Boltinn
Mínir menn búnir að rétt sinn hlut aðeins á útivöllum í meistaradeild Evrópu eftir frækinn baráttusigur á Rangers í gær. United átti reyndar fleiri færi miðað við þær 60 mínútur sem ég sá en Rangers börðust vel og hefðu alveg átt skilið eitt stig. Það verður hins vegar ekki litið hjá því að Scholes átti að fá tvær vítaspyrnur á lokamínútunum, fyrst honum var brugðið af frábærum markverði Rangers og síðan þegar hann fór fram hjá varnarmanni Rangers stuttu seinna. Anders Frisk sem dæmdi leikinn annars óaðfinnanlega dæmdi hins vegar ekki neitt. Það kom þó ekki að sök því mínir menn unnu og verma því toppsætið í riðlinum ásamt Stuttgart.
Chelsea stóð einnig fyrir sínu í gær með baráttusigri gegn sæmilegu liði Lazio. Frank Lampard var enn einu sinni allt í öllu hjá Chelsea og fullkomnaði góðan leik sinn með frábæru marki í upphafi seinni hálfleiks eftir góðan undirbúning feita víkingsins og Adrian Mutu. Mutu setti síðan sjálfur sigurmarkið eftir gott samspil við Gronkjær.
Rassenal hefur hins vegar fatast flugið enn einu sinni í Evrópu og nú síðast mistókst þeim að leggja Dynamo í Kænugarði. Þeir eru því í afskaplega slæmum málum með aðeins eitt stig eftir 3 leiki og eiga auk þess eftir að fara til Milano í viðureignina gegn Inter. Það sýnir enn einu sinni að þetta er ágætis lið í deildinni en þeir eiga bara því miður ekkert erindi í Meistaradeildina ennþá.

Pósturinn minn
Maðurinn/Konan sem ber póst í húsið til okkar er á einhverju trippi. Í fyrsta lagi kemur póstur dagsins yfirleitt ekki fyrr en seint og síðar meir auk þess sem það virðist sem hann geymi eitt og eitt bréf heima hjá sér í nokkra daga áður en hann ákveður að leyfa manni að sjá það. Þetta kemur sem betur fer ekki að sök þar sem ég fæ alla mikilvæga reikninga inn á heimabankann minn líka. Það er hins vegar verra með tímaritin sem ég er áskrifandi að því þau berast stundum ekki fyrr en nokkrum vikum of seint. Þetta gæti reyndar verið vandamál hjá dreifingaraðilanum úti en ég verð að álykta að það sé ólíklegt því þegar ég bjó í Eskihlíðinni hjá settinu voru þau oft komin fyrir raunverulegan útgáfudag og aldrei seinna en á mánudegi (útgáfudagurinn er á fimmtudegi). Ég er nú ekki enn orðinn það óhress með þetta að ég kvarti - þau skila sér nú öll þegar allt kemur til alls.

Próflestur
Ég er að lesa fyrir próf í endurhæfingarlæknisfræði og mér finnst það ekki gaman. Í fyrsta lagi er þetta ótrúlega leiðinlegt efni og í öðru lagi var ég að fá email frá kennaranum sem sagði að þetta yrði skítlétt próf. Honum finnst víst ekki taka því að kenna okkur svona víðfemt fag á meðan við erum enn í læknadeild og verð ég að segja að ég er sammála honum, sérstaklega þar sem þetta er ein skitin eining eða kannski ein og hálf. Best að geyma svona lagað þar til fólk er búið að ákveða að leggja þetta fyrir sig í lífinu. En ætli það sé ekki rétt að ég haldi áfram að læra svo ég fái ekki falleinkunn í þessu. Kannski maður reyni að komast eins og einu sinni eða tvisvar yfir efnið.

Mér finnst...
...ég ekkert þurfa að blogga í dag því ég var svo duglegur í gær en kannski maður skrifi nokkur orð. Lífið er farið að ganga sinn vanagang hér heima. Edda vinnur og ég reyni að læra á meðan. Á kvöldin reynum við að gera eitthvað skemmtilegt saman en það verður nú eitthvað lítið þessa vikuna því ég er að fara í próf á laugardaginn í endurhæfingarfræðum. Eftir prófið verður síðan hitað upp fyrir útskriftarveislu þriggja öðlinga - þeirra Herra Hannesar Bjarna Sigursveinssonar, Herra Hannesar Steinars Ellertssonar og Herra Hannesar Gísla Eyjólfssonar en þeir eru allir að ljúka námi í viðskiptafræði frá Háskóla Íslands. Allir eru þessir menn úrvalsHannesar og fá að sjálfsögðu hamingjuóskir þegar að útskriftinni kemur. Þeir eru líka vandaðir menn og hafa ráðið sig til starfa hjá rótgrónum félögum og fyrirtækjum. Sverrir (Hannes Bjarni) er kominn til Landsvirkjunnar, Ingi Steinar hefur ráðið sig hjá TM og Magnús hefur ákveðið að helga alla starfskrafta sína, framgangi Herraklúbbsins Hannesar.

Nýr hlekkur
Glöggir lesendur hafa eflaust veitt því eftirtekt að Prinsessa Dana hefur verið hlekkjuð hér til hliðar. Mun þar komin Elna Ósk Stefánsdóttir, æskuvinkona Eddu Guðrúnar sem skrifar gríðarlega frá krummaskuðinu Jelling á Jótlandi. Óskum við Elnu til hamingju með hlekkinn en minnum hana á að slíkum hlekk fylgir ábyrgð sem gæta skal sem sjáaldurs augna sinna, þ.e. það þarf að vera eitthvað bitastætt á enda leiðarinnar sem hlekkurinn vísar. Því ráðlegg ég henni að skrifa reglulega og þá munu þúsundir lesenda Ljós-Gíslans flykkjast á heimasíðu hennar.

Boltinn
Mínir menn stóðu sig með stakri prýði um helgina þegar þeir lögðu Leeds að velli á Elland Road. Frábært mark hjá fyrirliðanum sem klikkar ekki þegar á þarf að halda. Annars fannst mér ótrúlegt miðað við umfjöllun á netinu að sjá ensku mörkin í gær. Á netinu stóð að mínir menn hefðu verið heppnir að hirða öll stigin en miðað við myndirnar voru Leedsarar í nauðvörn allan seinni hálfleik því ég held að sýnd hafi verið ein 8 skot sem Robinson ýmist varði eða rötuðu rétt fram hjá rammanum. Howard sást held ég aldrei í mynd í þessu myndskeiði.
En Hermann er hetja síðustu daga. Skoraði í sínum fyrsta leik í hálfan annan mánuð og það er af lýsingum að dæma alveg stórglæsilegt. Hrossið klikkar ekki og þegar hann er kominn með þefinn af markinu eftir Þýskaraleikinn þá getur hann ekki hætt. Efnilegur. Heppinn.

Pæling
Spáiði í að vera bæði gormæltur og smámæltur - þá er maður eiginlega Dani af spænskum uppruna eða öfugt.

Jæja!
Þá hefur Danmörk verið sótt heim. Við Edda vorum bæði að koma til Danmerkur í fyrsta skipti á ævinni (reyndar er ég öllum hnútum kunnugur á Kastrup þar sem ég hef millilent þar 2svar áður). Það kom mér á óvart hvað það er mikið af múrsteinum í Danmörku. Svo er talað um að Kínamúrinn sé eitthvað byggingarafrek. Það hljóta að liggja miklu fleiri vinnustundir í öllum þessum múrsteinshúsum. En hvað um það - ætli ég verði ekki að segja ykkur alla sólarsöguna?

Miðvikudagurinn 15. október
Dagurinn byrjaði snemma eða kl. 4.00 árdegis eftir tveggja tíma svefn. Lögðum af stað út á flugvöll um fimmleytið en höfðum viðdvöl hjá foreldrum hennar Eddu þar sem Valdi tengdó ætlaði að skutla okkur út á flugvöll og bíllinn okkar ætlaði að vera í pössun. Við vorum kominn til Keflavíkur um kl. 5.45 og fyrsti maðurinn sem ég sé í Leifsstöð er Halldór Benjamín frændi minn sem var á leið til Köben með sömu vél. Við sátum því saman í vélinni á leiðinni út og spjölluðum heilmikið saman á meðan Edda reyndi að jafna sig á svefnleysinu. Við komuna til Köben tóku Elna og Áslaug vinkonur Eddu á móti okkur og að sjálfsögðu var stefnan tekin beint á Strikið. Við skoðuðum Burger King við Ráðhústorgið og síðan skoðaði ég tóbaksbúð sem Óli rass hafði bent mér á. Þar var að sjálfsögðu hægt að fá neftóbak og því var einu af þremur markmiðum ferðarinnar náð. Síðan tók við verslunarráp og stelpurnar skoðuðu H&M alveg í tætlur til að undirbúa jarðveginn fyrir fimmtudaginn sem var hinn raunverulegi verslunardagur skv. deiliskipulagi ferðarinnar. Teygjudeild H&M hefur t.d. þurft að loka tímabundið á meðan nýr lager er keyptur, eftir að Edda gekk þar berskerksgang og keypti upp vistir deildarinnar. Ég gat þó fundið mér eitt og annað og keypti húfu, vettlinga, trefil og sokka til að ég yrði ekki úti á meðan ég beið eftir stúlkunum. Síðan fórum við í siglingu um sýkin þarna í miðborg Köben þar sem maður siglir frá Nyhavn sem ég held að hafi einu sinni verið hinn raunverulegi miðpunktur Köben (þ.e. þar var hægt að gerast knapi gegn vægu gjaldi). Siglingin tók tæpa klukkustund og var mjög skemmtileg. Á eftir skoðuðum við svo Amalienborg sem er höllin í Köben. Nú var dagur að kveldi kominn og því kominn tími á öl og mat. Settumst inn á veitingastað sem ég man ekki í svipinn hvað heitir en hafði ítalskt yfirbragð. Þjónninn sem var suðrænn í útliti talaði hrafl í íslensku og fær plús fyrir það. Át þarna fyrirtaks lasagna bolognese sem fær hiklaust 3 bolta í skeytin og inn. Síðan var ferðinni heitið í herbergi sem Edda Rún og Sunna vinkonur þeirra meyja hafa til umráða í Köben ásamt Alexöndru sem margir muna eftir syngjandi í auglýsingu mjólkursamsölunnar. Þar spjölluðum við svolítið saman en fljótlega kom Óli í heimsókn og höfgi færðist yfir mannskapinn.

Fimmtudagurinn 16. október
Erfiður dagur. Byrjaði með því að ég vaknaði við mikið tak sem ég hafði fengið af því að sofa á allt of mjúkri dýnu. Fljótlega dreif liðið sig fram úr og stefnan var tekin á eitthvað ætilegt - bara hvað sem er. Neyðin rak okkur inn í fyrirtaksbakarí þar sem ég fékk mér eina allra bestur samloku sem ég hef á ævinni bragðað. Síðan var förinni heitið á Kastrup aftur að sækja Helgu og Sverri sem komu með sömu vél og við bara deginum seinna. Ferð þeirra gekk stóráfallalaust og við tókum stefnuna strax á Strikið. Nú tókst mér að versla aðeins meira enda kominn með samherja í Sverri. Við gengum frá okkar málum tiltölulega snögglega og verslaði ég frakka, skyrtur og peysu þann daginn. Ég hafði síðan séð búð á ráfi okkar kvöldið áður þar sem seldur var sérlega fallegur bolur sem mig langaði í. Ég leitaði að þessari búð kvöldið eftir en fann hana ekki fyrr en Elna vísaði mér leiðina. Kom þá í ljós að búðin var flutt og þurfti ég því aftur að finna hana. Það tókst að lokum örfáum mínútum fyrir lokun og nú er bolurinn minn ásamt öðrum flottum sem ég sá inni í búðinni. Dagurinn var mun bærilegri þar sem nú hafði ég liðsmann þegar mér leiddist þófið í verslunarferðum stúlknanna og við gátum því látið okkur hverfa og fengið okkur öl. Nýttum við okkur það svolítið en þó líklega of lítið. Um kvöldið var síðan borðað á RizRaz sem er í miklu uppáhaldi hjá stelpunum. Ég asnaðist til að fá mér einhverja steik þarna sem var nú ekki beysin. Hins vegar var svona buffet sem fylgdi og samanstóð af fersku grænmeti, pasta og allskyns heitum og köldum réttum og þótti það mjög gott. Með okkur borðuðu Stebbi striker og Halldóra kærastan hans sem eru við nám í Köben. Það var gaman að hitta félaga Hannes. Eftir matinn var tekin stefnan á Höfuðbanagarðinn þaðan sem lestin til Odense gengur. Ferðin tók hálfan annan tíma og náðum við Sverrir að hesthúsa hálfri koníak með dapurlegri tilraun stúlknanna til að hjálpa. Við vorum því orðnir hressir við komuna til Odense og vildum ólmir skella okkur á pöbb en það var fellt með meirihluta atkvæða þannig að við smökkuðum bjór heima hjá Gollum frameftir nóttu.
Það var rosalega notalegt að koma loksins til Golla og Slaugu. Þau búa í rúmgóðri íbúð steinsnar frá miðborg Odense. Mér fannst rosalega flott hjá þeim. Maður hefur svona mental picture að íslenskir námsmenn erlendis lepji dauðann úr skel en það er sko öðru nær því þau hafa komið sér vel fyrir. Það var því hrikalega notalegt að leggja höfuðið á koddann þarna um nóttina í rúmgóðu stofunni hjá Gollum og Ásláki þar sem við sváfum fimm í flatsæng - ég, Edda, Elna, Helga og Sverrir.

Föstudagurinn 17. október
Byrjaði snemma með bakarísferð um ellefuleytið þar sem stelpurnar fóru fram á eitthvað ætilegt. Síðan var ferðinni heitið niður í miðbæ þar sem tekin var skoðunarferð undir leiðsögn Ingólfs og Áslaugar. Við skoðuðum meðal annars hjallinn sem H.C. Andersen fæddist í en Odense leggur mikið upp úr því að heiðra minningu þessa frægasta sonar síns. Það hafa þeir meðal annars gert með því að byggja gróðurhús aftan við húsið hans að hætti Íslendinga en þar inni á að vera mikið safn helgað þessum snillingi. Merkilegt að sjá gróðurhús í hverfi frá fyrri hluta nítjándu aldar. Þá voru Danir allir í gróðurhúsabissnessnum. Fljótlega bættist öðlingurinn Jakob Friðriksson í hópinn en hann er bekkjarbróðir okkar Golla og Áslaugar úr MR og hefur búið í Odense frá útskrift þar sem hann hefur lagt stund á sameindalíffræði. Hefur frami hans orðið svo gífurlegur að hann er þekktur um gjörvallt Fjón undir nafninu Jobbi Fruma. Það var mjög gaman að hitta Kobba almennilega en það hefur varla gerst síðan í árdaga. Síðan var að sjálfsögðu kíkt aðeins í búðir en fljótlega settumst við inn á veitingastað sem heitir Frank A og fengum okkur úrvalsborgara sem svipaði að sumu leyti til American Style en var þó ekki eins góður. Hann var samt mjög góður og fær 3 bolta í skeytin og einn í stöng og út. Þjónustan var hins vegar eitthvað í anda vítaspyrnu Davids Beckham gegn Tyrkjum - nema hvað hún fór langt undir markið. Við strákarnir drifum okkur síðan heim þar sem til stóð að við elduðum ofan í stúlkurnar og varð hin gífurlega flókni réttur appelsínukjúklingur fyrir valinu. Á eftir var síðan súkkulaðikaka að hætti hússins. Kobbi sá um kökuna, ég og Sverrir unituðum hænsnin og Golli verkstýrði öllu af stakri prýði. Úr varð frábær máltíð með frábæru fólki.
Fljótlega fóru fleiri Íslendingar að týnast í partýið og held ég að Gollum hafi boðið öllum Íslendingum á Fjóni heim þetta kvöld. Úr varð hið ágætasta partý sem stóð fram eftir kvöldi og síðan fórum við Sverrir, Helga og Edda á Boogie Night Club og skemmtum okkur ágætlega. Fórum þó fljótlega heim aftur og skemmtum okkur aftur fram eftir nóttu.

