum þeim þannig gagnlegum.

Eurovisionlagið...
...var frumflutt hjá Gísla Marteini í gærkvöldi og verð ég að segja að mér finnst það bara fjandi gott. Jónsi stendur sig bara vel, syngur þetta af krafti og innlifun. Ég held nú samt að við séum ekki að fara að vinna þetta með þessu lagi en við fáum örugglega nokkur stig. Áfram Jónsi!!!

Dr. Gunni...
...tróð upp í þessum þætti líka. Guð minn almáttugur hvað hann er ömurlegur tónlistarmaður. Lögin voru léleg og hann söng þau eins og einhver górilla. Mér finnst alveg merkilegt að leyfa svona ógeð í RÚV. Líklega er það rétt sem sagt er um gagnrýnendur að þeir velja sér starfið af örvæntingu yfir að geta ekkert sjálfir.
Í sama þátt kom greyið litla hún Sif umhverfisspjallaráðherra sem ég hef alltaf látið fara í taugarnar á mér og það breyttist ekkert í gær. Mér finnst hún alltaf vera eitthvað svo upptekin af því að gera mikið úr sjálfri sér.
Síðan kom Björn Jörundur Friðbjörnsson sem ég held bara að sé orðinn fullmarineraður í undarlegheitunum. Rak útgerð í Brasilíu my ass!!! Ég held hann hafi verið að temja þessar brasilísku og reykja eitthvað annað en njóla þarna suðurfrá.

Tveir nýjir diskar í safnið
Fjárfesti loksins í OK computer með Radiohead og finnst hann ágætur. Á eftir að hlusta á hann almennilega en ætli maður þurfi ekki að pæla aðeins í honum áður en maður kann almennilega að meta hann.
Hinn diskurinn er "Swinging When You're Winning með Robbie Williams sem er frábær ef maður fílar svona swingtónlist. Þetta eru dægurlög 5. og 6. áratugarins og eru mörg hver alveg hrikalega skemmtileg. Þarna var mikið lagt upp úr röddum og tónlistin var kannski meira svona undirspil. Hann er fæddur á röngum áratug drengurinn. Syngur þetta snilldarlega.

Scent of a Woman
Myndin er á Skjá einum í þessum töluðu orðum. Ég var búinn að gleyma hvað Al Pacino var snilldarlegur í þessari mynd. Hann átti svo sannarlega skilið að fá Óskarinn fyrir leik sinn í þessari mynd. Hann verður alltaf í miklum metum hjá mér og þegar maður horfir til baka þá eru óteljandi myndirnar sem hann hefur verið brilliant í. Scarface var snilld. Í Serpico var hann frábær og í Guðföðurmyndunum líka að sjálfsögðu. Al Pacino er maðurinn!!!

Önnur mynd sem var á topp tíu listanum er myndin Kramer vs. Kramer (Pacino var reyndar ekki í henni). Fæst ykkar hafa líklega séð hana en ég mæli með því að þið takið hana einhvern tíma á leigunni. Munið nafnið því þið verðið ekki svikin af þessari mynd. Dustin Hoffman leikur hotshot businessmann sem er kvæntur óhamingjusamri konu og á með henni ungan son. Einn daginn yfirgefur konan hann en skilur soninn eftir. Myndin fjallar svo um samband þeirra. Meryl Streep leikur eiginkonuna og Justin Henry sem lék soninn er líklega yngsti karlmaðurinn sem tilnefndur hefur verið sem leikari í aukahlutverki. Hann var sjö ára þegar myndin var tekin og á algeran leiksigur.

Afmælisbarn dagsins
Helga Steinþórsdóttir, kennari, móðir, líkamsræktarsnillingur og réttargæslumaður Sverris Hannesar er 25 ára í annað skipti í dag. Til hamingju með það Helga mín.

Aðdáendur mínir...
...hafa vakið athygli mína á því að meginástæða heimsókna þeirra hingað sé ekki að fá fréttir af boltanum. Mönnum finnst víst eitthvað sniðugt þegar ég fæ mínar einstöku ritræpur og hrauna yfir hluti sem mér finnst aumkunnarverðir. Ég verð því miður að hryggja ykkur góðu vinir að ég er bara í svo hrikalega góðu skapi í dag að ég get ekki hraunað yfir nokkurn skapaðan hlut. Eða jú kannski...

Útskriftarferð
Nokkra bekkjarfélaga mína hefur lengi dreymt um að komast til Thailands af því það eru svo ódýrar hó...örflíkur þar. Það var því ákveðið að skella sér en ákveðinn hluti bekkjarins var ekki tilbúinn að eyða fleiri hundruð þúsundum króna í hálfsmánaðarflugferð til Thailands til þess eins að stoppa þar í nokkra daga. Ég ætla bara að fara til Thailands þegar ég er orðinn svona "dirty old man" og Edda löngu búin að átta sig á því hvað ég er leiðinlegur og ná sér í einn sem þorir að taka Viagra back to back í viku.
Ég ákvað því í staðinn að gera eitthvað skemmtilegt og ætla því að heimsækja bróður minn og fjölskyldu hans í Ameríku. Sú ferð kostaði fyrir okkur bæði einn þriðja af því sem hefði kostað mig að fara einn til Thailands, þannig er nú það.
Óttar bróðir býr í "fly-over-country" eða Iowa í Bandaríkjunum og stúderar þar heilmikla læknisfræði á tágrönnum Amríkönum. Við ætlum reyndar að eiga rómó Hvítasunnuhelgi á rosafínu hóteli í Minneapolis 28. maí til 1. júní en síðan förum við til Iowa og slöppum af í tvær vikur. Ég ætla að kíkja á sjúkrahúsið með gamla og síðan kaupir maður sér slatta af læknadóti, bókum, fötum og öðru drasli. Er að spá í að fara bara út með tóma risastóra tösku.

Sælinú!
Í dag var síðasti dagurinn sem ég þarf nokkurn tíma að mæta í skólann og vinna án launa. Í dag kláraði ég átta vikna medicin-kúrsus og ég vona að ég hafi staðið mig sæmilega. Nú er bara að standa sig í lestrinum sem er framundan. Síðan hef ég fengið næstum endanlegt plan fyrir vinnuna næsta árið en það er eftirfarandi:
Byrja þann 21/6 á hjartadeildinni og verð til 31. júlí með pásu frá 10.-20. júlí en þá verð ég í hestaferð.
Í ágúst verð ég á krabbameinsdeildinni,
í september verð ég á lungnadeildinni og
í október fer ég svo á taugadeildinni.
Í nóvember verð ég síðan á slysadeildinni,
síðan taka við þrír mánuðir á heilsugæslunni í Hafnarfirði.
Í febrúar og mars verð ég á skurðdeildum en
í apríl byrja ég aftur á lyflækningadeildum og fer þá á nýrnadeildina.
Í júní verð ég síðan á smitsjúkdómadeildinni.

Afmælisbörn
Halli átti afmæli 17. mars, Árni Grímur þann 18. og Júlía Rósa Sverrisdóttir og Fríða Heiðarskona eiga svo afmæli í dag. Síðan hefur mér borist til eyrna að Tómas Helgi Harðarson hafi orðið þriggja ára þann 18. mars. Drengurinn sá er einatt kenndur við Hörð Bjarnason stórmógúl í sögu íþróttafélagsins Ástarinnar en margir eru þeirrar skoðunnar að raunverulegur faðir Tómasar sé hinn dulúðlegi Heinrich sem fáir menn hafa augum barið og en færri lifað til að segja frá því.

Tvö stórveldi riða til falls...........og falla!
MR tapaði í fyrsta skipti í ellefu ár í Gettu Betur í gær. Því miður missti ég af keppninni en eftir því sem ég heyri þá var Borgarholtsskóli bara með betra lið. Til hamingju með þetta Borghyltingar, það var kominn tími til að einhver annar ynni þessa keppni.
Nú eru líka traustabrestirnir í MUFC orðnir aðeins of háværir fyrir minn smekk og vona ég að menn taki á þessum málum á Old Trafford í sumar. Sjáum til.

Draumalið Geislans
Ég er hrifnastur af leikkerfinu 3-5-2 (eða 5-3-2 eftir því hvernig á það er litið) og mundi stilla liðinu þannig upp.

Markvörður: Tim Howard kemur sterkur inn en ég held að ég verði að segja Gianlugi Buffon. Howard til vara.

Miðverðir: Allessandro Nesta, Sol Campbell og Walter Samuel en til vara Rio Ferdinand, Fabio Cannavaro og Lucio

Hægri kantur: Javier Zanetti eða Beckham eftir því hvort ætti að sækja eða verjast. Samt frekar Beckham þó hann sé tjelling

Vinstri kantur: Roberto Carlos en Ryan Giggs á bekknum.

Afturliggjandi miðjumaður: Keane og Makalele til vara

Framliggjandi miðjumenn: Zidane og Ballack en Scholes og Figo til vara.

Framherjar: Henry og Nistelrooy. Raul og Ronaldo til vara.

Græt mig í svefn á hverju kvöldi...
...yfir ömurlegu gengi minna manna. Það er lélegra en dollarinn þessa dagana. Ef ég man rétt hafa þeir ekki unnið nema einn leik í deildinni síðan Ferdinand var dæmdur. Altént hafa þeir ekki unnið í mánuð og viku betur því síðasti sigurleikur þeirra í deildinni var gegn Everton þann 7. febrúar. Ekki hafa þeir unnið í Evrópukeppninni en þeir unnu einn leik í bikarnum ef ég man rétt, gegn Fulham.
Eina von okkar um bikar í vetur er því hinn eftirsóknarverði FA bikar (verður furðulega fallegur þegar maður á ekki möguleika í neitt annað) en sú von beið alvarlega hnekki þegar við drógumst á móti Rassenal í undanúrslitunum. En hey, það er líklegra að við vinnum þá þar en í úrslitum þannig að það er eins gott að reyna það bara strax.

Matchstick Men...
...er ágætis mynd. Heyrði ekki mikið um hana þegar hún var í bíó þannig að ég gerði mér ekki miklar vonir. Hins vegar má færa rök fyrir því að mynd með Nicholas Cage og Sam Rockwell hljóti að vera góð, eða a.m.k. sæmileg. Eins og áður sagði varð ég ekki fyrir neinum vonbrigðum. Skemmtileg flétta og boðskapurinn í sögunni ekki svo slæmur, stundum hlýst eitthvað gott af smá mótlæti í lífinu. Fyrir svona læknisfræðinörda eins og mig fjallar myndin miklu meira um sjúkdóm aðalpersónunnar en hinn yfirbyggða söguþráð og er mjög gaman að sjá hvað Cage nær góðum tökum á kækjunum og sérviskunni sem oft fylgir fælnisjúkdómum. Endirinn kom líka mjög á óvart og iljaði manni um hjartaræturnar. Svona er ég meyr inn við beinið þrátt fyrir að ég sé svona ofurkúl töffari á yfirborðinu. He, hehehe, múhahahahaha!!!!

Trúin er skrýtin
Merkilegt. Eftir að hafa verið afspyrnu mikill slóði í bænum og öðrum trúarlegum athöfnum alla mína ævi hef ég tekið upp á því að biðja bænirnar mínar upp á síðkastið. Ég er ekki frá því að það sé gott fyrir sálina (þ.e. þá sál sem sálfræðingar og geðlæknar höndla, ekki þessa sem prestar blaðra um). Ég hef alltaf verið svolítill uppreisnarseggur hvað varðar trúmál. Ekki endilega tekið trúanlegt það sem hinir svokölluðu "guðsmenn" predika heldur finnst mér Guð miklu frekar endurspegla það góða í hverjum manni. Guð finnst mér sitja í góðum minningum um gott fólk, allt sem er gott er Guði þóknanlegt því það lætur okkur líða vel. Það er mín kenning. Guð er því ekki endilega í bæninni fyrir alla, því það finnst ekki öllum gott að biðja. Skiljiði? Ætli ég sé búinn að lesa yfir mig?

Halldór...
...er ein sterkleiðinlegasta bók sem ég hef lesið. Hannes er nú ágætur þó hann sé monthani og kverólant en þessi bók er bara ekkert sérstök. Hún er eiginlega miklu frekar upptalning á öllu því sem Halldór tók sér fyrir hendur. Hún ber þess bersýnilega merki að hún er unnin í flýti þar sem ekki hefur gefist tími til að skera niður. Stundum er minna betra. Ég ætla nú samt að berjast við að klára hana því inn á milli leynast oft skemmtileg atvik og fróðlegir molar. Það eru nú einu sinni bara rúmar 300 bls. eftir.

