Boltinn
Jæja. Ýmislegt gerst síðan ég skrifaði síðast og verð ég að viðurkenna að ég varð fyrir ákveðnum vonbrigðum með viðbrögðin við trúarjátningunni minni. Bjóst við því að alla vega eitt ykkar kallaði mig guðlastarar og trúleysingja. Svo hafa poolararnir nær alveg haldið kjafti sem ekki hefur gerst í mörg ár. Þeir hljóta að vera í prófum eða eitthvað uppteknir við annað.
Mínir menn hafa svo sem ekki verið að standa sig sérlega vel síðastliðnar vikur en í kvöld stóðu þeir sig vel og völtuðu yfir Wigan Athletic. 4-0 sigur var langþráður og sannfærandi og maður getur andað léttar í að minnsta kosti örfáa daga. Sjáum hvað setur um helgina.

Þvíumlíkt rugl
Hverslags skilaboð eru það eiginlega sem Reykjavíkurborg er að senda foreldrum borgarinnar. Við viljum frekar að fólk með menntun sem það getur ekki nýtt sér sjái um börnin ykkar á daginn en að faglærðir leikskólakennarar geri það. Eftir nokkur ár verða öll sex ára börn vel að sér um franska setningafræði, kenningar Sigmunds Freud og þýskar sonnettur. Síðan verða sjálfsagt allir leikskólakennarar farnir að sinna gamla fólkinu á elliheimilunum fyrir miklu hærri laun en hjúkkugreyin sem hafa sjálfsagt hrökklast úr störfum sínum og ráðið sig sem yfirkennara í grunnskólum borgarinnar á meðan kennaragreyin eru ennþá í verkfalli. Hvar endar eiginlega þetta gamanleikrit Steinunnar Valdísar? Ég held að hún sé á rangri hillu greyið. Sennilega yrði hún Arnaldur íslensku vísindaskáldsagnanna ef hún sneri sér að ritun slíkra bókmennta enda held ég að flestum borgarbúum sé hulin ráðgáta hvernig er mögulegt að vera svona vitlaus. Fyrsta bókin gæti til dæmis fjallað um það hvernig dularfullur en mjög frjálslyndur læknir reynir að klóna heila Steinunnar til að átta sig á öllu bullinu í henni. Hvað er eiginlega í gangi með þessa borgarpólítík?
Það versta við hana er þó að svo virðist sem allir þeir kollegar mínir sem voga sér svo mikið sem að hugsa um borgarmál verði sjálfkrafa kálhausar. Í það minnsta hafa allir þeir læknar sem komið hafa nálægt borgarpólítíkinni orðið heilalausir fáráðlingar þrátt fyrir ágæta meðalgreind í námi sínu. Hvað veldur því til dæmis að Dagur B. Eggertsson sem er læknir er með ólæknandi strútsheilkenni. Ef hann fær öndunarerfiðleika af öllum sandinum sem hann hefur grafið ofan á hausinn á sér er heppilegt að hann er vel giftur góðum lækni (veit reyndar ekki annað en að Dagur sé sjálfur góður læknir) sem getur reddað honum er í harðbakkann slær. Frá mínum bæjardyrum séð þá held ég að Dagur ætti að halda sig bara við læknisfræðina en ég er svo sem ekkert að kvarta yfir frammistöðu hans í borgarmálunum. Samfylkingin virðist falla um minnst 1% í hvert sinn sem maðurinn sést í sjónvarpi. Ætli Reykvíkingar hafi ekki bara séð í gegnum hann.

Jóla hvað
...með Skrámi er sennilega eitt magnaðasta og fyndnasta jólalag allra tíma. Þið verðir hreinlega að hlusta á það við tækifæri. Ég græt úr hlátri í hvert sinn.

Sniðugt
Farið á Google og sláið inn eftirfarandi orðasambönd: "failure" og "french military victories". Styðjið síðan á hnappinn vogun vinnur, vogun tapar í Google eftir hvort orð og hlæjið ykkur máttlaus. Þvílík snilld.

Meiri snilld
Þessi linkur er alger snilld. Eftir einhvern snilldarlegan amerískan blaðamann.

Ég trúi á Manchester United FC,
Besta félagslið í heimi.
Ég trúi á Ferguson, þess draumason,
stjóra vorn, sem getinn er í Skosku Hálöndunum,
fæddur af móður sinni,
píndur á dögum Margaretar Thatcher.
Fúkyrtur, skammaður og brotinn.
Steig niður úr Skotlandi,
Reis á 10. áratugnum aftur upp til sigurs.
Steig upp á verðlaunapallinn.
Situr við hægri hönd Busbys, áður almáttugs,
og mun þaðan fara aðeins vegna eigin dauða.
Ég trúi á heilagt liðið, heilbrigða almenna samkeppni,
áætlanir Glazerana, fyrirgefningu tapana,
upprisu United og eilífa sigra.
Mark

I have a dream!!!
Var að hlusta enn einu sinni á frábæra ræðu Martin Luther King yngri sem hann flutti á þrepum Lincoln-minnismerkisins þann 28. ágúst 1963. Hef lengi átt eintak af henni en ekki hlustað á hana í langan tíma. Var svo að skoða lagasafnið og rakst á þessa frábæru ræðu. Þó ræðan sé flutt fyrir röskum 40 árum er sorglegt að viðurkenna að margt sem hann dreymdi um þennan dag hefur enn ekki ræst þó annað hafi áunnist.
Það er líka magnað að hlusta á hve sannfærandi og hrífandi ræðumaður hann hefur verið. Þetta er svona persónutöfrar sem ekki er hægt að læra heldur eru þeir aðeins gefnir örfáum útvöldum. Mæli með því að allir sem ekki hafa þegar hlustað á þessa frábæru ræðu nálgist hana með einum eða öðrum hætti t.d. með því að Googla tilvitnunina ?I have a dream?.

Erfiður leikur
Mínir menn eiga erfiðan leik fyrir höndum í Meistaradeildinni í kvöld þegar þeir mæta Benfica í Portúgal og verða að vinna til að vera pottþéttir áfram. Þeir gætu reyndar komist áfram á jafntefli en það er algerlega háð úrslitum í hinum leik riðilsins á milli Lille og Villareal. Það verður gaman að fylgjast með.

Langt síðan síðast
Nú er komin rúm vika síðan ég reit hér snilld mína síðast. Margt hefur á daga mína drifið og væri langt mál að tíunda það allt. Ætla ég þó að gera heiðarlega tilraun til þess að draga það saman í stuttu máli.

Nonni bróðir...
...hefur verið hér heima sl. viku og verður fram á helgina. Hann kom hér heim í fríi sem hann átti og leysti af svæfingarlækna á Landspítalanum í Fossvogi og við höfum því verið að vinna svolítið saman sl. daga. Það hefur verið meiriháttar gaman og þá sérstaklega að sjá að það er ekki tómt bull sem hann segir heldur er hann bara helvíti lunkinn bæði í svæfingunum og gjörgæslulækningunum. Gott að vinna með þeim gamla líka.

Steggjaveislan
Var steggjaður á laugardaginn. Ég var sóttur hingað heim um morguninn upp úr níu og það var keyrt með mig í náttfötunum suður í Sporthúsið þar sem ég átti að klæða mig í sérlega kvenlegar hlaupabuxur og bleika skyrtu. Ofan á það var síðan bætt kúrekahatti og sólgleraugum. Þannig fór ég í upphitun og loks var ég settur í body-pump tíma. Það var ekki svalt en þó tók ég helvíti hraustlega á því þó ég segi sjálfur frá. Á meðan á þessu stóð öllu saman voru drengirnir duglegir að hella í mig öli enda ekki vanþörf á því að drekka í sig kjark að láta sjá sig í þvílíkum flíkum.
Eftir Sporthúsið var farið með mig í Smáralind þar sem ég átti að spígspora um allt og árita vafasama fótboltamynd af sjálfum mér sem Halldór Benjamín hafði útbúið. Síðan var farið með mig heim til Ingvars þar sem Jóhann Páll gipsaði á mig bjórkrús og þannig mátti ég vera það sem eftir lifði dags.
Frá Ingvari lá leiðin í Ölver þar sem ég var neyddur til að syngja You'll Never Walk Alone og síðan horfðum við á upprisu Peter's Crouch. Það var ágætt, sérstaklega þar sem með í kaupunum fylgdi ágætis shittíbörger sem ég sporðrenndi ljúflega.
Eftir þetta þótti þjóðráð að fara með mig í Smáralind en nú létu þeir mála mig og ég hélt áfram að gefa fólki áritaðar myndir af mér.
Að lokum lá leiðin svo í bústað austur í Hrepp þar sem djammað var vel fram yfir miðnætti þó sumir hafi farið snemma í háttinn. Sjálfur tórði ég til tvö en þá sagði þreytan til sín.
Frábær dagur með góðum vinum og þrátt fyrir nokkrar niðurlægingar var ég ánægður með daginn. Maður hefur gott af því endrum og eins að láta eins og fífl á almannafæri. Maður tekur sjálfan sig ekki eins hátíðlega á eftir.

Brúðkaupsundirbúningur
Allt í hámarki nú. Matur, myndir, músik, föt og fleira allt að smella. Nú síðast kláruðum við gjafalistann sem verður hafður í Líf&List í Smáralind. Mjög flott búð og þjónustan þar var frábær. Mæli með henni. Síðan er auðvitað ýmislegt sem okkur langar í sem ekki er á listanum en meðal þess eru listmunir, sérstaklega málverk. Auk þess eru ýmiss rafmagnstæki sem okkur vantar en við ákváðum að leyfa fólki að hafa töluvert frjálsar hendur með því að hafa listann ekkert of langan. Mér finnst alltaf gaman að fá óvænta hluti sem ég hef ekki óskað mér.

Mínir menn að standa sig
MUFC-menn stóðu sig vel um helgina með 3-0 sigri á heimavelli gegn Portsmouth. Scholes skoraði loksins og svo settu Rooney og Ruud hann af gömlum vana. Ruud virðist búinn að finna gamla formið sitt aftur og Rooney er áfram bara jafnrosalegur og hann hefur verið. Vona að þeir haldi uppteknum hætti í Meistaradeildinni í vikunni. Það verður erfiður leikur hjá þeim á útivelli á móti Benfica en ég held að það hafist. Maður verður í það minnsta að halda í vonina.

TippToppið
Ég er ekki að gera góða hluti í tippinu hjá Magnúsi þessa dagana. Eftir að hafa klúðrað titli á þriðja tímabili með því að gleyma að tippa á síðasta seðilinn þá hef ég ekki náð mér almennilega á strik. Féll núna síðast úr 1. deildinni og nú er Gunnar Thoroddsen farinn að snýta mér á seðlunum þrátt fyrir að vera einhverjum 3 deildum fyrir neðan mig. Það er súrt. Hann snýtti reyndar líka öllum hinum á síðasta seðli en það er samt súrt að tapa fyrir Keflvíkingnum. Ég er annars farinn að leggja aðeins meiri metnað í þetta og er farinn að spá í afstöðu liða í þeim deildum sem þau eru að spila í og svona. Það er samt ekkert að skila mér fleiri stigum og skitin 18 stig á seðli er náttúrlega bara hlægilegt. Villareal og Fulham skemmdu t.d. bæði fyrir mér með sínum sigrum en ég spáði báðum tapi. Svona getur lífið verið ósanngjarnt.

Helvítis Poolarar og Leedsarar
Sannaðist enn einu sinni hvurslags heiladauðir hálfvitar halda með þessum liðum um helgina þegar verið var að votta látnum manni virðingu. Það er eins og þeir muni ekki að þetta er einmitt sami maðurinn og á sínum tíma gaf skít í MUFC og hætti bara af því að hann mátti ekki alltaf vera að djamma og ríða kellingum. Ég hef alltaf vitað að það er bara illa upp alinn rumpulýður sem heldur með Liverpool og svo eru nú bara furðufuglar sem halda með Leeds.

Leikmaður ársins í Evrópu
Ef einhver hafði efasemdir þá eru þær hér með úr sögunni. Það kemur náttúrlega enginn annar til greina sem bestur í fótbolta en Ronaldinho. Hann mun held ég taka öll verðlaun sem hann á möguleika á að vinna. Maður sem tekur bara allt Real Madrid liðið og snýtur því út um svitaholu á bak við eyrað um leið og hann stingur þá af. Ótrúlegt kvikindi og þótt hann sé ljótur held ég að allir fyrirgefi honum það. Meira að segja kellingarnar. Fannst reyndar svolítið skrýtið að sjá menn eins og Carragher á listanum en ekki Rooney sem er náttúrlega mörgum klössum ofar. Sennilega fær Carragher heiður fyrir Evrópumeistaratitilinn sem hann á reyndar skilið en það er svolítið skrýtið að sjá að hvorki Campbell né Ferdinand eru ofar en hann þrátt fyrir að þeir séu báðir á undan honum í enska landsliðið. Carragher er góður en einn af 20 bestu leikmönnum Evrópu? Varla.

Arftaki Keane
Því miður held ég að hann sé ekki að finna innan veggja Old Trafford. Það er líka ljóst að það væri vanhugsað að kaupa einhvern leikmann sem þegar hefur spilað í meistaradeildinni ef við á annað borð gerum ráð fyrir að þeir komist upp úr riðlinum sínum. Ég held að það sé ljóst að leikmaðurinn þarf annað hvort að koma úr liði sem ekki hefur spilað í Meistaradeildinni í vetur eða frá liði utan Evrópu. Þá er manni kannski helst litið til S-Ameríku og það eru nokkrir sem maður hefur heyrt að séu að gera góða hluti með sínum liðum þar, flestir argentískir en einnig Kólombíumenn og Brassar. Það verður gaman að sjá hvort Ferguson fær aura til að kaupa í janúar eða bara hvort Ferguson verður yfir höfuð við stjórnvölinn hjá MUFC í janúar. Ég held að sé orðin stutt líflínan hans og sennilega fær hann að taka pokann sinn ef hann vinnur ekki einhverja titla á þessu tímabili. Það væri þó leiðinlegur endir á annars frábærum ferli hans hjá MUFC.