Laugardagurinn 18. október
Vöknuðum um ellefuleytið og drifum okkur í allþrif og morgunmat. Kobbi kom um hálftólf og hafði dagurinn verið skipulagður sem strákadagur. Elna átti afmæli og stelpurnar fóru saman í bæinn en við drengirnir byrjuðum á Go-Kart kl. 12. Þetta er flottasta gokart-braut sem ég hef séð því hún var úr einhvers konar gúmmíi þannig að veggripið var gífurlegt. Maður gat því keyrt nokkuð greitt og fórum við þrjár keppnir. Menn voru misbrattir fyrir þynnku og því gekk þeim misvel að hafa stjórn á bílunum. Farnar voru þrjár keppnir og á eftir vorum við gjörsamlega búnir á því - svangir og þyrstir. Því var tekin stefnan á McDonalds og einum vænum sporðrennt. Síðan fórum á Poolklúbbinn Sharks þar sem teknir voru nokkrir leikir og steypt í nokkur klósett. Upp úr þrjú var ferðinni svo heitið á Sportbar í Odense þar sem sýndur var leikur fantanna og píslarvottanna í Arsenal gegn málaliðunum í Chelsea. Þar var hægt að festa kaup á 4L bjórturnum og hesthúsuðum við einum slíkum fyrir hvorn hálfleik. Með okkur var Víðir vinur Golla úr læknisfræðinni þarna úti. Það er skemmst frá því að segja að skemmdarvargarnir í Rassenal unnu og hirtu toppsætið af mínum mönnum aftur. Eftir leikinn fórum við síðan heim. Um kvöldið átti að halda upp á afmæli Elnu sem varð 25 ára á laugardaginn og fær hér með hamingjuóskir Ljós-Gíslans. Því var stefnan tekin á Jensen's Bøfhus þar sem ég fékk mér gómsæta piparsteik með rauðvíni og bakaðri kartöflu. Á eftir var það síðan kaffi og koníak. Þegar hér var komið sögu var ölvun orðin töluverð og menn vildu síst glata slíku ástandi enda síðasta tækifærið að bragða á dönsku eðalöli. Því var kíkt á Kristján fjórða sem er víst einhver læknanemapöbb og þar var tekið öl á línuna. Síðan renndum við okkur heim þar sem heimferð var á döfinni morguninn eftir. Við fórum þó ekki í háttinn fyrr en Golla hafði tekist að reka okkur á gat í hinni svokölluðu kvikmyndagetraun sinni þar sem hann spilar lög úr þekktum kvikmyndum á píanóið sitt og nærstaddir reyna að geta upp á myndinni.

Sunnudagurinn 19. október
Byrjaði snemma eða kl. 8 að dönskum tíma þar sem við þurftum að taka lestina frá Odense til Kastrup þaðan sem vélin okkar fór klukkan 13.05 að staðartíma. Það gekk nokkuð tíðindalaust fyrir sig nema hvað við misstum næstum af vélinni því við vorum fullróleg í tíðinni á Kastrup og heyrðum allt í einu bara final boarding call fyrir flugið okkar og þurftum að hlaupa allann rampinn á einum spretti til að komast í vélina. Það endaði þó allt vel og við komum heil heim um kl. hálfþrjú í gær eftir frábæra ferð. Ég hlakka svo sannarlega til að heimsækja þau skötuhjú aftur svo ég tali nú ekki um snillinginn Kóbías. Þakka kærlega fyrir höfðinglegar móttökur.

Afmælisbörn vikunnar
16. október er fyrst og fremst merkilegur fyrir tvö afmæli. Mágkona mín Sigrún Helgadóttir viðskiptamógúll og listakokkur varð 35 ára og fær hún innilegar hamingjuóskir frá okkur Eddu. Má hún eiga von á sérlegum sendiboða á næstu dögum sem mun koma gjöf þeirra skötuhjúa til skila. Hitt afmælisbarnið er Sveinn Fannar Sveinsson (eða Sveinn annar eins og hann er stundum kallaður) sem er sonur Svenna bróður hennar Eddu. Hann er mikill Batman aðdáandi og hraustmenni. Þarf maður oft að hafa sig allan við þegar hann ræðst til atlögu eins og mesta hasarmyndahetja. Hann bauð til afmælisveislu í gær og fær sérlegar þakkir fyrir.
19. október er Elnudagur eins og að ofan má sjá og fær hún aftur hamingjuóskir Ljós-Gíslans

Við Edda...
...erum á leið í opinbera heimsókn til Danmerkur á miðvikudagsmorgunn. Verðum lent í Danmörku fyrir hádegi og ætlum að eyða tveimur dögum í Köben. Síðan er ferðinni heitið til Odense á fimmtudagskvöldið þar sem Herra Hannes Golli Ozon mun taka á móti okkur með rýrar birgðir af Þýskalandsbjór. Síðan er planið að halda upp á samtals 100 ára afmæli vinkvennanna Eddu, Helgu, Elnu og Áslaugar en þær eiga afmæli 10. nóvember, 20. mars, 18. október og 7. október (í þessari röð). Planið er alla vega að sjá sem mest á sem minnstum tíma og eyða sem minnstum peningi í sem mest. Veit ekki hvernig það tekst hjá okkur en við látum reyna á það.

Þýskaland - Ísland
Landsliðið í knattspyrnu getur verið stolt af frammistöðu sinni í undankeppni Evrópumótsins í knattspyrnu. Þeir áttu ágætis leik á móti Þjóðverjum í dag og lokastaðan 3:0 gaf ekki rétta mynd af gangi leiksins. Þjóðverðar voru reyndar töluvert betri að mínu mati en hver veit hvað hefði gerst ef markið hans Hermanns hefði ekki verið dæmt af. Málið er bara það að við misstum af lestinni þegar við klúðruðum leikjunum á móti Skotum. Við hefðum reyndar getað reddað okkur með því að vinna Þjóðverjana hérna heima í september eins og við áttum skilið. En það varð ekki og við verðum bara að halda ótrauðir áfram og klára bara næstu undankeppni og komast á HM eftir 3 ár í Þýskalandi.

Gærkvöldið...
...var ágætt. Ég, Árni og Halli grilluðum alveg rosalega meyrar og fínar lambalærisneiðar, marineraðar í sojasósu og Lamb Islandia kryddi - ekta gott. Halli fær 3 bolta í skeytin fyrir marineringuna og kjötborðið í Nóatúni fær 4 bolta í stöng og inn fyrir úrvalskjöt. Kvöldið endaði síðan í mikilli gleði og drykkju í miðbæ Reykjavíkur. Við Árni tórðum til morguns á 22 aðra helgina í röð og nú verð ég að taka því rólega í kvöld til að ná heilsu. Ætli maður leggist ekki bara í ræmu og Gísla Martein eftir að hafa sporðrennt svínakjöti í súrsætri sósu og hrísgrjónum sem ég er að fara að elda um leið og ég hef lokið við að blogga.

Matsölustaðir - góðir og slæmir!!
Um síðustu helgi fengum við Edda okkur dýrindis thailenskan mat frá Thai Matstofunni. Ekki nóg með að þetta væri snilldarlega gott á bragðið heldur var þetta líka tiltölulega ódýrt og vel útilátið. Staðurinn fær því 3 bolta - einn í skeytin, annan í slánna, þann þriðja í stöngina og svo einn rúllubolta í mitt markið.
Hinn staðurinn er mexíkanska skítabúllan Culiacan. Þetta er nú snyrtilegur staður en maturinn þarna var nánast óætur. Ég minnist þess að Viðar, sem þykist nú hafa vit á mexíkönskum mat, fór lofsamlegum orðum um þennan stað. Tvennt kemur til greina: 1) Maturinn hefur versnað til muna á þessum stutta tíma sem hefur liðið á milli skrifa okkar tveggja eða 2) Ég mun aldrei fara með Viðari inn á mexíkanskan veitingastað sem hann mælir með. A.m.k. fær Culiacan ekki einu sinni almennileg færi til að skora. Bara örfáa lélega stungubolta á feitan framherja.

Boltinn
Rio litli kútur er nú meiri vitleysingurinn. Ég get nú reyndar ekki skilið allt fjölmiðlafárið í kringum þetta, sérstaklega gagnrýni enskra blaða á landsliðsmenn Englands sem stóðu með sínum manni. Maður hefði nú haldið að það þætti jákvætt að liðið stæði saman og við bakið á hvorum öðrum. Maður hefði nú haldið að það bæri góðum liðsanda fagurt vitni. Ég held að England tapi fyrir Tyrkjum, Ísland tapar 3-1 fyrir Þjóðverjum en Litháar vinna Skota 1-2 í Skotlandi.

Jahá!!
Bloggið mitt er greinilega lesið af fleirum en ég hélt, a.m.k. hef ég fengið töluverð viðbrögð við skrifum mínum um Heimdallarkosningarnar og þá sérstaklega frá stuðningsmönnum Deiglunnar sem telja mig svarinn óvin sinn. Menn virðast halda að ég sé einhver stuðningsmaður Hugsjóna en það er öðru nær.
Reyndar beindust spjót mín kannski ívið meira að þeim Deiglumönnum en það er nú fyrst og fremst vegna þess að ég er ekki sammála þeim í ýmsum grundvallaratriðum - skoðanabræður mínir hafa kannski fyrst og fremst verið á hinum væng Heimdallar. Það þýðir þó ekki að mér sé eitthvað persónulega illa við Deiglumenn - langt í frá - enda á ég þar fjölmarga gamla félaga t.d. Tomma, Ingunni, Ásdísi, Arnar Þór, Eðvarð og Soffíu svo einhverjir séu nefndir. Mér finnst ekkert skárra að Hugsjónamenn nýskrái fólk í Heimdall rétt fyrir kosningar, svo ég tali nú ekki um ef það kemur upp úr dúrnum að þeir hafi misbeitt valdi sínu.
Ég get nú reyndar viðurkennt það fyrir lesendum mínum að ég var sjálfur skráður í Heimdall undir svipuðum kringumstæðum fyrir 4 árum síðan til að kjósa Sigurð Kára Kristjánsson formann S.u.s. Ég var nú svo heppinn að kosningarnar drógust á langinn þá og til að missa ekki af Herjólfi sleppti ég kosningunni (missti reyndar samt af Herjólfi en það er önnur saga). Málið er bara það að hvort sem það er leyfilegt eða ekki þá finnst mér ekki lýðræðislegt að vinna kosningarnar á nýjum félögum - hvort sem það eru skoðanabræður mínir sem gera það eða hinir. Það er ekkert gaman að vinna með svindli og enn leiðinlegra að tapa vegna þess. Leiðinlegast er þó að tapa þrátt fyrir að hafa svindlað því þá situr maður bæði uppi með samviskubitið og svekkelsið yfir að tapa.
Ég er því raunverulega að segja hér að hvorug fylkingin mun framar fá atkvæði mitt. Munurinn á fylkingunum er hins vegar sá að af því litla sem ég hef séð frá hvoru framboði fyrir sig þá líst mér betur á skoðanir Hugsjónamanna. Ég veit hins vegar alveg að þeir hafa oft leikið þann leik sjálfir að nýskrá félaga og því eru þeir ekkert skárri en Deiglumenn nema kannski að því leyti að þeir eru ekki eins "góðir" að veiða nýja félagsmenn. Bottom-line: Hvorugt framboðið er boðlegt til að leiða Heimdall sem á að vera félag lýðræðissinnaðra hægri manna í höfuðborginni.
Deiglumenn hafa reynt að verja sig með þeirri fáránlegu röksemd að löglegt sé að skrá sig í félagið x dögum fyrir kosningar. Þetta snýst bara ekkert um lög og reglur. Málið snýst um ákveðið siðferði og hvorugt framboðið hefur það. Þau hafa látið hvort annað draga sig niður á plan sem í besta falli hefur þekkst í sósíalískum félagskap í gegnum tíðina. Lifið heil - helst ekki í Heimdalli.

Grátandi Liverpoolmenn...
...hafa kvartað undan orðalaginu að Arsenal hafi gernað Liverpool á laugardaginn. Vilja þeir meina að Liverpool hafi verið betri aðilinn í leiknum en Arsenal klárað færin betur. Það er eins gott að lesendur þessarar síðu sætti sig við það strax að Liverpool er ekki cool hér og mun aldrei verða sagt neitt fallegt um þá undir geislanum. Ef þið viljið lesa eitthvað fallegt um Liverpool er líklega auðveldast fyrir ykkur að skoða Liverpool-síðuna eða starta seivi í CM4 og reyna að gera eitthvað í málunum. Húlli hangir á bláþræði!!
Talandi um poolara þá var einn leikmanna Liverpool skotinn í rassinn á næturklúbbi um helgina - ætli hann hafi boðið Arsenalmanni að klára það sem þeir byrjuðu á á laugardaginn?

Hróður hafursskeggsins...
...hefur borist víða og nú síðast hef ég fengið fyrirspurnir frá Berkley um þetta. Kannski maður fari að koma myndum af þessu á netið fyrir forvitna. Mun skeggið fá að tolla þar til Danmerkurferðinni er lokið að minnsta kosti. Ég verð nú að líta illa út fyrir eitthvað við hliðina á öllum þessum poolurum svo þeir fari ekki að gráta.

Íslenska idolið
Hef nú séð alla þættina og finnst þetta bara skratti skemmtilegt sjónvarpsefni. Gaman að sjá fólk gera sig að fíflum í sjónvarpinu. Mæli með þessu fyrir alla sem hafa gaman að því. Annars finnst mér merkilegt hvað það eru fáir strákar sem hafa komist áfram því nú eru strákar í miklum meirihluta í söngvarahlutverki vinsælla hljómsveita að því er virðist. Það er helst Birgitta og Íris í ber sem halda uppi hróðri stúlknanna. Það þýðir reyndar ekki að þetta lið geti allt saman sungið. Það var nú samt einn þarna sjóari frá Grundarfirði sem ég held að nái langt. Ólyginn sagði að hann hefði einu sinni verið í Jet Black Joe en aldrei fengið að syngja. Sel það ekki dýrara en ég keypti það en ég held alla vega með honum miðað við það sem ég hef séð. Maður má ekki láta kvenþjóðina stela senunni.