Að Halldóri loknum verður hafist handa við að lesa House of God sem er fræg bók um vinnugeðveiki unglæknis í USA. Þar er að finna stórkostlega frasa eins og: "no man should be allowed to die without the possible benefit of corticosteroids". Snilld

Grátlegt
Ég verð víst að viðurkenna hér, þó ég mundi að sjálfsögðu aldrei gera það opinberlega, að Rassenal hefur borið höfuð og herðar yfir mína menn í vetur og eru komnir með eitt allra skemmtilegasta liðið í Evrópu. Þeir eru reyndar alveg ógeðslega miklir ruddar og fávitar, líka þvílíkir vælukjóar og aumingjar en það verður ekki tekið af þeim að þeir eru með frábæra leikmenn innanborðs. Henry er líklega besti leikmaður heims, Pires er frábær sem og Ljungberg. Bergkamp er náttúrlega bara snillingur, Campbell er stórkostlegur varnarmaður og fíflið hann Vieira er ágætur á miðjunni. Svo hafa leikmenn eins og Toure og Cole staðið sig mjög vel inn á milli. Reyes er líka að koma sterkur inn.
Það sem hefur hins vegar fleytt þessu liði hvað lengst er frábær andi, samheldni og liðsheild. Skipulagið er líka frábært og það sést best á því að þeir geta haft handlama fábjána í markinu og samt tapa þeir varla leik. Það er sárt að viðurkenna það en ég held að Arsenal séu bara vel að enska Englandsmeistaratitlinum komnir, a.m.k. eiga mínir menn ekki skilið svo mikið sem fimmeyring fyrir frammistöðu sína á tímabilinu - þeir minna mann bara á Val eða eitthvað!!!

Athyglisvert!
Átta af sextán bíómyndum sem ég nefni hér að neðan gerast að stórum hluta í stríði:
WW2: La Vita e Bella, The Pianist, Schindler's List, Saving Private Ryan og The Bridge on the River Kwai.
Víetnam: Deer Hunter og Forrest Gump...
...og svo Braveheart sem fjallar um frelsishetju Skota, William Wallace.

Boltinn
Er að stelast til að horfa á mína menn í Meistaradeildinni því ég er búinn að vera svo duglegur að lesa síðustu daga. Líst ágætlega á þetta. Staðan er 1-0 fyrir mína menn, Scholes sett’ann og þeir eru m.a.s. búnir að skora annað fullkomlega löglegt mark sem var dæmt af vegna rangstöðu. Vonum bara að þeir klári dæmið í seinni hálfleik.

Jafnrétti til náms...
...er að rukka 30000 kall fyrir árið í Háskólanum en milljónkall fyrir meirapróf.

Ljós-Gíslinn mælir með...
...geisladisknum O með Damien Rice, uppáhaldsdiskurinn minn þessa dagana en ég fékk hann í jólagjöf frá Thoroddsen.
...Master & Commander með Russel Crowe sem ég sá um helgina, góð mynd.
...We Were Soldiers með Mel Gibson sem er ein átakanlegasta stríðsmynd sem ég hef séð.
...Pirates of the Caribbean með Johnny Depp, Orlando Bloom og Keiru Kneightley – Orlando fyrir stelpurnar og Keira fyrir strákana.

Topp tíu popp/rokkgeisladiskar í eigu Geislans í engri sérstakri röð
Brothers in Arms með Dire Straits,
O með Damien Rice,
A Rush of Blood to the Head með Coldplay,
Parachutes með Coldplay,
All that You Can’t Leave Behind með U2,
Achtung Baby með U2,
Megas með Megasi,
Document með REM,
Galore með Cure og
Sailing to Philadelphia með Mark Knopfler

Tíu bestu myndir sem Geislinn hefur séð í engri sérstakri röð
Forrest Gump með Tom Hanks, Robin Wright, Gary Sinise, Sally Field o.fl.
Deer Hunter með Robert De Niro, Christopher Walken, John Savage og Meryl Streep
Kramer vs. Kramer með Dustin Hoffman og Meryl Streep
The Shawshank Redemption með Tim Robbins og Morgan Freeman
The Pianist með Adrian Brody
Scent of a Woman með Al Pacino og Chris O’Donnell
La Vita e Bella með Roberto Benigni og Giustino Durano
One Flew Over the Cuckoo’s Nest með Jack Nicholson og Louise Fletcher
As Good as it Gets með Jack Nicholson, Helen Hunt, Greg Kinnear og Cuba Gooding jr.
The Godfather með Marlon Brando, Al Pacino, Robert Duvall, James Caan o.fl.

...og svo þessar sem komust næstum á listann...

Braveheart með Mel Gibson, Sophie Marceau o.fl.
Schindler’s List með Liam Neeson, Ralph Fiennes o.fl.
Rain Man með Tom Cruise og Dustin Hoffman
American History X með Edward Norton og Edward Furlong
Saving Private Ryan með Tom Hanks, Tom Sizemore, Matt Damon o.fl.
The Bridge on the River Kwai með Alec Guinness, William Holden og fleirum

Guð minn almáttugur!!!
Porto jafnaði í lokin og þar með er tímabilið búið hjá MUFC. Best að pakka bara niður og búa sig undir næsta vetur. Eftir stendur þó að MUFC gerði fullkomlega löglegt mark sem var dæmt af. Kannski hefði leikurinn þróast öðruvísi ef það mark hefði staðið.

Sá þessi skemmtilegu próf hjá nýliðanum Hannesi Þór Guðbrandssyni. Ótrúlega viðeigandi að ég skuli vera hestur, finnst ykkur ekki? Er nú ekki eins viss með Lincoln.

What Is Your Animal Personality?
brought to you by Quizilla

What Famous Leader Are You?.

Afmælisbarn dagsins...
...er höfðinginn, öðlingurinn og stórgreifinn Ingólfur Hannesson, a.k.a. Ingólfur Sveinn Ingólfsson. Til hamingju með daginn kæri smellur!

Skólinn...
...siglir sinn gang eins og venjulega. Nú eru aðeins tveir mánuðir í próf og ég ekki almennilega byrjaður að lesa. Þegar ég hugsa um það þá finnst mér ég ekki hafa tíma til að blo...

Útskriftir
Tveir menn áttu góðan dag í gær. Hafsteinn Þór félagi minn úr Garðabænum og formaður SUS útskrifaðist úr lögfræðinni og fær hann hamingjuóskir Geislans. Boðið var til heljarmikillar veislu í Þernunesinu og vil ég þakka kærlega fyrir mig.
Auk Hafsteins lauk Villi Hannes við viðskiptafræðina og hélt stórfínt útskriftarpartý í SEM-húsinu sem er orðið hálfgert félagsheimili Herraklúbbsins Hannesar.
Til hamingju með daginn í gær strákar.

Heimskir kvikmyndagerðarmenn!
Ótrúleg ósvífni í þessum hæfileikalausu fíflum. Þeir hafa í mörg herrans ár lapið spenann á Ríkisútvarpinu og svo loksins þegar skrúfað er fyrir endalausa fjáraustra úr Efstaleitinu þá voga þessir aumingjar sér að mótmæla opinberlega með blaðaskrifum og sjónvarpsröfli. Þessir menn mótmæla því að ríkið skuli ekki borga fyrir ömurlegar heimildamyndir sem enginn nennir að horfa á. Það er eins og þeir telji að RÚV hafi skuldbundið sig til að versla allar innlendar heimildamyndir sem eru í smíðum á hverri stundu. Það ber hæfileikaleysi þessara vælukjóa glöggt vitni að það skuli ekki nokkrum heilvita manni detta í hug að kaupa þetta drasl af þeim, aðeins höfuðlausa hernum í Efstaleiti. Guði sé lof fyrir píparann sem stöðvaði hriplekt fjárhagsniðurfall Ríkisútvarpsins.

Mínir menn...
...eru að bregðast mér í vetur. Ekki nóg með að ég þurfi að horfast í augu við heila tengdafjölskyldu sem heldur að Rassenal séu bestir heldur ætla þeir nú að tapa í meistaradeildinni fyrir einhverjum súkkulaðibrúnum stelpustrákum frá Portúgal.

SVR...
...er merkileg stofnun. Borgarstjórn og fleiri bjálfar rembast við að reka almenningssamgöngur í Reykjavík með ærnum tilkostnaði en enn sem komið er hefur ekki nokkur Íslendingur sem ekki er bílprófslaus ýmist sökum aldurs eða áfengisneyslu fengist til að nýta sér þær. Áfram halda þó þessir þveru einfeldningar að reyna að troða upp á einkabílasinnaða Reykvíkinga þessu brjóstumkennanlega almenningssamgöngukerfi. Meðal nýjunga sem stjórn SVR hefur boðið upp á er leiðakerfi og tímarammi sem dreginn er upp að sumri til en stenst síðan engan veginn þegar Íslands stutti vetur bankar á dyrnar. Einnig hafa þeir tekið upp á þeirri frábæru nýjung að hafa biðskýli strætisvagnanna hvorki vind- né vatnsþétt. Þetta hefur orðið til þess að þá sjaldan að einhverjum ólánsömum Reykvíking dettur í hug að nota almenningssamgöngur (yfirleitt vegna þess að bíllinn hans fer ekki í gang á köldum vetrarmorgni eða þá hann nennir ekki að moka hann upp úr skaflinum) þá þarf hann að bíða í korter eftir allt of seinum strætó á berangri strætóskýlisins. Nei, þá taka Íslendingar sko frekar leigubíl. Ég er ekki frá því að það yrði hagkvæmara fyrir SVR að gerast leigubílafyrirtæki, það er alltént ekki mikið dýrara að taka leigubíl endrum og eins en að taka strætó!!!

Boltinn rúllar í kvöld
Mínir menn gera sér dagamun í kvöld og heimsækja Púrtverja í Meistaradeild Evrópu. Vonandi gengur það vel en maður þorir nú varla að rækta með sér slíkar vonir. Kannski Gary Neville setji þrennu og skjóti mínum mönnum í 8 liða úrslitin.

Skólinn
Tíminn líður hratt, a.m.k. þegar maður er ekki að bíða eftir strætó, og ég á nú aðeins hálfa fjórðu viku eftir af kúrsus. Þeim mun ég eyða á hjartadeild Landspítalans utan síðustu vikunnar sem ég mun verja á Bráðamóttöku sömu stofnunnar. Síðan tekur við enn stífari lestur og gleði fram á vor enda er sennilega vissara að vera vel að sér í læknisfræði þegar maður verður loksins el doctor. Kannski ég hætti bara að blogga og fari að lesa.

Dapurt!!!
Mínir menn náðu bara jafntefli við auma Leedsara í gær. Ég er nú ansi hræddur um að Arsenal klúðri ekki málunum eins og í fyrra en það er svo sem ágætis spark í rassinn fyrir mína menn að missa af titilinum í ár. Kannski þeir hirði þá meistaradeildina í staðinn en ég er nú heldur ekkert vongóður með það. Sjáum til hvernig gengur þar á miðvikudaginn.

Lofa að blogga meira á næstu dögum. Ekki örvænta strax!!!

Hannes bloggar!
Hef ákveðið að bæta einum hlekk á spássíuna eftir að hafa uppgötvað bloggsíðu Hannesar Þórs Guðbrandssonar.

Jahá!!
Teljarinn minn segir mér að meðalásókn í síðuna mína sé 20 heimsóknir á dag. Það er ágætt en þó fulllítið að mínu mati. Mér finnst bræður mínir Hannesarnir ekki vera nógu duglegir að heimsækja mig því ef þeir mundu allir heimsækja mig daglega væri aðsóknin miklu meiri. Þannig er nú það, það er nú líkast til

Afmælisbarn dagsins
Viðar kisi er 26 ára í dag og fær hamingjuóskir frá Ljós-Gíslanum. Vonandi fær hann rækjur og kannski Inga Huld skipti um sand hjá honum í tilefni dagsins.

Eftirmálar Árshátíðar
Árshátíð okkar læknanema hefur valdið töluverðu fjaðrafoki og hafa gífuryrðin fallið á báða bóga á spjallsíðum læknanema síðustu daga. Vonandi verður þetta atriði til þess að fólk vandar betur valið á þeim sem sjá um atriðin þeirra næstu árin. Ekki það að mér sé ekki drullusama. Þetta var síðasta árshátíð FL sem ég mun sækja, a.m.k. í þónokkur ár.

Læknanemafarsinn
Guð minn almáttugur hvað sumir læknanemar eru skrýtnir. Kannski þeir séu búnir að lesa yfir sig.