Mannorðsrán
Það hefur lengi verið í umræðunni hér á landi hversu erfitt sé að fá kynferðisafbrotamenn sakfellda hér á landi og hvort ekki sé rétt að létta sönnunarbyrðina. Þetta hefur sem betur fer ekki fengið hljómgrunn löggjafarvaldsins en nú hafa meint fórnarlömb fengið DV í lið með sér og þeir þarna á Djöfulsins Vitleysunni hafa nú einsett sér að eyðileggja mannorð hvers þess manns sem kærður er fyrir nauðgun. Ef þeir eru síðan sýknaðir þá kemur kannski leiðrétting einhvers staðar í smáauglýsingunum nema þá að Djöfulsins Vitleysan taki þann pól í hæðina að dómararnir hafi bara verið fífl og maðurinn sé bara samt sekur. Það er nefnilega þannig í DV-landi að hálfvitarnir sem vinna þar þykjast vita meira um lög og brot á þeim heldur en allir héraðsdómarar og hæstaréttardómarar til samans. Ég er nú ekki viss um að samanlögð greindarvísitala blaðamanna Djöfulsins Vitleysunnar sé hærri en ísskápsins á kaffistofunni hjá þeim og alveg örugglega ekki ef grasið inni í honum er talið með.

Að því sögðu ætla ég nú ekki að taka afstöðu til þeirra mála sem undanfarna daga hafa riðið fréttahúsum hérlendis en ég á nú ekki von á því að DV birti afsökunarbeiðni á forsíðunni ef meintur R0hypnol-nauðgari verður sýknaður. Þá verður fyrirsögnin örugglega "DÓMARASKANDALL" eins og venjulega. Viðkvæðið hérna heima er nefnilega yfirleitt þannig að þegar menn hafa verið ákærðir fyrir eitthvað þá eru þeir sjálfkrafa sekir í huga fólks og ef þeir eru sýknaðir er skuldinni yfirleitt skellt á lélega dómara fremur en slakan málatilbúnað eða raunverulegt sakleysi. Nema reyndar í Baugsmálinu en þar voru Baugsmiðlarnir búnir að heilaþvo landann svo rækilega að einhverjir auðtrúa töldu sakleysi Baugsfeðga augljóst. Fyrir mér er þetta einfalt. Ef ekki tekst að færa sönnur á sekt manna eru þeir saklausir fyrir mér nema ég hreinlega viti fyrir víst að þeir séu sekir (hafi sjálfur orðið vitni að verknaðnum). Það eru aðrir og betri menn langtum hæfari en ég að dæma um sekt eða sýknu manna. Ég ætla bara að leyfa þeim að vinna sína vinnu í friði og ætlast til að ég fái að vinna mína að mestu í friði líka. Friður!!!!

Þegar öllu er á botninn hvolft er ekki takandi mark á nokkru sem stendur skrifað í DV vegna þess að þó sannleikskorn geti leynst inn á milli þá er 99% bara sorpblaðamennska af verstu gerð enda var einhver slakasti rithöfundur þjóðarinnar ritstjóri þess blaðs lengi. Ég meina hann getur ekki einu sinni skáldað upp almennilegar fréttir - hversu ömurlegur getur einn maður verið?

Andríki...
...tók um helgina á máli sem ég hef haldið fram frá því ég sá Bowling for Columbine. Michael Moore býr ekki til heimildarmyndir heldur áróðursmyndir. Þær eru vissulega skemmtilegar en heimildargildi þeirra er nær ekkert. Raunverulega eru þær hálfs annars tíma fyrirlestur um skoðanir Moore's og raunar má segja honum það til tekna að margir eru sammála skoðunum hans. Það þýðir samt ekki að um heimildarmyndir sé að ræða. Menn verða að gera greinarmun á þessu og ég held að öllum væri hollt að lesa Helgarsprokið frá 27. nóvember. Fróðleg lesning og stungið á mörgum bólum varðandi heimildarmyndir.

Boltinn
Mínir menn að standa sig í gær/fyrradag á móti West Ham. Rooney var víst enn einu sinni allt í öllu í leik minna manna og það er gaman að sjá hvað honum hefur farið fram sl. mánuði. Það verður gaman þegar hann og Ronaldo verða orðnir fullmótaðir leikmenn með Mikel á milli sín á miðjunni. Ég held að framtíðin sé björt en við þurfum einn svona vinnuhest á miðjuna. Ég er hrifinn af Pirlo eða Gattuso en Gravesen, Vieira eða Gerrard mundu alveg duga líka.

Jæja!
Það fer að styttast í sjöþúsandasta gestinn hér á síðunni. Ef ég dreg þá sjálfsögðu ályktun að ekki nokkur maður nenni að kíkja á þessa síðu oftar en einu sinni þá eru þetta næstum 2,5% þjóðarinnar. Ótrúlegt ekki satt.

Jólafögnuður í vinnunni
Var í vinnunni í nótt og það var heilmikið að gera. Ætla því að leggja mig seinnipartinn svo ég verði upplagður í jólafögnuð í vinnunni í kvöld. Við ætlum að fara út að borða á Skólabrú þar sem við ætlum að gæða okkur á jólakvöldverð. Það verður örugglega hörkustuð. Held reyndar að allir hinir deildarlæknarnir ætli að kjúklinga á þessu. Þá er bara að detta í það með sérfræðingunum og hjúkkunum. Það verður fínt. Skilst að það hafi verið hörkustuð í fyrra svo maður bíður bara spenntur.

United
Mínir menn skitu í sig á móti Villareal á heimavelli á miðvikudag enda ekki við öðru að búast. Þeir hafa náð algeru Arsenalformi í CL og verða nú að vinna Benfica á útivelli í síðustu umferðinni til að eiga möguleika á að komast áfram. Það verður létt verk og löðurmannlegt.

Föt og frakki, kökubiti!!
Fór í morgunn í Herrahúsið á Laugavegi og reddaði brúðkaupsdressinu ásamt frakka og ýmislegu smálegu. Tók klukkutíma en svo á eftir að lagfæra fötin lítið eitt. Snilld. Var búinn að kvíða þessu í marga mánuði en þetta var fljótgert. Sá gamli kom með og keypti sér líka föt. Við verðum aðalgæjarnir í partýinu ásamt Valda tengdó. Það er búið að gera mikið grín að kallinum og veðmál standa yfir hversu lengi hann verði að draga Eddu upp að altarinu. Flestir veðja á 8 sek. sléttar en ég ætla að gefa kallinum smá breik og segja 11 sek sléttar. Valdi er nefnilega svo röskur að það verður eitthvað súrt hjá honum og að dóla eitthvað upp kirkjugólfið. Hann vill örugglega ná góðum sætum við altarið eða eitthvað. Sjáum hvað setur.

ÁTVR
Hversu viðeigandi er það að Átthagafélag Vestmannaeyinga á Reykjavíkursvæðinu beri þetta nafn. Mér finnst þetta bara kúl.

George Best
Fallinn er frá einhver mesta goðsögn í sögu MUFC. Ekki nóg með að hann væri snillingur í fótbolta heldur var hann líka umdeildur glaumgosi og fyrsti rokkstjörnufótboltamaðurinn. Auk þess var hann ölur mjög og frægt er orðið þegar hann sagði í viðtali að hann hefði eitt megninu af peningunum sínum í konur, bíla og skemmtanir. Restinni sagðist hann hafa eytt í vitleysu.
Þrátt fyrir að hafa verið versti aumingi verður seint tekið af Best að hann var einn ástsælasti leikmaður MUFC fyrr og síðar og vottar Ljós-Gíslinn honum virðingu sína. Sannur snillingur hefur safnast til feðra sinna.

Haha! Ég er partýtröll!!!

Partítröll

Þú ert nýjungagjörn, tilfinningarík félagsvera.

Partítröllið fylgist vel með nýjustu straumum og stefnum hvort sem um er að ræða föt, tónlist eða græjur. Það eru 74.5% líkur á því að það eigi iPod, 61% líkur á því að það eigi Fred Perry póló bol og 96% líkur á því að það eigi Adidas skó. Partítröllinu finnst The OC vera skemmtilegur þáttur.

Partítröllið er vinsælt - eða telur sig að minnsta kosti vera það. Þótt margir laðist að því eins og flugur að mykjuhaug eru aðrir sem eru ónæmir fyrir þokka þess og enn aðrir sem hafa jafnvel ofnæmi fyrir því. Það eru þeir sem eru í eldhúspartíinu á meðan partítröllið hristir rassinn og baðar út öngum á dansgólfinu.

Þegar gamaninu slotar er partígríman þó fljótt tekin niður og undan henni kemur viðkvæma blómið sem partítröllið raunverulega er.

Hvaða'>http://www.stilbrot.com/trollafell/konnun/">Hvaða tröll ert þú?

Erfiður leikur í kvöld
Manchestermenn eiga erfiðan leik fyrir höndum í kvöld gegn Villareal á heimavelli í Meistaradeildinni. Þeir verða að vinna í kvöld til að komast áfram og það er nú ekki víst að það verði svo auðvelt. Sem betur fer skilst mér að Juan Roman Riquelme verði ekki með vegna meiðsla en hann er aðaldriffjöðurinn á miðjunni hjá þeim. Svo er bara að sjá hvort Forlan skorar á móti okkur. Það væri nú alveg týpískt.

Boltinn
Mínir menn tóku sig saman í andlitinu eftir sjokkerandi viku og gengu frá Charlton í dag. Gaman að sjá hvað Nistelrooy er í miklu stuði á þessu tímabili og nú verður maður bara að krossa fingur að hann meiðist ekki. Sömuleiðis má skilja á umfjöllun soccernet að Rooney hafi verið allt í öllu í leiknum í dag. Ég er alveg hrikalega ánægður með hvernig hann hefur staðið sig í vetur. Það er eiginlega miðjan og vörnin sem hefur verið að klikka en ekki sóknin og markvarslan á þessu tímabili.

Vaktirnar
Það er ótrúlegt hvað vaktirnar geta verið misjafnar. Yfirleitt er nóg að gera en samt þannig að maður getur andað á milli. Svo kemur ein og ein vakt þar sem er rólegt en oftar er breytileikinn í hina áttina og manni virðist sem allir landsmenn séu annað hvort fárveikir eða gjörsamlega geðveikir í slagsmálum og vitleysisgangi. Á vöktunum hérna sér maður sem sé bæði um gjörgæsluna og að svæfa fyrir þær bráðaaðgerðir sem koma upp. Maður er í náinni samvinnu við sérfræðinginn á vaktinni sem er á bundinni vakt í húsinu. Vaktirnar eru mjög lærdómsríkar auk þess sem þær eru mjög skemmtilegar en það er auðvitað svolítið vandnotað orð þegar maður er að fást við mjög veikt fólk. Að sjálfsögðu er ekkert gaman að sjá fárveikt fólk en það er engu að síður sérstaklega gaman þegar vel tekst til með bráðameðferðina. Á gjörgæslu eru venjulega veikustu sjúklingar spítalans hverju sinni og er ein slík á hvorum spítalanum auk þess sem það eru nokkur slík pláss á Akureyri. Margir gera að því grín að svæfingalæknar vilji helst sleppa við samskiptin við sjúklinga og vissulega eru þeir oft ekki til viðræðu en þá er einmitt mikið um samskipti við áhyggjufulla ættingja sem koma í staðinn og eru oft miklu vandmeðfarnari. Það er því mikill misskilningur að mannleg samskipti séu ekki ríkur þáttur í starfi svæfinga- og gjörgæslulækna og flestir hafa þeir einstakt lag á erfiðum kringumstæðum.

Skemmtilegar fréttir
Mogginn klikkar aldrei í áhugaverðum og mikilvægum fréttum eins og dæmin sanna. Ótrúlegt að mesti fréttavefur landsins skuli alltaf vera með svona ótrúlega tilgangslausar fréttir. Get ekki skilið að nokkur maður hafi áhuga á að vita það að einhver hafi skemmt bílinn sinn með því að aka á einhvern rolluræfil en ég hef svo sem haft rangt fyrir mér áður. Ekki oft en það hefur komið fyrir ;)

Konur gera það gott í prófkjörum
Sá úrslitin í prófkjöri Sjálfstæðismanna í Hafnarfirði. Þrjár konur af fimm efstu og 4 af 8 efstu. Það var löngu kominn tími á frambærilegar konur í Sjálfstæðisflokknum sem hingað til hefur alls ekki höfðað til kvenna. Ég veit ekki hvað breyttist en breytingin er góð.

Keane hættur
Obbosí. Hrikalegt svekkelsi að einn besti leikmaður Manchester frá upphafi skuli yfirgefa félagið undir þessum kringumstæðum en hann hefur sýnt sl. vikur að hann er ekki lengur traustsins verður. Persónulega finnst mér fyrir neðan allar hellur að fyrirliði liðsins skuli vera með blammeringar í útvarpi um félaga sína í liðinu, sérstaklega þegar hann er ekki einu sinni að spila sjálfur. Þetta er eitthvað sem á að fara fram í búningsklefa liðsins og kemur engum öðrum við. Ég held því að þetta muni reynast gæfuspor fyrir liðið þegar kemur fram á vorið. Nú neyðast þeir til að kaupa miðjumann sem helst getur borið fyrirliðabandið líka. Annars fannst mér ungu leikmennirnir sem Keane gagnrýndi hvað mest svara gagnrýni hans ágætlega á móti Chelsea. Því er hins vegar ekki að neita að ég hef orðið fyrir miklum vonbrigðum með frammistöðu minna manna það sem af er vetri, sérstaklega í meistaradeildinni. Persónulega finnst mér nauðsynlegt að fá tvo heimsklassamiðjumenn strax í janúar. Ég er spenntastur fyrir Gravesen og Ballack persónulega en aðrir sem hafa verið nefndir til sögunnar eru svo sem allir frekar spennandi kostir. Sjáum hvort Ferguson hristi ekki enn einu sinni eitthvað tromp fram úr erminni.

Jón Ólafsson
Greyið hann Jón. Hann er búinn að eyða allri sinni fullorðinsævi í að kveða niður þann draug að hann hafi upphaflega efnast með vafasömum hætti. Maður hefði haldið að slíkur maður hefði andúð á hvers kyns Gróusögum og rógburði en það sannast enn einu sinni hvers kyns innræti þessi maður hefur þegar hann segist hafa heyrt út undan sér að skattrannsóknarstjóri hafi verið með einhverjar yfirlýsingar í einhverjum gleðskap um að honum hafi verið boðin aukafjárveiting fyrir að rannsaka meinta glæpi Jónanna tveggja (J.Ó og J.Á.J).

