Húsaveiðar
Við fengum húsið sem við vorum svo hrifin af. Það er 133 fm raðhús í Bærum með bílskúr og æðislegum sólríkum garði. Við erum þvílíkt ánægð með þetta allt saman. Það besta er að aukaherbergið er mjög stórt þannig að fólk þarf ekki að vera hrætt við að koma í heimsókn. Setjum inn myndir á síðuna hennar Hildar Vöku þegar við erum flutt inn.
Pólítík
Ný ríkisstjórn tekur aldeilis til hendinni. Búið að reka mann og annan strax í fyrstu vikunni og seðlabankastjórnin á leiðinni út. Ég get ekki sagt að ég sé beinlínis hissa eða ósáttur við ráðstöfunina en það verður forvitnilegt að sjá hvaða áhrif það hefur út í þjóðfélagið. Fyrstu skoðanakannanir sýna að þjóðin er ekki viss um nýju stjórnina - Sjálfstæðisflokkurinn er aftur orðinn stærstur og ef mér skjátlast ekki mun hann bara auka fylgi sitt á komandi mánuðum. Ekki sé ég fyrir mér að auðvelt verði að kjósa nokkurn af gömlu flokkunum nema með mikilli endurnýjun í mannskap.
Boltinn
Úrslitin um helgina voru mér að skapi. Ég hef meiri áhyggjur af Chelsea í vor en Liverpool og því er ég sáttur við sigur drengjanna frá Merseyside. Það er fínt að toppliðin tapi stigum á móti hvoru öðru. Best hefði auðvitað verið jafntefli en það var skárra að poolararnir sigruðu því þeir hafa sögu um að springa á limminu en Chelsea er yfirleitt sterkt seinni part tímabils.
1 ummæli:
flott!!
við pöntum hér með gestaherbergið í ágúst.... eigum aðeins eftir að útfæra það betur í samráði við ykkur auðvitað :). Verðum í bandi.
Eva og Gunni
Skrifa ummæli