Storminum eftir árshátíðina hefur varla slotað þegar ný deilumál skjóta upp kollinum. Nú er það hið alræmda sósíalíska vinnuskömmtunarráðningakerfi læknadeildar sem gerir alla vitlausa og þá sérstaklega undarleg framkoma ráðningastjóra og stjórnar FL. Ég hef aldrei skilið hvers vegna læknanemar gera ekki bara eins og annað fólk og sækja um vinnu. Líklegast er að hæfustu einstaklingarnir verði ráðnir. Vinnuveitendur fara yfir umsóknir og ráða þá sem þeim sýnist. Hvernig getur þetta verið ósanngjarnt? Þeir hæfustu fá vinnu, hinir slakari ekki. Hvort finnst þér lesandi góður eðlilegra að sá sem ekki vinnur í lotteríi læknadeildar en er mjög hæfur starfskraftur eða sá sem kann ekki neitt en fékk góðan drátt í sumarráðningaröð eigi að ganga fyrir í vinnu? Merkilegt.

Ef ég verð einhvern tíma yfirmaður á spítalanum mun ég ekki taka þátt í þessum farsa heldur ráða hæfustu einstaklingana sem sækja um og hananú.

Árshátíð FL
Var í gær eins og ég minntist á á blogginu í gær. Það er skemmst frá því að segja að aldrei á ævinni hef ég upplifað eins slaka árshátíð. Ekki nóg með að hátíðin væri haldin á þeim ömurlega stað Skíðaskálanum í Hveradölum sem er sjálfsagt ágætis búlla en rúmar engan veginn þá 450-500 manns sem þarna voru samankomnir. Þetta varð til þess að fyrsta og annað árið voru sett afsíðis og sáu því ekki dagskrá árshátíðarinnar. Sumir mundu segja að þeir hafi verið lánsamir því skemmtiatriði læknanema náðu sögulega ömurlegu lágmarki. Fyrsta árið reið á vaðið með sérstaklega óviðeigandi klámvísusöng sem gerði víst lukku á einhverju menntaskólaballi í fyrra en var ekki alveg að ganga fyrir fullorðið fólk.
Annað árið kom síðan með myndband sem var bara nokkuð skemmtilegt og fá þau alveg eitt klapp fyrir það.
Þriðja árið sendi á svið ónefndan gamlan bekkjarfélaga minn sem fór alvarlega yfir strikið. The line is a dot to him. Hann fór á sviðið fyrir framan fullorðið fólk, þ.m.t. heiðursgesti og handhafa kennsluverðlauna sem voru allt kennarar í læknadeild. Þar sagði hann mjög grófa klámbrandara sem væru varla fyndnir í steggjapartýi. Var óánægja viðstaddra svo rosaleg að það endaði með því að fólk var farið að púa en því miður ekki nóg til að "skemmtikrafturinn" hefði vit á að yfirgefa sviðið. Hann kláraði "atriðið" sitt og yfirgaf salinn, viðstaddir sátu sem steinrunnir. Síðan tók einhver vitleysingur upp á því að henda um koll skjávarpanum og við það fóru einhverjar snúrur úr sambandi. Þetta varð til þess að hljóðkerfið gaf sig eitthvað og tók a.m.k. klukkustund að laga það. Það tókst samt ekki að koma atriðið fjórða ársins í gang þannig að fimmta árið var látið rúlla.
Atriði fimmta ársins var eitt af örfáum hlutum sem gerðu árshátíðina bærilega. Frábærlega fyndið myndband þar sem notuð var hugmyndin "Við hjálpum þér að láta það gerast" úr Síma auglýsingunum. Heppnaðist mjög vel og var mjög fyndið. Elías Hannes Guðbrandsson fór á kostum í myndbandinu. Til hamingju með það Hannes litli.

Mínir menn...
...fóru á kostum í dag gegn Árna Gauti og félögum í Man. City. Scholes skoraði fyrsta markið fyrir United í fyrri hálfleik en 10 mínútum seinna fékk Gary að líta rauða spjaldið. City sótti stíft í upphafi seinni hálfleiks en Howard hélt okkur á floti eins og oft áður. Nistelrooy setti síðan annað mark og þá fóru mínir menn í gang. Ronaldo skoraði stuttu seinna eftir að Árni Grautur hafði varið glæsilega skot utan úr teig. Ronaldo fylgdi hins vegar vel á eftir. Síðan skoraði Tarnat fyrir City en það tók ekki nema örstutta stund fyrir mína menn að setja 4 markið, Ruud gerði það. Fowler setti síðan annað mark City í lokin. Maður leiksins var Howard held ég en Keane, Ronaldo og Ruud stóðu líka fyrir sínu. Kannski við tökum bara bikardolluna úr því við er að missa af lestinni í deildinni. Greyið Árni gat nú lítið gert í þremur síðustu mörkunum en ég sá ekki það fyrsta sem Scholes gerði.

Feministar :)
Nú er ég mikill jafnréttissinni og þar af leiðandi fylgjandi jafnrétti karla og kvenna. Ég er sérstaklega fylgjandi því að konur megi lifa lífi sínu eins og þeim sýnist. Ég get því vel skilið að femínistar berjist fyrir því að karlrembur og afturhaldsseggir verði kjöldregnir og stjaksettir af kvenkyns lögfræðingum í jakkafötum sem pissa standandi í þvagskál. En það er eitt við femínista sem ég hef aldrei skilið og það er eilíf barátta þeirra fyrir því að konur hætti að lifa lífi sínu sínu eins og þeim sýnist. Þær eru alltaf að setja út á aðrar konur fyrir að vera "stereótýpískar". Konur mega ekki lengur raka sig undir höndunum, ganga í kjólum eða pilsum, greiða sér, mála sig, punta sig, púðra sig, plokka sig, snyrta sig, snurfusa sig eða hvað þetta allt nú heitir.
Hvernig getur það farið saman að berjast gegn sjálfsákvörðunarrétti konu til að líta út eins og henni sýnist og að berjast fyrir mannréttindum kvenna? Jú, þær eru nefnilega að lifa eftir ímynd hins fullkomna kvenmanns sem karlmenn hafa skapað. Hvað þá!!? Haldið þið í alvöru að einhver karl úti í heimi, segjum bara að hann heiti Hannes, hafi einn daginn staðið upp frá leiknum í sjónvarpinu og sagt við konuna sína sem við skulum kalla Katrínu: "Heyrðu Kata mín, heldurðekki að það væri meira sexý ef þú værir sköllótt undir höndunum og á leggjunum. Trítlaðu nú inn á bað, druslan þín, og Gilettaðu sjálfa þig aðeins"? Nei, það eru sko ekki karlar sem hafa fundið upp allar þær fáránlegu athafnir sem konur stunda í myrkviðum snyrtistofanna, heldur kerlingarnar sjálfar.
Feminístar eru ekkert annað en fasistar upp til hópa sem eru einmitt að gera jafnréttismálum kvenna mikinn óleik - þær vilja steypa konur í karlmannlegt form. Konur eiga að ganga í buxum, hætta að vaxa á sér fótleggina, hætta að raka á sér handarkrikana og helst að láta sér vaxa skegg. Ef við lítum á sögu mannkynsins hafa þeir sem hafa skarað fram úr, einmitt verið þeir sem hafa skapað sér sérstöðu, verið öðru vísi, fetað ótroðnar slóðir. Ég held að eina leiðin fyrir konur til áhrifa og valda sé einmitt að beita öðrum áherslum en við karlarnir, vera klárari en við, skera undan okkur völdin á meðan við sofum á verðinum. Þannig ná þær fram raunverulegu jafnrétti eða jafnvel öfugu misrétti sem mundi á fallegri íslensku kallast KVENRÉTTINDI.

Ég mæli með...
...bakþönkum Guðmundar Steingrímssonar á Fréttablaðinu í dag. Merkilegt hvað Guðmundur er skemmtilegur penni ef maður hefur það í huga að hann er sonur einhvers leiðinlegasta stjórnmálamanns Íslandssögunnar (skilgreind sem sá tími sem ég man eftir). Guðmundur talar um bankarán á Íslandi og óendanlega heimsku sumra bankaræningja. Bakþankar Guðmundar er þeir langskemmtilegustu og er ég löngu búinn að gefast upp á að reyna að lesa aðra. Stundum asnast ég reyndar til að lesa bakþanka Þráins Bertelssonar og get þá örsjaldan brosað út í annað en sjaldan hlæ ég upphátt. Man reyndar ekki eftir að hafa séð nýlegan pistil eftir Þráinn – ætli hann sé hættur?

Vaka...
...vann í vinsældakosningu Háskólans og má segja að þar hafi borið sigur úr býtum “lögulegasti kúkurinn í klósetti íslenskrar stúdentapólítíkur” svo maður steli nú frasa Sverris Stormskers. Síðan ég hóf nám í Háskólanum hefur bilið milli fylkinga greitt skatt félagshyggjunar svo átakanlega að ekki er lengur hægt að greina nokkurn mun á áherslum fylkinganna. Mál málanna í íslenskri háskólaumræðu var trompað út úr kosningabaráttunni með einhuga samkennd fylkinganna um andstöðu gegn skólagjöldum. Nú fyrst er Vaka orðin brjóstumkennanleg enda hafa þeir látið Röskvu draga sig á villigötur félagshyggjugettósins. Það merkilegasta er þó að sjá Heimdellinga í fylkingunni kyngja stolti sínu og fylgja þessari stefnu Vöku eins og blindir kettlingar.
Vökufólk – það er ekki nóg að vinna, bara til að vinna. Þið verðið að vinna á réttum forsendum. Ef þið ætlið að standa undir nafni sem fylking hægrisinnaðra stúdenta verðið þið að breyta afstöðu ykkar, setja undir ykkur höfuðið og koma af stað heilnæmri umræðu um betri rekstur HÍ. Það má byrja á því að draga úr eða skrúfa fyrir styrki háskólans til þeirra fylkinga sem hafa dregið háskólapólitíkina í saurinn – Röskvu og Vöku – og síðan hefja gagnvirka og málefnalega umræðu um skólagjöld í Háskóla Íslands. Það er fáránlegt að hluti af skólagjöldum mínum fari í það að kosta rekstur þriggja fylkinga í háskólapólítíkinni, sérstaklega í ljósi þess að það væri alveg eins hægt að steypa þessum framapoturum í eina fylkingu og hafa bara rússneska kosningu. Það mundi engu breyta!!!


Viðar...
...er eitt spurningamerki þegar hann samsinnir mér og einhverjum öðrum sem mig grunar að sé Ármann Jakobsson. Merkilegt að samsinna okkur báðum í einu og hlýtur það að benda til þess að ég sé sammála Ármanni í fyrsta skipti á minni löngu og viðburðaríku ævi. Annars er ég ekki eins harður og Bjúgan því mér finnst nú fullharkalegt að rukka 400.000 kall fyrir önnina í HÍ, sérstaklega í ljósi þess að hann þykir nú ekki merkilegur skóli á erlendan mælikvarða. Það er ekki vegna þess að efniviðinn vanti, það er vegna þess að menn hafa ekki frelsi til að taka rekstur skólans til gagngerrar endurskoðunnar. Ég held við ættum að setja Háskólann í öndvegi en ekki slugsana sem þar stunda nám (að sjálfsögðu er ég þar meðtalinn).

Mínir menn...
...eru að missa af lestinni í Englandi og verður sárt að sjá á eftir dollunni í hendur Nallanna. Sérstaklega þar sem Edda og stór hluti fjölskyldu hennar heldur með Arsenal. Annars verður maður bara að vona að Arsenal taki sína alkunnu marsogapríldýfu og mínir menn klári tímabilið af krafti að vanda – þá getur allt gerst.

Árshátíð FL
Félag læknanema heldur sína árlegu okurárshátið í kvöld í Skíðaskálanum Hveradölum (hafið þið nokkurn tíma séð mann á skíðum þarna). Það kostar litlar 4000 krónur inn fyrir FL-félaga og 6000 krónur fyrir utanfélagsmenn og maka. Það gerir litlar 10000 krónur fyrir mig og makann að viðbættum vínveitingum og leigubílskostnaði. Ætli kostnaður kvöldsins hlaupi ekki á 15000 krónum sem er helvíti blóðugt fyrir fátækan námsmann eins og mig. En ölmusukerfi íslenska menntakerfisins kemur mér til hjálpar og reddar málinu. Þetta hefst allt saman og maður lítur björtum augum á framtíðina því eins og almenningur “veit” eru læknar með fleiri hundruð þúsunda í laun á mánuði. Sá sem fer í læknisfræði til að græða peninga létt verður fyrir álíka miklum vonbrigðum og sá sem leitar að maka á nektardansstað – það er meira gaman að taka utan af pakkanum sjálfur!

