Kollgátan!!
Lið læknadeildar blizzaði í gegnum Sæmund Borghylting og félaga þrátt fyrir að Óli Njáll hafi haft í frammi ástarjátningar til hans á sínu annars leiðinlega bloggi. Í þetta sinn ákváðum við Snorri að hjálpa Eyjólfi pínulítið og höfðum okkur mun meira í frammi. Við erum bara eins og jaxlarnir í boltanum. Látum ekki í okkur heyra nema þörf sé á. Lið raunvísindadeildar gekk sneypt frá keppni og verður Sæmundur enn um sinn að bíða bikarsins sem hann á sannarlega skilinn. Einnig tel ég rétt að leiðrétta misfærslu Óla Njáls að heimspekideild var aldrei yfir 25-18 eins og Óli Njáll lýsir. Held ég raunar að munurinn hafi mestur verið 25-20 um miðbik bjölluspurninga. Í lok þeirra var staðan síðan orðin 25-24 eins og áður sagði og svo tókum við vísbendingaspurningarnar.

Blogg spurningaliðsmanna
Hafið þið tekið eftir að í bloggi sínu reyna fornir spurningaliðsmenn alltaf að koma sínum leiðinlegu námsgreinum á framfæri. Ekki dettur mér í hug að fjalla um hypospadiur og anemiur í mínu spjalli. Mér dettur ekki í hug að nokkur maður nenni að lesa hugleiðingar mínar um þetta enda væri það þá líklega í læknisfræði og mundi frekar vilja leita í merkilegri heimildir en Ljós-Gíslann. Ég held raunar að þetta byggist einfaldlega á því að þeir eiga sér enginn almenn áhugamál greyin, heldur eyða öllum sínum stundum í námsefnið. Það er m.a.s. mun skemmtilegra að lesa leiðinlegu SUSara bloggin en þetta bullshit. Mér finnst lágmarkskurteisi hjá þessum drengjum að taka upp hátterni Viðars sem hefur fyrirsagnir. Maður getur því bara hlaupið yfir klassíska hornið en þarf ekki að átta sig með æluna í hálsinum eftir að hafa lesið hálft bloggið. Ekki svo að skilja að ég hafi ekki gaman af klassískri tónlist - mér finnst bara leiðinlegt og tilgangslaust að ræða og/eða skrifa um tónlist. Ég vil bara hlusta og mynda mér mínar eigin skoðanir.

Klassísk tónlist
Hafið þið tekið eftir hvað liðið sem einskorðar sig við klassíska tónlist er oft fordómafullt gagnvart tónlistarsmekk annarra. Það gengur jafnvel svo langt að kalla vinsælt popp, rusl. Yfirleitt eru þetta vinstrisinnaðir menn sem ekki trúa á lögmál markaðarins. Hins finnst mér liggja í hlutarins eðli að vinsældir hljóta að vera besti mælikvarðinn á bestu tónlistina. Það er hægt að skeggræða um tónfræði og útsetningar og allt þetta kjaftæði sem menn tala um í sambandi við tónlist en þegar allt kemur til alls hlýtur það að vera meirihlutinn sem hefur rétt fyrir sér. Þá segja klassikerarnir að þetta sé lið sem ekki hefur vit á tónlist. Málið er bara það að tónlist er bara eins og matur, drykkur, húsgögn og fl. sem við notum í daglegu lífi - þetta snýst bara um smekk fólks. Það er ekki hægt að hafa rangan smekk - bara öðruvísi smekk!!

Leaves
Þvert á komment mín hérna áðan langar mér að benda tryggum lesendum á hreint frábæran geisladisk sem ég hef fjárfest í. Þetta er diskurinn Breathe með íslensku hljómsveitinni Leaves. Mjög góður diskur sem er svona blanda af Coldplay og Travis með smá Sigur Rósar-sósu yfir. Hann er búinn að vera í spilaranum síðan ég kom heim og verður betri með hverri hlustun. Bendi sérstaklega á fyrstu 3 lögin og síðan það síðasta (nr. 11 held ég). Síðan er auðvitað Race sem hefur verið spilað mikið á PoppTíví. Snilldardiskur sem fær 4,5 af 5 mögulegum í einkunn hjá mér. Frádrátturinn er vegna þess að þetta er ekki mjög original lagasmíðar en hins vegar finnst mér hljóðfæraleikur og söngur til fyrirmyndar. Svo eru þeir líka svo góðir í fótbolta.