Þingmenn
Ég get ekki betur séð en það sé stefna á Alþingi að vera vondur við nýja þingmenn. Alla vega sást í einu blaðanna um helgina að Birgir Ármannsson er látinn sitja á milli Kolbrúnar Halldórsdóttur og Jóhönnu Sigurðardóttur - hve illt er það? Maðurinn deyr örugglega úr leiðindum. Sextug lessa og púrítani - eru það nú sessunautar!!

Viðbrögð
Menn hafa sýnt viðbrögð við úrhellinu frá Geislanum í gær. Menn eru ánægðir að ég skrifa um annað en fótbolta en því miður er það nú svoleiðis að mér finnst fátt annað merkilegt gerast þessa daganna. Ég ætla því að halda áfram venju minni og tjá mig um leiki dagsins.

liverpool-ARSENAL
Mikið held ég að það sé erfitt að halda með þessu liði. Þeir geta bara ekki rassgat og ég held að Húlli verði fokinn fyrir áramót með þessu áframhaldi. Ég sá reyndar ekki leikinn þar sem ég var að spila fótbolta sjálfur venju samkvæmt en ég las á netinu að þetta hefði bara verið gerning í seinni hálfleik. Fyrir fáfróða skal tekið fram að orðiði gerning er nafnorð sem lýsir þeim verknaði þegar mönnum er rúllað upp í knattspyrnuleik. Mun þetta dregið af orðatiltæki óheflaðra manna er lýsa því hvernig brotið er á rétti endaþarms þess sem er gernaður. Einnig er til sögnin að gerna, dæmi: Liverpool var gernað af Arsenal árdegis.

Mínir menn
Mér fannst mínir menn skila sínu í dag en það var svo sem ekkert aukalega. Scholes og Fletcher áttu góðan leik og Silvestre var traustur í vörninni. Þeir spiluðu reyndar rúman helming leiksins einum fleiri eftir að markmanni Birmingham var vikið af leikvelli fyrir að bregða Scholes innan teigs. Sem aftasti maður á hann skv. reglum að fá rautt en mér finnst nú alltaf helvíti hart að dæma bæði víti og reka markmannin út af. Þetta var þó samkvæmt bókinni og ekkert hægt að segja við því. Rúðan virðist komin með vítakjarkinn aftur og Scholes er allur að koma til eftir meiðslin. Ég hef nú heldur ekki miklar áhyggjur af Beckham-leysinu eftir að hafa séð þennan Fletcher í leikjum upp á síðkastið. Hann verður fullgildur staðgengill stúlkunnar með hanakambinn. Annars er gaman að sjá hvað hún stendur sig vel hjá Real og ég held raunar að enginn hafi búist við því að hún fyndi sig svona vel svona fljótt. Alltaf gaman þegar gamlir MUFCarar standa sig annars staðar - bara ekki þegar það er á móti United.

Í gærkvöldi...
...komu hér bekkjarfélagar mínir til lítils teitis í tilefni af íbúðarkaupum okkar Eddu. Það var nú reyndar mun fámennara en ég bjóst við en það er svo sem ekki slæmt í ljósi stærðar íbúðarinnar. Við fórum síðan níu saman í bæinn en fljótlega fór að þynnast hópurinn og á endanum vorum það bara við Árni Grímur og Sunna sem vorum eftir. Gamanið barst um Kaffibarinn, Pravda og að lokum enduðum við á 22 og húktum þar til tæplega 6 en þá gáfumst við Sunna upp og fórum heim. Árninn ætlaði að klára bjórinn en líklega hefur hann hellt einhverju meira í sig því hann var hvergi sjáanlegur í boltanum í morgunn. Kvöldið var skemmtilegt og þakka ég kærlega fyrir þær gjafir sem við fengum.

Greyið hann Bolli litli!
Merkilegt þetta Heimdallarvæl. Ég var að vona að loksins kæmu þarna menn sem ekki kunna að væla en það er víst útséð með það að nokkur maður kunni að taka ósigri. Þannig hefur það tíðkast í félagsskap ungra sjálfstæðismanna víða á landinu að vinna kosningar með atkvæðum manna sem gengið hafa í félagsskapinn rétt áður en kosningin fer fram, m.a.s. stundum samdægurs. Hvernig getur það verið svindl að meina mönnum slíkt? Ég á voðalega bágt með að trúa því að 1300 manns hafi allt í einu ákveðið að ganga í Heimdall af því að þeir töldu Bolla litla framtíð íslenskrar pólítíkur og vildu leggja sitt af mörkum til að hann væri kosinn. Síðan vælir þetta lið út um allt á bloggsíðum og óopinberum síðum framboða sinna yfir öllu þessu óréttlæti. Eina óréttlætið í þessu væri það að formaður félagsins væri ekki kosin af virkum félögum. Það er t.d. ástæða þess að ég kæri mig yfirleitt ekkert um að taka þátt í þessum skrípaleik. Ég verð reyndar að viðurkenna að ég hafði hug að kjósa Hafstein Þór Hauksson félaga minn til formanns S.u.s. nú í haust en mér var ekkert vel við það (þrátt fyrir að ég viti að hann er starfinu vaxnari en nokkur annar) einfaldlega vegna þess að ég hafði ekki kynnt mér hvaða málefnaumræða hefur átt sér stað síðastliðin misseri. Örlögin höguðu því þannig að ég komst ekki í Borgarnes og gat því ekki kosið.
Nú er Deiglan, en svo nefnist hin sári minnihluti í Heimdalli, farinn að hljóma eins og samsullsvælukjóarnir. Allt er ólýðræðislegt og ömurlegt, stjórnin sýnir valdníðslu og ég veit ekki hvað. Málið er bara að það er mjög einfalt að leysa þetta vandamál. Enginn ætti að hafa kosningarétt á slíkum aðalfundum nema fullgildir félagar og það væri hægt að tryggja meðal annars með því að heimta félagsgjald af hverjum og einum sem kærir sig um að kjósa og jafnvel krefjast þess að menn hafi verið félagar í hálft ár til að hafa kosningarétt og jafnvel a.m.k. eitt til að teljast kjörgengir. Nú spyr ég ykkur sem sækist eftir frama í stjórnmálum og þá beini ég spurnum mínum sérstaklega til framboðanna tveggja: "Teljið þið í alvöru að einhver vilji kjósa fólk sem vitað er að hefur rangt við í kosningum í einhverju stuttbuxnafélagi?"
Sem tiltölulega hlutlausum aðila finnst mér grátlega augljóst að hvorugum frambjóðandanum er umhugað að koma stefnumálum sínum á framfæri því ég hef skoðað bæði Deigluna og Hugsjónir og finnst þetta nú fremur þunnar framboðssíður með litlu bitastæðu um stefnumál og áherslur. Meiri hluti dugnaðar þeirra og metnaðar hefur líklega farið í það að safna nýjum félögum sem engan áhuga hafa á raunverulegum niðurstöðum kosninganna, þeir eru bara að kjósa af því Gunna frænka bað um það, eða sæti strákurinn sem leikur í öllum Verslóleikritunum sagði þeim að gera það.
Vakniði nú og hættið þessu helvítis væli. Vinnið kosningarnar á sanngjarnan hátt með því að drífa með ykkur þá sem raunverulega skipta máli í þessu samhengi, gamla og trygga félagsmenn í Heimdalli sem vinna að félagsstarfinu allt árið. Að öðrum kosti eruð þið ekki formenn Heimdalls heldur bekkjarráðsformenn allra bekkjanna í menntaskólanum sem þið höfðuð tögl og hagldir í. Þessi skrípaleikur verður til þess að ég mun aldrei kjósa í Heimdallarkosningu framar fremur en hingað til og mun líklega fara fram á að vera tekinn af félagalistanum þar.
Hættur, farinn, nenni ekki að vera með í svona asnalegu stuttbuxnafélagi.

Já, og eitt enn! Bullið með að Deiglan hafi ekki haft aðgang að félagatalinu er eftir því sem ég fæ séð alger steypa því ég fékk frá þeim símtal og það var tiltölulega augljóst að þeir vissu að ég var skráður félagi í Heimdalli. Ætli þeir hafi komist að því með því að spá í Bolla?

Apasagan!
Þessi fræga saga er mikið notuð af þeim sem tapa í kosningum til að benda á þá augljósu staðreynd (að þeirra eigin mati) að einu einstaklingarnir sem raunverulega vissu hvað þeir voru að kjósa voru þeir sem kusu þá. (lesist aftur og aftur eftir þörfum þar til fullur skilningur næst). Málið er hins vegar það að þeir sem nota þessa sögu fatta ekki að þessa sögu er hægt að heimfæra á næstum öll félagasamtök og þrýstihópa þannig að hún á í rauninni við um þá sjálfa líka. Gott dæmi eru heimasíður fólks sem eru vinir þeirra sem standa í eldlínu þessarar stuttbuxnapólitíkur og halda því með þeim. Guð minn almáttugur - þar eru sko komnir mestu aparnir (ætli ég sé ekki bara einn þeirra). Það er því ljóst að mestu aparnir eru þeir sem ekki sjá að lausnin á vandamálinu er tungumálið. Við höfum háþróaðri samskiptatækni en apar. Þetta þekkist t.d. úr læknavísindunum þar sem meginhluti 20. aldarinnar fór í að hnekkja því sem menn héldu að væri góð læknisfræði með því að sanna hið gagnstæða í rannsóknum. Á sama hátt ætti Bolli greyið að geta sannfært hina hundtryggu hugsjónakjósendur um að hann sé hinn raunverulegi valkostur með því að hrífa fólkið með sér á fundinum. Þar geri ég ráð fyrir að hann hefði haft tækifæri til að halda framboðsræðu og skyggja þannig á mótframbjóðanda sinn með rökum, framkomu og sjálfsöryggi. En honum finnst betra að svindla bara og hann verður að eiga það við sjálfan sig og sína samvisku. En þegar slíkt tekst ekki verður eina ráðið oft það að hrópa háum rómi: "Svindl! Svindl! Mér er meinað að svindla. Þvílík ósvífni." Sannast þá hið fornkveðna að oft bylur hæst í tómri tunnu.

Deiglan
Eftir því sem ég kemst næst er uppistaðan í Deiglunni fólk sem hefur reynt fyrir sér í Vökuframboðum í Háskólanum. Nú hef ég verið lengur en flestir aðrir í HÍ þar sem ég var að hefja mitt sjötta ár við þá ágætu stofnun. Ég hef því séð fjögur framboð frá Vöku (þeir komu ekki til okkar í fyrra af því að við vorum ekki nógu mörg til að það borgaði sig) og öll hafa þau verið brjóstumkennanleg. Ég er nú þekktur fyrir að vera mikill hægrimaður en aldrei hefur þessu svokallaða hægri sinnaða stúdentafélagi tekist að sannfæra mig um eigið ágæti. Yfirleitt var þetta fólk illa undirbúið, illa að sér um sögu Háskólans (og því vandamál hans) og yfirleitt um hvað það var að hella sér út í. Stefnumálin voru þau sömu og hjá Röskvu - þau vildu bara gera það öðruvísi. Það heitir að vera framsóknarmaður. Þetta hefur orðið til þess að tvisvar hef ég kosið Vöku (í bæði skiptin af meðaumkun) en þrisvar skilað auðu. Framsóknarmenn hafa seinni árin flykkst í skurðgoðadýrkunarfélagið Samfylkinguna og búið til skólpræsi. Nú virðast þessir framsóknarmenn hins vegar vera orðnir þreyttir á innihaldslausum loforðum holræsadrottningarinnar og sjá að eina leiðin til að koma Davíð frá völdum er að brjóta hann niður innanfrá með því að ala upp ungliðahreyfingu vinstrivælukjóa í Sjálfstæðisflokknum. Það er ekki nóg að halda að maður sé hægri maður - maður þarf líka að vera það.

Skandall!!!
Mínir menn voru heppnir að tapa ekki stærra í viðureign sinni við Stuttgarðsmenn í gær. Ekki nóg með að eina mark þeirra kæmi úr vægast sagt vafasamri vítaspyrnu heldur varði Tim Howard markvörður United oft á tíðum vel, m.a. vítaspyrnu undir lok leiksins. Það sem var verst í leiknum í gær var hvað vörnin var slök og það er helvíti slappt að halda hreinu marki í fimm vikur og fá svo á sig þrjú gefins mörk í tveimur leikjum. Reyndar verð ég að segja það Stutturunum til hróss að þetta voru klínískar kláranir (clinical finishing) í báðum tilfellum og m.a.s. vítaspyrnan var nokkuð góð, markvarslan var bara betri. Nú lítur út fyrir það að við verðum að ná jafntefli í Skotlandi gegn Rangers og vinna heima gegn bæði Stuttgart og Rangers til að vera öruggir áfram. Það eru þó góðar líkur á því að United taki þess leiki og kannski útileikinn gegn Panathinaikos. Sjáum til.
Af öðrum leikjum kom það mér mest á óvart að Che₤$ky skyldi tapa fyrir Besiktas. Sá fyrri hálfleikinn og fannst þeir betri aðilinn framan af en skyndisóknirnar hjá Tyrkjunum voru stórhættulegar enda skoruðu þeir seinna markið úr einni slíkri og fyrra markið var nú bara snilldarlega útfærð aukaspyrna + lélegur varnarleikur.

Jæja!!!
Þá er enn ein snilldarhelgin á enda. Föstudagskvöldið var reyndar ekki æðislegt þar sem ég sat yfir eiturefnafræði vegna prófs sem ég síðan fór í á laugardagsmorguninn. Prófið gekk fínt og strax á eftir fór ég í laugardagsboltann. Mæting var slök en slapp þó og boltinn var ágætur. Á eftir var svo farið á Nesbalann að hjálpa Svenna mág að flytja en hann er loksins eftir 2ja mánaða framkvæmdir búinn að gera nýja húsið sitt íbúðarhæft. Þetta var fljótgert og gistu þau í fyrsta skipti í fína húsinu í gær. Ég óska þeim að sjálfsögðu til hamingju með nýja húsið.
Um kvöldið fórum við síðan til Helgu og Sverris þar sem við elduðum saman nauta entre cote piparsteik með bökuðum kartöflubátum og salati. Þessu var síðan rennt niður með 1999 árgerð af Konunga Hill rauðvíni sem er alveg sérdeilis gott. Júlía hélt fyrir okkur margar áhugaverðar ræður við matarborðið og sagði margt sem eflaust væri mjög skemmtilegt ef maður skildi orð af því sem hún segir. Kvöldstundin fær hæglega 5 bolta í skeytin og inn. Á leiðinni heim fékk ég síðan afar harðort símtal þar sem ég var hvattur til að mæta í bekkjarpartý sem enn stóð í blóma þrátt fyrir að klukkan væri hlaupin dágóðan hálftíma fram yfir miðja nótt. Ég gat að sjálfsögðu ekki hunsað þessa áskorun og úr varð að ég notaði leigubílinn til að komast í Safamýrina þar sem ónefndur bekkjarfélagi minn hafði sundrað teitinni með yfirlýsingum, punghittandi olnbogaskotum og með því að ganga í skrokk á lítilli stúlku sem síðan hafði hann undir og fíflaði hann. Þetta var að sjálfsögðu allt í gamni en stuðið var engu að síður rafmagnað enda entist teitin til að verða fjögur árdegis.
Ég vaknaði því fremur slakur í morgunn og fór beint í Hannesarboltann. Á eftir matreiddi undirritaður amrískar pönnukökur með sýrópi og ís sem runnu ljúflega niður en þegar þær höfðu runnið dágóða stund var kominn tími á að fylla í tómarúmið með fajitas a la Gilli með nautakjöti. Nú liggjum við hér á meltunni, matargestirnir Ingvar og Magga mágkona farnir og bitur veruleiki mánudagsmorgunsins blasir við. Ég ætla að takast á við hann með að því að skrópa og lesa frekar því á morgunn eru ekki margir skemmtilegir fyrirlestrar.