Til þessara landa hef ég komið!



create your own visited country map
or write about it on the open travel guide

Heiðar minn!!
Þú talar um lélega blaðamennsku Morgunblaðsins og á sú gagnrýni eflaust rétt á sér en dæmið sem þú tekur er náttúrlega alveg hrikalega lélegt. Það mætti kannski benda þér á að 85% fréttarinnar er bein tilvitnun í viðtal sem stuðningsaðili keppninnar tekur og leyfir síðan öllum fjölmiðlum að nota. Hvað viltu að Mogginn geri? Leggi Keegan orð í munn eða? Það fellur varla undir lélega blaðamennsku að birta þýtt viðtal innan gæsalappa. Viðtal sem þeir hafa líklega keyptan aðgang að.
Hins vegar hef ég oft rekið mig á sama vandamál og þú ert að tala um og er alveg sammála þér. Vildi bara benda þér á hversu lélegt dæmi þú tókst.

Tapas bar
Frábær matur, frábær staðsetning, frábært umhverfi, frábær staður. Eini gallinn er hvað það er kalt þarna inni.

Háskóli Íslands og skólagjöld
Loksins, loksins þorir einhver að skoða þessi mál. Auðvitað á Háskólinn að innheimta skólagjöld. Menntunarskylda ríkisins nær bara upp að vissu marki og ég get ekki sagt að það hafi verið beinlínis hollt fyrir Íslendinga að hafa aðganginn að Háskólanum eins og hann hefur verið. Mörg hundruð nemenda hafa hafið nám að hausti en dottið út úr námi þegar líður á veturinn með ærnum kostnaði. Auk þess virðist það vera í tísku í mörgum deildum að fresta prófum úr hófi fram. Það er ekki hlutverk ríkisins eða Háskólans að vera félagsmiðstöð fyrir íslenska slugsa sem nenna ekki að vinna og ákveða því að fara í Háskólann fyrir skít og kanil, taka námslán á frábærum kjörum og dúlla sér svo við þriggja ára háskólanám í fimm til sex ár.
Það eru til margar lausnir sem mundu tryggja frambærilegum en fjársnauðum nemendum tækifæri til háskólanáms. Styrkjakerfi væri til dæmis ein lausn. önnur lausn væri að bjóða fólki ódýrt háskólanám til að klára eina gráðu á lágmarkstíma en eftir það yrði það að borga brúsann að einhverju marki. Einnig væri hægt að rukka fólk aukalega fyrir að taka upp próf eða fresta þeim, t.d. 15000 kall fyrir prófið. Sumir mundu segja að þar væri verið að mismuna þeim sem eiga erfiðara með að læra. Hey, töff lökk, háskólanám er fyrir þá sem geta lært, ekki stjórnarskrárbundinn réttur fyrir hvern sem er.
Það er kominn tími til að við hættum að lepja af ríkisspenanum og förum að taka ábyrgð á eigin lífi. Háskólanám er dýrt spaug og íslenskir stúdentar hafa misnotað það "ljúfa líf" sem ríkið hefur skaffað okkur sl. ár. Við höfum verið sjálfum okkur verst og eigum skilið að það sé skorið niður.
Ég segi, fjöldatakmarkanir í allar deildir. Meiri kröfur til að grisja út slakari nemendur. Meiri kröfur til kennara um að standa sig. Meiri kröfur til ríkisins að verðlauna þá sem standa sig en ekki splæsa sköttum þeirra sem nenna að vinna í þann hluta háskólastúdenta sem gera grín að heiðvirðum borgurum með letilífi og próffrestunum æ ofan í æ.
Með þeim peningum sem spöruðust væri hægt að byggja upp háskóla sem væri í alvöru samkeppnishæfur við erlenda háskóla.
Já og að lokum: Hættið að eyða peningum háskóla, sem sífellt kvartar undan fjárskorti, í ópraktísk hús þar sem fleiri hundruð fermetra fara til spillis vegna duttlunga hæfileikalausra arkitekta. Maður þarf ekki annað en horfa á gróðurhúsið í Vatnsmýrinni eða krossfiskinn Odda þar sem hvöss horn og fáránlegur stigi eyða dýrmætum fermetrum. Byggjum hagkvæmt, byggjum kassa. Aðalbygging Háskólans er glæsilegt hús í fallegu umhverfi og er alveg nóg sem andlit háskólans. Það þurfa ekki allar byggingar hans að vera fallegar, bara nothæfar. Flestar þeirra eru bara fallegar en varla nothæfar.
Skólagjöld í Háskóla Íslands, útrætt mál!!!

Landspítalinn...
...er síðan annar ríkisbáknsbrandarinn. ég ætla ekki einu sinni að byrja að hella mér út í það. Við skulum bara segja að Landspítali Háskólasjúkrahús er sennilega verst rekna ríkisstofnunin.

Helvítis blogger er alltaf að rí...ugla í íslensku stöfunum. Djöfull langar mig stundum að fara þarna út og berja þessa aumingja.

Boltinn
Árni Gautur bara að standa sig brilliant í markinu hjá City. Það er eins gott að hann verði ekki í þessum ham á móti United í 16 liða úrslitunum. Ég sá reyndar ekki leikinn en ég náði tilþrifunum í sjónvarpsfréttunum áðan. Þvílík markvarsla á köflum. James má fara að vara sig ef Árni heldur svona áfram.

teljari.is
Þessir menn eru náttúrlega snillingar. Meira að segja mér tókst að setja teljarann inn án þess að klúðra nokkru. Snillingar

Lestur
Nú er hafinn stífur próflestur og reynir maður að sitja við a.m.k. 4 klst á sólarhring auk þess að vera í skólanum frá 8-16. Þetta er reyndar í fyrsta skipti sem skipuleggjendum námskeiðs í læknisfræði tekst að halda manni uppteknum við nám og kennslu allan daginn. Yfirleitt hefur verið dauður tími frá hádegi til seinniparts en nú er þetta mjög vel skipulagt og maður fær mikið út úr hverjum degi. Kennarar eru einnig viljugri að kenna (það hefur í alvöru verið vandamál) og deildar- og aðstoðarlæknar eru einnig miklu viljugri en áður að rekja úr manni garninar eða útskýra flókna hluti. Nú er ég á fullu að lesa lungnalæknisfræði og geri ráð fyrir að ljúka því í kvöld eða á morgunn og þá verður ónæmis- og gigtarsjúkdómar teknir fyrir. Þeir sem hafa sérstakan áhuga á lesskipulagi mínu er bent á að frekari upplýsingar má nálgast í síma 58-12345.

Handboltinn
Helvítis! Þjóðverjar urðu Evrópumeistarar í handbolta. Ég þoli ekki þegar Svíar og Þjóðverjar vinna eitthvað. Það er einhver svona yfirlætiskennd í íþróttamönnum þeirra sem fer í mig - svona ubermenschensyndrome sem ég get ekki skilgreint. Sem betur fer eru ekki allir einstaklingar af þessum þjóðernum haldin þessum kvilla enda væru Svíar og Þjóðverjar þá almennt óþolandi. Ég þekki hins vegar bæði skemmtilega Þjóðverja og Svía þannig að þetta er ekki almennt vandamál.

Boltinn
Fjandans Nallarnir misstíga sig bara ekki neitt. Ná alltaf að grísast á sigur hvernig sem þeir spila. Það eru nú reyndar stórmeistarabragur á slíku en gallinn er bara sá að Arsenal eru engir stórmeistarar. Vinna einn og einn titil þegar United gengur illa en geta raunverulega ekki rassgat eins og sést á leik þeirra í Meistaradeild Evrópu. Nú geta menn gasprað að þeir hafi unnið Inter 4-0 úti. Basel sló líka Liverpool út úr Meistaradeildinni í fyrra sko.

En nú kalla lungun í mig. Þar til næst félagar!!!!

Vaknaður aftur!
Síðan hefur legið í dvala síðustu 10 dagana vegna leti og andleysis. Ekki get ég nú sagt að andinn sé að koma yfir mig núna en ég ætla alla vega að reyna að skrifa eitthvað smávegis sem oftast.

Handboltinn
Strákarnir okkar voru hrikalega lélegir á EM en það er hægt að hugga sig við það að þrátt fyrir ömurlega frammistöðu förum við samt á Ólympíuleikana og getum hefnt harma okkar þar. Það áttu næstum allir leikmenn liðsins hræðilegt mót ef undan eru skildir, Rúnar Sigtryggs, Garcia, Gummi hlaðborð og Reynir í markinu. Svo var Snorri Steinn líka mjög góður miðað við fyrsta alvöru tækifærið í stórmóti. En fátt er svo með öllu illt að ekki boði nokkuð gott. Hinir óþolandi Svíar stóðu sig afburða illa líka og komast ekki á Ólympíuleikana og því erum við loksins lausir við þessa helv. óþolandi grísarapunga.

Boltinn
Mínir menn voru að leggja Southampton að velli í ensku á afar ósannfærandi hátt. Þrjú stig eru hins vegar þrjú stig þannig að ég get ekki verið annað en sáttur. Saha átti víst frábæran fyrri hálfleik og skoraði meðal annars ágætis mark úr aukaspyrnu. Hann átti síðan skotið sem markið hans Scholes kom upp úr en auk þess nokkrar afburða sendingar. United átti að fá a.m.k. tvö víti í seinni hálfleik en fékk hvorugt. Það fyrra var fyrir hendi á Fernandes þar sem hann var í varnarvegg rétt fyrir innan vítateigslínuna og varði með höndum. Dómarinn færði brotið út fyrir teig og mínir menn skoruðu upp úr aukaspyrnunni. Reyndar var það rangstöðumark en réttlætinu var fullnægt. Stuttu seinna klippti gamli United-drengurinn Danny Higginbottam Nistelrooy niður í teignum við endamörkin en ekkert var dæmt.
Southampton voru óheppnir að jafna ekki því þeir áttu fullt af færum. Howard varði glæsilega frá Ormerod sem komst einn inn fyrir. Síðan langskot frá Anders Svensson og loks stórkostlega hjólhestaspyrnu Beatties sem ég skil bara ekki hvernig hann fór að.
Saha stóð sig vel í fyrsta leik og Fletcher og Ronaldo voru ógnandi sem og Scholes sem átti nokkur ágætis skot. Hlakka til vorsins þar sem fótbolti verður ljósið í myrkri lestrar og streitu.

Afmælisbörn janúarmánaðar sem gleymdust!
Óttar bróðir og Davíð Smári Hannes sem urðu 33 ára og 27 ára þann 7. janúar.
Sveinn Pálsson afi hennar Eddu sem varð áttræður þann 10. janúar.
Þór Gunnlaugsson sem varð 25 ára þann 21. janúar.
Kobbi fruma sem varð 26 ára þann 27. janúar.
Ef ég er að gleyma einhverjum þá er hann/hún beðin/-n afsökunar.

Lifið heil

Nýjar email adressur!!!
Ég er kominn með tvær nýjar emailadressur fyrir áhugasama. Mun ég að mestu styðjast við þær héðan í frá og stefni á að minnka hotmailnotkun héðan í frá.
Ný tölvupóstföng eru:
gislibe@internet.is og
gilli@hannes.is
Vinsamlegast notið þessi email framvegis.