Nú hefur umræðan aðallega snúist um það hvort skattrannsóknarstjóri hafi verið fullur eða ekki sem mér finnst algert aukaatriði. Að maðurinn skuli leyfa sér að greina opinberlega frá einhverjum ummælum sem hann heyrði í einhverri kjaftasögu og draga þannig vísvitandi úr trúverðugleika embættismanns er náttúrlega með ólíkindum. Það er svo auðvelt að trúa svona sögum og svo erfitt fyrir fórnalambið að verjast slíku. Ég gæti sagt hér fullt af kjaftasögum um Jón Ólafsson greyið sem eru miður fallegar en mér dettur það bara ekki í hug af tveimur ástæðum. Í fyrsta lagi hef ég ekki hugmynd um hvort þær eru sannar og í öðru lagi hef ég ekki efni á að verja mig fyrir breskum dómstólum.

Eftir stendur hins vegar að í allri umfjölluninni hefur Jón hins vegar greipt í huga fólks álit þess á honum sem skúrk frekar en að mála einhverja hetjumynd af sjálfum sér eins og vafalaust var hugmyndin með bókinni. Það hefur enginn gleymt því að Jón gaf hér upp örfáa þúsundkalla í tekjur á mánuði þegar hann var einn umsvifamesti kaupsýslumaður landsins. Það hefur heldur enginn gleymt því hvernig hann seldi stóran hluta eigna sinna hér og flúði land þegar skattrannsóknin hófst. Saklausir menn flýja ekki. Nú veit ég ekki hvort Jón framdi þá glæpi sem honum voru gefnir að sök en hann var greinilega hræddur um að einhverjar beinagrindur læddust út úr skápnum þegar lögreglan færi á stúfana.

Ótrúlega viðeigandi
Heimasíða keppninnar um Herra Ísland er undirsíða á Ungfrú Ísland síðunni skv. þessari frétt á mbl.is. Hversu ótrúlega viðeigandi er það? Fór aðeins og kíkti á þessa síðu og á forsíðunni var ótrúlega kunnuglegt andlit sem ég kom þó ekki fyrir mig. Það var Ingunn Sigurpálsdóttir sem lenti í öðru sæti í Ungfrú Ísland síðast skv. síðunni. Við nánari eftirgrennslan kom í ljós að ég kannast ekkert við hana heldur er hún litla systir stelpu sem var í mínum árgangi í Garðaskóla og byrjaði reyndar með okkur í MR, Önnu Kristínar Sigurpálsdóttir. Þær systur eru sláandi líkar. Góð saga.

Boðskort
Jæja nú fara boðskortin út um helgina og þið getið haldið í ykkur andanum á meðan þið bíðið spennt eftir að sjá hvort þið fáið boð. Eða nei annars það er kannski ekki ráðlegt. Ólíklegt að kortin berist fyrr en eftir helgi og ég ráðlegg ykkur að halda ekki í ykkur andanum þangað til. Bara anda rólega og bíða spennt við lúguna. Eitt það erfiðasta sem ég hef gert er að sía út af gestalistanum og margir sem ég hefði alveg getað hugsað mér að bjóða komust ekki á listann. Sama er að segja um Eddu. Þetta hefði hæglega getað orðið 250 manns en við ákváðum að miða við ca. 150 og það var skorið niður í samræmi við það. Svona er lífið. Það er ekki öllum gefið að vera boðið í brúðkaupið þeirra Gísla og Eddu.

Gaman
Það er svolítið gaman að Googla gamla vini og kunningja sem maður hefur ekki haft samband við í mörg ár. Það kemur margt skemmtilegt í ljós.

Sælt veri fólkið!
Það er eitthvað skelfilegt andleysi yfir mér núna. Ég hef frá svo litlu að segja og þegar mér dettur eitthvað skemmtilegt í hug hef ég ekki aðgang að tölvu. Þegar svo í tölvuna kemur er ég auðvitað búinn að gleyma gríninu en svona gengur þetta bara. Vonandi fer ég að finna eitthvað skemmtilegt til að rífa mig yfir.

Nýjustu meiðslin
Ég er orðinn þvíumlíkt rosalegur hrakfallabálkur. Nú síðast missteig ég mig á æfingu í gær og rústaði á mér ökklanum. Nú get ég varla gengið en ég læt mig hafa það með teygjusokk og spelku. Er á vaktinni um helgina þannig að það verður bara Íbúfen og Parkódín helgi hjá mér. Reyni að setja einhverjar færslur inn um helgina.

Afmælisbörn dagsins
Gleymdi náttúrlega afmælisbörnum dagsins í færslunni fyrr í dag.
Fyrstan skal nefna Sigurð Loftsson stórbónda í Steinsholti og fyrrum fóstra minn sem varð 42 ára í dag og er því nákvæmlega jafngamall Surtsey gömlu.
Síðan er hjúskapur foreldra minna árinu yngri en þau gengu í það heilaga þann 14. nóvember 1964 ásamt reyndar Ingibjörgu systur hans pabba og manni hennar Þorbergi.
Síðastur en alls ekki sístur er síðan Emil gamli sem varð 29 í dag og fær hamingjuóskir Ljós-Gíslans eins og önnur afmælisbörn.
Til hamingju öllsömul.

Erlendir strætisvagnabílstjórar
Sá um daginn einhvers staðar á netinu að menn eru farnir að væla yfir því það séu útlendingar sem ekki skilja íslensku farnir að keyra strætó. Ég skil ekki vandamálið. Þeir sem taka á strætó á Íslandi eru útlendingar sem eru vanir almenningssamgöngum frá heimalandi sínu og svo unglingar sem eru ekki með bílpróf. Hvorugir tala yfirleitt almennilega íslensku svo ég sé ekki ástæðu til að krefjast þess af bílstjóranum að hann tali hana reiprennandi. Svo er líka bannað að tala við vagnstjórann. Maður á nefnilega að standa fyrir aftan rauðu línuna ef ég man rétt. Það eina sem vagnstjórinn þarf að kunna í íslensku er fargjaldið: "1500 kr fyrir fullorðna og 1499 fyrir börn". Svo þarf hann að geta sagt "ef þú átt ekki pening drullaðu þér út". En annars að öllu gríni slepptu þá finnst mér bara sniðugt að ráða útlendinga í þjónustustörf og þessi. Neyðin kennir þeim þá fyrr að tala íslensku sem er náttúrlega bara frábært, bæði fyrir þá og okkur hin.

Helgin
Er búinn að vera fremur rólegur um helgina þrátt fyrir að vera ekki í vinnunni. Á föstudaginn vorum við skötuhjúin bara róleg hérna heima að vinna í boðskortamálum og ég fékk mér einn bjór. Það var bara fínt að vera heima svona einu sinni og slaka á þó undirbúningur brúðkaupsins hafi verið meginþema kvöldsins. Síðan var tekið á því í gær því ég fór í Laugar í gærmorgunn. Síðan var farið í Smáralind í allskyns búðastúss þar sem ég keypti mér þessa líka fínu íþróttapeysu í Zara. Við urðum líka vitni að því þegar 470 jójógráðug börn settu heimsmet í fjöldajójói. Það ótrúlegt hvað hægt er að fá fólk til að gera fyrir ókeypis hluti.
Eftir Smáralind fór ég aðeins í spæjaragírinn og fann nokkur heimilisföng hjá tilvonandi brúðkaupsgestum en seinni partinn fór ég síðan í boltann og loks í mat til Svenna mágs sem hélt matarboð fyrir nánustu fjölskyldu í tilefni af afmælinu sínu. Þar fékk maður aðeins í aðra tánna og frábært læri líka. Komum heim um tvöleytið og þá fór ég algerlega uppgefinn í bælið.
Svaf síðan frameftir í morgunn og er svo búinn að vera í þessu boðskortaveseni í allan dag. Það gengur ágætlega.
Ætla síðan að gera heimatilbúna pizzu fyrir okkur á eftir en við verðum sjálfsagt langt fram á kvöld í þessu stússi öllu saman.

Króatinn á vertíð
Króatinn var svo blankur að hann skellti sér á vertíð til Ísafjarðar. Þar stundar hann hvalveiðar af kappi um helgar en í miðri viku skrifar hann ritgerð af miklu kappi. Sendum honum baráttukveðjur á Ísafjörð. Áfram Krói - You can do it!!!

England-Argentína
Helvítis Tjallarnir geta þetta þá ennþá. Owen litli er að blómstra hjá Newcastle og sannaði sig enn og aftur í gær með því að skora 2 í lokin eftir að hafa varla sést í leiknum (ef marka má lýsingar). Það eru alltaf góðir framherjar sem geta átt lélegan leik en samt skorað tvö mörk. Annars verð ég nú að segja að mér finnst mest gaman þegar S-Ameríkuþjóðirnar vinna þessa heimsmeistaratitla því fótboltinn þeirra er bara svo miklu skemmtilegri og meira fyrir augað. Ég held ég haldi bara í gamlan vana og haldi með Brössum á næsta HM.

Boltinn
Ég er að verða svolítið leiður á öllum þessum fréttum af mönnum sem MUFC á að vera á höttunum eftir. Best væri að sögurnar hættu bara alveg og þeir keyptu menn í stað þess að slúðra um það. Eða þá ekki. Maður vinnur ekki titla á að slúðra í blöðin. Ef þetta lið þarna eyddi helmingnum af þeim tíma sem þeir nota í að blaðra við blaðamenn þá mundi kannski eitthvað ganga upp hjá þeim.

Andleysi
Ég hef eitthvað svo lítið að segja þessa dagana. Kannski er það af því að ég hef verið að vinna svo mikið eða kannski er það bara af því að ég er sprunginn. Heimsækið mig daglega næstu vikurnar og þið munuð komast að því hvort er.

Skottulæknir
Sá Birnu Smith í Kastljósinu í gær. Hvernig er hægt að vera svona ótrúlega ósvífin. Konan sat þarna í beinni útsendingu í Ríkissjónvarpinu og hélt því fram fyrir framan alþjóð að hún gæti talað við stofnfrumuna (ath. ekki fleirtala heldur eintala) og þannig læknað sjálfa sig af alls kyns kvillum. Mér fannst Magnús Karl komast vel frá þessu því hann hrakti allt sem hún sagði án þess að vera ókurteis eða hleypidómafullur. Hann bara svaraði henni með vísindalegum rökum. Greyið konan gerði sig að algeru fífli og maður eiginlega vorkenndi henni bara að vera svona ótrúlega eitthvað bjánaleg. Það er nú lágmark að koma sæmilega undirbúin í svona rökræður en það var augljóst að konugreyið hefur aldrei einu sinni litið í líffræðibókina sína í gaggó. Mér liggur við að segja að hún hafi ekki einu sinni verslað í bókabúð sem selur líffræðibækur, svo illa var hún að sér. Nú er ekki svo að ég sé alfarið á móti óhefðbundnum lækningum. Síður en svo. Ég er bara á móti því að svona loddarar haldi því fram að þeir geti læknað sjúkdóma með eintómu kukli af því að einhver lærifaðir þeirra sem sennilega er geðveikur segir þeim að það sé hægt. Ég er líka á móti kuklurum sem ráða skjólstæðingum sínum að afþakka hefðbundnar vísindalega rannsakaðar meðferðir og þiggja í staðinn eitthvað djöfulsins óvísindalegt og ósannað fimbulfamb. Þetta jaðrar á köflum við tilraun til manndráps.
Ég ber hins vegar virðingu fyrir þeim sem bera virðingu fyrir læknavísindunum. Fjölmargir iðkendur óhefðbundinna lækninga leggja hart að skjólstæðingum sínum að þiggja áfram hefðbundnar meðferðir og útskýra fyrir sjúklingnum að hvor aðferð fyrir sig hjálpi hinni í virkni sinni. Hvort sem það er rétt eður ei er víst að margar óhefðbundnar aðferðir gera fólki, sem er komið á fremsta hlunn með að gefast upp, kleift að sjá einhverja von áfram og hún er það mikilvægasta sem langveikur sjúklingur býr yfir.

Kári fór líka á kostum!!!
Kári fór líka á kostum í þess Kastljósi og ræð ég þeim sem misstu af honum að nálgast hann. Held það sé hægt á netinu. Kári var eins og snaróður vísindamaður með silfurgrátt hárið upp í loftið og tryllingslegt augnaráð. Síðan fór hann í stríð við eyrnagræjuna og þá var orrustan töpuð. Hann hringsnerist í stúdíóinu og sýndi myndavélinni rassinn ítrekað. Það vantaði bara að hann múnaði í myndavélina.

Læt þetta duga í bili. Látið endilega heyra í ykkur á kommentakerfinu. Það gengur ekki að þetta sé bara spjallþráður fyrir þá Heiðar og Þorgeir.

Afmælisbarn dagsins!!
Edda mín átti afmæli í dag, 10. nóvember og varð hún 27 ára. Það var haldin smá afmælisveisla fyrir nánustu vini og vandamenn. Í gær átti tengdapabbi líka afmæli og gleymdi ég að senda honum kveðju þá. Er það gert hér með. Til hamingju með afmælið bæði tvö.

Vinna og aftur vinna
Var að klára svolítið erfiða vaktaviku. Tók 5 vaktir á 8 dögum. Það getur tekið helvíti hraustlega á, sérstaklega ef það er mikið að gera. Nú tek ég ekki vakt í nokkra daga og get hlaðið batteríin en þetta eru reyndar fremur erfiðar vikur framundan þar sem ég er að taka vaktir aðra hverja helgi í einn og hálfan mánuð. En maður kvartar ekki því yfirleitt finnst mér gaman í vinnunni (að því undanskildu að það er ekki gaman að fólk skuli vera veikt).

Brúðkaupsundirbúningur
Það er allt að komast á fullt. Boðskort, tónlist, matur, ljósmyndari o.s.frv. Ætli við verðum ekki orðin brjáluð áður en yfir líkur. Það er alla vega frá að panta kirkju, prest og sal. Gott að vera búinn að því. Nú er bara spenningurinn hjá ykkur félagar. Fáið þið boð eða ekki. Það er spurningin.

Heiðar og Þorgeir
Þeir félagar eiga greinilega margt vantalað. Þeir standa í þeirri trú að commentakerfið mitt sé spjallþráður fyrir þá og verði þeim að góðu. Við hin höldum þá bara áfram að nota MSN. Njótið piltar.