Boltinn
Unitedmaskínan er að hrökkva í gang því Leicester var tekið í gegn á sannfærandi hátt. Rúðan er líka hrokkin í gang og er að sjálfsögðu búinn að taka forystu í keppninni um markheppnasta mann Bretlandseyja. Ánægður með þetta og vona að þeir séu nú loksins komnir á beinu brautinni.

Maggi nafni...
...á afmæli í dag. Ég held að hann sé 26 ára í dag en hann lítur ekki út fyrir að vera nema í mesta lagi fertugur. Til hamingju Maggi minn. Þú ert fallegsti Hannesinn fyrir utan Óla sem að sjálfsögðu fallegasti maður í heimi.

Ísland í dag í gær...
...var fyrir margra hluta sakir skemmtilegt/áhugvert. Fyrst ber að nefna komu þeirra Lúða Bergvinssonar og Birgis Ármannssonar en þeir ræddu um hræðilegt hlutskipti þeirra sem verða gjaldþrota og hversu hrikalegt er fyrir þessa menn að lifa lífinu fyrst eftir gjaldþrotið. Þeir félagar vildu liðka reglurnar svo þessum einstaklingum væri gert auðveldara fyrir að koma undir sig fótunum aftur. Nú er mér ekkert sérlega illa við fólk sem verður gjaldþrota enda hefur fólk sem ég þekki og virði lent í þessari óskemmtilegu lífsreynslu. Á hinn bóginn er ég ákafur talsmaður þess að fólk greiði þær skuldir sem það sekkur sér í og því vil ég alls ekki að reglur séu liðkaðar frekar en ég vil minnka endurgreiðslubyrði námslána. Eins og staðan er í dag greiðir til dæmis hluti námsmanna aldrei öll námslánin sín til baka. Það má hins vegar alltaf ræða í mín eyru hvort réttlætanlegt sé að hafa enga vexti á þeim nema fólk lendi í vanskilum því það er miklu ábyrgari leið til að stuðla að námi í þjóðfélaginu. Ég verð nú reyndar að viðurkenna að ég þekki ekki nákvæmlega hvernig vaxtamálum er háttað á námslánum en ég geri ráð fyrir að þar sem talað er um að vextir á námslánum séu hagstæðir þá séu þeir að minnsta kosti til staðar. Skilaboð mín eru því - fólk á að greiða skuldir sínar og ef það verður gjaldþrota þá að því marki sem það framast getur og halda áfram að gera það eftir að gjaldþrotaskiptum er lokið.
Í öðru lagi var gestur þáttarins hinn ákaflega skemmtilegi Lord Nelson sem er talandi páfagaukur úr Hafnarfirði að ég held. Þessi stórskemmtilegi páfagaukur spjallaði heilmikið við myndavélar heima hjá sér en var furðu spakur í sjónvarpssal og sagði fátt. Best fannst mér þó þegar hann ropaði og sagði "afsakið" í kjölfarið.

Eftirmálar helgarinnar
Í gær voru kærðir nokkrir leikmenn Arsenal og Manchester fyrir ólætin á sunnudaginn og verður gaman að sjá útkomuna úr því máli öllu saman. Ég held að nokkrir leikmanna Arsenal gætu fengið langan dóm en líklega sleppa þó flestir við sektir og eins leiks bann. Það verða líklega helst Vieira, Lauren og Keown sem eiga lengri bönn yfir höfði sér. Gaman verður að fylgjast með þessu.

Bloggarar
Flestir bloggarar eru nú slappir þessa daganna og það er helst að Önni litli skutulsbróðir haldi uppi merki þeirra sem ég heimsæki hvað oftast. Viðar er dauður úr öllum æðum, Inga Huld skrifar á hálfsárs fresti, Heiðar og Fríða hafa kastað fögrum fyrirheitum fyrir róða og hafa aðeins einu sinni sent línu úr ríki Kalla klámhunds, Skutullinn þegir þunnu hljóði og það er helst að maður fái eitthvað fyrir sinn snúð á Hlíðarenda af öllum stöðum. Ef Gunni bloggar einu sinni enn í þessum mánuði verður um að ræða nýtt met hjá honum eftir því sem ég kemst næst. Hleypidómar og Stóridómur koma með einstöku gullkorn en þau eru alltof sjaldgæf.

Nýir hlekkir
Hef bætt inn hlekkjum á Heiðar og Fríðu á blogglínunni en svo koma hlekkir á Ólaf Kára Kristjánsson (Elínarson) og Erlu Hlín Guðmundsdóttur(Rögnudóttir) aðeins neðar.

Enn væla Arsenalmenn
Er ekki í lagi með þennan Wenger aumingja. Hann heldur því fram að Vieira hefði ekki átt að fá gult vegna þess að Nistelrooy byrjaði. Ég skal, eftir að hafa séð þetta aftur, viðurkenna að hann fór fremur harkalega í þennan skallabolta þarna á undan en hefði Vieira farið í boltann í staðinn fyrir að hugsa um að halda Ruud frá með því að standa kyrr og beygja sig hefði þetta líklega orðið venjulegt skallaeinvígi. Auk þess sem Ruud fékk gult spjald fyrir viðureignina. Málið er hins vegar það að Vieira var heppinn að sleppa með bara gult fyrir þetta væskilslega hefnispark og það skiptir engu máli hvort hann hitti eða ekki, það á að gefa mönnum rautt fyrir svona. En Arsenalmenn höfðu ekki sagt sitt síðasta orð því eftir að vítaspyrnan var dæmd í lokin slepptu þeir alveg virðingunni og skitu á sig. Ég skal verða fyrsti maðurinn til að viðurkenna að þetta var fremur harður dómur en reyndar sér maður þetta ekki frá eins góðu sjónarhorni og Bennett dómari. Engu að síður fannst mér mjög hart að dæma vítaspyrnu miðað við myndirnar. Arsenalmenn, bæði leikmenn og áhangendur ættu hins vegar að skammast sín fyrir framkomu nokkurra leikmanna í lok leiksins og er ég þar fyrst og fremst að tala um leikmenn eins og Keown, Lauren, Parlour og Cole sem gerðu allt sem þeir gátu til að æsa Nistelrooy upp því þeir vissu að hann þyrfti bara eitt lítið gult spjald og þá fengi hann rautt.

Arsenalmenn hafa sl. ár talað um að þeir séu lagðir í einelti af ensku pressunni og enska knattspyrnusambandinu, jafnvel almannarómi. Í gær sáum við hvers vegna.

Aðrir virðast vera sammála um það að ekki aðeins séu þeir grófasta liðið í deildinni heldur líka mestu dómaravælukjóarnir. Það eru yfirleitt 2-3 leikmenn Arsenal komnir í kringum dómarann um leið og hann flautar til að heimta spjald á þann brotlega og eru Vieira vælukjói og Ashley Cole yfirleitt fremstir í flokki en Ljungberg, Pires og Henry eru duglegir líka auk Keown. Vona bara að myndbandsnefnd knattspyrnusambandsins setji alla þessa aumingja í bann því þeir eiga það skilið.

En hvað leikinn snertir þá fannst mér þetta nokkuð sanngjörn úrslit. Hvorugt liðið spilaði almennilegan fótbolta, voru bæði hrædd við að sækja en þó voru Arsenalmenn slappari enda á útivelli. Ruud átti að klára skallann í fyrri hálfleik og að sjálfsögðu vítið í lokinn en hann virðist vera eitthvað ragur við Lehmann greyið. Málið er hins vegar það að Arsenal er ekki að byrja vel í ár og allir vita að endaspretturinn er yfirleitt slakur hjá þeim (nema kannski vorið 2002). Mínir menn hafa hins vegar yfirleitt ekki komist í gang fyrr en eftir áramót. Ég held því að baráttan í ár muni standa á milli United, Chelsea og kannski Arsenal ef þeim tekst að halda sér inni á vellinum. Ég held að ef mínir menn komast ekki í rosagír næsta mánuðinn þá muni Chelsea hirða titilinn.

Skólinn...
...er helvíti fínn þessa dagana. Ég er bara að koma mér á óvart með því að mæta og held mér meira að segja vakandi í sumum fyrirlestrum en eins og ég hef líklega áður sagt hér á síðunni er ég ekkert sérstaklega hrifinn af fyrirlestrum sem kennsluformi. Það er verst hvað það er ófyrirsegjanlegt hverjir halda góða fyrirlestra og hverjir vonda.

Ælupest dauðans
Er óðum að jafna mig eftir ógeðslegasta sólarhring í lífi mínu. Það byrjaði allt í gærkvöldi með nokkrum kröftugum uppköstum en í kjölfarið fylgdi nótt hinna mörgu klósettferða þar sem strókurinn stóð ýmist upp eða niður og stundum hvoru tveggja í einu. Ég fór a.m.k. 15x á klósettið í nótt. Í morgun var ég nú aðeins farinn að skána og hef verið að skríða saman í dag. Þetta var nú ekki heppilegasti tíminn fyrir slíka útúrdúra því ég á að fara í próf í réttarlæknisfræði á morgunn og hef eiginlega ekkert getað lesið sl. sólarhrings en ég ætla nú að reyna að bjarga málunum í kvöld. Nú er ég reyndar dottinn í Idol-þáttinn á stöð 2. Ætli ég reyni ekki að drulla mér í lestur snöggvast. Heyrumst

Ahh!
Gleymdi næstum bíódómi vikunnar.

Phone Booth
Símaklefinn er ágætisafþreying sem skartar þremur góðum leikurum. Fyrstan skal nefna Colin Farrell sem hefur skotist upp á stjörnuhimininn síðustu misseri. Hann skilar hlutverki sínu ágætlega sem súkkulaðismjaðrarinn. Forrest Whitaker hefur alltaf verið í miklu uppáhaldi hjá mér og ég skil ekki af hverju þessi maður fær ekki fleiri hlutverk í stórmyndum. Maðurinn sem stelur hins vegar senunni í myndinni er Kiefer Sutherland sem ljáir skyttunni rödd sína. Hann er hreint út sagt frábær í þessu erfiða hlutverki þar sem hann þarf að gefa manni mynd af klikkuðum pata án þess þó að sjást sjálfur. Myndin fær 3 bolta hjá mér, þar af einn í skeytin fyrir frammistöðu Kiefers. Einn stór plús er líka að hún er ekki nema tæpar 90 mínútur þannig að hún er miðrarvikuvæn.

Boltinn
Merkilegt hvað Arsenal er ógeðslega lélegt í Evrópukeppninni. Þrátt fyrir að Inter sé með frábært lið er ótrúlega slakt að fá á sig þrjú mörk á heimavelli gegn þeim án þess að sækja nóg til að skora sjálfur. Ég sá reyndar ekki leikinn þannig að ég get ekki dæmt um það hvort þetta hafi verið sanngjarnar tölur en það er náttúrlega hlálegt fyrir hina yfirlýsingaglöðu Frakka í liðinu að skíttapa svona í keppni hinna bestu sem þeir hafa svo oft sagst geta unnið. Það er ekki nóg að vera bara góður á sinni þúfu og öskra þaðan eins og galin belja. Til að maður taki Arsenal alvarlega sem stórveldi í evrópskri knattspyrnu verða þeir að sýna eitthvað í Evrópu eins og m.a.s. Liverpool hefur gert. Kannski maður sjái líka Chelsea gera góða hluti því þeim tókst að vinna sinn fyrsta útileik í ár og það þýðir að ef þeir klára alla heimaleikina sýna héðan í frá er öruggt að þeir verða í tveimur af efstu sætum riðilsins. Eini sjensinn væri sá að allir leikirnir endi með heimasigrum nema hvað eitt liðið tapaði öllum leikjunum sínum og þá gætu þeir fallið út á markatölu – afar ólíklegt.
Mínir menn byrjuðu hins vegar vel og verð ég að segja að það er gaman að sjá menn eins og Fortune, Silvestre og Djemba skora. Butt á nú alltaf mörk af og til en það er líka gaman þegar hann skorar. Ég var reyndar ekki nógu ánægður með að Nistelrooy komst ekki á blað, ekki það að ég hafi verið ósáttur við frammistöðu hans, heldur var ég að vona að hann tæki markakóngstitilinn í CC aftur í ár eins og í fyrra. Það er nú reyndar nóg eftir af keppninni en menn verða nú helst að skora í hverri umferð ætli þeir að hirða þennan titil.
Það verður líka gaman að sjá hvernig þetta nýja (gamla) fyrirkomulag með 16 liða úrslitin kemur út. Ég hugsa að þetta skili okkur kannski ekki endilega titlinum til bestu liðanna heldur þeirra sem toppa á réttum tíma. United hefur nú alltaf verið sterkt á því sviðinu og því er ég vongóður með áríð í ár en ég held nú að þeir eigi eftir að sakna Verons þegar stóru liðin fara að koma. Vonum bara að Kleberson verði orðinn góður fyrir 16 liða úrslitin og Ronaldo fái smá reynslu þangað til.
Ég var raunar mjög hissa á því að Ferguson skildi ekki nota hann á þriðjudaginn en kannski var hann að spara púðrið fyrir helgina. Það er líka mikilvægt að koma Fletcher aðeins inn í þetta lið enda er þar víst kominn maðurinn sem á að leysa Beckham af á hægri kantinum á næstunni. Hann átti a.m.k. góða innkomu í leiknum og sýndi frábæra takta inn á milli en reyndi kannski fullflókna hluti af og til.

Fyrirlestrar...
...geta verið mjög leiðinlegir og í augnablikinu sit ég í einum slíkum. Það hafa verið mjög fínir fyrirlestrar í morgun en þetta er nú alveg að drepa mig. Kannski maður þrauki og sjái hvort þetta skáni ekki í næsta tíma.

Hafsteinn Þór Hauksson...
...fær sérstakar hamingjuóskir í færslu dagsins þar sem hann var kjörinn formaður SUS um síðustu helgi. Til hamingju Haffi.

Heiðar og Fríða...
...fá hins vegar ósk um lærdómsríka og skemmtilega dvöl í Skíriskógi næsta árið en þau hafa bæði hafið framhaldsnám í Nottingham a.m.k. næsta árið. Þau hafa víst þegar lagt drög að því að fara á leiki í ensku og er það vel. Vonum bara að Brynjar Björn fái flugufrið fyrir hinum íslensku nágrönnum.