EM í handbolta
Mikið hrikalega var þetta dapurt hjá okkar mönnum. .það sorglegasta við þetta allt saman er þó að við töpuðum á eigin bjánaskap og "reynsluleysi". Í stöðunni 22-20 fyrir Ísland fór Óli í 2 mínútur fyrir kjánalegt brot. Slóvenar skora úr sama skoti og brotið átti sér stað í. Við förum í sókn en missum boltann og aftur skora þeir um leið og og Guðjón Valur brýtur lítillega af sér og staðan orðin 22-22, og Guðjón fær 2 mínútur (sem var reyndar mjög harður dómur). Við tveimur færri förum í sókn og aftur missum við boltann klaufalega. Slóvenar bruna fram, Patti togar í peysu en ekki einu sinni nógu harkalega til að stöðva manninn, hann skorar og Patti fær 2 mínútur. Sem þýddi að við vorum 3 færri í a.m.k. mínútu. Á meðan á þessu stóð skoruðu Slóvenar 7 mörk á móti engu og breyttu stöðunni úr 22-20 í 22-27 sem náttúrlega á ekki að geta gerst. Þegar Íslendingar voru þrír inni á, Dagur, Snorri Steinn og Garcia að mig minnir, þá tekur Dagur þá stórundarlegu ákvörðun í upphafi sóknar að skjóta frá miðju í staðinn fyrir að róa sig aðeins og eyða tímanum sem við vorum þremur færri. Dagur er náttúrlega búinn að margsanna að hann er löngubúinn sem handboltamaður, a.m.k. í íslenska landsliðinu. Hann getur ekki rassgat og þótt hann hafi átt nokkrar ágætis sendingar í þessum leik, bar hann líka ábyrgð á því að við missum boltann klaufalega a.m.k. 5 sinnum og Slóvenar svöruðu með marki. Það er ekki nóg að leggja upp þrjú mörk ef þú gefur önnur fimm í staðinn.
Gummi Hrafnkels var heldur ekki að verja neitt í seinni hálfleik enda öll skot úr dauðafærum og kannski ekki mikið hægt að gera í því. Það er hins vegar allt í lagi að leyfa Reyni að spreyta sig aðeins Hann er nú þekktur fyrir að vera góður, maður á móti manni en ekki Gummi. Ég ætla aldrei þessu vant að hrósa Guðmundi fyrir frábæran leik því hann varði vel í fyrri hálfleik en í þeim seinni sýndi það sig að snerpan er engin og hann ver varla skot maður á móti manni. Hann er góður þegar vörnin er góð en virðist ekki með næga snerpu í svona opin færi. Ég mundi segja að Guðmundur og Dagur séu ekki lengur nógu góðir til að spila í liði á heimsmælikvarða eins og íslenska liðið er. Það má alveg fara að hleypa mönnum eins og Björgvin Gústafssyni, Loga Geirssyni og Arnóri Atlasyni í þetta núna. Gunnar Berg hefur heldur aldrei sýnt neitt með þessu landsliði og því miður held ég að Róbert Gunnarsson sé orðinn miklu betri en Robbi Sighvats sem er reyndar ágætur líka.
Niðurstaða leiksins er hinsvegar algjör dómaraskandall - þeir dæmdu engan vegin eins á bæði lið og hallaði þar mjög á okkur, sérstaklega hvað varðar 2 mínútna brottrekstra. Ég held að ég hafi talið sjö skipti þar sem þeir fóru með hendur í andlit okkar manna og aldrei fengu þeir tveggja mínútna brottvísun fyrir það. Guðjón fær síðan tvær fyrir smá snertingu í skoti þar sem maðurinn fipaðist ekki meira en svo að hann skoraði úr skotinu. Algjör skandall og það hefur sýnt sig aftur og aftur að dómarar frá Miðjarðarhafslöndum eru mjög hlutdrægir á svona mótum. Ég skil ekki hvers vegna þeir fá að dæma á þessum mótum aftur og aftur.

Lestur...
...gengur hæft en sígandi. Ég er orðinn nett stressaður og þá byrjar lesturinn að verða markviss og stígandi. Ég hef nú aðallega verið að lesa svokallaðar yfirlitsgreinar úr læknatímaritum en nú fer ég að snúa mér alfarið að bóklestri og hugsa að ég einbeiti mér að mestu leyti að einni bók en leyti út fyrir hana með aukaefni. Sjáum hvernig það gengur!

Boltinn!
Mínir menn eru aldeilis að skíta á sig í boltanum. Geta ekki einu sinni drullast til að vinna botnlið Úlfanna. Það var síðan farið á stúfanna strax eftir leik og keyptur nýr framherji, Louis Saha, franskur ólátabelgur frá Fulham. Það er svo sem ekki hægt að kvarta yfir hæfileikum drengsins en hann hefur ekki sýnt á sér skemmtilega hlið í kringum þessi viðskipti öll sömul. Sérlega óþokkalegur piltur og mér líst eiginlega ekkert á að hafa svona leikmann í mínu liði. Arsenal hefur hins vegar haldið áfram á sigurbraut fyrir utan smá misstig í deildarbikarnum í gær þegar þeir töpuðu fyrir Middlesbrough. Vonandi fara þeir að misstíga sig oftar í deildinni en þeir eru eina taplausa liðið í deildinni síðan í haust sem verður að teljast nokkuð glæsilegur árangur, ef maður lítur fram hjá því hvernig hann hefur náðst.

Idol-stjörnuleit...
...lauk sl. föstudag með sigri Kalla Bjarna ofursjóara frá Grindavík. Ég var nokkuð sáttur við þau úrslit enda búinn að halda með honum frá byrjun. Ég glápti á þetta úr öftustu sætum í stofunni hjá Ragnari rokkara en var nokkuð sáttur við kvöldið. Eftir keppni þurftum við skötuhjúin að berjast í gegnum skafla og byl til að komast heim á litla sæta Polonum okkar en það tókst. Síðan hef ég verið þjakaður af krónískum varaþurrk.

Eðalfundur Hannesar...
...var haldinn á laugardaginn og er það vel. Ætti það að vera keppikefli hvers ungs manns að sækjast eftir tilnefningu í Hannes en því miður fyrir flesta er aðeins fáum útvöldum gefið að komast í klúbbinn. Hannes er vel.

Vaknaður!!!
Jæja, ég hef ekki verið sérlega duglegur að blogga svona yfir hátíðirnar en það virðist ekki hafa komið illa við kauninn á óteljandi aðdáendum mínum. Ég hef að minnsta kosti ekki haft mikinn ama af kröfum aðdáenda um fleiri færslur. En hvað um það - ég er kominn aftur hvort sem ykkur líkar betur eða verr.

Boltinn
Mínir menn hafa staðið sig vel í boltanum síðan við heyrðum síðast - reyndar náðu þeir ekki nema einu stigi í dag á móti Nývirkinu í dag en þeir eru að minnsta kosti á toppnum sem mér finnst fallegt. Í dag voru þeir ljónheppnir að ná jafntefli við Newcastle því dómarinn gerðist blindur um hríð í fyrri hálfleik þegar Howard skellti Shearer með sniðglímu í teignum. Hins vegar báru dómar hans vott um skyggnigáfu í seinni hálfleik þegar hann sá brot Silvestre eftir hornspyrnu og dæmdi því mark hans af. Enginn annar jarðneskur maður virðist hafa séð brot þarna. Réttlætinu var kannski fullnægt með jafntefli og get ég ekki sagt að ég sé mjög ósáttur við þau úrslit. Alltént hef ég ekki miklar áhyggjur af vorinu. Mínir menn eru alltaf betri seinni hlutann úr tímabilinu svo við eigum titilinn næsta vísan.

Nýr menntamálaráðherra...
...finnst mér einhver frambærilegasti stjórnmálamaður sem fram hefur komið sl. ár. Ef hún heldur áfram á sömu braut er ég sannfærður um að hún verði fyrst kvenformaður Sjálfstæðisflokksins. Hún er fyrsta alþingiskonan sem er ekki þjökuð af einhverri innri minnimáttarkennd heldur krefst og á skilinn þann stall sem hún hefur unnið sér í því karlaveldi sem íslensk pólítík hefur (kannski því miður) verið. Því miður er hún ekki þingmaður míns kjördæmis.

Ætli ég láti þetta ekki duga í bili. Churchill og rúmið kalla enda er morgundagurinn fyrsti dagurinn í fjögurra mánaða linnulausum próflestri.

Boltinn
Mínir menn kláruðu Tottenham í gær en tæpara mátti það varla standa. United hafði reyndar mikla yfirburði framan af og hefði átt að hafa miklu meiri forystu. Línuverðirnir veifuðu flöggunum eins og það væri 17. júní og þeir væru börn. En Tottenham náði að minnka muninn og eftir það þurfti Howard hvað eftir annað að taka á honum stóra sínum. En mínum mönnum tókst að hanga á stigunum þremur með mörkum frá O’Shea og Nistelrooy. Nú verður United á toppnum yfir jólahátíðina og því verða jólin gleðileg í ár. Það fylgir þessu hins vegar ákveðin bölvun því ef ég man rétt hefur liðið sem er efst um jól aldrei orðið Englandsmeistari síðan úrvalsdeildin var stofnuð. Leiðréttið mig ef ég hef rangt fyrir mér.

Ferdinand var dæmdur sekur og ekki er ég nú hissa á því. Lengd bannsins kemur mér verulega á óvart sérstaklega í ljósi þess að leikmaður Manchester City gerði sömu mistök í vor og fékk smá sekt ef ég man rétt. Að sjálfsögðu á að dæma manninn í bann. Um það er ekki rifist held ég. Hann missti af lyfjaprófi og þrátt fyrir að hann hafi tekið prófið 36 klst seinna þá dugir það ekki til. Ég er fylgjandi þeirri stefnu að áfrýja þessum fáránlega þunga dómi og vona að hann verði styttur í svona 3ja mánaða dóm sem mér finndist sanngjarn. En nóg um það. Bíðum og sjáum hvað áfrýjunardómstóllinn dæmir eftir 3 mánuði.

Jólaprófin...
...gengu vel. Ég tók sem sé tvö verklega próf sama daginn og gekk bara vel. Framar vonum raunar í skurðlæknisfræði en ég hefði viljað fá hálfum hærra í svæfingu a.m.k. En hvað um það þá gefur þetta gengi manni byr undir báða vængi fyrir vorið. Kannski maður slái nokkrar níur af stalli sínum ef vel gengur. Vonum það.

Mamma og Pabbi
Þau kalla ekki allt ömmu sína foreldrar mínir. Þau verða sem sagt í Noregi um jólin og fóru út að morgni laugardagsins síðasta. Við Edda renndum þeim á flugvöllinn. Fyrst var planið að fara á Lancernum þeirra en fljótlega áttuðum við okkur á að á honum var enginn krókur fyrir kerru og því ekkert pláss fyrir allan farangurinn. Það var því brugðið á það ráð að fá lánaðan jeppann hjá tengdó og var það auðsótt. Við sléttfylltum síðan Terranoinn með sjö ferðatöskum sem flestar voru fullar af jólagjöfum. Síðan var tekinn með gítarinn hans pabba sem Andreas frændi minn ætlar að fá lánaðan og að lokum fékk mamma þá snilldarhugmynd að taka með sér 150 ára gömul gönguskíði til að skíða á, á meðan pabbi reynir að læra á svigskíði. Þið getið ekki ímyndað ykkur hvað við Edda hlógum að þeim skötuhjúum þar sem þau burðuðust með 30 kg handfarangur hvort inn í flugstöðina. Síðan þurfti pabbi reyndar að skila handfarangrinum sínum því einhver eggvopn leyndust í jólapökkum fjölskyldunnar. Hann slapp því við að bera 30 kg tösku um borð í vélina. Heppinn!!!

Jólin
Mamma og pabbi og bræður mínir ásamt fjölskyldum verða öll erlendis um jólin þannig að eins nána fjölskyldan á landinu verða Edda og sonur minn Stúdent sem dvelur hér mjálmandi á meðan mamma og pabbi eru úti. Ég nýtti mér samviskubit mömmu áður en hún fór og fékk hana til að baka handa mér uppáhaldssmákökurnar mínar og að sjálfsögðu búa til heimatilbúinn jólaís svo ég hefði eitthvað að kjammsa á um jólin.
Takk mamma, þú ert best.
Ég verð sem sagt hjá tengdó sem verður frábært fyrir utan það að ég kemst ekki í Dómkirkjuna klukkan sex af gömlum vana því Valdi tengdó er á næturvakt í slökkviliðinu og því þarf að borða snemma. Hugsa að ég fari í miðnæturmessuna í staðinn en kannski maður hlusti bara í útvarpinu einu sinni.

Snilld!
"The efficient physician is the man who successfully amuses his patient while Nature effects the cure"
Voltaire

Keikó dauður og Saddam fundinn - tilviljun? Ég held ekki.
Það kann að koma sumum spánskt fyrir sjónir að Saddam skuli hafa fundist skömmu eftir að Keikó drapst en ég skil þetta alveg. Keikó og Saddam voru vinir og Saddam vill fylgja honum til grafar. Grafinn háhyrningur á víst að bragðast svipað og grafinn lax. VIBBI!!!!

Skandall #1
Niðurskurðartillögur stjórnarnefndar Landspítala Háskólasjúkrahúss eru skandall. Þeir ætla að spara á sviðum BMT með því að troða nokkrum bráðamóttökum í viðbót í húsnæði BMT í Fossvogi og er stefnan að flytja BMT barna, BMT skurðlækna og hjartamóttökuna, auk BMT kvennadeildar og geðdeildar allar þangað. Fyrir þá sem ekki vita var húsnæði BMT í Fossvogi byggt í kringum 1970 ef ég man rétt og átti þá að vera bráðabirgðahúsnæði deildarinnar. Hún er nú þegar orðin allt of þröng fyrir þá starfsemi sem þar er svo ég tali nú ekki um að bæta við 70-80 sjúklingum á dag, hið minnsta. Verst finnst mér þó að taka BMT barna úr því frábæra húsnæði sem þeir hafa og flytja það í Fossvogshjallinn. Hvað er að? Á meðan er örlitlu hlutfalli starfsfólks úr stjórnsýslu sagt upp, sennilega ekki nema 5%. Það er þó flestum starfsmönnum LSH ljóst að á því sviði er starfsfólki mjög ofaukið. Á meðan er 23 af 50 starfsmönnum rannsókna og kennslu sagt upp. Þannig að þegar fram líða stundir mun Landspítali háskólasjúkrahús reka þjónustu sína í lélegasta fáanlega húsnæði með allt of fáa heilbrigðisstarfsmenn sem ekki hefur verið kennt almennilega til verka, fleiri klukkutíma biðraðir og fáfróðar stjórnunarblókir andandi ofan í hálsmálið á þeim læknum sem enn halda starfi sínu.
Auðvitað er LSH búinn að kalla þetta yfir sig með því að eyða sýknt og heilagt peningum sem þeim voru ekki ætlaðir. Þegar allt kemur til alls eru það stjórnendur spítalans sem hafa brugðist viðskiptavinum sínum en ekki ríkisstjórnin, hvorki sú sem nú situr né aðrar sem á undan henni hafa komið.