Prófkjörið
Þá er prófkjörinu lokið og flokkurinn getur snúið sér að baráttunni um borgina. Þrátt fyrir að baráttunni um fyrsta sætið hafi ekki lokið eins og ég vonaði er margt jákvætt við niðurstöðuna.
Í fyrsta lagi eru konur augljósir sigurvegarar í prófkjörinu. Hanna Birna nær örugglega öðru sætinu og síðan eru fjórar aðrar konur í tíu efstu sætunum. Það er langt síðan konur hafa náð svona glæsilegum árangri í prófkjöri flokksins og ég held að við sem höfum stutt flokkinn ættum að vera stolt af þessu. Sennilega hefur nýafstaðin kröfuganga kvenna í borginni átt sinn þátt í þessum glæsilega árangri en ég held að meginástæða þessarar frábæru niðurstöðu sé sú að þessar konur eru einstaklega frambærilegar, hver á sinn hátt.
Í öðru lagi held ég að við getum fagnað því hvað unga kynslóðin stóð sig vel í þessu prófkjöri. Af tíu efstu eru sjö sem eru yngri en fertugir og átta yngri en fimmtugir. Júlíus Vífill er fæddur 1951 og Vilhjálmur 1846... nei ég meina 1946. Ég tel því að Sjálfstæðismenn séu að veðja á nýja kynslóð í flokknum og það er gott.
Í þriðja lagi finnst mér mikilvægt að flokksmenn eru að veita mörgum einstaklingum sem ekki hafa verið áberandi í borgarpólítíkinni kjörgengi. Það er sem sé ekki bara unga kynslóðin sem er að ryðja sér til rúms heldur líka mikið af nýju fólki. Þetta held ég að muni reynast mjög mikilvægt þegar kemur að kosningunum í vor.
Það er svo sem ekki margt neikvætt við þetta prófkjör að mínu mati. Það helsta er að Vilhjálmur skyldi sigra en ég vona bara að hann komi mér á óvart. Auk þess finnst mér ekki gott hvað Júlíus Vífill og Bolli enduðu ofarlega. Ég er ekki sérlega hrifinn af þeim tveimur af ástæðum sem ég ætla ekki að básúna hér. Látum bara sitja við það að mér líkar ekki fyrri saga þeirra innan sem utan flokksins.
Í framhaldinu held ég að það væri sterkur leikur að færa Gísla Martein niður í áttunda sætið og nýta sér þannig það mikla persónufylgi sem hann hefur og færa síðan þá sem eru á milli hans og áttunda sætisins ofar sem því nemur. Ég er hvorki viss um að prófkjörsreglur leyfi þetta (hef ekki kynnt mér það) né hvort Gísli Marteinn væri yfirhöfuð fáanlegur til þess ef reglur flokksins leyfðu.

Boltinn
Mínir menn stóðu sig í gær þrátt fyrir hrakspár mínar. Frábært afrek að binda enda á 40 leikja sigurgöngu Chelskymanna. Maður minnist með gleði í hjarta á það þegar við bundum enda á aðra aðeins lengri sigurgöngu í fyrrahaust um svipað leyti. Mér skilst nú að úrslitin hafi ekki endilega verið alveg sanngjörn, að kannski hefði jafntefli gefið rétta mynd af gangi leiksins en mér er sama. Þrjú stig eru gulls ígildi hverjir svo sem andstæðingarnir eru og hvernig sem þau nást. Það er líka augljóst að Keane hefur mikil áhrif á frammistöðu sinna manna þrátt fyrir að hann spili ekki leikina sjálfur. Þvílíkur leiðtogi. Þó hann hafi dalað töluvert á síðastliðnum árum held ég að það verði erfitt að finna arftaka hans. Svona miðjumenn fæðast ekki nema einu sinni á áratug. Nú vona ég bara að mínir menn finni sjálfstraustið sem þá hefur vantað svo tilfinnanlega síðastliðnar vikur.

Da Vinci Code
Var að ljúka við þessa frábæru bók og hef verið að surfa á netinu í leit að allskyns vitleysu tengdri því sem kemur fram í bókinni. Dan Brown hefur lagst yfir ótrúlega heimildavinnu áður en hann setti saman þessa frábæru sögu og verður hann að fá hrós fyrir frábæra fléttu og einstaka frásagnargáfu. Sumt fólk er bara fætt til að segja sögur. Ég las þessar tæpu 600 síður á rúmri viku, þar af hef ég lesið rúmlega 300 núna um helgina. Ég hef verið á næturaktinni um helgina og það hefur verið fremur rólegt auk þess sem ég hef verið andvaka síðustu tvær nætur eins og sést á ókristilegri tímasetningu þessarar færslu.
Annars þá finnst mér "plottið" alveg frábært en ætla að sjálfsögðu ekki að ljóstra upp um það hér ef vera skildi að einhver annar en ég sé ekki löngu búinn að lesa bókina. Ef það á við um eitthvert ykkur ræð ég þeim hinum sama að ráða bót á því hið snarasta.

Prófkjörið
Fór að kjósa áðan og Valhöll var full út úr dyrum. Þrátt fyrir að vera skráður í flokkinn þá fékk ég bara tvær hringingar. Þær voru frá Davíð Ólafi og hringdi Hafsteinn í mig í morgunn en ég geri ráð fyrir að það hafi verið fyrir Gísla Martein. Það verður gaman að fylgjast með þessu í kvöld og sjá hvernig þetta fer allt saman. Ég vona að Gísli nafni minn vinni en ég vona eiginlega enn frekar að Sjálfstæðismenn hafi séð sóma sinn í kjósa allar þessar efnilegu konur. Það væri klókt fyrir komandi kosningar að stilla upp lista með þessum efnilegu konum.

Boltinn
Ég þori ekki fyrir mitt litla líf að horfa á leikinn á morgunn. Ég vona auðvitað að mínir menn standi sig en ég get ekki hugsað mér að sjá þá tapa fyrir Chelsky. Annars held ég að Ferguson verði rekinn fljótlega ef þetta fer ekki að ganga. Hann er of stoltur til að segja upp og það gæti gert það að verkum að stjórnin verði að reka hann. Það væri leiðinlegur endir á annars frábærum ferli þessa magnaða þjálfara.

Nína Þorbjörg
Gleymdi að minnast á í síðustu færslum að Árni Grímur og Steinunn hafa nefnt litluna sína þessu fallega nafni. Til hamingju með nafnið öllsömul.

Annars ætla ég að láta þetta gott heita í dag. Skrifa aftur fljótlega.

Prófkjörið
Ég er svolítið hissa á einu. Þrátt fyrir að vera skráður í Sjálfstæðisflokkinn hef ég ekki fengið eitt einasta símtal frá frambjóðendunum. Kannski halda allir að ég sé of þver til að mér verði snúið og kannski hafa þeir nokkuð til síns máls. Ég er tiltölulega þver eins og fólk sem þekkir mig veit en það er nú kannski eitthvað sem framtíðarpólítíkusar verða að geta gert. Sannfært þá sem eru ósammála þeim. Ég frétti til dæmis í dag að ég er með fýlukall fyrir framan nafnið mitt í skránum hjá Vilhjálmi. Ekki veit ég hvernig þeir fengu það út enda hefur enginn þeirra talað við mig. Kannski eru framboðin með lið í að fletta nafni frambjóðandans upp á Google á hverjum degi til að fylgjast með andanum í þjóðfélaginu. Hver veit? Þó ég hafi ekki trú á að Vilhjálmur leiði hægrimenn til sigurs var ég nú að spá í að hafa hann ofarlega á mínum lista en nú er ég ekki svo viss. Hvurslags eiginlega stjórnmálamaður gefst bara upp? Ég bara spyr.
Annars hef ég haldið áfram að kynna mér frambjóðendurna og ég er kominn á þá skoðun að loksins loksins er kominn stór hópur af frambærilegum konum í framboð fyrir flokkinn. Loksins eru komnar konur í framboð sem eru raunverulegir valkostir. Ég held bara að það endi með því að ég setji þær allar á listann hjá mér og sumar þeirra mjög ofarlega. Ekki nóg með að þær séu með ágætis áherslur í málefnum heldur koma þær þeim frá sér með sóma og hafa persónutöfra í ríkum mæli. Áfram stelpur!! ;)

Stund sannleikans
Var á vaktinni í nótt og því átti ég vaktafrí í dag. Við pabbi nýttum daginn í hestastúss. Sindri hennar Eddu er loksins kominn á tamningaraldur og er búinn að vera hjá tamningamanni í mánuð. Það var orðið ágætt í bili enda Sindri ennþá hálfgerður unglingur. Hann er hins vegar að lofa rosalega góðu og ég var í það minnsta meiriháttar ánægður með framfarirnar. Nú fær hann frí eitthvað fram á vorið og þá kannski tek ég aðeins til við hann sjálfur og kenni honum praktíska hluti eins og að teymast og fleira. Hann lofar alla vega mjög góðu og mér skilst á tamningamanninum að hann verði góður konuhestur sem eru nákvæmlega það sem hann átti að verða.

Fótboltinn
Nú er ég alveg að gefast upp á mínum mönnum. Þeir voru að tapa í Meistaradeildinni fyrir Lille og nú er útlitið svart. Kannski er bara kominn tími á að láta Ferguson fara og selja Keane. Ég er nú ekki sammála Keane samt með Richardson sem hefur verið að standa sig ágætlega. En ég er fullkomlega sammála honum með Rio og Fletcher. Þeir hafa bara ekki verið að sýna neitt með liðinu í vetur og ég var hissa að sjá Rio í liðinu í kvöld. Ég held samt að það sé hægt að leysa vandamálið með einum eða tveimur góðum miðjumönnum. Sjáum til hvernig fer en ég held að ef ástandið lagast ekki á næstu vikum fái einhverjir hausar að fjúka um áramótin.

Helgin...
...var rosaleg. Var reyndar rólegur á föstudag og horfði á ræmu með Eddu, Möggu og Magga. Tek umfjöllun hérna að neðan. Á laugardaginn var síðan nóg að gera. Fór í ræktina, svo að hjálpa tengdapabba með einhverja skápa. Síðan að versla og svo kíkti ég aðeins á settið. Seinnipartinn kíktum við Edda til Írisar og Halldórs og við Halldór horfðum á leikinn saman og grétum. Ömurlegt. Um kvöldið var svo árshátið knattspyrnufélagsins Duffa sem tókst frábærlega. Nánar um það hér að neðan. Sunnudagurinn fór síðan að mestu í þynnku en ég kíkti þó í fjölskylduboð í tilefni af 85 ára afmæli afa sem á reyndar afmæli í dag eins og Svenni mágur. Til hamingju með það báðir tveir.

Uppskeruhátíðin
Jóhann Sveinn var óumdeildur maður kvöldsins á uppskeruhátíðinni og hirti verðlaun sem besti leikmaðurinn, besti varnarmaðurinn, besti sturtufélaginn auk þess sem hann fékk verðlaun fyrir flest D í sumar en fyrir þá sem ekki vita voru gefin 0-4D fyrir frammistöðu í leikjum í sumar. Maggi Ella var dauðafærabani ársins annað árið í röð en margir öttu við hann kappi, þar með talinn undirritaður. Maggi Gísla var valinn síbrotamaður Duffa, Eiki var hrakfallabálkur ársins (eftir harða keppni við mig) og Gauti var besti nýliðinn. Grétar og Biggi komust í hundrað leikja klúbbinn en fyrir í honum var Gestur stjóri. Einhver fleiri verðlaun voru veitt en ég man þau ekki í svipinn.

Alexander
Tók þessa mynd á föstudaginn. Bjóst svo sem ekki við miklu enda fékk hún skelfilega dóma á sínum tíma. Hún var samt verri en ég bjóst við. Þegar maður tekur mynd um mesta herstjóra sögunnar býst maður við mynd um stríð en myndin snýst eiginlega meira um kynhneigð Alexanders og undarlegar ákvarðanir hans í einkamálum sínum. Myndina vantar tilfinnanlega alla orku og heldur sjaldan dampi. Ef þið ætlið að sjá hana er ráðlegt að fá hana bara lánaða á netinu eða eitthvað. Það er alla vega ekki þess virði að borga leigu fyrir hana.

Prison Break
Shitturinn titturinn hvað ég er orðinn háður þessum þáttum. Átta þættir búnir og þeir verða sífellt meira spennandi. Fylgist með þegar og ef þeir koma hingað.

Prófkjörið
Hef markvisst verið að kynna mér frambjóðendurna í prófkjörinu hjá Sjálfstæðismönnum í Reykjavík. Verð ég nú að segja að ekki er um auðugan garð að gresja. Ég er nú reyndar búinn að finna nokkra sem ég gæti hugsað mér að setja á listann en það eru margir sem ég er búinn að útiloka. Það verður erfitt að finna níu manns til að setja á listann en ætli síðustu þrjú til fjögur sætin verði ekki bara uppfyllingarefni.

Vinnan
Ég er að fíla mig mjög vel í vinnunni. Svæfingar og gjörgæsla eiga áhuga minn allan þessa dagana. Ég ætla að láta aðra um að dæma frammistöðuna en ég skammast mín alla vega ekki eftir hverja einustu vakt fyrir hana. Manni er líka treyst fyrir sífellt meiru þannig að maður tekur sennilega einhverjum framförum. Sjáum hvort mér tekst að halda vinnunni út ráðninguna. Þá er ég alla vega skárri en ekki neitt.

Leikir gærdagsins
Gaman að sjá að Chelsky datt út úr bikarnum eftir yfirlýsingar þess efnis í gær að þeir ætluðu að taka allar dollurnar fjórar í ár. Stundum er bara betra að halda kjafti og láta verkin tala. Mínir menn fóru hins vegar létt með neðrideildarliðið Barnet eins og maður reyndar bjóst við. Ferguson stillti upp algeru B-liði og stóðu menn sig almennt vel miðað við aldur og fyrri störf. Rossi heldur áfram að skora þegar hann fær tækifæri í liðinu. Richardson stendur sig líka vel svo það er bjart yfir framtíðinni hjá okkur United-mönnum. Annars held ég að Chelsea gæti alveg unnið þessar þrjár keppnir sem þeir hanga enn inni í því þeir eru með ótrúlega sterkt lið. Vörnin er traust og þeir eru farnir að raða inn mörkum svo ég held að það sé engin örvænting yfirvofandi hjá þeim. Þeir taka í það minnsta deildina létt og við sjáum svo til með Evrópukeppnina og bikarinn.