Réttir
Þá er maður kominn heim eftir réttirnar þar sem tekið var hressilega á því. Ég lagði af stað á miðvikudagskvöldið og var kominn að Steinsholti undir miðnætti. Ég lagði síðan af stað upp úr hádeginu á fimmtudag á móti fjársafninu og fjallmönnum ríðandi með gutl í pela. Eiríkur Gestsson höfðingi ætlaði með mér en það kom upp úr dúrnum að honum er illa við smá rigningu og rok og sneri hann því við eftir hálfa leið eða svo og náði mér reyndar aldrei. Ætli maður verði ekki að segja honum það til varnar að hann þurfti að ríða töluvert lengri leið en ég en það er nú samt hálf lélegt að klára ekki það sem maður byrjar á. Hann fékk enda að heyra það þegar ég hitti hann á föstudeginum.
Á föstudeginum voru síðan réttirnar sjálfar þar sem dagurinn byrjaði á því að riðið var í réttirnar. Að sjálfsögðu var peli með í för, einn frekar en tveir. Síðan var drukkið og sungið og loks var okkar fé rekið heim að bæ. Síðan fengum við dýrindis kjötsúpu og loks var haldið til réttamjalta sem er nú orðinn árviss viðburður í mínu lífi. Þar var að sjálfsögðu hafður peli meðferðis og gengu mjaltirnar örugglega hraðar fyrir vikið. Loks var klikkt út með frábæru réttaballi í Árnesi þar sem hinir stórskemmtilegu Papar spiluðu fyrir dansi. Þetta er í annað skiptið í röð sem þeir spila og ég get svarið það að þeir eru alltaf að verða betri. Í fyrra voru þeir bestir og því eru þeir líklega bestari í ár. Síðan svaf maður hressilega út í gærmorgun og eftir hádegið komum við hestunum í haustbeitina. Síðan var haldið í bæinn þar sem beið okkar þrítugsafmæli.

Rakel...
...bekkjarsystir mín er þrítug í dag og hélt upp á það í gær. Teitin var haldin í lögreglusalnum í Brautarholti, þ.e. þeim neðri sem ku vera félagsaðstaða lögreglumanna. Þar voru frábærar veitingar og ágætis stemming. Var þreyttur eftir réttastand og skreið heim í bólið um hálftvöleytið. Sofnaði áður en hnakkinn snerti koddann. Til hamingju með daginn Rakel.

Í dag...
...stóð síðan til að ég færi í Borgarnes til að kjósa Hafstein félaga minn til formanns S.u.s. en ég kemst því miður ekki vegna anna og verð ég að vona að það komi Hafsteini ekki í koll. Ég verð alla vega með feitt samviskubit ef hann fær ekki kosningu en síðast þegar ég vissi var ekki um neitt mótframboð að ræða og því líklegt að hann fái örugga kosninu. Gangi þér vel Haffi.

Réttir
Í kvöld eða á morgun legg ég af stað í réttirnar árlegu en það eru Skaftholtsréttir í Gnúpverjahreppi. Við gamli ásamt Eika Gests, Arnóri í Þrándarholti og líklega Silla í Steinsholti ætlum að ríða á móti safninu á morgunn fimmtudag og síðan verða réttirnar sjálfar á föstudaginn með allsherjar gleði um daginn og síðan verður réttaball um kvöldið ef ég þekki liðið rétt. Annars hef ég beilað á réttaböllunum síðustu tvö ár vegna þreytu en ég ætla nú ekki að láta það koma fyrir mig aftur. Á fimmtudagskvöldið ætla síðan Halldór, Arnar og Ýr að koma og stefnan er að þau ríði með okkur í réttirnar. Svo verður að sjálfsögðu kjötsúpa og hangikjöt um kvöldið og traditional réttamjaltir með öllu tilheyrandi.

Um einkalíf stjórnmálamanna
Síðustu daga hefur verið mikil umræða hérlendis um það hvort fréttir af umferðarlagabrotum þingmanna séu fréttaefni. Í fyrsta skipti á minni löngu ævi held ég að ég hafi verið sammála þeim auma manni Gunnari Smára Egilssyni sem taldi þetta vera rof á friðhelgi einkalífs þessara manna. Hann taldi að aðeins væri fréttaefni þegar þessir menn brytu af sér í opinberu starfi og er ég að nokkru leyti sammála því. Mér finnst nú líka að það megi láta það flakka ef menn eru dæmdir til fangelsisvistar fyrir glæpi eins og ófrjálsi frjálslyndi þingmaðurinn. En trúverðugleiki fréttastofu Stöðvar 2 hefur beðið alvarlega hnekki nú þegar þeir hafa á stuttum tíma sent út þessa frétt og slegið annarri frétt á frest vegna þess að það hefði getað skaðað eiganda Stöðvar 2 hefði hún verið send út um leið og hún var tilbúin. Líklega hefur þetta orðið til þess að margir af bestu fréttamönnum stöðvarinnar hafa látið af störfum þar. Maður getur nú fyrirgefið kommastýrða ríkisbákninu við Efstaleiti svona yfirsjónir - þeir vita nú einu sinni ekki betur greyin. Það magnaðasta sem ég hef heyrt í því útvarpi var þegar það hringdi ein miðaldra kona í síðdegisútvarpið og vildi tilnefna Mörð Árnason sem kynþokkafyllsta mann ársins. Ætli hún sé blind og heyrnarlaus?

LEIKURINN
Ótrúlegur leikur hjá strákunum. Þeir voru frábærir. Vörnin var útrúlega solid allan leikinn og mér fannst þeir í raun allir frábærir, t.d. redduðu Ólafur Örn, Hermann hestur og Indriði Sigurðsson allir á síðustu stundu. Ólafur frá Neuville í fyrri hálfleik, Hermann í seinni hálfleik hjá Kuranyi og Indriði átti líka mikilvæga tæklingu á Kuranyi í seinni hálfleik þegar hann meiddist. Jóhannes Karl var með Ballack í vasanum og leyfði honum í raun ekkert nema losa sig við boltann. Aldrei fékk hann tækifæri til að skjóta eða skapa færi að ráði. Þórður var góður á hægri vængnum og Pétur í holunni fyrir aftan vörnina. Heiðar og Eiður (Heiður og Eiðar) voru góðir. Eiður átti lipra spretti og hélt boltanum vel og Heiðar barðist eins og ljón og skammaði síðan Fraulein Kahn á eftir. Þótt ótrúlegt megi virðast var Rúnar sennilega slakasti leikmaður íslenska liðsins og þó átti hann einn af sínum bestu leikjum. Ekki má gleyma Árna Gauti sem varði stórkostlega skalla frá Kahn í fyrri hálfleik. Ég hélt nú að ég yrði ekki eldri þegar Heiðar var tekinn út af því þó hann væri þreyttur þá hlyti hann að vera skárri en Helgi greyið Sigurðsson en meira að segja hann var góður eftir að hann kom inn á og hleypti í raun nýju lífi í sóknarleik Íslendinga. Arnar Grétarsson var í raun jafn ömurlegur og venjulega og ég skil ekki hvað hann er að gera í þessu landsliði. Hann spilar kannski vel í Belgíu en hann hefur aldrei sýnt neitt með landsliðinu. Ég veit eiginlega ekki hver ætti að vera maður leiksins, ætli ég verði ekki bara að velja Ásgeir Sigurvinsson þjálfara sem er búinn að berja saman alvöru fótboltalandslið. Til hamingju með það Íslendingar.

Helgin
Fyrir utan landsleikinn var ég nú ekki duglegur um helgina. Fékk síðan heimsóknir öll kvöldin og át því mikið af nammi og snakki auk ókjaranna allra af Coca-Cola. Auðvitað var kíkt í rauðvín og bjór líka en mér tókst þó ekki að klára nema eina rauðvín og 6 bjóra ásamt þeim sem hingað komu þannig að það var ekki mikil ölvun. Það er nú svo sem ágætt þar sem til stendur að fara í réttir á föstudaginn og mun það hefjast með mótreið á fimmtudaginn og síðan verður sjálfur réttadagurinn með réttaballi og tilheyrandi. Það verður því mikið að gera í vikunni þar sem ég ætla að fara ásamt gamla að kíkja undir hestana (fyrir ykkur sem vitið ekkert um dýr þá er það að athuga hvort skeifurnar séu í lagi og hvort þarf að járna (og fyrir ykkur sem eruð alger fífl þá er það að setja skeifur á hófa hestanna) hestana upp).

S.u.s. þingið
Síðan er SUS þingið um helgina þar sem ég mun að sjálfsögðu mæta til að styðja minn mann þó ég sé nú ekkert sérlega mikill SUSari í mér. Alltént er það líklega lögulegasti kúkurinn í klósetti íslenskrar ungliðapólitíkur. Ég hef líka fulla trú á að Hafsteini félaga mínum takist að rífa SUS upp úr þessari stuttbuxnapólítík sem er lítið skárri en helvítis (afsakið orðbragðið :) ) stúdentapólítíkin. Mér finnst alltaf jafnfyndið að sjá þessa formenn ungliðahreyfinganna koma í sjónvarpið og rífast um hver sé bestur; Holræsa-Solla, Krullu-Dabbi, Skalla-Grímur, Dóri dapri eða Margrét mútudóttir.
Ég vona nú að Hafsteinn sjái sér leik á borði og tali máli þeirrar hægri stefnu sem SUS þykist styðja en verði ekki enn einn krónprinsinn í skálminni hjá Dabba kóngi. Ég held að Á Pétur Blöndal sé enn ein sönnun þess að menn með róttækar skoðanir eiga líka heima í Sjálfstæðisbákninu. Áfram Hafsteinn.

Sælir kæru aðdáendur
Ég hef því miður ekki getað staðið undir væntingum ykkar um skrif á þennan vef sl. daga sökum gífurlegrar fíknar í tölvuleik sem heitir Rise of Nations. Ég hef nú tekið á því vandamáli með því að eyða leiknum út úr tölvunni og mun ekki spila hann framar eða a.m.k. ekki fyrr en ég hef lokið skuldbindingum mínum gagnvart HÍ og öðrum. Ég hef einnig eytt tölvuleikjunum CM4 og Colin McRae 2 út úr tölvunni og bý ný einungis við þann munað að geta spilað Tetris í einhverri millennium útgáfu.

Síðan síðast hef ég lokið vinnu minni á Heilbrigðisstofnun Suðurnesja og skólinn er hafinn að nýju. Ég hef ekki verið duglegur að fara þangað m.a. vegna veikinda en líka vegna þess að fyrirlestrarnir eru leiðinlegir, a.m.k. töluvert leiðinlegri en Rise of Nations. Nú hef ég hins vegar enga afsökun og mun mæta samviskusamlega í næstu viku jafnvel þótt ég hafi enga trú á fyrirlestrum sem kennsluformi.

Ég fór líka að heimsækja rauðhærða prímadonnu í vesturbæinn á sl. mánudag en það er hin stórmyndarlega Erla Hlín Guðmundsdóttir Jörgensen en það er dóttir Rögnu bekkjarsystur minnar og Gumma mannsins hennar fyrir ykkur sem eruð fáfróð um þessa hluti. Í stuttu máli er þarna um þvílíka prinsessu að ræða að annað eins hefur varla sést, rauðhærð og brosmild eins og mamman en svipurinn er að stórum hluta frá pabbanum þó Ragna eigi kannski nebbann. Vonum að það breytist :).
Til hamingju með prinsessuna Ragna og Gummi.

Leikurinn...
...á morgunn er stórt spurningarmerki og ég held að sigur okkar manna velti eingöngu á því hversu vel Eiður nær sér á strik. Ég vona að Ásgeir hafi vit á því að stilla Veigari Páli upp með Eiði frammi og síðan ætti miðjan að vera a.m.k. Þórður og Jóhannes bróðir hans. Í vörninni verður hrossið vonandi en það er ómögulegt að segja hver verður með honum. Vonandi ekki Lárus Orri sem hefur alltaf haft lag á að klúðra svona mikilvægum leikjum fyrir okkur.

En úr því ég er að tala um boltann þá held ég að ég verði aðeins að koma ensku að. Mínir menn byrjuðu ágætlega og kláruðu Bolton heima og Newcastle úti en síðan rétt mörðu þeir Úlfana og töpuðu loks fyrir Southampton þar sem þeir gátu ekki rassgat. Vonandi verður liðið skárra í næstu leikjum en það er svo sem ekkert nýtt að þeir byrji illa. Ég gæti vælt í allt haust yfir meiðslum eins og Arsenal-aðdáendur gerðu í vor en það er ekki háttur okkar United manna. Við bíðum bara vors og sjáum hvað setur.

Jæja
Þetta er búin að vera fín helgi. Á föstudaginn náði ég loks að heimsækja gamla manninn sem varð sextugur á miðvikudaginn. Síðan var farið í heimsókn til Svenna mágs og Kötu konunnar hans í nýja húsið þeirra á Nesbala á Seltjarnarnesi. Á laugardagsmorgunn fékk ég þá fáránlegu hugmynd að fara í þvottahúsið kl. 8 um morguninn (sem ég geri aldrei aftur). Það var síðan fyrsi laugardagsbolti vetrarins í hádeginu þar sem mæting var slæleg en varamenn redduðu málunum. Síðan kom hingað rafvirki að unita ADSLið mitt sem er nú orðið snilld með þráðlausu neti og látum. Strax eftir það fór ég á hestbak með kallinum og um kvöldið var síðan grillað. Á eftir kom Ingólfur ásamt Sverri hingað heim og við horfðum á Pianistann sem ég dæmi hér á eftir.

Der Klavierspieler
Snilld og aftur hrein snilld. Besta mynd sem ég hef séð síðan As Good as it Gets var og hét. Þessi mynd er alveg hrikalega óhugguleg og maður á nú erfitt með að trúa því að Þjóðverjar hafi verið svona rosalega illir. Adrian Brody átti klárlega skilið að fá Óskarinn fyrir þessa frábæru túlkun og Roman Polanski fyrir leikstjórn þrátt fyrir að hann sé dæmdur barnaníðingur. Myndin fær klárlega 5 bolta, alla í skeytin og inn.

Í dag...
...fór ég svo í skírn hjá móðurbróður hennar Eddu en hann var að skíra sitt fjórða barn. Stúlkan litla fékk nafnið Heiðrún Edda í höfuðið á ömmu sinni (þeirri sömu og Edda heitir í höfuðið á) og líklega vínbúðinni í Árbæ þrátt fyrir að foreldrarnir þvertaki fyrir það :). Nú er ég að undirbúa mat fyrir settið en við ætlum að bjóða þeim í kjúlla og franskar a la mama mia.

United...
...voru sterkir í gær þegar þeir tóku Newcastle í kennslustund þrátt fyrir ótrúlegan heimadómara. Þessi Rennie karakter er nú það versta gimp sem ég hef á ævi minni séð dæma. Hann hefur alltaf verið með rosalega heimadómgæslu þegar ég hef séð hann dæma. En við unnum samt og vermum toppsætið ásamt Rómanveldi og frönsku herdeildinni. Arsenal voru suddalega góðir á móti Boro í dag og þeir verða örugglega ofarlega í deildinni í vetur ásamt United, Chelsea og Newcastle. Ég hef ekki trú á Liverpool á meðan franska fyllibyttan er við stjórnvölinn. Ég spái því að United sigri, Arsenal verði stigi á eftir en Chelsea og Newcastle verða í 3-4 sæti u.þ.b. tíu stigum á eftir toppliðunum. Henry verður markahæstur ásamt Crespo en Nistelrooy verður annar. Hann verður hins vegar markahæstur í Meistaradeildinni eins og í fyrra.