Skandall #2
Nú er Davíð alveg að tapa sér. Leggur fyrir þingið frumvarp í skjóli einhverrar nefndar, sem tryggir honum eftirlaun þegar hann hættir næsta haust. Er ekki augljóst að allar slíkar hækkanir til alþingis- og ráðamanna eiga að fara í gegnum kjaradóm en ekki Alþingi? Man Davíð ekki stóru orðin sem hann lét falla um Kaupþing-Búnaðarbanka og ákvörðun stjórnenda þar um eigin bónusa og laun? Hann er að grafa sig ofan í sömu holu. Reyndar finnst mér þessar launakröfur alls ekkert ósanngjarnar en þær koma ekki eftir réttum leiðum. Alþingismenn og ráðherrar eiga ekki að ákveða eigin laun og kjör. Aðrir verða að gera það.

Nýr hlekkur á spássíuna
Abdul danaprins, öðru nafni Magnús Gísli Eyjólfsson hefur verið hlekkjaður hér til hliðar. Til hamingju með það, Abdul!

Er vændi glæpur?
Konur skrifa mikið um þá vá sem vændi þykir á Íslandi. Þær vilja ólmar gefa konunum sem selja sig á ólöglegan hátt, leyfi til þeirrar iðju. Þær vilja sem sé að konum sé heimilt að selja líkama sinn en hins vegar vilja þær að körlum sem kaupa þessa þjónustu sé refsað þar sem það sé svo ógeðslegt að kaupa sér hinn háheilaga líkama konunnar. Hann er engin söluvara – eða hvað?
Þessa undarlegu tillögur sínar rökstyðja konur svo með þeim undarlegu staðhæfingum að konurnar sé að gera þetta í neyð, eigi einskis annars kost. Þær hafa “leiðst” út í vændi vegna ytri aðstæðna t.d. fíknar. Ég skil samt ekki alveg hvað gerir þær þá frábrugðnar góðu strákunum sem hafa verið að ræna bankana víðs vegar um suðvesturhornið. Eru þetta ekki líka ólánssamir strákbjánar sem hafa rænt bankana til að borga skuldirnar sínar við “dílerinn”?
Að sjálfsögðu má síðan alltaf rífast um hvort vændi eigi yfir höfuð að teljast glæpur. Hvers vegna ætti að banna konum að nota líkama sinn sem atvinnutæki, fremur en nuddurum, erótískum dönsurum svo ég tali nú ekki um hnykklækna. Vissulega mundu sumir halda því fram að mikill munur sé á samræði og nuddi og get ég að nokkru leyti verið sammála því, en mér finnst það nú fyrst og fremst vera stigsmunur en ekki eðlismunur. Þegar munurinn er slíkur verðum við oft að draga mörkin í lögum. Sem dæmi mætti taka heimilisofbeldi. Það mundi ekki nokkurri eiginkonu/kærustu detta í hug að kæra manninn sinn fyrir að strjúka sér með lófanum en um leið og hann slær er um líkamsárás að ræða.
Ég er nú reyndar þeirrar skoðunnar að ef konum langar að sofa hjá körlum fyrir peninga og karlar eru tilbúnir að borga fyrir það sem hvergi í heiminum er auðveldara að fá ókeypis, þá eigi bara að leyfa þeim það, alveg eins og mér finnst bara allt í lagi að leyfa einhverjum vitleysingjum að berja hvorn annan í höfuðið ef þeir kæra sig um. Ég held þeir versni ekkert í hausnum við það. Flestir þeirra eru eins og gömul sjónvörp – myndin skýrist bara við að berja aðeins í þau.
En ég er víst kominn út fyrir efnið sem ég ætlaði að skrifa um. Mér finnst bara einfalt mál að það þarf tvo til að fremja glæpinn. Kona sem selur sig er að stuðla að glæpnum á markvissan hátt. Hún hvetur manninn til að brjóta lögin með því að bjóða sig til sölu. Ef við refsum þeim ekki líka (að því gefnu að vændi sé ólöglegt), getum við alveg eins sagt að einstaklingur sem ræður einhverja beinasna til að nauðga einhverjum sé ekki sekur því hann framdi ekki ódæðið sjálfur – hann bað bara um að það væri framið.
Mér finnst miður að sjá hvað ungar konur hafa sleppt sér í jafnréttisbaráttunni, þær heimta að lögum sé breytt sér í hag í nafni jafnréttis. Kvenréttindi og mannréttindi eru löngu hætt að vera á sömu blaðsíðu. Flestar hörðustu baráttukonur fyrir kvenfrelsi eru meira að segja farnar að ráðast að sjálfsögðum mannréttindum annarra kvenna, t.d. til ákveðinna snyrtiaðferða, á þeim forsendum að þetta sé allt runnið undan níðingshæl karlmanna. Ein þeirra heimtaði meira að segja fyrir fáeinum misserum að konum yrði meinað að raka á sér líkamshárin. Er ekki allt í lagi? Erum við ekki komin aðeins fram úr sjálfum okkur.
Ég er fylgjandi jafnrétti kynjanna en þó er ég meira fylgjandi mannréttindum og því styð ég ekki sumar aðgerðir ríkisins til að gera konur samkeppnisfærari með því að mismuna kynjunum. Slíkt ætti aldrei að líðast. Eina leiðin til að ná fram jafnrétti kynjanna er að þau hafi nákvæmlega sömu réttindi að lögum. Það er sannkallað jafnrétti.

Boltinn
Geri nú ekki ráð fyrir að lesendur hafi nennt að lesa nógu langt til að sjá þessa umfjöllun en ég er alltént mjög ánægður með mína menn í dag. Þeir kláruðu grannaslaginn í Manchester með stæl og fyrir það ber að hrósa þeim. Scholes er að koma sterkur inn á miðjuna og Ruud virðist vera að vakna af værum blundi. Vel. Áfram United.
Poolararnir halda hins vegar áfram að skíta í brækurnar sem Houllier klæðir litlu strákalingana sína í. Þeir eru orðnir svo brjóstumkennanlegir að þeir eru alvarlega að hugsa um að koma til Íslands á pre-season á næsta ári. Mér þykir nú vænt um skerið mitt en það er ekki beint vænlegt fyrir markaðsetningu stórliðs að eyða svo mikið sem klukkustund á litla skerinu. Ekki mundi ég nenna á þennan leik, sérstaklega þar sem maður þyrfti líklega að horfa upp á tvö leiðinlegustu fyrirbæri sem arkað hafa um jörðina: sigurreifa KR-inga og tapsára Poolara.

Próflesturinn kallar, lifið heil.

Ég hef...
...hef alls ekki staðið mig í blogginu síðastliðna daga og biðst ég velvirðingar á því. Ég hef verið upptekinn við ýmislegt, þ.m.t. próflestur. Ég á að fara í eitt próf nú um jólin sem er vitjun í skurðlæknisfræði og svæfingarlæknisfræði. Í rauninni eru þetta tvö próf en þau eru tekin sama daginn þannig að þetta virkar eins og eitt próf. Þetta er svo sem ekki mikill lestur heldur verður maður að tileinka sér það sem maður hefur lært á deildum og beina því í þann farveg sem kennarinn óskar. Staðreyndin er hins vegar sú að kennarar vilja oft villast út í að spyrja um það sem stendur í bókunum þannig að maður reynir að leggjast í lestur bókanna svo maður verði ekki rekinn á gat. Ég er um það bil að ljúka við svæfingarhlutann og ætla þá að snúa mér að skurðlæknisfræðinni sem ég hef reyndar lesið að einhverjum hluta. Nú verður tölvan sett á ís í 10 daga þannig að þið skuluð ekki búast við miklu af mér á þessum tíma.

Njála
Ég hefði nú geta sagt ólánssömum félögum mínum að kvikmyndin Njála sýnir ekki alla söguna heldur aðeins fyrsta hluta hennar. Þessi hluti var gerður til að kanna áhuga manna á gerð heildarinnar en einnig til að kanna hvort áhugi fjárfesta sé fyrir hendi til að kvikmynda alla söguna. Þetta hefur allt komið fram í fréttum og tilkynningum um sýningar myndarinnar þannig að ég skil ekki hvaða væl er í Skerjagarðsbóndanum, Bjúgubróðurnum og Skutlinum.

Afmælisbarnið
Helgi Hrafn Bergmann, snillingur og töffari, er ársgamall í dag og fær hamingjuóskir frá Klakanum. Fyrir þá sem ekki vita er hann bróðursonur minn og býr í Noregi. Í tilefni af afmælinu hefur hann verið að æfa sig að labba sl. daga og er víst orðinn nokkuð sleipur. Til hamingju með daginn frændi, gjöfin þín kemur með ömmu og afa um jólin.

Höfðingi er látinn
Jón Eiríksson eða Nonni frá Steinsholti lést í nótt, níræður að aldri. Jón var föðurbróðir Sigurðar sem ég var lengi vinnumaður hjá og raunar var ég tvö sumur hjá Nonna og systkinum hans, Svenna og Böggu. Nonni var mikill fjölskylduvinur eins og Steinshyltingar allir og með honum er genginn einn fróðasti og minnugasti maður sem ég hef kynnst á minni stuttu ævi. Auk þess var hann mikill íslenskumaður. Heimili þeirra systkina stóð okkur alltaf opið og var okkur jafnan tekið sem höfðingjum. Blessuð sé minning Nonna í Steinsholti.

Boltinn
Mínir menn gerðu góða ferð til Grikklands í vikunni og Forlan tryggði þeim sætan sigur og sæti í 16 liða úrslitum Meistaradeildarinnar. Fallegt!! Það var hins vegar ekki eins fallegt að horfa á þá tapa fyrir Chel$ky í dag. United gátu ekki neitt fyrr en síðustu tíu mínúturnar þegar Kleberson og Ronaldo voru komnir inn á og ég hef trú á því að við hefðum náð a.m.k. einu stigi ef þeir hefðu byrjað leikinn eða komið fyrr inn á. En hvað um það - allir vita að United toppar eftir áramót og því hef ég engar áhyggjur af þessu. Við tökum dolluna á endasprettinum eins og vanalega.

Akranes
Ég dvaldi frá sunnudegi til föstudags á Akranesi við verknám í svæfingalæknisfræði og líkaði vel. Þetta fag heillar mig mikið eftir þessa stuttu kynningu en spurningin er hvort það sé pláss fyrir tvo svæfingarlækna í sömu fjölskyldunni. Sjáum til, það er svo sem margt annað skemmtilegt að læra innan læknisfræðinnar. Alltént þakka ég Akurnesingum fyrir höfðinglegar móttökur og væri alveg til að koma þangað aftur einhvern tíma.

Sindri
Við Edda fórum í dag að líta á "son" hennar, hann Sindra. Hann er nú á beit á Hólmahjáleigu í Landeyjum. Það var gaman. Við komum þarna í ljósaskiptunum um hálffimmleytið og röltum einhverja 2 km til að heilsa upp á hann. Hann er nú óttalegur kjáni ennþá og ekki farinn að treysta manninum fullkomlega þannig að við náðum honum ekki nema á mynd. Ég komst reyndar mjög nálægt honum en þegar ég tók mynd af honum close-up leist honum ekkert á blikuna og lét sig hverfa. Við náðum samt af honum einum 10 myndum sem kannski verða látnar ganga á netinu ef menn hafa áhuga.
Á leiðinni austur keyrði fram úr okkur mikill töffari á fallegum upphækkuðum og -gerðum Ford Econoline sem var búinn öllum flottustu græjunum. Í afturrúðinni var þessi áletrun: Sá sem á mest af dóti þegar hann deyr, vinnur! Ég hló svo mikið að það munaði engu að Lancerinn hans pabba fengi að kynnast því hve kalt vatnið er í rangæskum skurðum. Sem betur fer náði ég stjórn á karinu og elti Econolininn.
Annað fallegt sem gerðist í ferðinn var að sjá Vestmannaeyjar svona nálægt á meðan sólin settist við hafröndina og lýsti upp suðvesturhiminninn. Vestmannaeyjabær var fjarskafallegur þar sem hann sást yfir landeyðið vestan við Heimaklett. Tignarleg sjón og sannarlega falleg. Sumir hlutir eru bara fjarskafallegir, þ.e. fallegir úr fjarska.