Prófkjörið
Hef verið að kynna mér betur frambjóðendurna í prófkjöri Sjálfstæðismanna í Reykjavík aðeins í morgunn. Er nú ekki búinn að lesa síðurnar þeirra spjalda á milli en það eru nú ekki margir sem heilla mann upp úr skónum. Það er hins vegar einn Hannes í framboði og auðvitað setur maður hann ofarlega á lista í prófkjörinu. Þetta er Davíð Ólafur Ingimarsson sem er úrvalsnáungi og raunar er mér hulin ráðgáta hvernig hann getur talist til fylkingar Bolla Thoroddsen í Heimdalli. Ég ætla þó ekki að erfa það við Davíð að hann hafi stutt Bolla og set hann því í það sæti sem hann biður um. Hannesar er vel hvar sem þeir koma sér fyrir. Áfram Davíð!!!

Bolli
Bolli ætlar sér í 5. sætið held ég en það er ekki fræðilegur möguleiki að ég setji hann á minn lista. Maður sem dregur svo mikla neikvæða umfjöllun að sér í kringum kosningar í Heimdalli verður held ég aldrei frambærilegur borgarfulltrúi. Hann fær sko ekki kjörgengi fyrir tilstilli míns atkvæðis og vona ég lesendur góðir að þið farið að mínu fordæmi.

Maggi Gylfa þjálfar Víking
Ég er ánægður með hvernig Maggi Gylfa hefur byrjað sem þjálfari. Ekkert múður hjá Magnúsi. Hann hefur sent þeim Grétari, Stefáni og Viktori þau skilaboð að menn sem eru samningsbundnir Víkingi og mikilvægir hlekkir í liðinu muni ekki verða lánaðir eða seldir nema fyrir ásættanlega fjárhæð og þá til útlanda. Þetta þýðir að Viktor og Grétar munu að óbreyttu spila með okkur næsta sumar og verður það gífurlegur liðsstyrkur. Áfram Víkingur!!!

Feitir vs. reykingamenn
Edda kom hérna heim um daginn og hafði verið að horfa á heimildamyndina um McDonald's gaurinn og var að segja mér frá snilldarlegri athugasemd aðalsöguhetjunnar í þeirri mynd. Við hikum ekki við að biðja fólk að drulla sér með sígarettuna sína. Við gerum vinum og ættingjum lífið leitt um leið og það kveikir sér í rettu. En hvað með hina sem geta varla gengið sökum fitu. Þeir byrja að troða í sig í fermingarveislunum og það eina sem fólk gerir er að snúa sér undan og hugsa: "Greyið". Af hverju er svona auðvelt að ráðast á reykingamenn en erfitt að segja fitubollunum til syndanna. Mér finnst þetta góð pæling.

Andríki
Þeir sögðu í grófum dráttum það sem ég var búinn að skrifa en hætti við að birta. En eins og ég sagði hér í gær þá fannst mér, í þessu tilfelli, tilgangurinn helga meðalið. Það verður líka að taka það fram að stór hluti þeirra kvenna sem arkaði niður Skólavörðustíginn á mánudag fær nákvæmlega sömu laun og karlmenn í sömu stöðu. Kennarar, leikskólakennarar, hjúkrunarfræðingar, læknar og svo mætti lengi telja. Launahækkanir ráðast í þessum störfum af námi, starfsaldri, lífaldri sums staðar og fleiri sambærilegum hlutum. Þetta er greypt í kjarasamninga og lítið sem ekkert svigrúm til að mismuna fólki á grundvelli kyns eða nokkurs annars sem yfirmenn kynnu að hafa áhuga á að gera.
En böggull fylgir skammrifi því það er heldur ekki hægt að verðlauna fólk fyrir framúrskarandi árangur í vinnu. Það er bara ekki í boði. Þó ég væri afburða starfskraftur sem sýndi meiri afköst, meiri hæfileika, meiri metnað, betri mætingu og væri bara á allan hátt betri en starfsbróðir/-systir minn/mín þá hefði yfirmaður okkar ekki nokkurn möguleika á að verðlauna mig sérstaklega, launalega séð. Ég er ekki viss um að það sé endilega gott heldur, ekki einu sinni fyrir stelpurnar sem oft á tíðum eru framúrskarandi læknar.

Sælinú!
Ég var í gær búinn að skrifa langan pistil um kosti og galla þessa kvennafrídags en þó aðallega gallana. Ég ákvað af virðingu við móður mína og verðandi eiginkonu að endurskoða pistilinn áður en ég birti hann og í kjölfarið hætti ég við að birta hann. Stundum er það þannig að tilgangurinn helgar meðalið og ég held að konur hafi rétt sloppið fyrir horn í þetta skiptið.

Boltinn
Mínir menn eru ekki alveg að standa sig þessa daganna. Tvö jafntefli í röð á heimavelli eru ekki ávísun á meistaratitla þegar vorar. Annars er ég ánægður með ýmislegt í leik minna manna en mér finnst eins og það vanti breidd og kannski svolítið hungur í liðið. Þeir leika eitthvað svo áhugalausan fótbolta þessa dagana.

Olnbogaskot
Talandi um fótbolta þá er ég duglegur að mæta á æfingar. Í gær var ég á einni slíkri og var ekki ánægður á eftir. Þannig er það að einn félagi minn fór í sama skallaboltann og ég nema hvað honum hefur verið kennt að baða olnbogunum út í loftið af einhverjum miður gáfuðum knattspyrnuþjálfara í yngri flokkum. Hann hitti mig svona hressilega í augað að ég fékk risastórt glóðarauga hægra megin og sé illa út úr auganu í dag sökum bólgu. Ég hef ákveðna skoðun á því þegar mann verja sig svona með olnbogunum. Mér finnst að það eigi að banna það, hengja alla þá þjálfara sem kenna mönnum þetta og gefa mönnum beint rautt fyrir í leikjum ef olnbogar þeirra hitta höfuð andstæðingana. Þá finnst mér einu gilda hvort menn gefa olnbogaskotið viljandi eða óviljandi (eins og var raunin í gær því hann vissi ekki af mér). Það er alveg á hreinu að menn setja olnbogana á undan sér í ákveðnum tilgangi og með vilja og þó þeir ætli sér kannski ekki endilega að hitta mótherjana með þeim þá er það óneitanlega alltaf hættan að það gerist. Þú þarft að vera alvarlega greindarskertur eða þá heilaþveginn til að stökkva með olnbogana í höfuðhæð á móti öðrum manni því þetta getur verið lífshættulegt eins og dæmin sanna.
Menn afsaka sig yfirleitt með einhverjum fáránlegum afsökunum eins og "það gera þetta allir" eða "þú stökkst bara á olnbogann á mér" en báðar eru slakar. Þetta er svona eins og að keyra á 100 km hraða í íbúðargötu og segja svo bara að barnið hafi hlaupið á bílinn þegar þú ert búinn að keyra yfir það. Menn taka áhættu og verða að taka afleiðingunum af því.
Hitt er svo annað mál að þessi félagi minn er langt frá því að vera einhver heiladauður hálfviti. Þetta er virkilega viðkunnalegur og klár náungi sem er aldrei annað en ljúfmennið uppmálað utanvallar. Þetta er bara týpískt dæmi um þann heilaþvott sem ungir fótboltamenn mega þola af forheimskum fótboltaþjálfurum alls staðar í heiminum. Strákum og stelpum er kennt að þetta sé eina leiðin til að fara upp í skallabolta. Staðreyndin er reyndar sú að það er ekkert mál að fara upp í og jafnvel vinna skallabolta án hjálpar olnboganna. Ég fer aldrei með þá á undan og hef örugglega unnið hlutfallslega mjög marga miðað við hæð og fyrri störf. Þetta er miklu meira spurning um stökkkraft og tímasetningar en einhverja helvítis olnbogavörn.

Hamingjuóskir
Haffi og Hrefna voru að trúlofa sig á dögunum. Ljós-Gíslinn óskar þeim innilega til hamingju með áfangann og vonar að lífið brosi við þeim hér eftir sem hingað til.

Erfið helgi!
Ég hef ekki verið sérlega duglegur að blogga um helgina enda aðallega unnið og sofið. Reyni að bæta úr bloggleysinu í vikunni.

Salka Valka
Fór í gær með Eddu, Möggu Pálu og tengdamömmu á Sölku Völku í Borgarleikhúsið. Þetta var bara nokkuð skemmtilegt. Almennt fannst mér uppsetningin skemmtileg, sviðið opið og lýsingin hjálpaði mikið til við að marka skil í tíma. Mér finnst hins vegar hljómburðurinn ótrúlega slakur og maður sá að gestir áttu oft í vandræðum með að greina orðaskil, sérstaklega þegar margir voru að tala.
Hvað leikarana varðar þá voru nokkrir sem voru góðir. Ilmur átti frábæra frammistöðu sem Salka og er svo sannarlega að stimpla sig inn sem ein mest spennandi leikkonan hérlendis að mínu mati. Sveinn Geirsson var góður sem Arnaldur og Halldóra Geirharðsdóttir var ágæt sem móðir Sölku en mér fannst Ellert A. Ingimundarson eiginlega bestur en hann lék Steinþór. Laddi fór einnig á kostum í nokkrum hlutverkum og var sérlega góður sem Jóakim, einn af kærustum móður Sölku.
Annars mæli ég eindregið með því að þið skellið ykkur að sjá stykkið, það er klárlega þess virði.

Boltinn
Mínir menn hér heima búnir að ráða Magnús Gylfason sem þjálfara. Ég veit ekki hvort ég er sáttur við það en maður verður víst að sætta sig við hann næstu 2 árin miðað við fréttirnar því samningurinn er óuppsegjanlegur af beggja hálfu í þessi tvö ár. Hann er hins vegar harður á því að Viktor Bjarki og Grétar Sigfinnur komi heim eftir að hafa verið í láni hjá Fylki og Val svo það er í það minnsta jákvætt. Sjáum til hvað hann gerir karlinn.

Kranabyltan
Ég er þessa vikuna á Gjörgæslunni og kranabyltan fræga blasir við okkur ofan af 6. hæð. Það var nú enginn smáhvellur þegar hann hlunkaðist niður og maður hélt bara að eitthvað hefði hrunið í gólfið uppi á deild í fyrstu. En það voru einhverjir þarna sem höfðu séð það sem gerðist svo maður var fljótur að átta sig. Í dag eru þeir búnir að vera að rembast eitthvað við að lyfta krananum og þegar ég fór heim voru þeir að búa sig undir að rétta kranabílinn við. Fyrr í dag færðu þeir kranaarminn, sem verið var að lyfta þegar slysið varð, í burtu í nokkrum pörtum og virtist það ganga vel. Líklega verður allt búið í fyrramálið þegar ég kem í vinnuna.

Sheringham er snillingur
Sá þessa frábæru frétt á www.tribalfootball.com. Hann kann sko að koma fyrir sig orði þó hann sé orðinn gamall og hrumur.

Andríki
Góð grein á Andríki í dag um ökuleyfi atvinnubílstjóra. Kíkið þangað.

Boltinn
Mínir menn fóru illa að ráði sínu í kvöld og náðu aðeins markalausu jafntefli gegn Lille á heimavelli í meistaradeildinni. Auk þess meiddist Giggs og Scholes fékk rautt þannig að hópurinn er aldeilis tekinn að þynnast. Vonandi geta ungu strákarnir staðið undir væntingum og hjálpað liðinu í gegnum öll þessi meiðsli á næstu vikum. Annars hef ég fremur litlar áhyggjur af þessu. Ég held að við munum taka Lille í Frakklandi og klára þennan riðil með stæl. Sjáum hvað setur.
Meiri áhyggjur hef ég hins vegar af mínum mönnum hér heima því Víkingar hafa enn ekki ráðið til sín þjálfara fyrir næsta sumar sem er sérlega slæmt þegar maður hugsar til þess að félagaskiptaglugginn hefur þegar opnað. Vonandi fer stjórnin að klára þetta sem fyrst og ég vona persónulega að Þorvaldur Örlygsson taki þetta að sér.

Heilsuátakið mikla
Þetta gengur enn sem komið er hörkuvel. Ég er þegar farinn að grennast og hlaupaformið kemur rólega. Ég er líka farinn að þyngja í lyftingunum og mestu harðsperrurnar farnar úr magavöðvunum. Ég hef haldið dampi sl. daga og er búinn að fara á hverjum degi sl. 8 daga í Laugar auk þess sem ég hef spilað fótbolta 3 af þessum dögum líka. Það magnaðasta er þó það að ég ekkert farinn að láta mér leiðast þetta. Læt ykkur vita hvernig gengur.

Settið að skipta um postulín
Kamarinn hjá settinu er fokheldur þessa dagana. Þau rifu bókstaflega allt út og ætla að skipta um heila klabbið. Pabbi er búinn að vera með sveittan skallann sl. daga við að rífa út og svo kom píparinn og lagði í þetta í gær. Svo kom flísalagningamaðurinn í dag og allt er komið á fulla ferð við að múra og pússa og ég veit ekki hvað og hvað. Páfinn hefur boðað vígsluathöfn með aðstoð Ljós-Gíslans að viku liðinni. Ef kostnaðar- og framkvæmdaáætlanir standast verður jafnvel boðið upp á þriggja skáka einvígi.

Fiskur er hollur og góður
Á þessu staglaðist mamma alla mína æsku. Ég mótmælti því svo sem ekki að hann væri hollur enda hafði ég ekki mikið vit á því. En góður var hann sko ekki. Ég fussaði og sveiaði í hvert skipti sem fiskur var á boðstólnum. Mamma þreyttist hins vegar aldrei á því að hafa fisk svo ég fékk hann a.m.k. einu sinni í viku allan minn uppvöxt. Smátt og smátt lærði ég að meta fiskinn að verðleikum og eftir að ég flutti að heiman hef ég saknað þess sífellt meira að fá ekki fisk reglulega. Nú er svo komið að ég elska humar og skötusel og mér finnst steiktur fiskur ennþá alveg rosalega góður með soðnum kartöflum og kokkteilsósu. Ég er farinn að panta mér fisk á veitingastöðum en slíkt hefði ég talið ávísun á geðveiki fyrir nokkrum árum.
Nú síðustu dagana hef ég verið að velta fyrir mér framtíð Reykjavíkur og hvernig væri hægt að tryggja framtíð hennar. Þá mundi ég eftir orðum mömmu gömlu og komst að þeirri niðurstöðu að Reykjavík þyrfti bæði hollan og góðan fisk!!!! Og viti menn! Jú!! Gísli Marteinn er fiskur. Þess vegna held ég að hann sé framtíðarkostur Reykvíkinga.
En að öllu rugli slepptu hef ég ákveðið að styðja hann í prófkjörinu. Það þarf einfaldlega unga og ferska vinda inn í pólítíkina. Gísli er eini raunhæfi kosturinn eins og er. Áfram nafni.