Var búinn að skrifa langt blogg en það eyddist. Nú nenni ég ekki meir og er farinn að sofa.

Helgin...
...var fín. Byrjaði með tiltölulega rólegri vakt á föstudaginn en síðan kom ég heim á laugardaginn og horfði á mína menn taka Bolton í litla kennslustund í því hvernig maður á að kaupa unga leikmenn. Nánar að því á eftir. Síðan var tekinn "smá" göngutúr. Við Edda lögðum efst í Stórholtinu þar sem móðursystir hennar á heima og löbbuðum alla leið niður í miðbæ. Þar skoðuðum við meðal annars háskólasalinn í gamla Top Shop húsinu þar sem vinnufélagi Eddu var að syngja í hljómsveit og Króatinn var að segja hvernig vetnisrafall virkaði. Labbaði síðan nokkra hringi í miðbænum og lenti á endanum inni í fornbókabúðinni Gvendi dúllara og keypti mér tvær vel með farnar Laxness-bækur í safnið. Það var endurminningabókin Í túninu heima og ritgerðasafnið Upphaf mannúðarstefnu. Var reyndar svolítið svekktur því mig minnti að ég ætti Kristnihaldið en þegar heim kom sá ég að svo var ekki. Það var nefnilega nánast ósnert eintak af henni þarna sem hefði verið 1200 kallsins virði. Bendi þeim sem hafa áhuga á slíkum bókmenntum að maður getur fengið mjög vel með farin eintök á þriðjungi af því sem þau kosta ný.
En hvað um það. Við héldum síðan heim á leið því til stóð að Þór og Íris og Króatinn kæmu í grill. Við grilluðum snilldarlega borgara að hætti hússins og drukkum svolítið með því. Síðan fór Ingvar í bæinn samferða Þór og Írisi sem voru á heimleið en við Edda töltum á leiguna og leigðum þá úrvalsræmu Gangs of New York. Eitthvað rámar mig í að annað hvort Þorgeir eða Önni hafi verið að kvarta undan byssuleysi í bardögunum en það kemur einmitt fram í myndinni að klíkurnar gerðu með sér samkomulag um að nota slík vopn ekki. Lewis og DiCaprio voru góðir og Diaz var skárri en vanalega. Gef myndinni 3 bolta (sjá að neðan).
Á sunnudaginn var ég síðan rifinn upp kl. 9 til að fara með pabba í bíltúr austur fyrir fjall að sækja hesta og heimsækja vinafólk okkar. Það var ekki það ég vildi ekki fara heldur er ég ekki sérstaklega sprækur morguninn eftir hálfa rauðvín. Ferðin var hin ágætasta og við vorum komin í bæinn í tæka tíð til að sjá Chelsea taka Liverpool á Anfield sem var gaman. Síðan vorum við boðin í mat hjá settinu í gærkvöldi þar sem grillaður var dýrindis svínahnakki. Edda fékk makeover í kaupæti og bara allir sáttir.

Einkunnagjöf
Er að spá í að taka upp mína útgáfu af einkunnagjöf hér á síðunni þar sem gefnar verða einkunnir fyrir allan djöfulinn. Mun kerfið virka þannig að gefnir verða 0-5 boltar fyrir frammistöðu. Kerfið verður kannski þróað frekar síðar.

Manchester United vs. Bolton
Mínir menn voru nú ekki mjög sannfærandi í þessum leik og það verður ekki sagt að 4-0 sigur hafi verið sanngjörn úrslit. 2-0 hefði kannski verið nær lagi. Það var hins vegar undrabarnið Ronaldo sem var fegurð dagsins því leikur United lifnaði allur við þegar hann kom inn á og þó það sé kannski fullmikið sagt að hann hafi átt þátt í mörkunum þá var það nú samt þannig að hann opnaði leikinn fyrir United og skapaði plássið sem þurfti til að skora mörk. Ég held hann verði stjarna en ég sakna samt Verons. Hann er snillingur. Mínir menn fá 3 bolta fyrir góðan endasprett. Ef ekki hefði verið þessi endasprettur og leikurinn hefði endað 1-0 þá hefði ég gefið þeim einn bolta.
NIÐURSTAÐA: 3 boltar.

Jæja!!!
Þá er byrjuð ný vika. Ég á bara þrjár vikur eftir í vinnunni og get ekki beðið eftir að skólinn byrji. Ég er búinn að vinna svolítið stíft síðustu vikurnar og ég er orðinn frekar þreyttur á þessu en maður verður víst að venja sig við þetta því svona tarnir eru það sem koma skal hjá manni.

Samfélagsskjöldurinn
Ánægður með mína menn í gær. Fannst þeir spila vel og voru betra liðið á vellinum. Dómarinn var úti að steikja í gær. Fyrst sleppti hann Ashley Cole með viðvörun fyrir að sparka í Ole Gunnar Solskjær þegar hann hefði átt að gefa honum beint rautt eða að minnsta kosti annað gult spjald. Síðan hætti hann að vera skv. sjálfum sér þegar hann gaf Scholes gult fyrir svipað brot. Síðan fór Phil Neville í þessa ljótu tæklingu sem verðskuldaði nú alveg gult á góðum degi en dómarinn ákvað að sleppa honum við það. Jeffers var hins vegar ekki sáttur og sparkaði í bæði hausinn og lappirnar á Phil og fékk fyrir vikið rauða spjaldið. Örstuttu seinna tók Djemba svolítið vilt skot og það vildi þannig til að skotfóturinn fór í lærið á Sol Campbell. OK kannski var Djemba ekkert að reyna að sleppa við Campbell og það hefði alveg mátt veifa gula spjaldinu á hann en Campbell sparkaði í rassinn á Djemba í staðinn og átti að sjálfsögðu líka að fá rautt. Það er því kannski hægt að segja að þetta hafi jafnast út. Scholes og Neville hefðu getað fengið rautt en Campbell og Cole áttu tvímælalaust að fá rautt. Það hefði verið magnað að sjá 5 rauð í Samfélagsskyldinum sem á nú að heita vináttuleikur.
Annars var ég ánægður með Scholes sem mér fannst besti maður vallarins en það er ekki hægt að horfa fram hjá frammistöðu varnarinnar hjá United sem var frábær í leiknum sem og Keane sem var aftur kominn í gamla formið sitt og pakkaði saman Vieira á miðjunni. Howard varði síðan vel í vítaspyrnukeppninni og stimplaði sig vel inn í liðið.

Sorg!
Fíflið hann Ferguson hefur ákveðið að selja Seba Veron. Hversu mikið fífl getur maðurinn verið. Hann er búinn að selja besta miðjumanninn sinn nokkrum dögum áður en hann spilar fyrsta leikinn á tímabilinu. Það er eiginlega orðið of seint að kaupa nýjan leikmann. Ég hafði enga trú á því að hann seldi Veron úr því að við fengum ekki Ronaldinho en sumir eru greinilega búnir að missa það. Ég vona bara að þeir gangi frá einhverjum alvöru kaupum á næstu vikunni því annars fer titillinn fyrir lítið held ég. Þá er kannski eina vonin okkar að þessi Darren Fletcher brilleri og verði einhver stjarna. Ég mun gráta mig í svefn í kvöld.

Ferðasaga, brúðkaup og fleira skemmtilegt
Nú hef ég ekkert bloggað í rúman hálfan mánuð og þetta gengur ekki lengur. Það sem hefur drifið á daga mína síðan þá er töluvert. Í vikunni eftir síðustu færslu slóst í ég í för með foreldrum mínum, bræðrum og fjölskyldum þeirra í hestaferð um há- og láglendi Suðurlands. Var ek í för þeirri frá þriðjudagseftirmiðdegi og fram á föstudag þegar við héldum til Reykjavíkur á vit ævintýranna. Hestaferðin var yndisleg. Við gistum fyrstu nóttina í Smáratúni í Fljótshlíð sem er svolítið vestan við Hlíðarenda. Daginn eftir riðum við inn að Einhyrningi þar sem er gangamannakofi en fyrir ókunnuga er þetta á vestari bakka Markarfljóts aðeins innan við þar sem Húsadalsskálarnir eru á eystri bakkanum. (Vá þetta var flókið). Daginn eftir riðum við svo í grenjandi rigningu upp með og oft yfir Markarfljót og enduðum um kvöldið í Landmannahelli sem er rétt við Heklu og Dómadalsleið. Það var síðasta nóttin okkar Eddu í ferðinni því við höfðum afráðið að fara föstudaginn 25. júlí í bústað með félögum mínum úr Garðabænum. Þegar allt kom til alls treystum við okkur til að fara það kvöld og höfðum það notalegt í Hólmgarðinum um kvöldið en fórum síðan upp úr hádeginu í bústað sem Skutullinn hafði útvegað á Hvítárvöllum í Borgarfirði þar sem hann og bróðir hans stunda þá miður karlmannlegu iðju að sussa á fiska allan daginn. Við sem vitum hvað karlmennska snýst um kneyfuðum öl og grilluðum ket. Þorgeir og Önundur komu tómhentir heim og Hrefna eldaði handa þeim dýrindis grill. Þorgeir horfði reyndar á ketið grillast en allir viðstaddir vita að Hrefna átti heiðurinn. Síðan var brennt í bæinn á sunnudeginum eftir vel heppnaða ferð. Vikan fór síðan að mestu í vinnu og veikindi því aldrei þessu vant tókst mér að verða veikur á fimmtudaginn. Ég er nú ekki enn búinn að jafna mig en hafði þó heilsu til vinnu á föstudag og hélt síðan mikla teiti um kvöldið þar sem Garðbæingum var boðið að skoða hýbýli okkar Eddu. Eitthvað var mætingin dræm en þar var góðmennt að vanda. Síðan var brúðkaup hjá Möggu og Christian á laugardagskvöldið sem tókst með ágætum og fá þau þúsund hamingjuóskir frá okkur Eddu. Á sunnudaginn löbbuðum við síðan úr Hólmgarðinum í Eskihlíðina til að sækja bílinn og svo var farið í að mála Nesbala 2 þar sem bróðir hennar Eddu hefur nýverið fest sér forláta raðhús. Síðan var tengdó boðið í pasta í gær og í dag á ég síðan vaktina í Keflavík en hún hefur verið fremur róleg framan af. Líklega glæðist þó eitthvað með kvöldinu þegar liðið fer að skríða heim úr útilegunni.

Jæja!
Nú hef ég ekki bloggað í hartnær 20 daga og þessari eilífu þögn verður að ljúka... en ekki núna. Get þó sagt tryggum sörferum að ég hef lokið við innréttingar í Hólmgarðinum og ráðgeri að flytja inn með spúsu minni í dag. Því er öllum sem ég þekki frjálst að hringja eða koma í heimsókn næstu vikurnar að því gefnu að það sé á skynsamlegum tíma sólarhringsins. Ætli maður taki það ekki rólega næstu dagana. Klári að koma sér fyrir og kaupa mat í búið. Sjáum svo til hvernig gengur hjá okkur í sambúðinni. Ég held að það eigi eftir að ganga glimrandi vel.

Fyrsta færslan á nýrri og glæsilegri tölvu
Nú hefur Nonni bróðir fært mér glæsilega tölvu frá landi tækifæranna. Um er að ræða stórglæsilega Toshiba tölvu sem er 2,2 GHz, 512 Mb innra minni, 60 Gb harðan disk, DVD, CD, brennara og ég veit ekki hvað og hvað. Tölvan hefur verið prufukeyrð í dag og til dæmis er hún um það bil 2 mínútur að setja heilan 60 mínútna disk á tölvutækt form en gamla tölvan hefði gert það á svona 60 mínútum eða svo. Síðan er hún svo fallega blá á litinn. Davíð verður ánægður með það.

Helgin...
...var rosaleg en þá var farið í ferð með Herraklúbbnum Hannesi en atburðir ferðarinnar eru að sjálfsögðu algert trúnaðarmál. Það eina sem ég get sagt er að ég held að ferðin hafi þjappað félagsmönnum vel saman. Helgin var alla vega bæði eftirminnileg og skemmtileg.

Heiðar tjóðraður
Æsir hefðu líklega kosið að Fríða væri ásynja þegar tjóðra átti Fenrisúlf því henni hefur tekist það sem austurískum meyjum tókst ekki þrátt fyrir ítrekaðar tilraunir, þ.e. að fá Heiðar á skeljarnar. Fríða er kostakona og sennilega allt of góð fyrir Heiðar kallinn (og þó, hann er nú ágætur). Ég óska þeim að sjálfsögðu til hamingju og vona að þeim vegni vel í Nottingham næsta vetur. Nú er maður næstum kominn með skothelda afsökun til að fara á leik í Englandi á næstunni :)

Uppfærslur
Þau leiðu mistök urðu við uppfærsluna að öðlingurinn Gunnar Thoroddsen missti linkinn sinn. Úr því hefur verið bætt auk þess sem nokkrir skemmtilegir linkar hafa bæst við. Nú er bara að finna út hvernig maður minnkar letrið á póstunum og minnkar breiddina á spássíunni þarna =>

Jæja!
Loksins tókst mér með hjálp góðra manna að laga aðeins síðuna en hún hefur tekið töluverðum breytingum eins og þið sjáið og þarf svolítið viðhald í viðbót en það mun verða gert næstu daga. Læt betur í mér heyra á næstunni.

Blogger drusla!!!

Áfram Ísland!!
Eftir fremur dapurlegan leik á móti Færeyjum tóku strákarnir okkar sig saman í andlitinu og lögðu Litháa sannfærandi í síðustu viku. Eiður var snillingur í leiknum og hélt síðan upp á glæsilega framgöngu sína á Hverfisbarnum á laugardaginn þar sem hann hösslaði konuna sína. Hermann gerði líka heiðarlega tilraun til að myrða markvörð Litháa en sem betur fer tókst honum að forða sér og boltinn endaði í netinu.

Helgin...
...var rosaleg. Hún byrjaði með erilsamri vakt á föstudag og síðan var tekið á því í Sporthúsinu með Golla. Við tókum fjóra skvass leiki og í stuttu máli þá hefðu samanlögð stig mín úr þeim öllum ekki dugað til að sigra tvo leiki: 15:7, 15:10, 15:2 og 15:5. Þess ber að geta að Ingólfur er bæði í betra formi en ég og fyrrverandi landsliðsmaður í spaðaíþrótt en það var samt súrt að tapa fyrir honum. Síðan var tekið á því í tveimur útskriftarveislum á laugardagskvöldið. Fyrst var sótt heim Vala vinkona hennar Eddu sem var að ljúka námi sem leikskólakennari og síðan var Heiðar hinn Austurríski (varist að rugla saman við Heiðu hina svissnesku) að ljúka námi í stjórnmálafræði og hyggst kynna sér stjórnmál í Nottingham næsta vetur. Hefur hann fengið viðurnefnið Hötturinn ellegar Dýrið af augljósum ástæðum. Til hamingju með áfangann krakkar!!!