Boltinn
Mínir menn skiluðu sínu í dag með sigri á Blackburn. Ég er ánægður með að Rúðan skuli loksins hafa skorað í deildinni, að Kleberson skuli vera kominn í gang og að Fortune skuli vera að brillera enda lagði hann upp bæði mörkin í dag. Fallegur maður. Poolararnir halda áfram að valda vonbrigðum en helv. Nallarnir virðast ekki ætla að stíga feilspor fyrr en í vor. Ætli Chelsky vinni þetta ekki? Hvað haldið þið?

Mystic River...
...ku vera á í Massachusetts en mynd með þessu nafni var sýnd kl. 22 í Sambíóunum Álfabakka í kvöld. Svo heppilega vildi til að ég var í salnum og sá þessa snilld. Þetta er ein besta löggumynd sem ég hef séð lengi með skemmtilegu handriti, fallegri myndatöku og umfram allt stórgóðum leik þriggja frábærra leikara. Myndin fjallar lauslega um nokkra daga í lífi þriggja æskuvina frá Boston. Þeir eru leiknir frábærlega af Kevin Bacon, Sean Penn og Tim Robbins. Þeir tveir síðarnefndu hafa sjaldan eða aldrei verið betri og eiga báðir vísa Óskarstilnefningu. Bacon var ágætur sem og Fishburne, Laura Linney og Marcia Gay Harden. Frábær mynd sem fær fimm skeytabolta auk þess sjötta fyrir stórbrotinn leik þeirra Penns og Robbins. Mæli sterklega með þessari mynd fyrir alla, sérstaklega þó aðdáendur Clints Eastwood sem hefur aftur tekist að búa til mynd þar sem maður hefur samúð með krimmanum án þess þó að vera ósáttur þegar hann fær makleg málagjöld. Þetta er mjó lína sem oft reynist erfitt að feta.

Góðar stundir!!

Skólinn...
...er upp og ofan þessa dagana. Fyrstu tvær vikurnar á kúrsus voru vægast sagt slakar og ef ekki hefði verið fyrir frábæra deildarlækna hefði hann verið algerlega misheppnaður. Á ég þá sérstaklega við Fjalar, Torfa og Steinar sem voru brilliant. Að öðru leyti náðu vikurnar tvær á almennu skurðdeildinni aldrei almennilegu flugi. Síðustu tvær vikur hef ég síðan verið á bæklunarskurðdeildinni í Fossvogi og það er bara snilld. Ég er aftur orðinn opinn fyrir þessari grein læknisfræðinnar sem löngum hefur verið sú eina innan skurðsviðsins sem ég hef haft raunverulegan áhuga á. Klínikurnar og kennslan eru brilliant. Sérfræðingarnir næstum allir áhugasamir um kennslu og eru duglegir að taka okkur með í aðgerðir þar sem þeir ætlast síðan til að maður láti ljós sitt skína en nota mann ekki bara fyrir skurðhakastatíf eins og margir aðrir. Deildarlæknarnir eru fáir en allir mjög fínir. Það sem gerir lífið á bæklunardeildinni svo snilldarlegt er það að maður þarf aldrei að koma inn á legudeildina. Nú er ég ekki að segja að vera á legudeildum sé ómerkileg. Hún er að sjálfsögðu mjög mikilvægur hluti af læknisfræðinni. Málið er bara það að maður er á skurðkúrsus og þá lærir maður mest á því að skoða veika sjúklinga fyrir aðgerð og sjá síðan aðgerðina sem læknar hann. Það hjálpar manni rosalega lítið í prófi í þessu að hlusta á flettifundi og umræður á stofugangi allan daginn. Halldór Jónsson jr. sem er yfirlæknir á bæklun virðist vera eini skurðlæknirinn sem áttar sig á þessu og lætur okkur því ekki koma inn á deild nema einn dag en það er einmitt á morgun. Þá er síðasti dagurinn okkar á bæklun og þá eigum við að kynna fyrir honum tilfelli sem við höfum komið nálægt. Hann mun síðan segja okkur frá því tilfelli, mögulegum meðferðum og vonandi grilla okkur aðeins á meðan.

Niðurstaða: Bæklunarskurðlækningar eru komnar á listann minn sem eins og er samanstendur af
Barnalæknisfræði
Bæklunarlæknisfræði
Svæfingalæknisfræði
Lyflæknisfræði (lungu, hjarta, nýru, smit eða innkirtlar sem undirgrein)

Ég er því ekki kominn með mjög stuttan lista en þetta styttist fljótt þegar maður fær að prófa þetta allt saman.

Íslandi allt
C-liðið okkar stóð sig sæmilega í gær þegar það gerði markalaust jafntefli við Mexíkó í San Francisco. Ég vona svo sannarlega að Viðar, sem kvartar óendanlega undan boltaleysi í Amríkunni hafi drifið sig á völlinn því annars eru boltaleysiskvartanir hans hjóm eitt í mínum eyrum. Það er ekki nóg að væla bara, maður þarf að nota vasaklútinn þegar manni er réttur hann. Annars hef ég ekki mikla trú á því að hann hafi drifið sig - líklega hefur hann verið of upptekinn af því að hlusta á eina af sjö útgáfum sínum af klósettrími Rachmaninovs eða eitthvað slíkt. Mikið held ég að sé erfitt að vera svona upptekinn af gamalli tónlist, gamalli sögu, gömlum tungumálum, gömlu fólki. Viðar hverfur líklega í ryk fyrir þrítugt en við hin sem munum eftir að þurrka af, megum ekki gleyma honum. Undir ryklaginu er lítill og hnípinn drengur sem fílar bragðarefi með rykbragði, bland í poka frá því 1750 og myglaða mexíkanska upprúllaða flatköku. Munum Viðar, hann man okkur - eins og allt annað sem hann kemur nálægt.

Jæja börnin góð
Ég lá heima í veikindum í dag. Haustið er búið að vera það skrýtnasta í mörg herrans ár. Venjulega er ég ekki veikur nema 1-2 daga á ári en á síðustu 8 vikum hef ég þrisvar verið veikur. Kannski maður drífi sig til læknis fljótlega. :)

Boltinn
Rúðan stóð sig vel í kvöld og henti Skotum út úr keppninni sem þeir áttu ekki heima í. Ruud setti þrjú í leiknum og átti víst stórleik. Svekkjandi að Wales skyldi detta út en ég var ánægður með að Króatar skyldu komast. Svekkjandi að Tyrkir skyldu detta út því þeir eru með svo skemmtilega geðveikt lið.

Annað var það ekki í bili - bið ykkur vel að lifa eða lel að vifa - allt eftir smekk.

Á frelsinu má lesa þessa grein
Þar fjallar María Margrét Jóhannsdóttir um heilagan rétt kvenna til að gangast undir fóstureyðingu og telur að konur eigi að hafa algert og heilagt sjálfdæmi í eigin málum. Það er augljóst að Maríu finnst hún eiga rétt á ýmsum fríðindum og kannski krefst hún þess næst að allar konur eigi rétt á nefaðgerð eða fitusogi án þess að nokkur maður fái að gera athugasemdir við það. Síðan á auðvitað að borga allan brúsann úr ríkissjóði í nafni jafnréttis - ég meina strákarnir sem brjóta á sér nefið í slagsmálum fá viðgerð á kostnað ríkisins og offitusjúklingar fá megrandi aðgerðir á kostnað skattborgaranna.
Það sem Maríu í fávísi sinni yfirsést er að lækni er fullkomlega heimilt að neita að framkvæma aðgerð ef hann telur hagsmunum sjúklinga sinna ekki borgið með þeirri aðgerð sem þeir fara fram á að sé gerð. Þá fyrst mundi Landspítalinn okkar fara fram úr fjárlögum ef við mættum bara sjálf ákveða hvaða aðgerðir eða læknisþjónustu okkur hlotnaðist.
Nú gætu margir millilínulesarar ályktað að ég sé á móti fóstureyðingum en því fer fjarri. Ég er mjög fylgjandi því að fóstureyðingar séu leyfðar en þær verða að sjálfsögðu að lúta ákveðnum lögum og reglugerðum. Hagsmunum konunnar og fósturvísins verður að þjóna og því miður eru konur sem ekki eru sérstaklega menntaðar í heilbrigðisgreinum ekki alltaf hæfar til að meta heilsufarslegt ágæti fóstureyðingar þó ég efist ekki um fullyrðingu Maríu súperkonu að konur séu fullfærar um að meta félagslegar aðstæður sínar sjálfar. Þessa heilsufarslegu hagsmuni verður heilbrigðisstarfsfólk að meta fyrir hönd konunnar og að sjálfsögðu er það gert á sem hlutlausastan máta. Raunar held ég að fóstureyðingu, innan þess tímaramma sem þær eru siðfræðilega, lagalega og læknisfræðilega mögulegar, hafi ekki verið synjað sl. 10-15 ár þannig að í raun hefur María ekki yfir neinu að kvarta.
Ég er nú raunar þeirrar skoðunnar að það sé nóg að kona vilji ekki eignast barnið til að fóstrinu sé eytt, að því gefnu að það sé gert innan þess tímaramma sem lögin setja okkur. Ég meina: Viljum við í alvöru gera mæður úr konum sem ekki hafa áhuga á því hlutverki.
María gleymir því líka sem er svo sorglega augljóst að um leið og eitthvað fer úrskeiðis er lækninum kennt um. María segir að "nauðsynlegur hluti þess að vera einstaklingur með ákveðnar þarfir og réttindi er að hafa vald yfir eigin líkama". Það er alveg rétt en í þeim rétti felst ekki réttur til að neyða lækna til að framkvæma aðgerðir á þessum sama líkama. Rétturinn á aðeins við um þann rétt okkar að neita læknisaðstoð en ekki réttinn til að krefjast hennar gegn ráðleggingum læknisins. Ákvörðun um inngrip verður alltaf að byggjast á sannfæringu læknisins að það geri sjúklingnum meira gagn en skaða auk samþykkis sjúklingsins eða nánasta aðstandanda fyrir framkvæmd inngripsins.

Það sem er gaman að gera í Garðabæ!
Hjálmar Hjálmarsson, snillingur, ekkifréttamaður og grínari fór á kostum í Djúpu Lauginni á föstudaginn þegar hann tróð upp sem uppistandari. Standið náði þó hámarki þegar Hjálmar söng frumsaminn texta sinn um hvað er skemmtilegt að gera í Garðabæ. Hann hóf forspilið, gerði sig nokkrum sinnum líklegan til að byrja á undurfögrum söng með fallegum texta og hrífandi hrynjandi en þegar allt kom til alls virtist honum ekki hugkvæmast neitt og hætti því við að syngja. Það er nefnilega ekki hægt að gera neitt skemmtilegt í Garðabæ, a.m.k. opinberlega. Hins vegar býr þar reiðinnar býsn af skemmtilegu fólki sem gaman er að heimsækja en maður býður nú sjálfum sér ekki í heimsókn hjá bláókunnugu fólki.

IDOL...
...er að gera alla vitlausa hérna heima. Síðastliðið föstudagskvöld sló þó öll met þegar hartnær hundrað þúsund atkvæði voru greidd í Idolinu. Ég vissi ekki að það væri til svona mikið af unglingum á Íslandi. Annars er þetta það skásta í íslenskri afþreyingardagskrárgerð sem býðst. Silfrið hefur ekki náð sama flugi á Stöð 2 og það gerði á Skjá 1 áður og því nenni ég varla orðið að horfa á það. Ég er reyndar afspyrnuslakur í að horfa á sjónvarp síðan ég var í klásus. Áður gat ég horft á hvað sem er en nú læt ég ekki bjóða mér það, þ.e. hvað sem er. Ég horfi helst á boltann og stundum á fréttir en annars finnst mér orðið meira gaman að lesa bara. Lesa blöðin, lesa fyrir skólann, lesa fyrir mig, lesa fyrir Eddu - bara lesa. Það er gaman og uppbyggilegt.

The Hours...
...er góð kvikmynd enda hlaðin frábærum leikurum. Nicole Kidman fer á kostum í hlutverki geðsjúklingsins Virginiu Wolf, auk þess sem Meryl Streep, Julianne Moore, Ed Harris, Jeff Daniels og fleiri troða upp. Myndin er rosalega þung og ekki fyrir andlega óstabíla að horfa á. En hún er frábærlega leikin, sagan er skemmtileg og leikurinn framúrskarandi þannig að myndin fær sjö rúllubolta í markið. Ekki vegna þess að hún er eitthvað slök heldur af því að hún er ekkert meira spennandi en rúllubolti því markið er gott engu að síður - það þarf ekki alltaf að vera fast.