Vinnan
Ég er farinn að finna mig vel í vinnunni finnst mér. Ég hlakka til að fara í vinnuna á morgnana og mér finnst gaman á vöktunum. Kannski er ég bara búinn að finna mína hillu eða kannski fæ ég leið á þessu eftir nokkra mánuði. Alla vega er ég alsæll núna og vona að svo verði áfram.

Afmælisbörn
Í gær áttu afmæli tveir snillingar. Sigrún mágkona mín, eiginkona Jóns Braga bróður, varð 25 í 13da skipti og Sveinn Fannar Sveinsson bróðursonur Eddu varð 7 ára. Til hamingju með daginn bæði.

Nýjir tenglar
Var að bæta við skemmtilegum tenglum. Annars vegar er heimasíðan hans Magga sem er kærasti Möggu systur hennar Eddu. Helvíti gott blogg og skemmtileg síða. Hinn linkurinn er neðar í fótbolta og fréttalinkunum og tengill í mjög skemmtilegan tippleik sem þessi sami Maggi stendur fyrir á netinu. Nú er að byrja nýtt tímabil á morgunn eða hinn held ég svo það er um að gera að skrá sig. Látið mig endilega vita ef ykkur finnst ég eiga að linka á ykkur með því að skrifa komment við þessa færslu.

Boltinn
Mínir menn kláruðu þetta í gær. Gott að sjá Rossi koma inn og standa sig. Ég held þessi strákur verði nýjasta stjarnan til að koma upp úr unglingastarfinu og slá í gegn með aðalliðinu. Sá mörk úr æfingaleik gegn Peterborough í sumar. Þar átti þessi leikur frábæra takta, skoraði glæsilegt mark og lagði upp annað fyrir Ruud eftir glæsilegan einleik. Það er líka ánægjulegt að einhver annar en Ruud og Rooney skori mörk í deildinni. United hefur skorað 13 mörk í deildinnil, Ruud hefur skorað 8, Rooney 4 og Rossi 1. Vonandi fer þetta að detta inn hjá öðrum, Giggs og Scholes eru nú vanir að skora sitthvor 5-10 og fleiri leikmenn skora alltaf eitt eða tvö.
Þegar ég skrifaði hérna síðast var hálfleikur í leikjum gærdagsins og Chelsea var undir en Arsenal að gera jafntefli. Chelseamenn lifnuðu við í seinni hálfleik eftir að Eiður kom inn á en Arsenal tapaði og hefur því aðeins náð 1 stigi af 12 mögulegum á útivelli í vetur. Einhvern veginn á ég miklu auðveldara með að sætta mig við velgengni Chelsea en Arsenal. Kannski er það vegna Eiðs eða þá vegna þess að tengdafjölskyldan eins og hún leggur sig heldur með Arsenal sem og pabbi og Halldór bróðir hans. Þessir Arsenalaðdáendur eru svo hrikalega montnir þegar vel gengur, næstum jafnslæmir og KR-ingar.
En mínir menn eru að standa sig sæmilega í keppninni um annað sætið á Englandi og fara í það minnsta betur af stað en Arsenal sem líklega verða þeirra stærsti keppinautur. Kannski hefur brotthvarf Vieira dregið úr þeim vígtennurnar svo þeir verða slakir í vetur. Vona það. Síðan er líka gaman að sjá hvað Liverpool hefur farið illa af stað. Skora lítið og gera mörg jafntefli. Tóku reyndar stig af mínum mönnum á Anfield en við tökum þá í bakaríið á heimavelli eftir áramótin.

Aðsóknin að glæðast
Gamlir aðdáendur eru greinilega farnir að uppgötva endurholdgun Ljós-Gíslans því teljarinn telur 10-15 manns á dag og það fer vaxandi. Látið endilega álit ykkar í ljós á kommentakerfinu. Það er gaman að heyra hvað ykkur finnst.

Kraftlaus Orkuveita
Ég átti svolítið bágt með mig í morgunn niðri í Laugum. Þannig er því háttað að Orkuveita Reykjavíkur hefur gefið einhvern drykkjarbrunn þarna í lyftingasalinn sem er svo sem góðra gjalda vert. Hann er hins vegar svo máttlaus að bunan drífur varla upp úr rörinu. Endurspeglar algerlega máttleysið í stjórnun Orkuveitunnar enda eru Framsóknarmenn þar við stjórnvölinn. Hafið þið einhvern tíma spáð í hvað nafnið á Framsóknarflokknum er skelfilega mikið rangnefni. Sennilega mesti afturhaldsflokkurinn hér sl. 100 ár.

Heilsuátak
Ég er byrjaður í heljarinnar heilsuátaki. Það var eiginlega þrennt sem rak mig af stað. Í fyrsta lagi er ég alls ekki í nógu góðu formi, í öðru lagi hefur Edda verið ófeimin við að benda mér á björgunarhringinn minn og í þriðja lagi hefur öxlin verið í hraðri afturför sl. vikur og það varð að lokum til þess að ég dreif mig í Laugar. Keypti mér hálfs árs kort á þriðjudag og er búinn að fara á hverjum degi síðan. Stefnan er að lyfta mánudaga, miðvikudaga og föstudaga með Sverri og Kobba félögum mínum. Síðan ætla ég helst að fara tvo til þrjá aðra daga vikunnar að hlaupa til að þjálfa þolið og brenna fitu. Síðan er ég í fótbolta þrisvar í viku svo að meðaltali ætti ég að fara 7-8x í viku í einhverja hreyfingu þannig að ég ætti að vera snöggur að koma mér í form. Ég leyfi ykkur að fylgjast með hvernig gengur.

Boltinn
Mínir menn voru rétt í þessu að skora fyrsta mark leiksins gegn Sunderland og mér er nokkuð sama þó það verði það síðasta einnig. Væri fínt að ná 3 stigum á útivelli í dag. Það var hinn frábæri Wayne Rooney sem sett'ann. Hann er allur að koma til og hefur staðið sig vel í haust þrátt fyrir að vera á köflum helst til óstýrilátur.
Síðan er Chelsea undir í hálfleik gegn Bolton og Arsenal að gera jafntefli við West Brom á útivelli. Það væri ekki leiðinlegt ef það yrðu lyktir þeirra leikja. Sjáum hvað setur.

Góð heimsókn
Mér finnst rosalega gaman að heimsækja fólk en jafnvel enn meira gaman að fá vini í heimsókn til mín. Í gærkvöldi litu góðir vinir við og það var meiriháttar notaleg kvöldstund, sátum og spjölluðum langt fram yfir miðnætti. Í kvöld ætlum við skötuhjúin síðan að grilla humar á teini og kíkja svo aðeins til vina okkar í netta konnastemmingu og rólegheit. Ég hlakka heilmikið til.

Landsfundurinn
Hef því miður ekki haft almennileg tök á því að fylgjast með gangi mála þar en sá inntakið í ræðu Davíðs og fannst hann skemmtilega herskár að skilnaði. Það er greinilega heilmikil orka eftir í kallinum og ég er að mörgu leyti sammála því sem hann sagði þótt hann hafi á köflum verið fullherskár í tali. Fyrir utan þetta hef ég því miður lítið fylgst með og ætla því ekkert að vera að gaspra hér út í loftið.

Ógeðslegt mál
Ég fékk nú bara gæsahúð þegar ég las tímarit Morgunblaðsins um helgina. Greinin um systurnar fimm sem voru misnotaðar á hinn hroðalegasta hátt sem maður getur hugsað sér. Það gerist ekki mikið ógeðslegra en að selja aðgang að kynlífi með börnunum sínum. Það sem mér finnst standa upp úr er hins vegar það hve ótrúlega margt getur farið úrskeiðis í svona málum. Það er ljóst að yfirvöld hafa á öllum stigum misstigið sig á einn eða annan hátt í þessu máli og grátlegast er að lesa dóm Hæstaréttar frá 1978 þar sem maðurinn er sýknaður þrátt fyrir mjög knýjandi gögn um hið gagnstæða og framburð félaga hans í brotinu.

Það hefur hins vegar komið mér á óvart hvað sumir sem ábyrgir voru fyrir velferð barna í Hafnarfirði á þessum tíma, eru óhræddir við að axla sína ábyrgð og viðurkenna mistök. Ég held hins vegar miðað við umfjöllunina að það sé ljóst að árangur í svona málum næst aldrei nema með samstarfi við fórnarlömb hins kærða og þá er auðvitað grundvallaratriði að meint fórnarlömb séu óhrædd að tala sínu máli. Ekki er líklegt að það takist nema löggæsluaðilar fái rýmri heimildir til að halda meintum gerendum frá hugsanlegum fórnarlömbum. Það er náttúrlega ekki vænlegt til árangurs í máli sem tekur kannski vikur eða mánuði að rannsaka að þolendur og gerendur búi í sama húsi. Ég held að þetta sé eitt af grundvallarmistökunum varðandi þetta mál. Það verður að aðskilja fórnarlömb og meinta gerendur á meðan á rannsókn málsins stendur, í þessu tilfelli, fjarlægja börnin af heimilinu.

Ég verð nú samt að segja að mér finnst varhugavert að skella allri skuldinni á yfirvöld í þessu máli. Mér finnst t.d. að eldri systurnar verði að axla þá ábyrgð að hafa ekki kært föðurinn eftir að þær yfirgáfu heimilið og komið þannig í veg fyrir að yngri systurnar hlytu sömu örlög. Móðirin sem verður vitni að þessu öllu saman ber auðvitað líka ákveðna ábyrgð þó hún sé raunverulega fórnarlamb líka. Það stendur í lögum að þeim, sem grunar að börn séu beitt ofbeldi eða óhóflegu valdi, beri að tilkynna slíkt til barnaverndaryfirvalda. Gerðu þær það? Ég veit það ekki?

Svo eru alltaf þeir sem skýla sér á bakvið þá afsökun að það hafi verið búið að tilkynna þetta þegar þeir fréttu af þessu en svo hefði bara ekkert gerst. Það er léleg afsökun. Hverjum borgara ber að tilkynna hvert það tilfelli vanrækslu eða ofbeldis gegn barni sem hann verður vitni að. Það er jafnvel nóg að um grun sé að ræða. Skv. barnaverndarlögum ber okkur skylda til að tilkynna slíkt. Það er ljóst að margir hafi brugðist þessari skyldu sinni í þessu máli; móðir stúlknanna, eldri systurnar, nágrannar, lögregla, kennarar, skólahjúkrunarfræðingar, vinir, fjölskyldur foreldranna og fleiri. Síðan hafa yfirvöld auðvitað brugðist í þau skipti sem þetta var tilkynnt.

En þegar öllu er á botninn hvolft er þetta eitt ógeðslegasta mál sem komið hefur upp á yfirborðið hér svo ég muni og í sjálfselsku sinni óskar maður þess næstum að hafa ekki lesið greinina til enda. En það mikilvæga við þetta skref þeirra systra er að umræðan fer í gang og vonandi sjáum við fleiri tilkynningar um meint ofbeldi gegn börnum í framtíðinni. Öðruvísi náum við ekki árangri. Það er ekki nóg að standa á Austurvelli með skrýtna húfu og mótmælaspjald og heimta harðari refsingar og minni sönnunarbyrði en líta svo undan þegar nágranninn tuskar barnið sitt til út í búð. Þið getið rétt ímyndað ykkur hvað gerist í laumi hjá fólki sem lemur börnin sín á almannafæri. Árangurinn næst ef allir leggjast á eitt um að vera ábyrgir og tilkynna í hvert skipti sem þeir sjá börn beitt ofbeldi.

Nokkrar góðar ræmur!!
Ég er búinn að vera duglegur að glápa á skjáinn um helgina. Eins og sjá má í fyrri færslu var föstudaguskvöldið lagt undir spil en á laugardaginn tókum við skötuhjúin því rólega og horfðum (lesist: ég horfði á meðan Edda svaf) á tvær misgóðar myndir á RÚV. Fyrst horfði ég á The Human Stain með Anthony Hopkins, Nicole Kidman, Gary Sinise, Ed Harris og fleirum. Sá þessa mynd aldrei í bíó eins og ég ætlaði mér og var sannast sagna búinn að steingleyma henni en stundum borgar sig að horfa á RÚV. Í stuttu máli fannst mér hún hreint afbragð. Frábær leikur í mynd sem tekur á mikilvægum málefnum dagsins í dag og raunar sl. 50 ára. Hopkins fer á kostum og hin eru mjög góð líka. Mæli með henni. Á eftir henni kom svo ótrúlega skelfileg mynd með Seann William Scott sem heitir Stark Raving Mad. Þvílík endaleysa en það má þó segja að plottið var ágætt. Mér hefur alltaf þótt He Said/She Said formið vont en það er þegar persónur í myndinni tala við myndavélina og þar með áhorfandann á meðan bakrunnurinn stendur kyrr. Afspyrnu slök leið til að koma söguþræðinum og boðskapnum á framfæri. Lou Diamond Phillips lék líka í henni en það er nánast ávísun á slaka mynd. Ég hef nú svarið þess dýran eið að sjá aldrei mynd þar sem hann leikur stórt hlutverk aftur.
Á sunnudagskvöldið fór ég síðan á ræmuleigu og tók tvær ágætar myndir. Fyrst sá ég Beyond the Sea með Kevin Spacey og fleirum en hún fjallar um ævi dægurlagasöngvarans og frekjudallsins Bobby Darin. Spacey fer á kostum í hlutverki þessa snillings sem gat sungið eins og engill þrátt fyrir alvarlegan hjartasjúkdóm. Mæli með henni fyrir aðdáendur góðrar tónlistar, sérstaklega ef þið hafið gaman af djasstónlist. Hin myndin er Something's Gotta Give með Jack Nicholson og Diane Keaton ásamt fleirum. Þetta er ágætis feelgood mynd sem þau tvö halda uppi með hreint ágætum leik. Ekki kannski beinlínis snilldarverk en alveg þess virði að taka sem gamla ef ekkert kemur upp í hugann.

Boltinn
Unglingalandsliðið tók Svía í kennslustund áðan en ég efast um að það sé fyrirboði um gott gengi aðallandsliðsins gegn frændum okkar á morgunn. Ég er svolítið hræddur um að þeir verði gernaðir en maður veit auðvitað aldrei. Það verður gaman að sjá hvernig vængbrotið lið okkar stendur sig en ég hef trú á að þeir muni tapa stórt. Mín spá er 5-1 fyrir Svía. Sjáum til.