Halda skaltu hvíldardaginn heilagan
Það gerði ég á háa loftinu hjá settinu þar sem ég fór hamförum í að ryðja út rusli og drasli. Á endanum var farið með fullan sendibíl af drasli í gám. Nú sést í gólfið sumsstaðar á loftinu.

Púff
Mikið rosalega voru strákarnir okkar í fótboltalandsliðinu heppnir á laugardaginn þegar þeir unnu Færeyjar. Þetta lið er náttúrlega algerlega hrunið og það þarf að fá einhvern karlmann til að reisa það úr öskustónni. Það þýðir ekkert að taka blíðu föðurlegu ímyndina á þessa gutta eins og Atli gerði. Það þarf svona "ég sef hjá konunni þinni - aftur" gæja eins og Gauja Þórðar eða Willum Þór til að bíta í nokkur eyru og sparka nokkrum takkaskóm. Annars held ég að þetta íslenska landslið geti orðið mjög gott. Við eigum rosalega efnilega einstaklinga og síðan fullt af ungum strákum sem eru að brillera með sínum liðum eins og t.d. Arnar Þór og Eiður Smári en menn gleyma því stundum að þessir menn eru bara 25 ára. Ég spái því að Ísland nái á HM innan 10 ára.

Liverpool
Nonni bróðir var eitthvað að barma sér yfir útreiðinni sem bítlínurnar frá Liverpool fá á þessari síðu. Ég hef bara eitt að segja um það: Sannleikanum verður hver sárreiðastur.

Helgin var rosaleg
Föstudagur
Hún hófst með erfiðum vinnudegi á föstudag en síðan var brunað í bæinn þar sem beið mín þetta líka svakalega re-union útskriftarárgangsins 1998 úr MR. Við byrjuðum hjá Einari og Jönu sem eru höfðingjar heim að sækja eins og áður. Við drukkum hressilega í Grænuhlíðinni áður en stefnan var sett á lögreglusalinn í Brautarholti þar sem við hittum fyrir gamla árgangsfélaga. Það er skemmst frá því að segja að úr varð hörkustuð og ég hef nú varla skemmt mér svona vel síðan ég var í MR. Við dröttuðumst svo heim eitthvað um kl. 3.
Laugardagur
Við vorum síðan vakin kl. 9 á laugardagsmorgunn til að fara austur í Grafning þar sem pabbi var í "sleppitúr". Við vorum komin að Villingavatni í Grafningi um kl. 12 og þá var riðið alla leið austur í Laugarás. Við Edda settumst í söðulinn skamma stund en sökum rassæris og "þreytu" frá kvöldinu áður, sátum við aðeins í tæpa tvo tíma á baki en sáum síðan um bílana það sem eftir var dags. Um kvöldið var síðan boðið til grillveislu þar sem grillað var svínakjöt og með því borið fram rauðvín, kartöflusalat og hrásalat. Á eftir fékk ég mér síðan Cohiba vindil frá Havana en varð eitthvað illt af honum (eins og reyndar alltaf þegar ég fæ mér vindil) og fór því snemma í háttinn eftir að hafa látið öskrin vaða yfir klósettið.
Sunnudagur
Sunnudagurinn byrjaði um hálftíu. Þá dreif ég mig í sturtu og í sparifötin og síðan rakleiðis í fermingu "fósturbróður" míns úr sveitinni. Gylfi var loksins fermdur en drengurinn sá hefur verið stærri en ég síðan hann var tólf ára. Hann er sem sé uppeldissonur Sigurðar bónda í Steinsholti sem fóstraði mig ein 10 sumur. Fermingin var snilld en þar var borið fram alls kyns brauð með pesto og ostum auk þess sem það var traditional kransakaka og nokkrar hnallþórur. Skemmtileg ferming hjá skemmtilegum strák. Eftir ferminguna var síðan farið á móts við hestafólkið og um kvöldið átum við ljúffengar lambalundir með bökuðum kartöflum og fersku salati. Ég er enn hálfsaddur því ég át á mig gat. Eftir mat var síðan brunað í bæinn því ég átti að vinna morguninn eftir í Kefló.
Mánudagur
Erfið vakt en skemmtileg. Er nú á leiðinni heim í háttinn.

Jæja!
Er ekki kominn tími á Gillann að blogga pínulítið. Það hefur mikið verið að gerast sl. daga. Byrjaði að vinna á fullu sl. mánudag á heilsgæslunni í Keflavík og tók mína fyrstu vakt hér á aðfaranótt miðvikudags. Nú er ég á annarri vaktinni og það lítur út fyrir að maður fái svolítinn frið í kvöld. Aðeins von á einum sjúklingi það ég veit. Ætli maður tjilli ekki bara og fari snemma að sofa. Ég verð að vera upplagður á morgunn þegar ég fer í Bláa lónið með Eddu og systur hennar Möggu ásamt frændsystkinum þeirra tveimur. Annars verð ég að segja að það kom mér á óvart hvað Grindavík er vinalegur bær, miklu stærri en ég átti von á og mikið af fallegum húsum. Svo er aksturinn hérna suður eftir miklu auðveldari en ég átti von á. Maður er innan við 40 mínútur að keyra þetta ef ekki er mikil umferð og löggan lætur mann í friði.

Boltinn
Íslenska landsliðið í handbolta stóð sig vel í gær þegar það valtaði yfir Dani í Austurbergi. Sá reyndar ekki nema síðasta korterið en þá voru strákarnir búnir að klára þetta. Síðan var mæting hér kl. 10 í morgunn og vaktin stendur til kl. 10 í fyrramálið. Ætli maður verði ekki að vona að það verði rólegt í kvöld.
Á miðvikudaginn töpuðum við síðan fyrir Ástinni og verður það að segjast að ég er orðinn leiður á því að keppa í fótbolta. Ég hef ekkert gaman að því að keppa lengur en þeim mun meira gaman af því að spila. Kannski er þetta til komið vegna þess að mér finnst leiðinlegt að tapa en skemmtilegt að vinna. Ég hef bara ekki skapgerðina í þetta. Ekki bætti úr skák að ég var búinn að vera allan daginn á slysadeildinni að láta athuga hvort það væri í lagi með hausinn á mér. Í ljós kom að ég er með eitthvað sem heitir occipital neuralgiu. Það er bólga í skyntaug aftan á hausnum á mér sem þýðir að ég er búinn að vera með hausverk í 3 mánuði og hann er ekkert á förum næstu vikurnar. Albert Páll taugalæknir sem skoðaði mig kippti í einhverja spotta og ég var kominn í deyfingu fyrir fjögur á föstudag þar sem sprautað var í kringum taugina á hnakkanum - djöfull var það sárt. Nú er ég ekki mikið skárri en þó þannig að ég finn ekkert fyrir þessu nema ég hnerri, hósti, rembist eða hlæi. Góðar stundir

Próflestur
Fer í heimilislæknisfræðipróf á morgunn. Er latur að lesa en er samt tæplega hálfnaður með efnið. Maður tekur á þessu í kvöld. Yfirleitt er þetta nú fremur auðvelt próf sem veltur á því að leysa vandamál sem lögð eru fyrir okkur. Síðan er það bara grill og gleði með Birgittu á morgun.

Viðar
Hefur heiðrað landið með nærveru sinni. Kom til landsins í gær og ætlar strax að taka á því í drykkjunni með því að kneyfa öl yfir Evrópusjóninni (Eurovision) annað kvöld. Inga Huld er lent temmilega snemma til að prenta sín alræmdu einkunnablöð og getur sleppt sér yfir búningunum og sviðsframkomunni hjá T.A.T.U. Velkomin heim skötuhjú.

Loksins kem ég aftur
Hef ekkert getað bloggað síðan fyrir síðustu helgi vegna anna. Er búinn að vinna þrjá eftirmiðdaga í Keflavík og líkar bara fínt. Maður er svolítið óöruggur til að byrja með en síðan kemur þetta þegar maður fer að sjá hlutina í þriðja og fjórða skipti. Ætli maður reyni ekki að miðla einhverjum fréttum hér í sumar, t.d. af gangi flutninga og gangi FC-Forseta í Utandeildinni.

Leikurinn
Fyrsti leikurinn okkar í Utandeildinni endaði ekki glæsilega því við gerðum okkur lítið fyrir og töpuðum 10-0. Ekki bætti úr skák að þjálfari okkar og máttarstólpinn í vörninni verður líklega frá út tímabilið þannig að ekki skánar vörnin til muna. Reyndar kom Ómar inn á fyrir hann og skilaði sínu hlutverki vel. Ívar stóð sig þrátt fyrir allt ágætlega í markinu og mörkin verða miklu frekar skrifuð á vörnina en hann. Auk þess megum við sem spilum framar á vellinum taka okkur saman í andlitinu og reyna að bæta okkar ráð fyrir næsta leik sem verður á móti góðvinum mínum í Ástinni. Það var gaman að sjá Ástina loksins spila eins og menn en það var reyndar ekki fyrr en þeir voru orðnir einum fleiri sem hlutirnir fóru að gerast hjá þeim á sunnudaginn. Þeir voru verulega óheppnir að tapa leiknum því þeir lágu hreinlega í færum eftir að leikmaður BR var rekinn út af. BR stal síðan sigrinum á síðustu sekúndunni þegar Ástin hafði sett allt kapp í sóknarleikinn. Slæmu fréttirnar fyrir Ástarmenn eru þær að tveir bestu menn þeirra í leiknum, þeir Jón Ingi og Mási, voru að spila sinn eina leik í sumar því báðir hafa þeir nú horfið til annarra verkefna. Hins vegar fá þeir Adda í staðinn en hann hefur verið einn besti leikmaður Ástarinnar frá því að Herði tókst að kenna honum að gefa boltann. Forsetinn mun hitta Ástina næstkomandi miðvikudag og þá verður sko tekið á því.

Ríkisstjórnin
Djöfull er ég ánægður með þess ríkisstjórn. Davíð verður áfram í ár og síðan tekur Dóri fúli við og það er bara fínt mál. Þorgerður Katrín kemur sterk inn og það er fínt að fá Sigríði Önnu Þórðardóttir líka til að sýna fólki að konur geta vel náð langt í Sjálfstæðisflokknum. Þetta eru tvær frambærilegar konur. Síðan var leiðindakerlingunni Sólveigu Pétursdóttur skipt út af og hún sett á bekkinn. Bjössi Bjarna er kominn aftur og það er ágætt að fá mann eins og hann í Dómsmálaráðuneytið og ég vona bara að hann leggi niður kirkjumálaráðuneytið og skilji að ríki og kirkju. Geir er traustur í ríkiskassann og Árni getur haldið áfram að skíta á sig í togararallinu. Ég er líka ánægður með að Árni Magnússon skuli fá ráðherrastól. Það er kominn tími á ungt fólk í ráðuneytin.

Fyndnar fréttir
Ég hélt ég mundi deyja úr hlátri yfir hádegisfréttunum í Ríkisútvarpinu í gær þegar sagðar voru fréttir af þeim flugfélögum sem væru hæfust í að koma farangri til skila. Eins og dyggir lesendur eflaust muna lenti ég í miklum hremmingum með farangurinn minn á leið til og frá Búdapest í haust og mér var því skemmt þegar flugfélögin tvö sem ég átti svo skemmtilegar minningar um voru bæði á topp tíu yfir skilvísustu flugfélögin. Ég get nú alveg sagt ykkur það að þau eru ekki á topp tíu listanum hjá mér. Því miður varð mér aldrei úr verki að skrifa harðorða grein í Moggann um þetta mál en það hefði sjálfsagt orðið til lítils annars en að ég hefði fengið viðurnefnið Gilli flugdólgur.

Geðlæknisfræði…
…hefur verið lögð að velli en mér gekk hreint ágætlega í prófinu í morgun þrátt fyrir að hafa næstum dáið úr leiðindum við að lesa fyrir þetta próf. Það eru engin takmörk fyrir því hvað hægt er að kalla þunglyndi mörgum nöfnum og hvað það eru til margar álíka gagnslausar aðferðir til að lækna það. Það merkilegasta við geðlæknisfræðina er þó það að þrátt fyrir 150 ára rannsóknir á lyfjum og sálfræðilegum meðferðum telur hinn almenni borgari sem hlotið hefur einhvers konar sálfræðiþjónustu í USA, AA-kerfið enn árangursríkustu leiðina til að ná sér út úr hversdagslegu þunglyndi skv. einhverri neytendakönnum fyrir nokkrum árum. Þetta er kannski ofureinföldun hjá mér en það er það verður mönnum ljósara með hverjum deginum hversu mikla möguleika tólf spora kerfi AA hefur og hefur það verið notað meðal annars af spilafíklum, aðstandendum alkóhólista, átfíklum, fólki með átraskanir, skapofsamönnum, kynlífsfíklum og fleirum. Þetta virðist alltaf skila árangri. Lyfin okkar eru seinvirk og yfirleitt með aukaverkanir sem trufla meðferðarheldni verulega. AA, OA, GA, Al-Anon og fleiri samtök eru því líklega framtíðin. Kannski fáum við Depressed Anonymous (DA), Anxios Anonynous (ANXAN), Schizophrenic Anonymous (SCAN) o.fl. samtök í framtíðinni – hver veit?

HAHAHAHA
Óli grís er búinn að kvænast Dorrit. Ætli hann hafi fengið demantshring á puttann sinn? Ætli þau hafi keypt hringana hjá Dorrit? Eru það ekki eins konar innherjaviðskipti?

Bara stutt í dag
Er að fara í geðlæknisfræði á morgunn og eftir því sem ég les meira þeim mun geðveikari verð ég. Ætli ég verði ekki kominn með schizotypal persónuleikaröskun á morgun eða eitthvað.

Prinsessa fædd
Gleymdi auðvitað að setja hér inn hamingjuóskir til Rögnu og Gumma með litlu prinsessuna sem fæddist að mig minnir sl. laugardag. Til hamingju með frumburðinn. Það er víst lítil hætta á öðru en að hún verði myndarlegur snillingur miðað við foreldrana.

Taugalæknisfræðin...
...var kláruð í morgun. Þetta gekk bærilega en ég held ég verði nú enginn taugabrilli í framtíðinni. Barnalæknisfræðin hefur enn forystu í baráttunni um hylli mína.

Vilji kjósenda
Það virðist vera að þegar fólk bíður sig fram fyrir Samfylkinguna fái það ókeypis námskeið í að túlka úrslit kosninga sér í hag. Þannig túlka þeir þá staðreynd að þingmönnum Samfylkingarinnar fjölgaði um 3 sé augljóst merki um vilja kjósenda að skipta um ríkisstjórn. Við hin sem kunnum stærðfræði vitum að u.þ.b. 5% fleiri kusu Samfylkinguna nú en síðast. Skv. vinstri mönnum eru það hins vegar þessi 5% sem túlka augljósan vilja kjósenda. Hmmm. Fólk sem veit raunverulega hvað lýðræði er skilur að sjálfsögðu að fylgi flokkanna gefur bestu vísbendinguna um vilja kjósenda og á laugardaginn var það augljóst að meirihluti kjósenda styður ríkisstjórnarflokkanna. (ef ég væri vinstrimaður hefði ég sagt ríkisstjórnina en ég veit auðvitað að margir kjósendur D og B vilja ekki áframhaldandi samstarf). Þessir vinstri menn geta talað svo fallega um margt og dregið svo skemmtilegar ályktanir að þeir eru stundum alveg stórskemmtilegir og stundum jafnvel hlægilegir.