Boltinn
Englendingar voru í þann mund að skíta á sig á Old Trafford þar sem þeir töpuðu fyrir skemmtilegu liði Dana 2:3. Danir áttu fullkomlega skilið að vinna að mínu mati. Þegar sigurmarkið loksins kom voru þeir búnir að sækja linnulaust seinnihluta seinni hálfleiks og markið lá í loftinu. Sanngjarn sigur Dana var niðurstaðan og það eina jákvæða sem kom út úr þessum leik var frábær frammistaða unglinganna Glens Johnson, Joe Cole og Wayne Rooney og virðist framtíðin björt hjá enska landsliðinu.

Stefan Kretschmar...
...var á Pravda í gær ásamt Fúsa og nokkrum leikmönnum Magdeburgar. Ég ræddi stuttlega við hann og tjáði honum að ég treysti á að þeir flengdu Haukana því þeir væru svo djöfulli leiðinlegir. Hann var alveg til í það og skálaði meira að segja við mig upp á það. Viðkunnalegur náungi þrátt fyrir exotískt útlitið. Áfram Magdeburg.
Spáiði í það að hata Hauka nógu mikið til að halda frekar með einhverjum Þjóðverjum. Hættulegt.

Stendur Heiðar sig ekki?
Fríða kvartar undan því opinberlega á bloggsíðu þeirra hjúa að Heiðar hafi ekki gert neitt ljótt við sig. Mér finnst nú að Heiðar ætti að einbeita sér meira að því að skoða runna en garðyrkjustörfum úr því að laxkona hans sér sig knúna til að tjá sig um slíkt opinberlega - en það er bara mín skoðun.
Annars er ágætt að frétta af mér. Brjálað að gera í skólanum en nú er ég á Fossvogsspítala við bæklunarlækningar sem eru að koma verulega sterkar inn um þessar mundir.

Afmælisbörn
Mamma og pabbi áttu 39 ára brúðkaupsafmæli í gær. Til hamingju með það. Sigurður Loftsson sumarfóstri minn til margra ára varð fertugur sama dag og Emil krúttíbolla sem er bekkjarbróðir minn og sálufélagi varð 27 ára. Til hamingju með daginn öllsömul.

Afmælisbarnið
Edda mín er aldarfjórðungsgömul í dag og hefur þegar haldið tvisvar upp á það. Á föstudaginn var hér hjörð af píum á trúnófylleríi og flúði ég til Tóta Trölla...barns í felur. Við drápum slatta af vondum köllum í tölvuleikjum, drukkum bjór og náðum svo í konurnar okkar í bæinn svo þær færu sér ekki að voða. Það kvöld heppnaðist vel.
Í kvöld var síðan komið að fjölskyldum okkar og var foreldrum, ömmum og öfum og systkinum búsettum á Íslandi boðið í Hólmgarðinn til að éta kökur og gefa gjafir. Hún fékk margar fallegar gjafir. Byrjum á uppáhaldsgjöfinni minni en það var veturgamla gæðingsefnið Sindri sem ég gaf henni. Síðan fylltu foreldrar mínir og bræður inn i myndina með reiðbuxum og hjálmi. Foreldrar hennar gáfu henni síðan flísbuxur og námskeið að eigin vali. Magga systir gaf henni vettlinga og veski. Amma og afi gáfu henni tertugræjur, amma hennar og afi gáfu henni glerlistaverk, Svenni bróðir hennar og co. gáfu henni ilmkerti og jólaskraut. Síðan fékk hún að ýmislegt annað frá mörgum vinum og vandamönnum.
Til hamingju með afmælið ástin mín.

Önnur afmælisbörn...
...eru Valdi tengdó sem varð enn eldri í gær, Örvar KJ sem ásamt Sverri Jeremy og Geir Beam hélt upp á afmælið sitt á þeim fágaða stað Café Amsterdam og síðast en ekki síst varð Gylfi Sigríðarson snillingur varð fjórtán á föstudaginn. Til hamingju allir, til hamingju!

Boltinn...
...rúllaði um helgina. Mínir menn héldu áfram að gera Dudek greyið að fífli því annað árið í röð var ósigur Liverpool að miklu leyti honum að kenna. En sigur er sigur og þrjú stig voru sanngjörn að mínu mati. Poolarar voru svekktir yfir því að fá ekki víti í seinni hálfleik og get ég vel skilið þá. Snertingin var þó alls ekki mikil og Pongolle lét sig náttúrlega detta um leið og hann fann snertinguna í staðinn fyrir að klára bara færið eins og sönnum karlmanni sæmir. Soccernet hélt því fram að þetta hefði ekki verið víti en aðrir netmiðlar sem ég hef lesið töldu að um víti hefði verið að ræða. En það eru ekki alltaf jólin þegar maður heldur með Liverpool.
Annars áttu Poolararnir náttúrlega aldrei að klára leikinn ellefu, og ég skil bara ekki af hverju Diouf fékk ekki rautt spjald þegar hann fór með takkann á undan sér í legginn á O'Shea í seinni hálfleik rétt eftir að hann hafði fengið gult spjald. Ég hugsa reyndar að hann hefði ekki mátt taka vitlaust innkast eftir það til að vera rekinn út af enda kippti Húlli honum strax út af eftir þetta. Pongolle hefði því aldrei átt að koma inn á fyrir hann og því aldrei að fá færið í teignum þegar þeir heimtuðu víti. Miðvörðurinn Heskey klúðraði síðan dauðafæri í lokin og við United menn gátum andað léttar. Við erum greinilega komnir með tak á poolurunum. Vonandi væla Kobbi og Golli ekki of mikið í Odense. :)

Identity...
...kom á óvart og er ágætis afþreying fyrir fólk sem þarf að myrða mínútur. Þrír rúlluboltar í mitt markið og einn í skeytin fyrir skemmtilega fléttu.

Boltinn
Ánægður með mína menn í vikunni. Unglingarnir í United stóðu sig prýðilega á móti Leedsurum í deildarbikarnum og slógu þá út. Ég var sérlega ánægður með Christofer Eagles sem kom inn á hægri kantinn. Forlan var líka góður og Djemba stóð sig vel á miðjunni. Carroll var líka traustur í netinu.

Skólinn
Er byrjaður að rúlla á fullu og maður reynir að tileinka sér hin miklu fræði skurðlæknanna. Þetta er að mörgu leyti mjög gagnleg kennsla þó ég hafi nú ekki mikinn áhuga á að leggja þetta fyrir mig. Það er nú einu sinni þannig í læknisfræðinni að maður verður að kunna slæðing í flestu öðru en maður sérhæfir sig í til að geta staðið sig í sínu sérsviði. En ég nenni ekki að blogga meira í dag. Er á leiðinni til Árnans í G&T þannig að við heyrumst bara seinna.

Hannesar útskrifast og efni helgarinnar
Á laugardaginn var mikið um að vera. Um morguninn fór í stysta próf sem ég hef nokkurn tíma farið í. Þetta var sem sé þriggja tíma próf frá 9-12 en þeir allra handlötustu voru farnir að rífast yfir því að fá ekki að yfirgefa stofuna þegar u.þ.b. 45 mín voru liðnar af próftímanum. Þá var ég löngu búinn með prófið enda ófær um nautaskít (incapable of bull shit) á skriflegum prófum. Ég samdi því nokkrar vísur um sjálfan mig og aðra á meðan ég beið eftir að fá að fara en þar sem ég hef ekki mikið dálæti á sjálfum mér sem skáldi hef ég ákveðið að birta þær ekki hér. Strax fór ég í boltann og kenndi drengjunum sitthvað til gamans og til gagns áður en ég skellti mér í ÆKÍJA eða ÍKEA eins og við Íslendingar köllum það. Þar spókuðum við Edda okkur og keyptum m.a. kuta til að brytja niður steikina sem er á borðum hér á hverju kvöldi.
Við heimkomu var kveikt á imbanum og fylgst með leikjum dagsins með öðru auganu á meðan ég reyndi að klára Colin McRae 2.0 sem er snilldarlegasti og erfiðasti bílaleikur sem ég hef spilað fyrir utan kannski Colin McRae 3.0. Um kvöldið var stefnan síðan sett á útskriftarveislu þeirra öðlinganna Sverris Bjarna, Magnúsar nafna og Inga Steinars sem voru eins og fyrr sagði allir að útskrifast með B.A. í viðskiptafræði. Til hamingju með það drengir. Útskrifarpartýið var haldið á frægum sögustað Herraklúbbsins Hannesar og mættu þar allmargir félagar og tóku á því í drykkjunni. Á eftir löbbuðum við Edda heim í kyrrðinni og það var hreint ágætt kvöld. Á sunnudeginum kom síðan í ljós að fleiri hefðu betur farið að okkar fordæmi því afspyrnuslök mæting var í sunnudagsboltann þar sem aðeins 6 mættu. Við létum það ekki á okkur fá og spiluðum í góðan klukkutíma þar sem Jón Ingi öskraði hendi í hvert skipti sem hann tapaði tæklingu eða missti boltann. Erfitt að vera tapsár.
Á sunnudaginn var ég síðan ógeðslega duglegur því ég bakaði Betty Crocker amrískar pönnsur með ís, rjóma og sýrópi fyrir settið og tengdó sem sporðrenndu þessu ásamt ostum og kexi. Það var voðalega notalegt en síðan settumst við Edda niður og lágum eins og slitti yfir tveimur ræmum. Dómar fylgja að neðan.

Í dag...
...byrjaði ég síðan á kúrsus í skurðlæknisfræði. Það er alltaf erfitt eftir langt skeið með tiltölulega frjálsri mætingu að taka átta vikna kúrs með 95% mætingarskyldu og mætingu kl. 8.00 á morgnanna eða fyrr eftir atvikum. Þetta var reyndar ágætis dagur - sá eina aðgerð sem stóð hátt á fjórða tíma, fékk mér hádegismat, svo á fund og síðan heim. Lýsing aðgerðarinnar væri síst til að hressa við matarlyst lesenda minna eftir erfiða helgi enda ætla ég ekki að fara út í slíkar lýsingar hér. Merkilegt hvað mér finnst gaman að fara í aðgerðir miðað við það að ég hef lítinn sem engan áhuga á að framkvæma þær sjálfur. Sennilega finnst mér heillandi að sjá líffærafræðina svona up, close and personal. Gaman að sjá þetta lifandi og virkandi en ekki í hundrað og fimmtíu ára gömlum líkum í myrkviðum læknagarðs.

Boltinn
Mínir menn stóðu sig aldeilis ekki um helgina. Skíttöpuðu á heimavelli fyrir Fulham og voru heppnir að Rassenal tapaði stigum gegn Charlton. Ég hugga mig við það að United eru alltaf betri eftir áramót og því er 2ja stiga forysta Arsenal ekki eitthvað sem ég er hræddur við. Þeir eru nú einfaldlega þannig að um leið og þeir tapa leik þá verða þeir nokkrir á fáum vikum. Þeir virðast alltaf taka nokkra leiki í röð þar sem allt gengur á afturfótunum, þó það virðist ætla að einskorða sig við meistaradeildina í vetur. Ég veit reyndar ekki hvort það sé eitthvað frábært að þeir detti þaðan út strax. Það verður auðvitað voða gaman að stríða Möggu og Svenna systkinum Eddu sem eru harðir Nallar eins og pabbi en það er bara gott fyrir úrvalsdeildina að Arsenal hangi inni í CL. Vonum að þeir komist alla vega í UEFA cup.

The Banger Sister´s
Tókum þessa mynd í gær. Ekki get ég nú sagt að þessi mynd sé eitthvað meistaraverk en hún skartar tveimur frábærum leikurum og einum frægum í viðbót. Geoffrey Rush fer reyndar á kostum í þessari mynd en fær alltof litla skjástund til að lyfta myndinni á hærra plan. Ágætis tímasóun ef þið þurfið að sóa tíma. Fær þrjá rúllubolta í mitt markið fyrir fáeina góða brandara og góðan boðskap.

NARC
Með gömlu brýnin Ray Liotta og Jason Patrick í fararbroddi kom þessi mynd þægilega á óvart. Ég er ekki að segja að þetta sé mynd sem allir verði að sjá en fléttan er góð og plottið er ekki eins fyrirsegjanlegt og maður heldur. Flottur endir, ekki hefðbundnar amrískar gleðilyktir og því er þessi mynd vel þess virði að kíkja á ef ekkert annað er haft fyrir stafni. Fær tvo bolta í stöng og inn og tvö í slánna og inn. Sá fimmti hittir utanverða hægri stöngina af þrjátíu metra færi.

Góðar stundir