Prófkjörið
Nú er framboðsfrestur útrunninn fyrir prófkjör Sjálfstæðisflokksins í Reykjavík og ég var svolítið hissa að sjá ekki fleiri frambærilega frambjóðendur í þessum slag. Það verður nú frekar auðvelt að raða á þennan lista held ég en við skulum sjá til hvernig menn standa sig áður en ég legg seðilinn í kassann. Kannski eiga einhverjir lítt þekktir sterka innkomu í umræðuna.

Sameiningarfloppið
Ég verð að taka undir með þeim sem gagnrýna þetta sameiningarrugl allt saman. Það sér auðvitað hver maður í hendi sér að það getur skilað meiriháttar hagræðingu fyrir sveitarfélög að sameinast í stærri einingar en sú hagræðing er löngu horfin út í veður og vind með endalausri fjársóun Félagsmálaráðuneytisins við að halda síendurteknar kosningar í hreppum sem margoft hafa sýnt nær einróma andstöðu gegn sameiningu. Mér finnst mál að linni og fólk fái að hafa sjálft að því frumkvæði að sameinast. Það er kannski rétt að hafa sið Englendinga og setja lög sem skikka íbúa hreppa sem ekki vilja sameinast til að gifta börn sín börnum úr öðrum nálægum hreppum sem hafa neitað að sameinast og búa svo í þeim þriðja. Eftir u.þ.b. 80 ár verða þá allir meira og minna ættaðir frá öllum þessum hreppum og geta þá kannski sætt sig við sameiningu. Svo væri hægt að veita t.d. bæjarstjóranum á Akureyri "prima nocte" í öllum litlu hreppunum. Það mundi kannski verða til þess að menn mundu sameinast um það á Eyjafjarðarsvæðinu að koma honum frá völdum og þá er samvinnan komin í gang og hægt að notfæra sér meðbyrinn til að sameina allt heila klabbið. Hvað segið þið um þetta?

Súsanna segir loks eitthvað af viti
Mæli með að þið lesið bakþanka Súsönnu Svavarsdóttur á baksíðu Fréttablaðsins í gær. Ég held þetta sé í fyrsta sinn sem ég er sammála henni. Ég er nú samt þeirrar skoðunar ólíkt mörgum að óbreyttir lögreglumenn eigi ekki að vera sýnilega vopnaðir skotvopnum enn sem komið er. Mér segir svo hugur að ástæðan fyrir hægri skotvopnaþróun hins almenna krimma hér á landi sé einmitt sú að lögreglan er lítt vopnuð. Sennilega á þetta eftir að breytast næstu árin en ég held að lögreglan ætti að fara hægt í sakirnar með að bera skotvopn dags daglega. Þessi íhaldsemi byggist þó algerlega á því að lögreglan búi yfir sterkri, vel vopnaðri sérsveit sem er ávallt í viðbragðsstöðu ef einhver klikkhaus ákveður að ógna lögreglumönnum eða samborgurum sínum með hættulegum vopnum. Því held ég að auknar fjárveitingar til sérsveitarinnar séu hið besta mál.

Pólland-Ísland
Ég er ánægður með hvað Íslendingar stóðu uppi í hárinu á Pólverjum þrátt fyrir að þeir hafi tapað að lokum. Það er gott að vita til þess að menn hafi kjark til að sækja á útivelli gegn sterkari andstæðingum. Menn ná aldrei framúrskarandi árangri nema þeir standi frammi fyrir erfiðum verkefnum af reisn, leggi sig alla fram og reyni að sigrast á líkunum. Þannig getur maður alltaf sagt að maður hafi gert sitt besta og aðeins betur en það ef það er það sem þarf. (skelfilegur texti handboltalandsliðsins fyrir B-keppnina forðum daga). Ég er líka ánægður með hvað þessir ungu strákar eru að koma sterkir upp. Kári Árnason og Hannes Sigurðsson ásamt Gunnari Heiðari Þorvaldssyni eru líklega efnilegustu landsliðsmennirnir okkar. Kannski er vonin um sæti á HM í nánustu framtíð ekki svo fjarlæg þegar við eigum svo marga efnilega stráka. Verst er þó hve margir þeirra eru að upplagi sóknarmenn. Við eigum núna a.m.k. fjóra mjög frambærilega framherja (Eið, Heiðar, Gunnar og Hannes) auk þess sem nokkrir ungir og upprennandi hafa samið við stór lið í Evrópu sl. misseri. Við eigum líka nokkra sæmilega miðjumenn og síðan eru auðvitað ágætis varnarmenn og frábær markvörður. Þetta er bara að verða nokkuð frambærilegt. Kannski maður fari að splæsa sér í íslenska landsliðsbúninginn.
Áfram Ísland

Víkingur í djúpum
Það er ekki gaman að vera Víkingsaðdáandi þessa dagana. Þjálfaramál meistaraflokks karla í upplausn eftir að Siggi Jóns sagði upp og menn eru greinilega alvarlega að spá í Loga Ólafsson eða Magnús Gylfason. Mér finnst nú frekar skrýtið að menn ætli að ráða tvo menn sem hefur mistekist svo rosalega sl. mánuði. Magnús stóð sig reyndar vel með Eyjamenn í fyrra og Logi færði Víkingum þeirra eina Íslandsmeistaratitil í fótbolta hingað til en báðir eru þeir á niðurleið. Ég vil helst sjá Eyjólf Sverrisson eða Þorvald Örlygsson í þessu. Svo væri líka gaman að reyna við Heimi Guðjónsson en hann er reyndar nýbúinn að skrifa undir samning við FH um að gerast aðstoðarþjálfari meistaraflokks ef ég man rétt. Sjáum hvað setur.
Síðan er hálft 2. flokksliðið komið í bann. Þar af einn í næstum 9 mánuði eftir að þeir veittust að dómara eftir að síðasta leik tímabilsins lauk. 6 leikmenn fengu rautt spjald eftir að venjulegum leiktíma lauk og 1 í leiknum. Sá áttundi var síðan kominn með 6 gul á tímabilinu og fær eins leiks bann vegna þess. Skammarlegt að menn láti dómara, þó þeir séu lélegir, fara svona hrikalega í sig. Skilst reyndar á þeim sem sáu leikinn að hann hafi verið skelfilegur en það afsakar ekki að hann sé sleginn eftir leik. Vonandi læra þessir strákar að hafa stjórn á sér í framtíðinni svo þeir geti hjálpað mínum mönnum að halda sæti sínu í úrvalsdeildinni að ári. Þar eigum við heima.

Heiðar og Þorgeir eiga greinilega góðar konur
Garðabæjargengið spilaði í gær Axis&Allies og stýrði Gunni og Hjölli öxulveldunum en ég, Heiðar og Þorgeir stýrðum "allies". Tvísýnt spil lengi vel en úrslitin réðust sennilega í fyrstu umferðunum þegar Þorgeir (USA) og Heiðar (UK) áttu við fáránlega fötlun á teningunum að etja. Þeir misstu nær allan flotann sinn í tveimur fyrstu umferðunum án þess að gera öxulveldunum teljandi skráveifu og það þýddi að ég stóð einn með Rússana í stríði við Japan og Þýskaland á meginlandinu. Uppbyggingin var síðan erfið og kom of seint og Hjölli náði af mér Moskvu í fimmtu umferð og þar með var spilið búið þrátt fyrir að París væri fallin í okkar hendur aftur. Þjóðverjar voru einfaldlega allt of sterkir til þess að eitthvað vit væri í að halda áfram. Gunni stýrði líka Japan af miklu öryggi og ég held að það hafi verið viturlegt af honum að rjúfa friðhelgi Rússlands eins snemma og hann gerði. Rússar hafa einfaldlega ekki bolmagn í að berjast á tveimur vígstöðvum í jafnvíðáttumiklu landi og þeir ráða yfir. Til þess eru fjárráðin of lítil. Ég komst reyndar í 40 framleiðslustig þegar best lét enda einbeittu Þjóðverjar sér að flotaorrustum á Atlantshafi fremur en á austurvígstöðvunum en þegar hann fékk frið á höfunum var hann einfaldlega of sterkur fyrir mig.
Frábært spil og niðurstaðan sú í ljósi fáránlegra óheppni Þorgeirs og Heiðars með teningana að þeir hljóti að eiga góðar konur.

Kommentakerfi
Búinn að setja upp kommentakerfi. Þá geta menn sagt skoðanir sínar á bullinu í mér.

Erfitt að vera sinn eiginn bensíntittur!
Mér hefur lengi fundist fyndið hvernig verslun með bensín fer fram. Liðið kemur á bensínstöðina og lætur bensíntittina vita að þeir vilji fá bensín fyrir 1500 kall t.d. Síðan dælir bensíntitturinn samviskusamlega og stoppar af fádæma öryggi í nákvæmlega 1500 kalli með sjö aukastöfum. Síðan andar hann léttar, strýkur stresssvitann af enninnu og setur dæluna aftur í slíðrið. Viðskiptavinurinn arkar inn og borgar - með korti. Eins og það skipti einhverju máli hvort það er 1498 eða 1503 kr sem færist á reikninginn.
Starf bensíntittana og okkar hinna sem dælum sjálf hefur hins vegar orðið að martröð eftir að bensínverð rauk upp úr öllu valdi. Maður rembist við að hitta á 1500 kallinn og þegar maður er kominn í 1493 reynir maður af veikum mætti að hitta í 1500 kallinn en allt kemur fyrir ekki. Ég held takanum inni í hálfa nanósekúndu og viti menn, reikningurinn stendur í 1607 krónum. Það er kraftur í Orkudælunum. Ég skelli dælunni í slíðrið, loka bensíntanknum og reyni af fremsta megni að halda haus. Sest svo inn í bílinn minn með svörtu rúðunum og þá opnast flóðgáttir tárabylgjunnar. Ég er misheppnaður bensíntittur!!!

Skrýtnar greinar
Ég hef gaman af að lesa greinar á pólítískum vefritum og oft á tíðum eru þær snilldarlegar. T.d. er www.andriki.is ein af mínum uppáhaldssíðum og þeir menn sem þar skrifa greinilega miklir spekúlantar. Ég get hins vegar ekki varist brosi þegar meðlimir fylkingar ungra sjálfstæðismanna birtir svona pistil á sinni vefsíðu. Hvað er málið? Mér finnst reyndar oft erfitt að átta mig á hvernig pistlarnir á Deiglunni tengjast pólítík. Þeir eru oft hnittnir og skemmtilegir aflestrar en oftar en ekki hafa þeir ekkert með pólítík að gera. Það er svolítið erfitt að taka svona félagsskap alvarlega.

Prison Break
Svili minn (kærasti mágkonunnar) er mikill áhugamaður um sjónvarp. Hann stundar það að nálgast sjónvarpsþætti sem ekki hafa verið teknir til sýninga hér og athuga hvort eitthvað sé varið í þá. Nú síðast uppgötvaði hann þessa þætti sem hafa nýlega verið teknir til sýninga í USA. Ég er búinn að sjá fyrstu 4 þættina og er orðinn hooked. Fjalla um bræður sem eru að skipuleggja flótta úr fangelsi. Sá yngri rændi banka til að láta dæma sig til betrunarvistar í sama fangelsi og bróðir hans bíður dauðadóms. Þetta gerði hann til að skipuleggja flótta í þeirri trú að stóri bróðir sé saklaus. Mikið plott og mikil spenna. Mæli með þeim.

Skítalaun
Sparnaður er skrýtinn. Laun hjá ófaglærðu starfsfólki í umönnunar- og uppeldisstörfum eru alveg skelfileg. Hátt hefur farið í fjölmiðlum hversu skelfileg laun ófaglært starfsfólk leikskóla hefur en ég hef jafnvel enn meiri áhyggjur af slíku starfsfólki á elli- og hjúkrunarheimilum. Eða ætti ég kannski að segja skorti á því starfsfólki. Nú er svo komið, segja mér fróðari menn, að tugir plássa á elliheimilum standi auð einfaldlega vegna þess að það er ekki til starfsfólk til að sinna því fólki sem annars gæti nýtt sér plássin. Í staðinn liggja sjúklingarnir sem gætu notið góðs af þessum tiltölulega ódýru plássum í rándýrum rúmum Háskólaspítalans og hreinlega drekka í sig framlög ríkisins til LSH. Það er nú einu sinni þannig að til að hægt sé að reka spítalann almennilega er algert grundvallaratriði að hægt sé að útskrifa þá sem leggjast inn. Auðvitað keppast læknar, hjúkrunarfólk og aðrir starfsmenn við að skila fólki aftur á sinn stað en það er nú einu sinni þannig að stundum er fólk einfaldlega ekki lengur í stakk búið fyrir fyrri vistarverur og þarf meiri þjónustu. Vegna skorts á henni liggur það hins vegar löngu tilbúið að útskrifast svo vikum skiptir á spítalanum. Dominoeffektin sér síðan til þess að ekki er hægt að kalla fólk inn til rannsókna og meðferðar á hættulegum eða hvimleiðum kvillum og það kemur fyrir að fólk deyr á biðlistum eftir inngripum sem hugsanlega gætu bjargað lífi þeirra um stund og veitt þeim dýrmætan tíma með ættingjum. Þessu hafa stjórnmálamenn gefið allt of lítinn gaum og það er nánast grátlegt hvað bæði stjórnarliðar og stjórnarandstaða hafa lítinn áhuga á heilbrigðismálum. Þessu þarf að breyta.
Það versta er þó að góðir menn innan spítalans hafa reynt að taka á þessum málum með því að setja kraft í það að eyða biðlistum og oftar en ekki hefur komið á daginn að stórfé sparast því þótt það kosti peninga að framkvæma inngripin eru áföllin sem sjúklingarnir geta orðið fyrir á meðan þeir bíða miklu kostnaðarsamari. Þessir hugsjónamenn eru síðan verðlaunaðir með því að yfirstjórn spítalans hirðir af þeim peningana sem þeir spara við næstu kostnaðaráætlun í stað þess að veita þeim í uppbyggingu þjónustunnar. Grátleg skammsýni. Stundum kostar peninga að spara svolítið.