Ég ætla að sjálfsögðu ekki að neita því að ég er verulega svekktur yfir gengi Sjálfstæðisflokksins því þótt ég sé nú ekki alfarið sammála stefnu hans í mörgum málum er hann raunverulega eini valkosturinn fyrir hægri búra eins og mig. Lokaniðurstaðan er hins vegar sú að Samfylkingunni mistókst í tveimur af þremur áætlunarverkum sínum. Í fyrsta lagi tókst þeim ekki að fella ríkisstjórnina og í öðru lagi tókst þeim ekki að koma gullkálfinum sínum frá Ráðhúsinu á Austurvöll þrátt fyrir að þetta séu nú ekki nema örfáir metrar. Þeim tókst hins vegar að gera Samfylkinguna að því afli í íslensku stjórnmálum sem þá dreymdi um og fyrir það ber að óska þeim til hamingju. Það kostaði hins vegar það að gullkálfurinn þeirra heltist úr lestinni á miðri leið og verður einhvers staðar út á túni að jafna sig næstu þrjú árin. Kannski hún geti nýtt tækifærið, farið í Háskóla Íslands og hjálpað Röskvu að vinna aftur meirihluta sinn í Stúdentaráði.

Það sem mér fannst ánægjulegast er að sjá allt þetta unga fólk sem nær inn á þing. Þrír fyrir Frjálslynda, Ágúst, Katrín, Bryndís Hlö og fleiri fyrir Samfylkinguna, Siggi Kári, Biggi Ármanns, Bjarni Ben og Guðlaugur Þór fyrir Sjálfstæðismenn og Dagný, Árni og þessi pjakkur þarna fyrir austan fyrir Framsókn. Það er hins vegar skemmtileg pæling sem Spurningasveppurinn kom með varðandi frétt Moggans um lækkandi meðalaldur þingmanna. Þrátt fyrir að meðalaldurinn á Alþingi hafi nú lækkað um fimm ár þá hafa auðvitað liðið fjögur ár síðan gömlu þingmennirnir voru kosnir og því hefur meðalaldur kosinna manna ekki lækkað nema um eitt ár. Það er þó vissulega þróun í rétt átt.

Boltinn
Mínir menn krýndir á sunnudag og ég var glaður. Það var líka vegna þess að kettlingarnir frá Bítlaborginni komust ekki í Meistaradeildina enda á svona skítalið ekki heima þar. Sorry, Golli, Kobbi, Þór, Eiki, Óttar og Nonni en það er bara staðreynd. Þeir eru ekki nógu góðir til að spila í Evrópu. Rúðan tók svo að sjálfsögðu markakóngstitilinn eftir að Henry skoraði bara eitt af tíu mörkum Arsenal í síðustu 2 leikjum. Hey, hann er alla vega góður í að leggja upp. Annars verð ég nú að viðurkenna að mér líður eins og þjófi yfir þessu því Henry er búinn að vera svo miklu betri en Nistelrooy í vetur enda sést það á því að hann er næstmarkahæstur og með langflestar stoðsendingar í deildinni. Maðurinn er snillingur og það verður gaman að sjá hann við hliðina á Ruud hjá United næsta vetur.

Dapurlegur dagur
Dagsins í gær verður minnst í mínum huga sem dagsins sem Íslendingar kusu næstum yfir sig skattpíningardrottninguna Skalla-Sollu. Sem betur fer sáu Sunnlendingar að þetta gengi ekki og felldu Ingibjörgu á síðustu utankjörfundaratkvæðunum. Þetta þýðir að Framsóknarmenn halda sínum 12 þingmönnum, Sjálfstæðisflokkurinn fær 22 og er í sögulegu lágmarki, Samfylking fær 20 þingmenn og sannar að enn eru 30% þjóðarinnar með greindarvísitölu á við ísskáp, Frjálslyndir fá 4 sem er fínt en Vinstri grænir (a.k.a. gamlir kommar) fá 5 þingmenn. Þrátt fyrir gífurlegan meðbyr og frábærar viðtökur fengu nýtt afl og T-listi Kristjáns Pálssonar enga þingmenn. Það var nú eiginlega bara tvennt sem gladdi mitt auma hjarta í nótt og morgun en það var að Ingibjörg skyldi ekki ná kjöri en það þýðir að pólítískur ferill hennar er í 3 ára biðstöðu. Hitt er það að svo margt ungt fólk náði kjöri fyrir Framsókn, Samfylkingu og Sjálfstæðisflokk. Í þeim hópi er ég að sjálfsögðu ánægðastur með fjölskylduvininn Birgi Ármannsson í syðra Reykjavíkurkjördæminu. Ég er ekki í nokkrum vafa um það að Birgir á eftir að ná langt í pólítík. En það er ljóst að allir geta vel við sína niðurstöðu unað nema Sjálfstæðismenn og Vinstri grænir. Til hamingju skattgreiðendur - ykkur mistókst að hækka skattana undir forystu Ingibjargar Sólrúnar Gísladóttur.

Frjáls
Síðasti dagurinn minn á geðdeildinni er senn á enda og ég get ekki beðið. Þetta eru búnar að vera langar og á köflum leiðinlegar vikur. Verð nú samt að viðurkenna að sumt af þessu á eftir að nýtast mér vel í sumar þegar ég tekst á við Keflvíkinga. Þetta er ekkert skot á Keflavík því þetta er nú svona víðast hvar á landinu - mikil geðlæknisfræði í heilsugæslunni. Svo er það bara 6 daga próflestur og 2 próf en síðan verður tekið á því á heimilislæknakúrsinum. sem verður vikuna 19.-24. maí.

Afsökunarbeiðni
Viðar er beðinn afsökunar á að vera settur í hóp aumingjabloggara hér að neðan. Hann hefur bloggað a.m.k. síðustu tvo daga.

Pirraður
Mikið rosalega er ég orðinn pirraður á fólki sem aldrei þreytist á að senda mér keðjubréf og auglýsingapósta. Mér finnst ótrúlegt hvað fólk leggst lágt í að troða einhverjum keðjubréfsauglýsingum upp á vini sína og vandamenn með tölvupósti. Það eru engin takmörk fyrir vitleysunni sem maður fær senda. Þeir sem þetta lesa mega taka það til sín að ég vil bara alls ekki fá tölvupóst um fársjúkt barn í Langtíburtistan sem fær eitt grjón fyrir hvert forward á einhverjum helvítis tölvupósti. Auðvitað gerir þetta fólk svona heimskupör til að friða samvisku sína af því að það nennir eða getur ekki tekið almennilega til hendinni í góðgerðarstarfi. En ég er bara með smá fréttir fyrir ykkur. Þetta virkar ekki. Þið eruð ekkert að hjálpa hungurmorða börnum með því að senda email. Þið megið því alveg sleppa því að senda mér svona bréf en brandarar og annað skemmtiefni er vel þegið.

Kosningabaráttan
Það bilaði eitthvað loftræstingin hjá Sollu Bollu og það virðist sem allur vindur sé úr henni. Fregnir herma að gífurlega tæknilegt holræsakerfi í götunni hennar hafi hreinlega yfirbugað Skatta-Sollu og dregið úr henni allt loft. Það varð til þess að Ingibjörg virðist búin að glata trausti þeirra þriggja komma sem enn trúðu nokkru af því sem hún sagði. Nú kjósa bara bókstafstrúarmenn sem eru til í að gera hvað sem er til að losna við Dabba kóng - meira að segja kjósa einhvern mesta lygara íslenskrar sjórnmálasögu. Ég mæli með umfjöllun á www.andriki.is hún er skemmtileg, hnitmiðuð en umfram allt ómálefnaleg. Það er fyndið.

Aumingjabloggarar
Viðar, Þorgeir, Hjölli, Haukur Þór, Gunni, Baddý, Sjonni og Inga Huld! Eru þau dauð? Þorgeir heldur að ég eigi afmæli samfleytt í tíu daga og hinir eru varla búnir að blogga síðan sumarið leit dagsins ljós. Hvers eiga einmana menn eins og ég að gjalda. Ég lifi fyrir bloggið ykkar fólk. Keep feeding me.

Kosningar
Aldrei hef ég verið jafn efins um hvað ég á að gera við atkvæðaseðilinn minn á kosningadag. Reyndar verð ég að viðurkenna að kostirnir eru aðeins þrír: 1) að skila auðu af þeirri einföldu ástæðu að enginn flokkanna hefur nógu frjálslynda stefnu fyrir minn smekk, 2) að kjósa Sjálfstæðisflokkinn vegna þess að þeir eru eini flokkurinn á Íslandi sem er nálægt miðjunni vinstra megin frá, 3) að kjósa Dóra "skemmtilega" svo hann komist á þing en ekki hin vængbrotna Ingibjörg Sólrún. Annars lét ég það nú eftir mér í próflestrinum í gær að horfa á Davíð spurðan spjörunum úr af starfsmönnum RÚV. Hann stóð sig mjög vel og var skemmtilegur en ég hafði heyrt utan af mér að Ingibjörg greyið hefði verið fremur vængbrotin á mánudaginn.
Annars finnst mér magnað að lesa greinar Dags B. Eggertssonar um Ingibjörgu síðustu daga í Morgunblaðinu. Þessar greinar hafa birst á besta stað í blaðinu og því varla hægt fyrir vinstri menn að kvarta um að blaðið sé enn að aðstoða Sjálfstæðisflokkinn. Þarna fer Dagur lofsamlegum orðum um pólítíska móður sína sem hann er víst tilbúinn að fyrirgefa eins og saklaust barn fyrirgefur geðsjúkri móður. Hann virðist hafa gleymt þeim orðum sínum sl. vor að Ingibjörg Sólrún væri bara ekki þannig persóna að hún gengi á bak orða sinna við kjósendur og færi í framboð til Alþingiskosninga. Það er greinilegt að sannfæring Dags er til sölu eins og sannfæring annarra vinstri manna og komma hefur verið í gegnum tíðina. Sagan hefur kennt okkur að harðir vinstri menn eru margir hverjir tilbúnir að ljúga, blekkja, limlesta og jafnvel drepa til að koma sínum skoðunum á framfæri. Þeir vita nefnilega betur en almenningur hvað er best fyrir hann. Það er þó ekki svo að skilja að mér sé persónulega illa við Dag B. Eggertsson enda þekki ég hann sæmilega í gegnum læknisfræðina og á því sviði er hann bæði fær og atorkusamur. Skoðanir hans eru bara ekki þær sömu og mínar né heldur pólítísk gildi.
Að lokum langar mig til að minnast á það að ég tók hið fræga próf afstada.net og kom eins og mig grunaði út með:
Sjálfstæðisflokkur 79%,
Framsóknarflokkur 57%,
Frjálslyndir 36%,
Samsoðningur 36%,
Vinstri grænir 14%.
Það kemur mér nú mest á óvart hvað ég er lítið sammála Sjálfstæðismönnum en það er líklega vegna þess að ég er töluvert hægrisinnaðri en stefna flokksins. Tók þessa könnun reyndar fyrir nokkrum vikum en síðan hefur afstaða mín breyst í nokkrum málum sem þarna koma upp.

Boltinn
Arsenal tapar í kvöld, um það er ég sannfærður. Ruud setur síðan þrennu á laugardaginn og verður markakóngur og jafnar met Dennis Law um mörk á einni leiktíð fyrir félagið. Ruud er að sjálfsögðu markahæstur í deildinni og lítil hætta á að Henry skori af bekknum hjá Arsenal í kvöld. Beattie gæti orðið skeinuhættur en ég held samt að hann nái ekki Ruud. Síðan eru það auðvitað töluverð vonbrigði að lið Juventus skuli hafa staðið sig svona vel á móti Real á Spáni í gær. Síðan er bara að sjá hvernig Milano-liðin taka á því í kvöld. Ég verð reyndar að lesa en kannski maður fylgist með þessu með hálfum öðrum þriðjung úr auga (reiknið þið nú).

Meistarar, snillingar!
Mínir menn tóku titilinn létt í gær, þurftu ekki einu sinni að fara í takkaskóna því stórliðið Leeds vann "sanngjarnan" sigur á Arsenalmönnum í gær. Það hefur verið gaman að fylgjast með vælinu í Wenger í dag en það kemur mér svolítið á óvart að hann skuli ekki væla meira yfir því hvað Viduka var rangstæður í sigurmarkinu. Það breytti hins vegar mjög litlu því Arsenal dugði ekki jafntefli heldur og þeir voru svo sem ekkert að gera sig líklega til að skora sigurmarkið þarna í lokin. Mér fannst botninn detta alveg úr sóknarleiknum þeirra þegar Kanu kom inn á og þeir jöfnuðu. Staðreyndin er auðvitað sú að besta liðið vann þessa deild sem sést best á muninum á árangri þessara liða í Meistaradeildinni. Vissulega er frábærir einstaklingar í þessu Arsenalliði sem geta klárað leiki upp á sitt eins- eða tvídæmi. Það virðist hins vegar ekki hafa náðst nógu góð liðsheild í liðið og það er látið ganga á of fáum mönnum, það vantar alla breidd í það sem sést best á því að þegar tveir miðverðir eru úr leik þá verða þeir að setja hægri bakvörð sem ekkert hefur spilað að ráði í vetur, í miðvarðarstöðuna. Fyrir áramót voru Gary Neville, Wes Brown og Rio Ferdinand meiddir í vörninni hjá United og Beckham, Keane og Butt á miðjunni en samt var United að vinna leiki með Phil Neville á miðjunni, Solskjær á kantinum og smástrákinn John O'Shea í vörninni.
Talandi um John O'Shea. Af hverju var sá maður ekki valinn efnilegasti leikmaður deildarinnar. Jenas var góður, Rooney ágætur en Jón var stórkostlegur. Hann spilaði allar stöður í vörninni og var m.a.s. á miðjunni á móti Burnley í bikarnum og átti stórleik. Hann hefur brillerað á móti mörgum af stærstu liðum Evrópu - Juve, Depor, Real og fleirum. Þetta val var alger skandall.

Afmæli
Í gær átti Magga Pála Eddusystir og mágkona mín afmæli. Hún heldur með Arsenal og átti því ekki góðan afmælisdag. Hún er líka á fullu í samræmdum prófum og verður að einbeita sér að þeim þannig að ég bíð með það þangað til í sumar að stríða henni. Til hamingju með daginn í gær Magga Macho.

Afmæli!
Eiki átti afmæli á föstudaginn og fær eina hamingjuósk frá Ljós-Gíslanum. Hann hefur því aftur tekið hið hefðbundna ársforskot sem hann hefur haft á mig lengst af ævinni.

Vaktin
Er nú á vakt á barnadeildinni sem hefur verið fremur annasöm. Hef lítið getað sofið í nótt fyrir heimsóknum en þó náð að festa blund í ca. 2,5 tíma. Síðan er bara heim kl. 9:30 í háttinn og svo lestur eftir hádegið.

Skrifa meira á morgun