Stuttbuxnadrengir
Það er voðalegt að fylgjast með hnignun ungliðahreyfingar sjálfstæðismanna. Maður heyrir varla bofs í þessum greyjum sem stýra þessu annað en eitthvað gelt um kosningasvindl og atkvæðasmölun. Svo virðist sem málefni skipti orðið engu í þessu og það sé bara nóg að vera svolítið "krútt", helst hafa ættarnafn, verður að hafa verið í versló og helst þar annað hvort formaður NFVÍ eða í ræðuliðinu. Svo er líka gott ef þér finnst gaman að gefa táningsstúlkum á lóðaríi nokkrar pitsusneiðar og kannski svolítinn bjór. Ég hef nú reynt að fylgjast með áherslum þeirra aumu manna sem hafa verið að belgja sig þarna og ég get ekki séð að það sé nein framúrskarandi hugmyndavinna eða nýstárlegar hugmyndir. Helst hefur þeim þótt við hæfi að gefa einhverjum kommum í útvarpshúsinu spil og kannski kerti í náttmyrkri hálfdauðs "menningarsjónvarps". Það er kannski þess vegna sem ekkert gerist þarnar við Efstaleiti, það eru örugglega allir að spila spilin sem Heimdellingar hafa gefið þeim.

Verst finnst mér þó þegar þeir sem bylja hæst í ungliðahreyfingunni ná kjöri á Alþingi. Þá þurfa þeir að fara í síðbuxur eins og ædolin þeirra og þá virðist sem allur vindur sé úr þeim. Það er eins og uppspretta hávaðans sé í kálfunum og gjafmildi hennar virðist í réttu hlutfalli við það magn lofts sem leikur um kálfana þeirra. Svo þegar síðbuxurnar hindra næðingin þá er bara allur vindur úr þeim og eru bara sáttir við að vera komnir á þing. Maður heyrir helst í þessum drengjum þegar Séð og Heyrt (en þó mestmegnis logið) slær upp fréttum að næturgamni þeirra með ólögráða unglingum eða einhverju þaðan af verra.

Er ekki kominn tími á að fá ferska vinda inn í pólítíkina, fá einhverja menn sem eru ekki myglaðir af langri fundarsetu hjá ungliðahreyfingunni þar sem frjóustu hugmyndirnar eru: "Kaupum útvegsspilið handa einhverjum sem er ekki kúl" eða "Pöntum pizzu". Er ekki kominn tími á að einhver af þessum mönnum standi við stóru orðin og geri eitthvað af viti. Hvurslags eiginlega dauðyflisflokkur er það þegar ekki nokkrum manni dettur í hug að bjóða sig fram til formanns nema krónprinsinum. Enginn virðist heldur þora í Þorgerði nema Kristján Júlíusson sem ég held að eigi ekki minnsta sjens í hana. Ég er ekki að segja að ég sé eitthvað mótfallinn þeim Þorgerði og Geir sem slíkum. Ég er bara mótfallinn rússneskum kosningum og mér finnst tímabært að einhver hræri svolítið upp í þessum flokki. Vatnið hefur staðið of lengi kyrrt og er orðið úldið. Nú er kominn tímí að einhver setji árarnar útbyrðis, gári vatnið aðeins, vaggi bátnum og komi svolítilli hreyfingu á málefnaumræðuna innan flokksins sem og út á við.

Ég hef orðið trú á að Gísli Marteinn geti gert góða hluti í borginni ef einhverjum tekst að koma svolítilli grimmd í hann. Ég mundi persónulega vilja sjá hann láta eins og hann gerir stundum í leikjum með Rögnunni. Verður alveg dýrvitlaus og berst eins og ljón, ýtir aðeins frá sér og lætur menn heyra það. Hvurslags eiginlega kosningabarátta er það þegar frambjóðendurnir keppast við að hlaða lofi á hvorn annan. Það er eins og þeir séu að reyna að fá kjósendur til að kjósa frekar mótframbjóðandann. Ég held reyndar að ég muni halda með Gísla Marteini. Ekki endilega vegna þess að hann sé einhver Messías heldur vegna þess að Vilhjálmur er orðinn of samdauna batteríinu öllu saman. Það þarf ungan mann sem er tilbúinn að gára vatnið aðeins. Hann þarf að vera skemmtilegur og með pólítíska sem og persónulega útgeislun. Hann þarf líka að vera svolítið grimmmur en þó rökfastur. Kurteis en þó harður í horn að taka. Gísli hefur flesta þessa kosti en eins og ég sagði áður þá finnst mér hann of linur. Ég vil sjá hann gagnrýna menn, ekki bara láta eins og allt sé í gúddí fíling í borgarstjórnarflokki sjálfstæðisflokksins. Það á ekkert allt að vera í gúddí fíling eftir svo langa fjarveru úr bílstjórasætinu.

Jæja!
Ég hef tekið þá afdrifaríku ákvörðun að þið hinir vitleysingarnir (þið eruð hér er það ekki?) getið ekki lifað án þess að vita af skoðunum mínum á mönnum og málefnum. Undanfarnar vikur hafa líka verið svo lygilegar í þjóðmálaumræðunni að það nær ekki nokkurri átt og þið hafið auðvitað velt upp þeirri augljósu spurningu hvað Ljós-Gíslanum finnst um málið.

Baugsmálið
Ég veit ekki hvar ég á eiginlega að byrja. Ég veit ekki einu sinni hvort ég á að byrja en almannaheill er í húfi svo það er kannski eins gott að láta flakka.
1.
Hvers vegna láta Baugsmenn svona ófriðlega í fjölmiðlum þrátt fyrir að vera vissir um eigið sakleysi. Gæti verið að þeir telji sig þurfa að þyrla ryki í augu almennings til að koma í veg fyrir að hann kynni sér almennilega einstaka þætti málsins og kæmist þannig að þeirri augljósu niðurstöðu að þeir séu í raun og veru ótýndir glæpamenn. Ég er sannfærður að Landsímadrengurinn mun verða þjófnaðarlegur smárindill við hliðina á þessum lortum.
2.
Hvaða heilvita maður sendir Jónínu Ben. viðkvæman tölvupóst. Ég mundi ekki einu sinni þora að senda henni fingurkoss af ótta við að Edda mundi lesa um það í Séð og Heyrt (en mestmegnis logið). Það er miklu betra að segja henni það bara augliti til auglitis því þá getur maður verið viss um að hún verður búin að gleyma því þegar rennur af henni (ef það gerist þá einhvern tíma).
3.
Þeir sem ríða brim alnetsins á hina merku síðu www.andriki.is hafa vafalaust lesið nýlega úttekt þeirra á því "andrúmslofti" sem vinstri menn telja að kærur J.G. Söllenberger (héðan í frá kallaður Sölli) hafi sprottið fram í. Í ljós kemur að hæst gullu gagnrýnisraddir á Baug í þeim stallsystkinum Ingibjörgu Sólbrúnu og Össuri Skarp á Alþingi um þær mundir sem kærurnar komu fram. Nú spyr ég mig: Væri ekki nær að gagnrýna þau fyrir að hvetja Sölla ekki til að kæra fremur en að gagnrýna Moggann fyrir aðstoð sýna við að koma kærunum á framfæri. Ekki það að ég vilji verja Styrmi greyið sem ég held að ætti að sjá sóma sinn í að víkja úr ritstjórn Moggans. Ef ekki fyrir afskipti sín af málinu í fæðingu þá fyrir fáránleg greinaskrif sín á undanförnum dögum. Maðurinn hefur misst allan trúverðugleika sem hlutlaus ritstjóri og á meðan hann situr í ritsjórn er ekki hægt að líta á Mbl. sem annað en opinbert málgagn uppkominna stuttbuxnadrengja.

Davíð laxtur
Mestu stórtíðindin hljóta nú samt að vera yfirvofandi brotthvarf Dabba kóngs úr brúnni hjá Sjálfstæðisflokknum. Það er náttúrlega sjónarsviptir af þeim gamla en persónulega fannst mér kominn tími á þetta. Hann er einkabarn sinnar eigin byltingar og hún hefur eins og byltinga er von og vísa gert heiðarlega tilraun til að leggja sér Dabba til munns. Hann var reyndar eitthvað tormeltur og hefur tekist að rymja nokkra smellna one-linera úr koki hinnar digru einkavæðingarbyltingar en nú er komið að því að honum verði kyngt niður í maga hins pólítíska gímalds og setjist að í Virkinu við Akraborgarbryggju. Einhverjum búkhljóðum held ég að við megum búast við og ekki kæmi mér á óvart þó byltingin fengi alvarlegar meltingartruflanir eftir brotthvarf svo mikils leiðtoga.

Ég vil persónulega þakka Davíð fyrir að hrinda í framkvæmd mörgum af þeim þjóðþrifamálum sem mörg okkar, er teljumst hægra megin á hrygg pólítíkurinnar, dreymdi um fyrir nokkrum árum en á einu sviði mér hugleiknu hefur honum ekki tekist að hrinda af stað bráðnauðsynlegri einkavæðingarbylgju og það er í heilbrigðisgeiranum. Kannski tekst Geiranum betur upp í þeim efnum. Davíð hefur samt staðið sig vel og ég held að hann eigi líka eftir að standa sig vel í Seðlabankanum. Ég meina Steingrímur Hermannsson kláraði þetta for kræing ád lád!!!! Ég var reyndar alveg steinhissa að Guttormur Húsdýragarðsnaut skildi ekki erfa stöðuna hans en hann var víst full svona þver skilst mér á kunnugum.

Ég geri ráð fyrir því að Davíð muni einbeita sér að því að veiða lax á kostnað okkar skattborgarana undir því yfirskini að það sé mikilvægt fyrir gengisþróun og vaxtastýringu. Verði honum að góðu. Vona að hann veiði vel.

Tökum nú upp léttara hjal!!
Boltinn hefur alltaf verið snar þáttur í skrifum mínum hér og mun það ekki breytast. Ég er hundóánægður með mína menn þessa dagana en það voru klár batamerki á leik liðsins um helgina. Rúðan er líka komin í gang og finngálknið unga Wayne Rooney er líka að standa sig. Park er líka farinn að finna sig eins og ég bjóst reyndar við og það var meiriháttar að sjá hvað hann var ógnandi um helgina. Áfram MUFC.!!!

Drykkja, matur, hestar og bíó
Helgin var góð. Á föstudag átti ég góða stund í Hólmgarðinum með gömlum félögum úr menntó. Serbinn, Króatinn og Kobbi fruma kíktu við og nokkrum bjórum var rennt niður. Notaleg kvöldstund og ég fór lúinn að sofa.
Á laugardag fórum við Edda í bæinn eftir að hafa sofið út. Um kvöldið fór ég svo með Eddu á Hótel Óðinsvé. Við fengum ljúffenga máltíð sem markaði tímamót. Við vorum bæði í fyrsta skipti á ævinni að panta okkur sjávarfang á veitingastað sem bíður upp á annað. Ég fékk mér dýrindis skötusel með humarhala og einhverju hrísgrjónadrasli. Mjög gott. Edda fékk sér pönnusteikta lúðu sem var ágæt en ekki eins góð og hjá mömmu. Í það heila notaleg kvöldstund sem endaði hjá Svenna mág og Kötu svil í nettu spjalli.
Á sunnudaginn var svo hestaleiðangur. Þurfti að sækja hest í aðgerð fyrir Nonna bróður og fara svo með Sindra hennar Eddu og annan hest frá pabba í tamningu. Okkur feðgunum varð ekki skotaskuld úr þessu og ég var kominn heim nógu tímanlega til að sjá GOAL! í bíó kl. 20 í Kringlubíó. Ágætis fílgúd mynd en ég held að Óskar frændi muni ekki slefa yfir þessari. Góð mynd fyrir fótboltaáhugamenn.

Læt þetta duga í bili, nógu er kombakkið orðið kröftugt. Reyni að vera duglegri næstu daga og vikur og mánuði og ár.

Shitturinn titturinn!
Hef ekki bloggað í 7 mánuði eða meira. Spurning hvort maður hættir þessu bara eða reynir aftur. A.m.k. finnst mér ástæða til að minnast á uppgötvun Fréttablaðsins í dag á því að Elísabet Englandsdrottning heitir ekkert Elísabet lengur heldur mun hún hlýða nafninu Margrét um þessar mundir. Þvílíkt sorp.

Kerry tapaði
Nú er ljóst að við verðum í slagtogi við einn nafntogaðasta stríðsherra samtímans næstu fjögur árin. Til hamingju með það Íslendingar. Mér finnst samt tvennt alveg hræðilega sorglegt í umræðunni hér heima. Í fyrsta lagi er það hin ótrúlega afneitun sjálfstæðis- og framsóknarmanna, jafnt ungra sem aldraðra, í sambandi við Bush. Maður heyrir þetta fólk reyna af veikum reyna að sannfæra okkur hin um að Bush sé bara nokkuð vænn drengur með eðlilegt gildismat á mannlegri tilveru. Þeir styðja hraustlega við bakið á manni sem er á móti réttindabaráttu samkynhneigðra, vill banna fóstureyðingar og er tilbúinn að rústa alþjóðlegu viðskiptaumhverfi til þess eins að vinna eitt fylki í kosningunum (setti innflutningstolla á stál til að ná hylli kjósenda í Pennsylvaniu - það mistókst). Bush er og verður alvarlega veruleikafirrtur leiðtogi sem mun seint fallast á þau sjónarmið sem ráða ríkjum á vesturlöndum í sambandi við almenn mannréttindi.
Á hinn bóginn eru allir gömlu kommarnir í Samfylkingunni og Vinstri grænum að vegsama hinn drepleiðinlega og óspennandi John Kerry sem er nú lítið skárri kostur. Maðurinn stendur svo langt hægra megin við hægrimenn á Íslandi að þeir sjá ekki einu sinni línuna sem skilur þá að. Eða eins og Jói í vinum sagði: Línan er þeim punktur. Ekki get ég séð að það skipti meginmáli hvor þessara bjálfa stjórni herveldinu útbólgna USA. Eini kosturinn við að fá Kerry í stólinn hefði verið að hægja á yfirgangi hinna valdgráðugu í vestri.
Ég veit samt ekki hverju menn búast við af þjóðfélagi sem byggt er á veikum grunni ofbeldis og úrkynjunar og haldið gangandi á hverri stórstyrjöldinni á fætur annarri, ef ekki utan landsteinanna þá með drápum á hvorum öðrum.
Ég tek hins vegar fram að ég er sammála kettinum þegar hann segir að Bandaríkin eru margbreytileg og hvert fylki er raunar eins og ríki í sjálfu sér. Raunverulega eru þau ríkjabandalag og munur milli ríkja er gífurlegur.